Idi lawas ti Oktubre 29, 2012, dakkel ti bimmabaan ti bilang dagiti pammapatay, panangdarup, ken panangholdap iti New York City no idilig iti isu met la a lawas idi 2011. Apay? Gapu iti nagpigsa a Bagyo a Sandy a nangdadael iti East Coast ti United States a nagresulta iti pannakapukaw ti koriente iti adu a lugar. “Kalpasan ti maysa a natural a kalamidad wenno nasaknap a didigra kas [iti yaatake dagiti terorista idi Septiembre 11, 2001], nadlawmi a bumaba ti bilang dagiti kadawyan a krimen,” kuna ti pannakangiwat ti New York Police Department a ni Paul Browne. Ngem immadu ti bilang dagiti nauli wenno nastrek ti pagtaenganda a din nagsiddaawan ni Browne. “Adu ngamin a lugar ti awanan iti silaw,” kinunana.

Madanagan dagiti sientista nga agpeggad ti natural nga ekolohia ti Antarctica gapu iti umad-adu a kita ti mula manipud kadagiti sabali a kontinente a naipan sadiay. Kada tawen, agarup pinullo a ribu ti turista iti Antarctica. Di napupuotan a nakaitugot ti tunggal maysa iti average a 9.5 a bukel a masansan a nakaselsel kadagiti sapatos wenno bagaheda. Adu a kita ti saan a neytib a mula ti nasarakanen iti Western Antarctic Peninsula.

Maysa nga 83 anyos a baket ti kaunaan a pasiente a nakabilan iti artipisial a titanium a pangal a naaramid babaen iti 3-D laser printer. Nadadael ti pangalna gapu iti impeksion iti tulang. Ngem normal itan ti pannangan, panaganges, ken panagsaona. Pinagtitipon ken pinagtutuon ti laser printer dagiti partikulo ti titanium tapno maaramid manen ti pangal ti baket sa naikabil babaen iti operasion.

Iti makatawen a pannakaiparit ti panagsigarilio kadagiti pagtrabahuan iti Germany, bimmaba iti 13.3% dagiti naospital gapu iti angina pectoris ken 8.6% iti atake iti puso ti maysa a grupo a naobserbaran.