“Ti kadaanan a serpiente, daydiay naawagan iti Diablo ken Satanas, [ket] mangyaw-awan iti intero a mapagnaedan a daga.”—Apocalipsis 12:9.

TI KUNA TI TATTAO

Mamati ti dadduma a ni Satanas a Diablo ket saan a maysa a persona no di ket basta di makita a dakes a galad nga adda iti puso ti tunggal tao.

TI KUNA TI BIBLIA

Ni Satanas ket pudpudno a persona. Isu ket maysa a rebelde nga anghel ken espiritu a parsua a bumusbusor iti Dios. Kuna ti Biblia a ni Satanas “ti agturay iti daytoy a lubong.” (Juan 12:31) Agus-usar kadagiti “ulbod a pagilasinan” ken “panangallilaw” tapno maibanagna dagiti panggepna.—2 Tesalonica 2:9, 10.

Nailanad iti Biblia ti panagsarita ni Satanas ken ti Dios idiay langit. Yantangay ti Dios nakisarita idi ken Satanas, ni Satanas ngarud ket saan a simbolo ti kinadakes agsipud ta perpekto ti Dios ken awan ti kinadakes kenkuana. (Deuteronomio 32:4; Job 2:1-6) Nalawag a ni Satanas ket pudpudno a persona ken saan a basta simbolo ti kinadakes.

APAY A PAKASEKNAM?

Kayat ni Satanas a patiem nga isu ket saan a pudpudno a persona. Umasping dagiti rasonna iti maysa a kriminal a mangilemlemmeng iti kinasiasinona tapno maitultuloyna ti agaramid iti dakes a di madmadlaw. Tapno masalaknibam ti bagim manipud ken Satanas, masapul a patiem nga umuna nga isu ket sibibiag a persona.

“Asi pay ti daga . . . agsipud ta ti Diablo immulog kadakayo.”—Apocalipsis 12:12.

TI KUNA TI TATTAO

Adu ti mamati nga agnanaed ni Satanas iti umap-apuy nga impierno iti uneg ti daga. Kuna met ti dadduma nga isu ket adda iti uneg dagiti dakes a tattao.

TI KUNA TI BIBLIA

Ni Satanas ket maysa nga espiritu a parsua isu a di makita ti lugar a pagnanaedanna. Adda idi tiempo a napalubosan a mapan iti pagnanaedan ti Dios ken dagiti matalek nga anghel. (Job 1:6) Ngem ita, napaksiaten iti saklang ti Dios ken iti laengen aglawlaw ti daga ti naipalubos a pagnaedanna a kadua ti dadduma pay a dakes nga espiritu a parsua.—Apocalipsis 12:12.

Kaipapanan kadi dayta nga agnanaed ni Satanas iti maysa nga espesipiko a lugar ditoy daga? Kas pagarigan, mabalin a nabasam a ti nagkauna a siudad ti Pergamo ket nakuna a “pagnanaedan ni Satanas.” (Apocalipsis 2:13) Kinapudnona, dagita a sasao tukoyenna a nasaknap sadiay ti panagdayaw ken Satanas. Awan ti espesipiko a lugar ditoy daga a pagnanaedan ni Satanas. Imbes ketdi, kuna ti Biblia a kukuana ti “amin a pagarian ti mapagnaedan a daga.”—Lucas 4:5, 6.

“Ti intero a lubong adda iti pannakabalin daydiay nadangkes.”—1 Juan 5:19.

TI KUNA TI BIBLIA

Kaaduan iti sangatauan ti agpapaibuyog iti mangiwawa nga impluensia ni Satanas isu a naipasidongda iti panangkontrolna. (2 Corinto 11:14) Dayta ti mangilawlawag no apay a di kabaelan ti tattao a pasayaaten dagiti kasasaad ti lubong.

Nailanad met iti Biblia dagiti nakarkaro a kasasaad, a ni Satanas ken ti dadduma pay a rebelde nga anghel, kinontrol ken dinangranda dagiti tattao.—Mateo 12:22; 17:15-18; Marcos 5:2-5.

TI MABALINMO NGA ARAMIDEN

Di rumbeng a pagbutngam ti pannakabalin ni Satanas. Tapno dinaka maimpluensiaan wenno makontrol, masapul nga ammuem no kasano nga im-impluensiaanna dagiti tattao. Iti kasta, ‘saanka nga ignorante kadagiti gakatna.’ (2 Corinto 2:11) No basaem ti Biblia, makagun-odka iti napateg a pannakaammo maipapan kadagiti taktika ni Satanas ket maliklikam ti mabiktima kadagita.

Ibellengmo ti aniaman a banag a nainaig iti aramid dagiti demonio. (Aramid 19:19) Karaman kadagita dagiti an-anib, babasaen, videos, musika, ken computer applications a mangitandudo iti espiritismo wenno panagipadles.

“Busorenyo ti Diablo,” kuna ti Biblia, “ket isu agtalawto kadakayo.” (Santiago 4:7) No surotem ti nainsiriban a balakad ti Biblia, masalaknibam ti bagim kadagiti dakes a gakat ni Satanas.—Efeso 6:11-18.