TI KITA ti lawwalawwa a maawagan iti American house spider (Parasteatoda tepidariorum) ket agpatpataud iti saput nga addaan iti pigket a mabalin a nakakapkapet iti diding wenno nalaka a malkab no iti daga tapno makasilo iti agkarayam nga insekto a kanenna. Kasano a makapataud daytoy a lawwalawwa iti maysa a kita ti pigket nga agpada a nakakapkapet ken nalaka a malkab para iti saputna?

Usigem: Ikapet ti lawwalawwa ti saputna iti diding, bobida, wenno iti umasping a lugar babaen ti panangaramidna iti nakapigpigket a saput a maawagan iti scaffolding discs. Nakakapkapet dayta isu a di madadael uray madungpar dagiti agtaytayab nga insekto a kanenna. Nadiskobre dagiti managsirarak iti University of Akron, Ohio, U.S.A., a naiduma met unay ti pannakaaramid dagiti gumfoot discs—saput a naikapet iti daga. Gapu ta sumagmamano laeng ti nakaikapetan dagita no idilig iti scaffolding discs, nalaklaka a malkab ti saput ken insigida a maguyod ti aniaman nga insekto a makadalapus iti dayta.

Sigun iti University of Akron, dagiti managsirarak a nakadiskobre iti daytoy a nakaskasdaaw a banag iti nakaparsuaan ket ‘madama nga ad-adalendan no kasanoda nga aramiden ti artipisial a pigket a kaasping ti naisangsangayan a disenio nga us-usaren dayta a lawwalawwa.’ Namnamaen dagiti sientista a makaaramidda iti pigket nga agpada a mausar kadagiti benda ken iti panangpaimbag kadagiti natukkol a tulang.

Ania ti makunam? Babaen kadi iti ebolusion a timmaud ti abilidad ti lawwalawwa a mangpataud iti pigket a nakakapkapet ken nalaka a malkab no kasapulan? Wenno nadisenio dayta?