Kuna ti Biblia a ti tao ket napno iti “pannakariribuk.” (Job 14:1) Ita, ti tunggal maysa ket makapaspasar iti nagduduma a trahedia. Ngem ti dadduma ket maaw-awananen iti namnama, a kas man la awanen ti aranaar iti agsapa, ken nasaysayaat a masakbayan. Kasta met kadi ti marikriknam? No wen, agtalekka nga adda pudno a namnama nga ipapaay ti Biblia—saan la a para kenka no di ket para iti amin a tattao. Kas pagarigan:

• Isursuro ti Biblia a nagsayaat ti panggep ni Jehova a Dios nga agpaay kadatayo.—Genesis 1:28.

• Inkari ni Jehova a Dios a pagbalinenna a paraiso ti dagatayo.—Isaias 65:21-25.

• Sigurado a matungpal dayta a kari. Kuna ti Apocalipsis 21:3, 4:

  “Ti tolda ti Dios adda iti sangatauan, ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”

Saan la a basta arapaap dayta a namnama. Sigurado a tungpalento ni Jehova a Dios dayta ta mannakabalin-amin ken tarigagayanna unay nga itungpal dayta. Mapagtalkan ti namnama nga isursuro ti Biblia ken mangipaay iti nalawag a sungbat iti saludsod nga “Apay a dika sumuksuko?”

LAGLAGIPEM DAYTOY: No ti emosionmo ket kasla bangka nga iyallo-allon ti nadawel a baybay, ti namnama a mensahe ti Biblia ket kas iti angkla a mamagtalinaed kenka a natalged.

TI MABALINMON NGA ARAMIDEN: Usigem ti isursuro ti Biblia maipapan iti pudno a namnama iti masanguanan. Maragsakan dagiti Saksi ni Jehova a tumulong kenka. Mabalinmo a kontaken ida iti lugarmo wenno biroken ti napateg nga impormasion iti Web site-da a jw.org/ilo. *