Idi Biernes, Marso 11, 2011, naginggined ti Japan iti magnitude 9.0 a nakatayan ti nasurok a 15,000 ken nakadadaelan ti nasurok a $200 a bilion (U.S.). Idi napakdaaran maipapan iti umad-adanin a tsunami, nagkamang ti 32 anyos a ni Kei iti nangatngato a disso. “Kabigatanna, nagsubliak idiay balay tapno alaek dagiti mabalin pay,” kunana, “ngem amin ket inalun-onen ti baybay, agraman ti apartmentko. Pundasion laengen ti nabati.

“Naklaatak. Saan la gayam a saggaysa ti napukaw no di ket amin. Awanen ti kotsek; dagiti kompiuter nga us-usarek iti trabahok; dagiti lamisaan, tugaw, ken sopa a pagipatpatugawak idi kadagiti bisitak; dagiti instrumentok nga agtokar a kas iti organ, gitara, ukelele, ken plauta; amin nga us-usarek iti panagpinta; amin a painting ken drowingko.”

Ikagumaam nga isentro ti panunotmo kadagiti adda pay laeng kenka, saan a kadagiti napukaw. Kuna ti Biblia: “Uray no addaan kinaruay ti maysa a tao ti biagna saan nga agtaud iti bambanag nga ik-ikutanna.” (Lucas 12:15) Kuna ni Kei: “Idi damo, nangaramidak iti listaan dagiti amin a kayatko, ngem impalagip la dayta ti amin a napukawen. Isu nga inlistak laengen dagiti talaga a kasapulak, ken kada maaddaanakon iti aniaman kadagita, ikkatek dagitan iti listaak. Dayta ti nakatulong tapno agsubli ti normal a kasasaad ti biagko.”

Imbes a ti la bagim ti pampanunotem, usarem ti kapadasam a mangliwliwa iti sabsabali. “Nagadu ti naawatko a tulong manipud iti dadduma a tattao ken gagayyemko. Ngem gapu ta awatak lattan nga awat, bimmaba ti panagraemko iti bagik,” kuna ni Kei. “Idi kuan, nalagipko ti kuna ti Biblia iti Aramid 20:35 nga ‘ad-adu ti kinaragsak iti panangted ngem iti panangawat.’ Gapu ta awan unay ti material a maitedko, inkeddengko a paregtaen ti dadduma a nadidigra. Dakkel ti naitulong kaniak ti kinaparabur iti kasta a pamay-an.”

Ikararagmo iti Dios a maaddaanka iti praktikal a sirib tapno maibturam ti kasasaadmo. Nagtalek ni Kei iti panangipasigurado ti Biblia a ti Dios “denggennanto dagiti nabaybay-an a tattaona.” (Salmo 102:17, Ti Baro a Naimbag a Damag Biblia) Mabalinmo met nga aramiden dayta.

Ammom kadi? Impadto ti Biblia nga addanto tiempo nga awanen ti agdanag a mapukawan kadagiti sanikua gapu iti natural a didigra. *—Isaias 65:21-23.