“Dika agaramid iti agpaay kenka a kinitikitan a ladawan wenno aniaman a kapadpada ti parsua iti langit wenno iti daga wenno iti danum nga adda iti uneg ti daga. Dika agrukbab wenno agdaydayaw iti uray ania a kinitikitan a ladawan.”—Exodo 20:4, 5, Ti Baro a Naimbag a Damag Biblia.

Iti Hebreo a Kasuratan, a gagangay a pagaammo kas ti Daan a Tulag, kanayon a makondenar ti panagusar ken panagrukbab kadagiti imahen.

KUNA TI DADDUMA A REPERENSIA

Sigun iti New Catholic Encyclopedia, nagadu nga imahen ti us-usaren idi dagiti Judio iti panagdaydayawda “ken maidaydayaw, mapagraeman unay, ken mapagrukbaban dagita.” * Kas pagarigan, dinakamat dayta nga ensiklopedia ti maipapan iti adu a nakitikit a prutas, sabong, ken animal a nangarkos iti templo iti Jerusalem.—1 Ar-ari 6:18; 7:36.

TI MASAPUL A MAAMMUAM

Maikontra iti ibagbaga ti New Catholic Encyclopedia, saan a nagrukbab dagiti matalek a Judio iti aniaman a nakitikit a bambanag wenno idolo a masarakan iti templo. Kinapudnona, awan ti mabasatayo iti Biblia nga adda matalek nga Israelita nga agus-usar idi iti maysa nga imahen iti panagdaydayawna.

TI KUNA TI BIBLIA

“Iti asinoman a sabali saanko nga ited ti bukodko a dayag,” kinuna ti Dios babaen ken propeta Isaias, “wenno ti dayawko kadagiti kinitikitan a ladawan.”—Isaias 42:8.

“Ania ti pakitunosan ti templo ti Dios kadagiti idolo? . . . Isardengyo a sagiden ti di nadalus a banag.” —2 Corinto 6:16, 17.

“Karimon la ketdi dagiti nagkauna a Kristiano uray ti suhestion laeng a panangikabil iti imahen kadagiti simbaan, ken ibilangda la ketdi a katupag ti idolatria ti panagrukbab wenno panagkararag iti sanguanan dagita.”—History of the Christian Church

KUNA TI DADDUMA A REPERENSIA

“Saanen a maiparbeng a makuestion ti panangusar kadagiti imahen iti nagkauna a panagdaydayaw dagiti Kristiano,” kuna ti New Catholic Encyclopedia. “Ti katakomba dagiti Kristiano ket pudpudno a nagbalin a galeria ti arte dagiti nagkauna a Kristiano. . . . Uray dagiti idolo a mangiladawan kadagiti persona a nadakamat iti sarsarita ket nayarkos kadagiti nasantuan a siled a nausar kas tanem ken iti sagrado a panagdaydayaw.” *

TI MASAPUL A MAAMMUAM

Dagiti kabayaganen nga imahen a makita kadagitoy a katakomba—dagiti usok iti uneg ti daga a nausar a pagitaneman—ket sipud laeng idi maikatlo a siglo. Agarup 200 a tawen daytan kalpasan a natay ni Jesus. Ti ngarud aw-awagan ti New Catholic Encyclopedia a “nagkauna a panagdaydayaw dagiti Kristiano” ket saan a ti kaunaan a panagdaydayaw dagiti Kristiano—nga inannurot dagiti adalan idi umuna a siglo ken nadeskribir iti Kristiano a Griego a Kasuratan, a gagangay a pagaammo kas ti Baro a Tulag. Ti kaadda dagita nga imahen kadagiti katakomba ipakitana laeng nga idi maikatlo a siglo, tinulad dagiti agkunkuna a Kristiano ti adu a kostumbre dagiti pagano a panagusar kadagiti imahen, tapno adu la ketdi ti makomberteda. *

TI KUNA TI BIBLIA

“Pagtalawanyo ti idolatria.”—1 Corinto 10:14.

“Igagayo ti bagbagiyo manipud kadagiti idolo.”—1 Juan 5:21.

Ti panagrukbab kadagiti imahen ket maysa a narelihiosuan nga aramid a saan nga isursuro ti Biblia. Gapu iti dayta, saan nga agrukrukbab wenno agdaydayaw dagiti Saksi ni Jehova kadagiti imahen ken awananda met kadagiti narelihiosuan nga imahen iti pagtaenganda wenno lugar a pagdaydayawanda

KUNA TI DADDUMA A REPERENSIA

“Yantangay ti panagdayaw a maipaay iti maysa nga imahen ket maiturong ken agpatingga iti persona nga ireprepresentarna,” kuna ti New Catholic Encyclopedia, “ti umasping a kita ti panagdayaw nga agpaay iti persona ket mabalin a maipaay iti imahen kas mangireprepresentar iti persona.”

TI MASAPUL A MAAMMUAM

Idi insuro ni Jesus dagiti pasurotna no kasano ti agkararag, saanna nga imbaga kadakuada nga agusarda kadagiti imahen. Ti mismo nga ideya a panagusar iti imahen iti panagdaydayaw iti pudno a Dios ket saan a masarakan iti Kristiano a Griego a Kasuratan.

TI KUNA TI BIBLIA

“Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi.”—Mateo 4:10.