ANIA ti nakarkaro ngem iti pannakapaay? Ti sinsinan balligi. Ngamin, no napaayka iti inkagumaam a maragpat, adda dagiti maaramidam tapno mailinteg dayta. Uray kaskasano, makasursuroka iti kapadasam ken determinadoka a saysayaatem inton maminsan.

Naiduma ti sinsinan balligi ta ipagarupmo a mangab-abakka idinto ta ti kinaagpaysuanna, maab-abakka. No makitamon a kasapulan ti panagbalbaliw, mabalin a naladaw unayen.

Usigem ti maysa a pagarigan. Naminsan, insaludsod ni Jesu-Kristo: “Adda aya magunggona ti tao no matagikuana ti entero a lubong ngem mapukawna met ti biagna?” (Mateo 16:26, Ti Baro a Naimbag a Damag Biblia) Mabalin nga agaplikar unay dayta kadagidiay a ti kangrunaan iti biagda ket kuarta ken iti amin a magatangna—ti eksakto a pagarigan ti sinsinan balligi. “No ti la pampanunotem ket ti sumaganad nga ingangato ti posisionmo iti trabaho, iyaadu ti kuartam wenno sanikuam, dikanto pulos mapnek,” insurat ti mamalbalakad maipapan iti karera a ni Tom Denham. “No ti kuarta laeng ti pangrukodam iti balligi, parparawpaw laeng dayta ken saankanto a naragsak.”

Nabatad nga adu ti umanamong iti dayta. Iti maysa a surbey iti United States, “ti kaadda ti adu a kuarta” ket maika-20 iti listaan ti 22 a “makatulong iti panagballigi.” Dagiti umun-una iti listaan ket ti kinasalun-at, nasayaat a relasion, ken trabaho a pagay-ayatmo.

Nalawag nga ammo ti adu ti nagdumaan ti sinsinan balligi ken ti pudpudno a balligi—no mapagsaludsodanda. Ngem narigrigat ti mangaramid kadagiti desision a maitunos iti umiso a panangmatmat iti balligi.