NO ANIA TI KUNA TI BIBLIA
Ti Mesias
Impakauna ti Biblia nga umay ti Mesias ditoy daga tapno isalakanna ti tattao manipud sakit, rigat, ken ipapatay. Ni Jesu-Kristo kadi dayta?
Kasano a mailasin dagiti tattao ti Mesias?
Sigun kadagiti padto ti Biblia, umay ti Mesias, wenno Kristo, iti dua nga agduma nga akem nga itungpalna iti aginnadayo ken agduma a tiempo. * Iti umuna nga akemna, isu ket agbalin a tao. Tapno silalawag a mailasin dagiti tattao, impakauna dagiti mannurat iti Biblia ti adu a detalye maipapan iti biag ken ministeriona. Kinapudnona, “ti panangsaksi ken Jesus” ti kangrunaan a panggep dagiti padto ti Biblia.—Apocalipsis 19:10.
Idi tao ni Jesus, bassit laeng dagiti inaramidna no ikompara kadagiti aramidennanto iti intero a lubong kas mannakabalin nga espiritu a parsua
TI KUNA TI BIBLIA
Ti Mesias ket . . .
-
Kaputotan ni Ari David.—Isaias 9:7; Lucas 3:23-31. *
-
Mayanak iti ili ti Betlehem.—Mikias 5:2; Lucas 2:4-7.
-
Napakumbaba a mangipakaammo iti “naimbag a damag.”—Isaias 61:1; Lucas 4:43.
-
Maumsi ken maibilang nga awan patpategna.—Isaias 53:3; Mateo 26:67, 68.
-
Maliputan iti 30 a kapisi a pirak.—Zacarias 11:12, 13; Mateo 26:14, 15.
-
Agulimek iti sanguanan dagiti mangak-akusar bayat ti di nainkalintegan a panangkondenarda kenkuana a matay.—Isaias 53:6, 7; Mateo 27:12-14.
-
Maisakripisio kas “kordero” a mangikkat iti basol tapno maaddaan dagiti tattao iti nadalus a takder iti Dios.—Isaias 53:7; Juan 1:29, 34, 36.
-
Mapapatay nga awan matukkol a tulangna.—Salmo 34:20; Juan 19:33, 36.
-
Maitanem iti denna dagiti nabaknang.—Isaias 53:9; Mateo 27:57-60.
-
Mapagungar iti maikatlo nga aldaw.—Mateo 16:21; 28:5-7.
Amin dagita ken adu pay a padto ket natungpal ken Jesus. Pinaimbagna pay dagiti masakit ken pinagungarna dagiti natay. Saanna la ngarud a pinaneknekan nga isu ti Mesias. Nangipaay pay iti nabileg a pangibatayan tapno agtalektayo a matungpal dagiti kari ti Biblia ken aramidennanto dagita iti intero a lubong. (Lucas 7:21-23; Apocalipsis 21:3, 4) Kalpasan a napagungar ni Jesus, nagtugaw iti ‘makannawan’ ti Dios nga agur-uray iti tiempo tapno iringpasna ti akemna kas Mesias.—Salmo 110:1-6.
“Inton dumteng ti Kristo, agaramidto kadi iti ad-adu a pagilasinan ngem iti naaramid daytoy a tao?”—Juan 7:31.
Kasano nga iringpas ti Mesias ti akemna?
Namnamaen dagiti Judio idi kaaldawan ni Jesus a wayawayaan ida ti Mesias manipud iti panagturay ti Roma ken iturayanna ti naisubli a pagarian ti Israel. (Aramid 1:6) Idi laengen agangay a naawatan dagiti Judio a pasurot ni Jesus nga idiay langit nga iringpasna ti akemna kas mannakabalin nga espiritu a parsua a naikkan iti nagdakkel nga autoridad.—Mateo 28:18.
TI KUNA TI BIBLIA
Iti maikadua nga akemna, ti Mesias ti . . .
-
Agturay kas Ari ti Pagarian ti Dios, maysa a sangalubongan a gobierno.—Daniel 7:13, 14; Apocalipsis 11:15.
-
Agbalin a bendision iti amin a mangipakita iti pammati kenkuana.—Genesis 22:17, 18; Salmo 72:7, 8.
-
‘Mangkigtot iti adu a nasion’ ken kadagiti mangiturturay kadagita inton dadaelenna ida gapu iti ibubusorda kenkuana.—Isaias 52:15; Apocalipsis 19:19, 20.
-
Mangisalakan iti “dakkel a bunggoy” dagiti nalinteg a tattao iti amin a nasion tapno agturongda iti natalna a baro a lubong.—Apocalipsis 7:9, 10, 13-17.
-
Kaduanto ni Jehova a Dios a mangpagungar kadagiti natay nga agnaed iti Paraiso a daga.—Lucas 23:43; Juan 5:21, 28, 29.
-
Mangisuro kadagiti iturayanna no kasanoda nga agbiag a sitatalna.—Isaias 11:1, 2, 9, 10.
-
Mangikkat iti basol, ti talaga a makagapu iti sakit ken ipapatay.—Juan 1:29; Roma 5:12.
-
Mangdadael kamaudiananna, iti amin nga aramid ni Satanas ken pagkaykaysaenna ti amin a tattao nga agpasakup iti turay ni Jehova a Dios.—1 Corinto 15:25-28; 1 Juan 3:8.
Tinungpalen ni Jesus ti umuna nga akemna kas Mesias. Iringpasnanto pay ti maikadua nga akemna. Isu nga ad-adalen a naimbag dagiti masirib ti maipapan ken Jesus, ngamin kinunana: “Siak ti dalan ken ti kinapudno ken ti biag.”—Juan 14:6.
“Iti al-aldawna agtubonto daydiay nalinteg, ken ti kinaruay ti talna agingga nga awanen ti bulan. Ket maaddaanto kadagiti masaksakupan . . . agingga kadagiti ungto ti daga.”—Salmo 72:7, 8.
Baka Kayatmo Met ti
SUNGBAT DAGITI SALUDSOD MAIPAPAN ITI BIBLIA
Paneknekan Kadi Dagiti Padto Maipapan iti Mesias a ni Jesus ti Mesias?
Mabalin ngata a saan la a maymaysa a tao ti mangtungpal kadagiti padto maipapan iti Mesias?
TI PAGWANAWANAN
“Nasarakanmi ti Mesias”!
Adu ti mamati a ni Jesus ti naikari a Mesias. Ngem saan a mamati ti dadduma. Ammuem ti kuna ti Biblia.
