1. Ania ti marikna ni Jehova kadagiti napakumbaba? Ilawlawag.

AY-AYATEN ni Jehova dagiti napakumbaba. Dagidiay laeng pudpudno a napakumbaba ti maaddaan iti nasinged a relasion kenkuana. Ngem “adayo [ni Jehova] kadagiti natangsit.” (Sal. 138:6) Kayattayo amin a paragsaken ni Jehova ken kayattayo a marikna ti nadungngo nga ayatna, isu a masapul a sursuruentayo ti agbalin a napakumbaba.

2. Ania ti pagsasaritaantayo iti daytoy nga artikulo?

² Iti daytoy nga artikulo, pagsasaritaantayo ti sungbat dagitoy a tallo a saludsod: (1) Ania ti kinapakumbaba? (2) Apay a masapul nga agbalintayo a napakumbaba? (3) Ania dagiti situasion a mangsubok iti kinapakumbabatayo? Kas maammuantayto, no napakumbabatayo, maparagsaktayo ti puso ni Jehova ken pagsayaatantayo.​—Prov. 27:11; Isa. 48:17.

3. Ania ti kinapakumbaba?

³ Ti kinapakumbaba ket napakumbaba a panagpampanunot. Kasungani daytoy ti kinapannakkel wenno kinapangato. Ipakita ti Biblia nga umiso ti panangmatmat ti napakumbaba a tao iti relasionna ken Jehova a Dios ken iti padana a tao. Bigbigenna a nalalaing ti sabsabali iti dadduma a banag.​—Fil. 2:3, 4.

4-5. Apay a mabalin a ti tao a kasla napakumbaba ket saan a talaga a napakumbaba?

⁴ Adda dagiti tattao a kasla napakumbaba. Mabalin a managbabainda. Wenno mabalin a narespeto wenno nadayawda gapu iti kultura ken pannakapadakkelda. Ngem ti agpayso, sobra gayam ti kinapannakkelda. Inton agangay, rummuarto met laeng ti agpayso a linaon ti pusoda.​—Luc. 6:45.

 ⁵ Iti sabali a bangir, dagidiay adda kompiansada iti bagida wenno prangka ket saan a kanayon a napannakkel. (Juan 1:46, 47) Ngem masapul nga agannad dagidiay kasta ti personalidadda tapno saanda nga agtalek iti abilidadda. Adda man kompiansatayo wenno managbabaintayo, masapul nga ikagumaantayo a patanoren ti napakumbaba a puso.

6. Kas mabasa iti 1 Corinto 15:10, ania ti maadaltayo iti ulidan ni apostol Pablo?

⁶ Usigentayo ti ulidan ni apostol Pablo. Inusar ni Jehova ni Pablo iti adu a pamay-an iti pannakabuangay dagiti baro a kongregasion iti nadumaduma a siudad. Posible nga ad-adu ti naaramidanna iti ministerio ngem iti asinoman nga apostol ni Jesu-Kristo. Ngem saan a pinanunot ni Pablo a natantan-ok ngem kadagiti kakabsatna. Sipapakumbaba nga inaminna: “Siak ti kanunumuan kadagiti apostol, ken saanak a maikari a maawagan iti apostol ta indadanesko ti kongregasion ti Dios.” (1 Cor. 15:9) Kalpasanna, binigbig ni Pablo a naaddaan laeng iti nasayaat a relasion ken Jehova gapu iti nagpaiduma a kinaimbag ti Dios, saan a gapu ta espesial wenno adu ti naaramidanna. (Basaen ti 1 Corinto 15:10.) Talaga a nagsayaat ni Pablo nga ulidan iti kinapakumbaba! Idi nagsurat kadagiti Kristiano idiay Corinto, saan a nagpangas, uray no adda dagiti lallaki iti kongregasion a nanguy-uyaw kenkuana.​—2 Cor. 10:10.

7. Kasano nga impakita ti maysa a pagaammo a kabsat nga isu ket napakumbaba?

⁷ Adu nga adipen ni Jehova ti naparegta iti pakasaritaan ti biag ni Brother Karl F. Klein, a nagserbi kas miembro ti Bagi a Manarawidwid. Iti pakasaritaan ti biagna, sipapakumbaba nga inaminna nga adu ti pagkapuyan a linabananna ken problema a napasaranna.  Kas pagarigan, idi 1922, damona ti mangasaba iti binalaybalay ngem gapu ta marigatan, saannan nga inulit dayta iti agarup dua a tawen. Idi agangay, bayat nga agserserbi iti Bethel, nagsakit ti nakemna iti maysa a kabsat a nangbalakad kenkuana. Kasta met, naaddaan iti emosional a sakit gapu iti stress ken panagdanag, ngem immimbag met laeng idi agangay. Nupay kasta, naaddaan iti adu a nagsasayaat a pribilehio. Nalawag a nakapakpakumbaba gapu ta inaminna dagiti pagkapuyanna uray no isu ket pagaammo dagiti kakabsat! Malaglagip ti adu a kakabsat ni Brother Klein ken ti napudno a panangestoriana iti nagsayaat a pakasaritaan ti biagna. *

8. Kasano nga ipakita ti 1 Pedro 5:6 a maparagsaktayo ni Jehova no napakumbabatayo?

⁸ Ti kapatgan a rason a masapul nga agbalintayo a napakumbaba ket gapu ta mangparagsak dayta ken Jehova. Kasta ti nalawag nga imbaga ni apostol Pedro. (Basaen ti 1 Pedro 5:6.) Maipapan iti imbaga ni Pedro, kuna ti libro nga “Umayka Agbalinka a Pasurotko”: “Kasla sabidong ti kinapasindayag. Dakes ti epektona. Maysa dayta a galad a mamagbalin iti natalugadingan a tao nga awan serserbina iti Dios. Iti sabali a bangir, ti kinapakumbaba mapagbalinna a naserbi unay ken ni Jehova uray ti kanunumuan a tao. . . . Maragsakanto . . . a mangsupapak iti kinapakumbabam.” * Adda pay kadi nasaysayaat ngem iti panangparagsak iti puso ni Jehova?​—Prov. 23:15.

9. Apay a kaykayat dagiti tattao ti makikadua kadatayo no napakumbabatayo?

⁹ Malaksid a maparagsaktayo ni Jehova, adu pay ti pagsayaatan ti panagbalin a napakumbaba. Asideg ti rikna dagiti tattao kadatayo no napakumbabatayo. Kasano a kasta? Panunotem no siasino dagiti kaykayatmo a pakikaduaan. (Mat. 7:12) Manmano kadatayo ti mayat a makikadua kadagiti manangipapilit ken saan nga umawat iti suhestion. Ngem makapabang-ar ti makilangen kadagiti kapammatiantayo a mangipakpakita iti “simpatia, nainkabsatan nga ayat, nadungngo a pannakipagrikna, ken kinapakumbaba.” (1 Ped. 3:8) No kaykayattayo dagita a tattao, kaykayatdatayo met a kadua, no la ket napakumbabatayo.

10. Kasano a makatulong ti kinapakumbaba tapno nalaklakatayo a maibturan dagiti problema?

¹⁰ Makatulong met ti kinapakumbaba tapno  nalaklakatayo a maibturan dagiti problema. No dadduma, makakita wenno makapasartayo kadagiti banag nga ipagaruptayo a saan a patas. Imbaga ti masirib a lalaki a ni Ari Solomon: “Nakakitaak kadagiti adipen a nakakabalio ngem magmagna dagiti prinsipe a kasla adipen.” (Ecl. 10:7) No dadduma, saan a kanayon a dagiti nakalalaing ti mapadayawan no di ket dagiti saan unay a nalaing. Ngem imbaga ni Solomon a nasaysayaat nga akseptarentayo ti realidad imbes a maupaytayo kadagiti negatibo a situasion iti biagtayo. (Ecl. 6:9) No napakumbabatayo, nalaklaka a maakseptartayo dagiti ditay kayat a mapaspasamak iti biagtayo.

11. Ania koma ti reaksiontayo no mabalakadantayo?

¹¹ Kada aldaw, adu ti gundawaytayo a mangipakita iti kinapakumbaba. Dagitoy ti dadduma a situasion. No mabalakadantayo. Laglagipentayo koma a no adda nangikagumaan a mangbalakad kadatayo, mabalin a nakarkaro ti naaramidtayo a kamali ngem iti ipagaruptayo. No kasta ti situasion, posible a ti umuna a reaksiontayo ket saantayo nga awaten ti balakad. Baka kritikarentayo ti nangbalakad wenno ti pamay-anna a nangbalakad kadatayo. Ngem no napakumbabatayo, ikagumaantayo nga ipakita ti nasayaat a kababalin.

12. Sigun iti Proverbio 27:5, 6, apay nga agyamantayo iti nangbalakad kadatayo? Mangted iti ilustrasion.

¹² Apresiaren ti napakumbaba a tao ti balakad. Kas panangyilustrar: Panunotem nga addaka iti gimong. Kalpasan a nakiinnestoriaka iti dadduma a kakabsat, impaigidnaka ti maysa a kabsat sa inyarasaasna nga adda naisingat iti ngipenmo. Sigurado a mabainanka. Ngem saan kadi nga agyamanka met ta imbagana dayta? Kinapudnona, baka kayatmo nga adda koma nasapsapa a nakaibaga! Iti umasping a pamay-an, masapul a sipapakumbaba a pagyamanantayo ti kapammatiantayo a situtured a nangbalakad kadatayo. Ibilangtayo dayta a kabsat kas gayyemtayo, saan a kabusor.​—Basaen ti Proverbio 27:5, 6; Gal. 4:16.

13. Kasanotayo a maipakita ti kinapakumbaba no makaawat ti dadduma iti pribilehio?

¹³ No makaawat ti dadduma iti pribilehio. “No makitak a makaawat ti sabsabali iti pribilehio, mapampanunotko no dadduma no apay a saan a siak ti naikkan,” inamin ti panglakayen nga agnagan Jason. Nariknam met kadin ti kasta? Saan a dakes no ‘ikagumaantayo’ ti rumagpat iti dakdakkel a pribilehio. (1 Tim. 3:1) Ngem masapul nga agannadtayo no ania ti pampanunotentayo. Ta no saan,  mabalin nga agtubo ti kinapannakkel iti pusotayo. Kas pagarigan, mabalin a panunoten ti maysa a Kristiano a lalaki nga isu ti kakualipikaduan iti maysa nga annongen iti kongregasion. Wenno baka panunoten ti maysa a Kristiano nga asawa a babai, ‘Mas kualipikado ni lakayko ngem iti dayta a kabsat!’ Ngem no pudpudno a napakumbabatayo, liklikantayo ti kasta a kinapannakkel.

14. Ania ti masursurotayo iti reaksion ni Moises idi naikkan ti dadduma iti pribilehio?

¹⁴ Adda masursurotayo iti reaksion ni Moises idi naikkan ti dadduma iti pribilehio. Ipatpateg ni Moises ti annongenna a mangidaulo iti nasion ti Israel. Ania ti reaksionna idi impalubos ni Jehova nga aramiden ti sabsabali ti dadduma a trabahona? Saan a nagimon. (Num. 11:24-29) Sipapakumbaba nga impalubosna nga aramiden ti sabsabali ti dadduma a trabahona a panangukom kadagiti tattao. (Ex. 18:13-24) Gapu iti dayta, al-alisto a nadesisionan dagiti kaso nga indatag dagiti Israelita. Ipakita dayta a napatpateg ken Moises ti pagsayaatan ti dadduma ngem kadagiti pribilehiona. Nagsayaat nga ulidan a tuladentayo! No kayattayo nga usarennatayo ni Jehova, laglagipentayo a napatpateg kenkuana ti kinapakumbabatayo ngem ti abilidadtayo. “Uray nangato ni Jehova, asikasuenna dagiti napakumbaba.”​—Sal. 138:6.

15. Ania a panagbalbaliw ti napasaran ti adu a kakabsat?

¹⁵ No agbaliw ti kasasaadtayo. Iti napalabas a tawtawen, nakaawat iti baro nga annongen ti adu a nabayagen nga agserserbi ken Jehova. Kas pagarigan, idi 2014, nagbaliw ti annongen dagiti manangaywan iti distrito ken dagiti assawada. Nangrugi iti dayta a tawen, saanen nga agserbi kas manangaywan iti sirkito dagiti kakabsat a lallaki nga agtawen iti 70. Ken dagiti agtawen iti 80 wenno nasursurok pay ket saanen nga agserbi iti kongregasion  kas koordineytor ti bagi dagiti panglakayen. Kasta met, iti napalabas a tawtawen, adu a Bethelite ti na-reassign kas payunir. Adda met dagiti nagsardeng iti espesial nga amin-tiempo a panagserbi gapu iti problema iti salun-at, obligasion iti pamilia, wenno dadduma pay a personal a rason.

16. Kasano nga impakita dagiti kakabsattayo ti kinapakumbaba iti panag-adjust-da iti baro a kasasaadda?

¹⁶ Saan a nalaka dagita a panagbalbaliw para kadagitoy a kakabsat a lallaki ken babbai. Talaga nga ipatpategda ti dati nga annongenda a kaaduanna a tinagiragsakda iti adu a tawen. Napalalo ti liday ti dadduma bayat nga agad-adjust-da iti baro a kasasaadda. Ngem idi agangay, naka-adjust-da met laeng. Apay? Kangrunaanna, gapu iti ayatda ken Jehova. Ammoda a nagdedikarda iti Dios​—saan nga iti maysa a trabaho, posision, wenno annongen. (Col. 3:23) Maragsakanda nga agtultuloy a sipapakumbaba nga agserbi ken Jehova iti aniaman nga annongen. ‘Impalladawda kenkuana ti amin a pakadanaganda,’ ta ammoda nga ipatpategna ida.​—1 Ped. 5:6, 7.

17. Apay nga agyamantayo ta iparparegta ti Sao ti Dios nga agbalintayo a napakumbaba?

¹⁷ Saantay kadi nga agyaman ta iparparegta ti Sao ti Dios nga agbalintayo a napakumbaba? Pagsayaatantayo ken ti sabsabali no napakumbabatayo. Ad-adda a kabaelantayo a sanguen dagiti problematayo. Kangrunaanna, sumingedtayo iti nailangitan nga Amatayo. Maragsakantayo unay a makaammo nga uray isu ti “Kangatuan,” ay-ayatenna ken ipatpategna dagiti napakumbaba nga adipenna!​—Isa. 57:15.