No marigrigatanka, sigurado a manamnamam a tulongannaka ti nasayaat a gayyemmo. Adda dagiti mangibaga a ti Dios ket saan a maysa a gayyem ta ipagarupda nga awan ti aniaman nga ar-aramidenna para kadakuada. Ngem kinapudnona, adun ti naaramidan ti Dios a pagimbagantayo ken solbarennanto ti amin a problema ken panagsagabatayo ita. Ania dagiti aramidento ti Dios?

Pagpatinggaento ti Dios ti amin a kinadakes babaen ti panangikkatna iti pagtataudan dayta. Ibaga ti Biblia no ania dayta: “Ti intero a lubong ket adda iti pannakabalin daydiay managdakdakes.” (1 Juan 5:19) Dayta a “managdakdakes” ket awan sabali no di ni Satanas a Diablo, daydiay inawagan ni Jesus nga “agturay iti daytoy a lubong.” (Juan 12:31) Ti impluensia ni Satanas iti sangatauan ti ramut dagiti narigat a kasasaad ditoy daga. Ania ti aramidento ti Dios?

Asidegen nga agtignay ni Jehova a Dios babaen ti Anakna a ni Jesu-Kristo tapno “pukawenna ti Diablo nga addaan pannakabalin a mangyeg iti ipapatay.” (Hebreo 2:14; 1 Juan 3:8) Kinapudnona, ibaga ti Biblia a ti Diablo “ammona nga ababan ti tiempona” sakbay a madadael. (Apocalipsis 12:12) Dadaelento met ti Dios ti amin nga agar-aramid iti dakes.​—Salmo 37:9; Proverbio 2:22.

Tungpalenton ti Namarsua kadatayo ti agnanayon a panggepna iti sangatauan ken iti daga kalpasan a naikkatnan ti amin a kinadakes ditoy daga. Ania ti manamnamatayo?

Agnanayon a talna ken talged. “Dagiti naemma kukuadanto ti daga, ken maragragsakandanto unay iti naruay a talna.”​—Salmo 37:11.

Aglaplapusanan ken makapasalun-at a taraon. “Naruayto dagiti bukbukel ditoy daga; nagadunto ti maani iti rabaw dagiti bantay.”​—Salmo 72:16.

Komportable a pagtaengan ken makaparagsak a trabaho. “Mangbangondanto kadagiti balay ket agnaedda kadagita, ken agmuladanto kadagiti ubas ket kanenda ti bungada. . . . Naan-anayto a tagiragsaken dagiti pinilik ti aramid ti imada.”​—Isaias 65:21, 22.

Kayatmo kadi a makita dagita a kasasaad? Dagita ti asidegen nga inaldaw a matagiragsak ti amin a tattao.

Agsakit ken matay ti amin a tattao ita, ngem dandanin maawan dagita a kasasaad. Ibanagto ti Dios dagiti bendision nga ipaay ti daton a subbot ni Jesus tapno “saan a madadael ti asinoman a mangipakita iti pammati kenkuana no di ket maaddaan iti biag nga agnanayon.” (Juan 3:16) Ania ti resultana?

Maikkatto nga interamente dagiti sakit. “Awanto ti residente a mangibaga: ‘Masakitak.’ Mapakawanton ti basol dagiti agnanaed iti daga.”​—Isaias 33:24.

Saanton a matay dagiti tattao. “Alimonennanto ni patay iti agnanayon, ket punasento ti Kangatuan nga Apo Jehova dagiti lua iti amin a rupa.”​—Isaias 25:8.

Agbiagto nga agnanayon dagiti tattao. “Ti sagut ti Dios ket biag nga agnanayon babaen ken Kristo Jesus nga Apotayo.”​—Roma 6:23.

Mapagungarto dagiti natay. “Agungarto agpadpada dagiti nalinteg ken dagiti nakillo.” (Aramid 24:15) Magunggonaandanto iti subbot a sagut ti Dios.

Kasano nga ibanag ti Dios amin dagita?

Ibanag ti Dios ti panggepna para iti sangatauan ken iti daga babaen ti nailangitan a gobierno, a ni Kristo Jesus ti dinutokanna nga Agturay. (Salmo 110:1, 2) Dayta ti gobierno, wenno pagarian, nga insuro ni Jesus kadagiti pasurotna nga ikararagda: “Amami nga adda iti langit, . . . umay koma ti Pagariam.”​—Mateo 6:9, 10.

Iturayanto ti Pagarian ti Dios ti intero a daga ken pagpatinggaenna ti amin a rigat ken panagsagaba. Daytoy a Pagarian ti kasayaatan a gobierno a mangituray kadagiti tattao! Isu a sireregta nga impakaammo ni Jesus “ti naimbag a damag maipapan iti Pagarian” bayat ti ministeriona ditoy daga ken imbagana kadagiti adalanna nga aramidenda met dayta.​—Mateo 4:23; 24:14.

Gapu iti kasta unay nga ayat ni Jehova a Dios kadagiti parsuana a tattao, inkarina nga aramidenna amin dagita a nagsayaat a bambanag para kadakuada. Saan kadi a dayta ti rason a kayatmo nga am-ammuen ti Dios ken suminged kenkuana? No kasta ti aramidem, ania dagiti magunggonam? Ilawlawag dayta ti sumaruno nga artikulo.