Ita, inaramidtayon dagiti pamay-an tapno maammuantayo ti sungbat ti saludsod nga, Asino ti Dios? Rinugiantayo babaen ti pannakabasatayo iti Biblia a Jehova ti naganna ken ayat ti kangrunaan a kualidadna. Naammuantayo met dagiti naaramidannan ken dagiti aramidennanto pay a pakagunggonaan ti amin a tattao. Adu pay ti maammuantayo maipapan iti Dios, ngem nalabit pampanunotem no ania dagiti magunggonam bayat nga ar-aramidem dayta.

Ikarkari ni Jehova a “no birokem, ipalubosnanto a masarakam.” (1 Cronicas 28:9) Panunotem ti nagsayaat a sagut nga agur-uray kenka bayat a birbirokem ken am-ammuem ti Dios​—ti ‘nasinged a pannakigayyem ken Jehova.’ (Salmo 25:14) Ania dagiti magunggonam iti kasta a pannakigayyem?

Pudpudno a kinaragsak. Ni Jehova ket nailadawan kas “ti naragsak a Dios.” (1 Timoteo 1:11) No nasingedka kenkuana ken surotem ti panangidalanna, agbalinka a pudpudno a naragsak a mangpasayaat iti riknam, isipmo, ken bagim. (Salmo 33:12) Mapagbalinmo met a naragsak ti biagmo no liklikam ti makadadael a wagas ti panagbiag, patanorem dagiti nasayaat nga ugali, ken taginayonem ti nasayaat a relasion iti sabsabali. Maibagamto met ti kas iti imbaga ti salmista: “Ti iyaasidegko iti Dios ket pagimbagak.”​—Salmo 73:28.

Personal a panangaywan ken panangasikaso. Inkari ni Jehova kadagiti adipenna: “Balakadankanto bayat a kitkitaenka.” (Salmo 32:8) Kayatna a sawen a personal nga as-asikasuen ni Jehova dagiti adipenna ken ibagayna ti panangaywanna kadagiti kasapulan ti tunggal maysa kadakuada. (Salmo 139:1, 2) Apaman a maaddaanka iti nasayaat a relasion ken Jehova, mariknam a kanayon nga adda isuna para kenka.

Nagsayaat a masanguanan. Tultulongannaka ni Jehova a Dios a maaddaan iti naragsak ken makapnek a biag ita. Ik-ikkannaka met iti gundaway a maaddaan iti nagsayaat a masanguanan. (Isaias 48:17, 18) Kuna ti Biblia: “Maaddaanto iti biag nga agnanayon dagidiay mangam-ammo kenka, ti maymaysa a pudno a Dios, ken ti imbaonmo, ni Jesu-Kristo.” (Juan 17:3) Iti daytoy narigat a tiempo, ti namnama nga ipapaay ti Dios ket kas iti angkla a mamagtalinaed kadatayo a “sigurado ken natibker.”​—Hebreo 6:19.

Sumagmamano laeng dagita iti adu a napateg a rason nga ad-adda nga am-ammuentayo ti Dios ken maaddaantayo iti nasinged a relasion kenkuana. Mabalinmo a kasarita ti maysa kadagiti Saksi ni Jehova wenno bisitaem ti jw.org para iti ad-adu pay a makatulong nga impormasion.