“O Managdengngeg iti kararag, umayto kenka ti amin a kita ti tattao.”—Salmo 65:2.

Agkarkararag ti dadduma ta sumayaat kano no kua ti riknada, uray no saanda a mamati nga adda dumdumngeg kadakuada. Ngem agkararagtayo saan laeng a tapno sumayaat ti riknatayo ken maibturantayo dagiti problematayo. Ipasigurado kadatayo ti Biblia nga “asideg ni Jehova * iti amin nga umaw-awag kenkuana, iti amin nga umawag kenkuana iti kinapudno. . . . Dengdenggenna ti panagpatulongda.”—Salmo 145:18, 19.

Masiguradotayo ngarud a dengdenggen ni Jehova a Dios dagiti kararag dagiti agdaydayaw kenkuana. Siaayat nga imbagana: “Umawagkayto ken agkararagkayto kaniak ket denggenkayto.”—Jeremias 29:12.

“Itultuloyyo ti agkararag.”—Roma 12:12.

Parparegtaennatayo ti Biblia nga “itultuloytayo ti agkararag” ken ‘agkararagtayo iti amin a tiempo.’ Nalawag a kayat ni Jehova a Dios nga agkararagtayo kenkuana.—Mateo 26:41; Efeso 6:18.

Apay a kayat ti Dios nga agkararagtayo kenkuana? Panunotem: Maragsakan dagiti nagannak no ibaga ti ubing pay nga anakda, “Papa, tulongannak man.” Mabalin nga ammon ti ama ti kasapulan ken marikrikna ti anakna, ngem no mangngegna nga agpatulong ti anakna, mariknana nga agtaltalek ken nadekket kenkuana ti anakna. No agkararagtayo met ken Jehova a Dios, ipakpakitatayo nga agtaltalek ken kayattayo ti agbalin a nadekket kenkuana.—Proverbio 15:8; Santiago 4:8.

“Ipalladawyo kenkuana ti amin a pakadanaganyo, ta ipatpategnakayo.”—1 Pedro 5:7.

Kayat ti Dios nga agkararagtayo kenkuana gapu ta ay-ayaten ken ipatpategnatayo. Ammona dagiti problema ken pakadanagantayo, ken kayatnatayo a tulongan.

Kanayon idi a nagkararag ni Ari David ken Jehova a Dios tapno agpatulong ken tapno iyebkasna ti pampanunot ken rikriknana. (Salmo 23:1-6) Ania ti narikna ti Dios ken David? Ay-ayaten ti Dios ni David ken dinengngegna ti adu a kararagna. (Aramid 13:22) Dengdenggen met ti Dios dagiti kararagtayo gapu ta ipatpategnatayo.

Imbaga dayta ti maysa kadagiti mannurat kadagiti salmo iti Biblia. Masiguradona a dinengngeg ti Dios dagiti kararagna ket dakkel ti naitulong dayta kenkuana. Simminged iti Dios ken naaddaan iti bileg a mangibtur iti rigat ken ladingitna.—Salmo 116:1-9.

No masiguradotayo a dengdenggen ti Dios dagiti kararagtayo, agtultuloytayo nga agkararag kenkuana. Kitaentayo ti kapadasan ni Pedro a taga-Spain. Natay iti aksidente ti 19 ti tawenna a barona. Gapu iti ladingitna, imbukbokna ti linaon ti pusona iti Dios ken maulit-ulit nga inkararagna ti liwliwa ken suporta. Ania ti napasamak? Kuna ni Pedro: “Sinungbatan ni Jehova dagiti kararagko babaen ti panangliwliwa ken panangsuporta dagiti padami a Kristiano kadakami nga agassawa.”

Saan a nagungar ti anakna uray no nagkararag, ngem nagdakkel ti naitulong dayta ken ni Pedro ken iti pamiliana. Imbaga ti asawana a ni María Carmen: “Naibturak ti ladingitko gapu iti kararag. Ammok a maawatannak ni Jehova a Dios, ta no agkararagak, tumalna ti panunotko ken agkalma ti riknak.”

Ipakita ti Biblia ken dagiti personal a kapadasan a talaga a dengdenggen ti Dios dagiti kararag. Ngem nalawag met a saan a sungbatan ti Dios ti amin a kararag. Apay nga adda dagiti kararag a sungbatan ken saan a sungbatan ti Dios?