KASLA ordinario laeng a banag ti sinanbarko a pagtahar nga adda iti ima ni Jordan. Ngem maysa dayta kadagiti kapatgan nga adda kenkuana. Kuna ni Jordan: “Idi ubingak, inted dayta ti gayyem ti pamiliami a ni Lolo Russell.” Idi natay ni Russell, naammuan ni Jordan a nagdakkel ti naitulong ni Russell ken ni lolona ken iti nagannakna. Isu ti nangan-andingay kadakuada kadagiti narigat a panawen. Intuloy ni Jordan: “Ita ta ad-adun ti naammuak maipapan ken ni Lolo Russell, napatpateg manen kaniak daytoy bassit a regalo.”

Kas ipakita ti kapadasan ni Jordan, mabalin a saan unay a napateg ti maysa a regalo wenno awan pategna para iti dadduma. Ngem para iti manangapresiar nga immawat, mabalin a nakapatpateg wenno di pay ketdi magatadan dayta. Inladawan ti Biblia ti maysa a regalo a nakangatngato ti balorna babaen iti daytoy a nalatak a sasao: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”—Juan 3:16.

Regalo a mabalin a mangted iti biag nga agnanayon kadaydiay umawat! Adda pay kadi sabali a regalo a napatpateg ngem iti dayta? Saan a makita ti dadduma ti pateg dayta a regalo, ngem ibilang dayta dagiti pudno a Kristiano kas “napateg.” (Salmo 49:8; 1 Pedro 1:18, 19) Ngem apay nga inted ti Dios ti biag ti Anakna kas regalo para iti lubong?

Inlawlawag ni apostol Pablo no apay: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao.” (Roma 5:12) Nagbasol ti immuna a tao a ni Adan idi inggagarana ti nagsukir iti Dios isu a nasentensiaan iti ipapatay. Gapu ken Adan, matay met ti amin a kaputotanna—ti intero a sangatauan.

 “Dagiti isupapak ti basol isu ti ipapatay, ngem ti sagut nga ipaay ti Dios isu ti agnanayon a biag babaen ken Kristo Jesus nga Apotayo.” (Roma 6:23) Tapno mawayawayaan ti sangatauan iti sentensia nga ipapatay, imbaon ti Dios ditoy daga ti Anakna a ni Jesu-Kristo tapno idatonna ti perpekto a biagna para iti lubong. Maibatay iti daytoy a daton, a pagaammo kas “ti subbot,” amin a mangipakita iti pammati ken Jesus ket maaddaan iti biag nga agnanayon.—Roma 3:24.

Kinuna ni Pablo maipapan iti amin a bendision nga ited ti Dios kadagiti agdaydayaw kenkuana babaen ken Jesu-Kristo: “Pagyamanan iti Dios gapu iti di mailadawan a sagutna nga awanan bayad.” (2 Corinto 9:15) Wen, talaga a nakasaysayaat ti subbot nga uray la ditayo mailawlawag a naan-anay dayta. Ngem iti amin a naayat a regalo ti Dios kadagiti tattao, apay nga espesial unay ti subbot? Kasano a naidumduma daytoy iti dadduma pay a regalo ti Dios? * Ken kasano a maipakitatayo ti panagyamantayo? Awisendaka a mangbasa iti sungbat ti Biblia iti sumaruno a dua nga artikulo.