Panunotem ti maysa kadagiti kasingedan a relasion ti tao​—ti relasion ti agsingin (identical twin). Nakasingsingedda. Dadduma ti “agkinnaawatan uray no saanda nga agsasao,” kuna ni Nancy Segal a direktor ti Twin Studies Center ken adda kasinginna. Kuna ti maysa a babai maipapan iti relasionda nga agsingin: “Ammomi ti amin maipapan iti maysa ken maysa.”

Apay nga agkinnaawatan unay dagiti agsingin? Sigun kadagiti panagadal, adda epekto ti aglawlaw ken ti pannakapadakkelda, ngem mabalin a ti kangrunaan a makagapu ket ti panagpada ti genes-da.

PANUNOTEM: Sigurado a maawatan ti nangparsua iti daytoy a nakaskasdaaw a genes ti pakabuklan ti tunggal maysa kadatayo. Pudno ti imbaga ni salmista David: “Binukelnak iti aanakan ni inak. Saan a nailemmeng kenka dagiti tulangko idi naaramidak iti nalimed. . . . Nakitanak uray idi maysaak pay laeng a sikog; amin a pasetna ket naisurat iti librom.” (Salmo 139:13, 15, 16) Ti laeng Dios ti makaammo ken naan-anay a makaawat iti pakabuklantayo ken uray kadagiti pasamak iti biagtayo a nangsukog iti personalidadtayo. Ti naidumduma a pannakaammo ti Dios kadatayo ken iti pakabuklantayo ipasiguradona a maawatanna ti amin a detalye maipapan kadatayo.

Inkararag ni David: “O Jehova, sinukimatnak, ket am-ammonak. Ammom no kaano nga agtugawak ken agtakderak. Mailasinmo dagiti pampanunotko uray iti adayo. Sakbay pay nga adda sao a rummuar iti ngiwatko, ammomon dayta, O Jehova.” (Salmo 139:1, 2, 4) Kanayonanna, ammo ni Jehova ti marikriknatayo ken mailasinna uray ti ‘tunggal pampanunot ken tarigagaytayo.’ (1 Cronicas 28:9; 1 Samuel 16:6, 7) Ania ti ipakpakita dagitoy a teksto maipapan iti Dios?

Uray no saantayo a mayebkas ti amin a mapampanunot ken marikriknatayo iti kararag, makitkita ti Namarsua no ania ti ar-aramidentayo ken maawatanna pay no apay nga ar-aramidentayo dagita. Kanayonanna, ammona a kayattayo ti agaramid iti naimbag, uray no saantayo a maaramid dagita gapu kadagiti limitasiontayo. Gapu ta pinarsuanatayo ti Dios nga addaan iti abilidad nga agayat, sigurado a kayatna ken magagaran a makakita ken mangtarus kadagiti pampanunoten ken motibotayo a naibatay iti ayat.​—1 Juan 4:7-10.

 Ipasigurado kadatayo ti Kasuratan

• “Nakaturong dagiti mata ni Jehova kadagiti nalinteg, ken denggen dagiti lapayagna ti panagpakaasida.”​—1 PEDRO 3:12.

• Inkari ti Dios: “Ikkankanto iti pannakaawat ket isuroka iti dalan a rebbeng a papanam. Balakadankanto bayat a kitkitaenka.”​—SALMO 32:8.

No ammotayo a maawatan ti Dios ti kasasaadtayo ken ti marikriknatayo, makatulong kadi dayta tapno maibturantayo dagiti pakarigatan? Kitaentayo ti napasamak ken Anna a taga-Nigeria. Kinunana: “Napampanunotko idi no adda pay la kaipapanan ti biagko gapu ta desperadon ti kasasaadko. Baloak ken ay-aywanak ti balasitangko nga adda iti ospital gapu iti hydrocephalus (sobra a pluido iti utek). Iti dayta a tiempo, nadayagnosak met iti kanser ti suso ket kasapulan a maoperaak, ma-chemotherapy, ken ma-radiotherapy. Nakarigrigat para kaniak dayta ta agpadakami nga adda iti ospital iti masaksakit nga anakko.”

Ania ti nakatulong ken Anna? “Inut-utobko dagiti teksto iti Biblia kas iti Filipos 4:6, 7, a kunana a ti ‘talna ti Dios a mangartap iti amin a pannakaawat salaknibannanto ti puso ken isipyo.’ Tunggal mapanunotko dayta a teksto, mariknak a nasingedak ken Jehova ta ammok nga ad-adda a maawatannak ngem iti pannakaawatko iti bagik. Adu met a kapammatiak ti nangparegta kaniak.

“Uray no lablabanak pay laeng ti sakitko, adda met simmayaatanen ti kasasaadmi nga agina. Gapu ta adda kadakami ni Jehova, nasursuromi a saankami nga agnegatibo no adda dagiti pakarigatan. Ipasigurado kadatayo ti Santiago 5:11: ‘Ibilangtayo a naragsak dagidiay nakapagibtur. Nadamagyo ti panagibtur ni Job ken nakitayo ti resulta nga impaay ni Jehova, a ni Jehova ket nadungngo unay [wenno, “mannakipagrikna unay,” footnote] ken naasi.’” Naan-anay a naawatan ni Jehova ti situasion ni Job isu a makapagtalektayo a maawatanna met ti aniaman a pakarigatantayo.