Inaramid ti Dios ti bagitayo nga addaan iti nakaskasdaaw nga abilidad nga umimbag. No masugatan, magarumiadan, wenno matudoktayo, “irugi ti bagitayo ti komplikado a proseso a mangpaimbag iti sugattayo, dakkel man wenno bassit.” (Johns Hopkins Medicine) Dagus nga agtignay ti bagitayo a mangpasardeng iti panagdara, palawaenna dagiti urat, paimbagen ken pagkeggangenna ti sugat.

PANUNOTEM: No dinisenio ti Namarsua ti bagitayo a mangpaimbag iti literal a sugat, saan kadi a makapagtalektayo iti karina a paimbagenna met ti emosional a sugattayo? Insurat ti salmista: “Paimbagenna dagiti nasaktan ti pusoda; bedbedanna dagiti sugatda.” (Salmo 147:3) Ngem no adda emosional a sugatmo gapu kadagiti kapadasam iti napalabas wenno iti agdama, kasanom a masigurado a bedbedan ni Jehova dagiti sugatmo, ita ken iti masanguanan?

Ikarkari ti Dios: “Dika agbuteng, ta addaak kenka. Dika madanagan, ta siak ti Diosmo. Patibkerenkanto, wen, tulongankanto.” (Isaias 41:10) No ammo ti maysa a tao a maseknan ni Jehova kenkuana, natalna ti panunotna ken adda bilegna a mangsango kadagiti nadumaduma a pakarigatan. Inawagan ni apostol Pablo dayta a rikna iti “talna ti Dios a mangartap iti amin a pannakaawat.” Innayon ni Pablo: “Ta adda pigsak a mangsango iti amin a banag gapu iti daydiay mangpabpabileg kaniak.”​—Filipos 4:4-7, 9, 13.

Pabilgen ti Kasuratan ti pammatitayo kadagiti kari ni Jehova iti masanguanan. Kas pagarigan, ibaga ti Apocalipsis 21:4, 5 (makita ti linaonna iti sumaruno a panid) no ania ti aramidenna ken no apay a makapagtalektayo nga aramidenna dayta:

• “Punasennanto ti amin a lua” kadagiti mata dagiti tattao. Pukawento ni Jehova ti amin a sagsagabaen ken pagdandanagantayo, uray dagiti kasla saan a napateg iti dadduma.

• Kas Mannakabalin-amin nga Ari ti sangaparsuaan a “nakatugaw iti trono” idiay langit, usarennanto ti pannakabalin ken autoridadna a manglapped iti panagsagaba ken mangipaay iti tulong a kasapulantayo.

• Ipasigurado ni Jehova a dagiti karina ket “mapagtalkan ken pudno.” Kaipapananna a kasla ipustana ti reputasionna kas pudno a Dios kas pammatalged a matungpal dagiti karina.

“‘Punasennanto ti amin a lua kadagiti matada, ken awanton ni patay. Awanto metten ti panagladingit wenno panagsangit wenno ut-ot. Dagiti dati a bambanag ket limmabasen.’ Imbaga Daydiay nakatugaw iti trono: ‘Kitaem! Pabpabaruek ti amin a bambanag.’ Kunana pay: ‘Isuratmo, ta mapagtalkan ken pudno dagitoy a sasao.’”​—Apocalipsis 21:4, 5.

Agpada nga ipakita ti uniberso ken ti Biblia ti personalidad ken kababalin ti nailangitan nga Amatayo. Nupay saan a direkta nga iyaw-awis ti sangaparsuaan nga am-ammuentayo ti Dios kas nadekket a Gayyem, direkta nga aw-awisennatayo ti Biblia: “Umasidegkayo iti Dios, ket umasidegto kadakayo.” (Santiago 4:8) Ibaga ti Aramid 17:27: “Saan nga adayo [ti Dios] iti tunggal maysa kadatayo.”

Bayat nga am-ammuem ti Dios, ad-adda a makombinsirka nga ‘ipatpategnaka.’ (1 Pedro 5:7) Ania dagiti pagsayaatan ti kasta a panagtalek ken Jehova?

Kitaentayo ti kapadasan ni Toru, a taga-Japan. Dimmakkel iti Kristiano a nanangna, ngem nakikadua iti naranggas a grupo dagiti yakuza wenno ti Japanese Mafia. Malagipna, “Ammok a kaguranak idi ti Dios, ket panagriknak, dusa kaniak ti ipapatay dagiti kakaduak, nangruna dagiti ay-ayatek.” Inamin ni Toru a gapu ta nagulo ti panunotna ken ti sinerrekna a grupo, nagbalin a “naranggas ken awan asina.” No maipapan iti ambisionna, malagipna, “Kayatko ti matay nga ubing kalpasan a makapatayak iti nalatlatak ngem siak ket daytanto ti pakalaglagipanda kaniak.”

Ngem idi nagadal iti Biblia ni Toru ken ti baketna a ni Hannah, dakkel ti nagbalbaliwan ti biagna ken ti panangmatmatna. “Nakitak ti dakkel a panagbalbaliw  ni lakayko,” kuna ni Hannah. Kastoy ti makuna itan ni Toru: “Adda Dios a maseknan iti tunggal maysa kadatayo. Dina kayat a matay ti asinoman, ken sidadaan a mangpakawan kadagiti naimpusuan nga agbabbabawi iti basolda. Denggenna dagiti bambanag a ditay maibaga iti sabali ken saan a maawatan ti dadduma. Asidegen a pukawen ni Jehova ti amin a problema, panagsagaba, ken pakarigatantayo. Uray ita, tulongannatayo iti pamay-an a ditay namnamaen. Ay-ayatennatayo ken tulongannatayo no narigat ti kasasaadtayo.”​—Salmo 136:23.

Kas ipakita ti kapadasan ni Toru, no ammotayo a kabaelan ken asidegen a pagpatinggaen ti Dios ti amin a trahedia ken punasenna ti amin a lua, saan laeng a namnama ti ipaayna no di ket tumulong pay kadatayo a maaddaan iti nasaysayaat a biag itan. Wen, uray iti daytoy a lubong a napnuan panagsagaba, mabalinmo ti magunggonaan iti ayat ken pannakaseknan ti Dios.