Manipud idi naparsua ti sangatauan, nakikomunikar ti Namarsua kadagiti tattao babaen kadagiti anghel ken kadagiti propeta. Malaksid iti dayta, impaisuratna ti mensahena ken dagiti bendision nga inkarina. Dagitoy a kari ti Dios apektaranna ti masanguanam. Pakasarakantayo ita kadagiti kari ti Dios?

Mabasatayo ti mensahe ti Dios iti Nasantuan a Kasuratan. (2 Timoteo 3:16) Kasano nga inusar ti Dios dagiti propeta a mangisurat iti mensahena? (2 Pedro 1:21) Inkabil ti Dios dagiti kapanunotanna iti isip dagiti mannurat, sa insuratda dagita. Kasta met la ita. No ibaon ti negosiante ti sekretariona a mangisurat iti mensahena, bigbigentayo a ti negosiante ti naggapuan ti mensahe. Umasping iti dayta, uray no nangusar ti Dios iti lallaki a nangisurat iti mensahena, isu ti pudpudno a naggapuan dagiti Sagrado a Sursurat.

Nakapatpateg ti Sao ti Dios isu a kayatna a basaen ken maawatan dayta ti amin a tattao. Ita, magun-odanen ti “agnanayon a naimbag a damag” iti “tunggal nasion ken tribu ken lengguahe.” (Apocalipsis 14:6) Babaen ti panangbendision ti Dios, magun-odanen ti intero wenno dadduma a paset ti Sagrado a Sursurat iti nasurok a 3,000 a lengguahe. Ad-adu nga amang dayta ngem iti aniaman a libro ditoy daga.