ADDA DAGITI MAMATI nga isimsimbolo dayta ti panagturay ti Dios iti puso ti maysa a tao. Kuna met ti dadduma a resulta dayta ti panagporsegi dagiti tattao a mangpaadda iti talna ken ayat iti intero a lubong. Ania ti makunam?

TI KUNA TI BIBLIA

“Mangipasdekto ti Dios ti langit iti maysa a pagarian a saanto a pulos madadael. . . . Rumekennanto ken pagpatinggaenna amin dagitoy a pagarian [ti tattao].” (Daniel 2:44) Ti Pagarian ti Dios ket maysa a pudpudno a gobierno.

ANIA PAY TI MAAMMUANTAYO ITI BIBLIA?

• Agturay ti Pagarian ti Dios manipud langit. —Mateo 10:7; Lucas 10:9.

• Ti Pagarian ti usaren ti Dios a mangaramid iti pagayatanna idiay langit ken ditoy daga.—Mateo 6:10.

PANAGKUNAM?

• Awan makaammo

• Dandanin

• Saan nga umay

TI KUNA TI BIBLIA

“Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:14) No naan-anayton a naikasaba ti naimbag a damag, umayton ti Pagarian tapno pagpatinggaenna ti agdama a dakes a sistema.

ANIA PAY TI MAAMMUANTAYO ITI BIBLIA?

• Awan ti asinoman ditoy daga a makaammo no kaano ti eksakto nga iyaay ti Pagarian.—Mateo 24:36.

• Ipakita dagiti padto ti Biblia nga iti din agbayag, umayen ti Pagarian.—Mateo 24:3, 7, 12.