IDI napan a tawen, rinibu a lallaki a Saksi ni Jehova iti intero a lubong ti nadutokan a panglakayen ken ministerial nga adipen. No maysaka kadagitoy a maipatpateg a kakabsat, sigurado a maragsakanka iti baro a pribilehiom.

Ngem mabalin a medio madanaganka. Kuna ti agkabannuag a panglakayen a ni Jason, “Idi nabiit pay a nadutokanak, mariknak a diak kabaelan dagiti baro a responsabilidadko.” Narikna idi da Moises ken Jeremias a dida kabaelan ti baro nga annongen nga inted ni Jehova. (Ex. 4:10; Jer. 1:6) No kasta ti marikriknam, kasano a mapagballigiam dayta ken agtultuloyka a rumang-ay? Panunotem ti Kristiano nga adalan a ni Timoteo.—Ara. 16:1-3.

Mabalin nga agarup 20 ti tawen ni Timoteo idi inawis ni apostol Pablo a kaduana nga agdaliasat. Idi damo, gapu ta ubing pay, mabalin a kurang ti panagtalek ni Timoteo iti bagina ken mabalin a nagkedked a mangibaklay iti baro nga annongenna. (1 Tim. 4:11, 12; 2 Tim. 1:1, 2, 7) Ngem kalpasan ti 10 a tawen, imbaga ni Pablo iti kongregasion ti Filipos: “Mangin-inanamaak ken Apo Jesus nga ibaonko kadakayo ni Timoteo iti mabiit . . . Ta awanen kaniak ti sabali pay nga addaan kababalin a kas kenkuana.”—Fil. 2:19, 20.

Kasano a nagbalin ni Timoteo a nagsayaat a panglakayen? Adda innem a masursurom iti ulidanna.

1. Pudpudno a maseknan kadagiti tattao. Imbaga ni Pablo kadagiti kakabsat idiay Filipos: “[Ni Timoteo] sipupudno a mangisakitto iti bambanag maipapan kadakayo.” (Fil. 2:20) Wen, maseknan ni Timoteo iti sabsabali. Talaga nga interesado iti naespirituan a pagsayaatanda, ket situtulok a nagsakripisio para kadakuada.

Dika koma agbalin a kas iti drayber a pampanunotenna laeng ti eksakto nga oras ti isasangpetna iti destinasionna imbes a ti panangiluganna kadagiti pasahero. Ni William a mararaem a panglakayen iti nasuroken a 20 a tawen binalakadanna dagiti kabbaro a nadutokan a lallaki. Kunana: “Ipategyo dagiti kakabsat. Kitaenyo dagiti kasapulanda imbes a dagiti laeng urnos ti organisasion.”

2. Inyun-unana ti naespirituan a bambanag. Inkompara ni Pablo ti ulidan ni Timoteo iti dadduma, ket kinunana: “Dagiti dadduma sapsapulenda dagiti bukodda a pagimbagan, saan a dagidiay ken Kristo Jesus.” (Fil. 2:21) Idiay Roma ti nangaramidan ni Pablo iti suratna. Nadlawna a maseknan unay dagiti kakabsat sadiay iti personal a pagimbaganda. Kurang ti panagsakripisioda iti naespirituan. Ngem naiduma ni Timoteo! No adda gundaway tapno maisaknap ti naimbag a damag, tuladenna ti kababalin ni Isaias, a nagkuna: “Adtoyak! Ibaonnak!”—Isa. 6:8.

Kasano a mabalansem dagiti personal ken naespirituan nga obligasionmo? Umuna, adda masapul nga iyun-unam. Imparegta ni Pablo: ‘Siguraduem ti napatpateg a bambanag.’ (Fil. 1:10) Iprioridadmo dagiti para iti Dios. Maikadua, pasimpliem ti bambanag. Liklikam dagiti mangibus iti oras ken pigsam. Inyunay-unay ni Pablo ken Timoteo: “Umadayoka kadagiti tarigagay a naikasigudan iti  kinaagtutubo, ngem surotem ti kinalinteg, pammati, ayat, talna.”—2 Tim. 2:22.

3. Nagaget iti sagrado a panagserbi. Impalagip ni Pablo kadagiti taga-Filipos: “Ammoyo ti pammaneknek nga impaay [ni Timoteo] maipapan ti bagina, a kas iti maysa nga anak iti ama isu nagpaadipen a kaduak iti pannakaidur-as ti naimbag a damag.” (Fil. 2:22) Saan a sadut ni Timoteo. Nagaget a nakipagtrabaho ken Pablo ket nagbalinda a nadekket.

Nakaad-adu ti trabaho iti organisasion ti Dios ita. Makaparagsak dagita a trabaho ken pasingedendaka kadagiti kakabsatmo. Pagbalinem ngarud a kalat a kanayon nga ‘aduanka iti aramiden iti trabaho ti Apo.’—1 Cor. 15:58.

4. Inyaplikarna dagiti nasursurona. Insurat ni Pablo ken Timoteo: “Sinurotmo a sisisinged ti sursurok, ti dana ti panagbiagko, ti panggepko, ti pammatik, ti mabayag a panagituredko, ti ayatko, ti panagibturko.” (2 Tim. 3:10) Inyaplikar ni Timoteo dagiti nasursurona, isu a kualipikado a maikkan iti dakdakkel a responsabilidad.—1 Cor. 4:17.

Adda kadi nataengan iti naespirituan a mamalbalakad kenka? No awan, mabalin nga agsapulka. Nalagip ti nabayagen a panglakayen a ni Tom: “Impakitaannak ti maysa nga eksperiensiado a panglakayen iti personal nga interes ken sinanaynak a naimbag. Kanayonak nga agpabalakad kenkuana ket inyaplikarko dagita. Gapu iti dayta, alisto a naaddaanak iti kompiansa.”

5. Nagtultuloy a nagsanay. Imparegta ni Pablo ken Timoteo: “Sanayem ta bagim buyogen ti nadiosan a debosion kas kalatmo.” (1 Tim. 4:7) Uray adda coach ti maysa nga atleta, kasapulanna latta ti agsanay. Imbalakad ni Pablo ken Timoteo: “Itultuloymo nga igaed ti bagim iti panagbasa iti publiko, iti panangbagbaga, iti panangisuro. . . . Utobem dagitoy a banag; maipamaysaka kadakuada, tapno ti panagrang-aymo maiparangarang iti amin a tattao.”—1 Tim. 4:13-15.

Itultuloymo met a pasayaaten dagiti abilidadmo. Parang-ayem ti espiritualidadmo ken ammuem dagiti kabaruan nga urnos iti organisasion. Liklikam met ti nalabes a panagtalek iti bagi—nalabit panunotem nga adun ti kapadasam isu a kabaelamon a tamingen ti amin a situasion uray saanka nga agsukimat a naimbag. Kas ken Timoteo, “itultuloymo nga asikasuen ti bagim ken ti isursurom.”—1 Tim. 4:16.

6. Nagpannuray iti espiritu ni Jehova. Impalagip ni Pablo ken Timoteo ti ministeriona: “Daytoy nasayaat a naitalek saluadam babaen ti nasantuan nga espiritu nga agtataeng kadatayo.” (2 Tim. 1:14) Tapno makapagtalinaed ni Timoteo iti ministeriona, masapul nga agpannuray iti espiritu ti Dios.

Napaliiw ti dinekdekadan a panglakayen a ni Donald: “Masapul nga ipateg dagiti nadutokan a lallaki ti relasionda iti Dios. ‘Kumired’ dagiti mangaramid iti dayta. No ikararagda ti espiritu ti Dios ken patanorenda ti bungana, agbalinda a pudpudno a bendision kadagiti kakabsat.”—Sal. 84:7; 1 Ped. 4:11.

Makaparegta unay a makita ti nagadu a kabbaro a nadutokan a lallaki, a kas kenka, a rumangrang-ay iti naespirituan. Kinuna ni Jason a nadakamat iti rugi: “Manipud nagbalinak a panglakayen, adun ti nasursurok ken dimmakkel ti kompiansak. Maragragsakanak iti annongek ken ibilangko daytoy a naisangsangayan a pribilehio!”

Itultuloymo kadi ti rumang-ay iti naespirituan? Ikagumaam a tuladen ni Timoteo tapno agbalinka met a bendision iti ili ni Jehova.