1, 2. (a) Apay a kabaelantayo nga isuot ti baro a personalidad? (b) Ania dagiti ramanen ti baro a personalidad a mabasa iti Colosas 3:​10-14?

“BARO a personalidad.” Namindua a nagparang dagita a sasao iti Baro a Lubong a Patarus ti Nasantuan a Kasuratan. (Efe. 4:24; Col. 3:10) Tumukoy dayta iti personalidad a “naparsua maitunos iti pagayatan ti Dios.” Kabaelantayo ti maaddaan iti baro a personalidad. Apay? Pinarsuanatayo ni Jehova a kaladladawanna isu a matuladtayo dagiti nagsasayaat a galadna.​—Gen. 1:​26, 27; Efe. 5:1.

² Agpayso a gapu iti natawidtayo a kinaimperpekto kadagiti immuna a nagannaktayo, agduyostayo iti dakes no dadduma. Mabalin a nakaro pay ketdi ti impluensia kadatayo ti aglawlawtayo. Ngem babaen ti tulong ni Jehova, kabaelantayo nga itunos ti kinataotayo iti kayatna a pagbalinantayo. Tapno tumibker ti determinasiontayo a mangaramid iti dayta, adalentayo ti dadduma a paset ti baro a personalidad nga insurat ni Pablo. (Basaen ti Colosas  3:​10-14.) Ken no kasano a mausartayo dagita iti ministeriotayo.

3. Ania ti maysa a kababalin a karaman iti baro a personalidad?

³ Idi imparegta ni Pablo ti panangisuot iti baro a personalidad, inlawlawagna a ti saan a panangidumduma ket nagpintas a kababalin a karaman iti baro a personalidad. Kunana: “Awan ti Griego wenno uray Judio, pannakakugit wenno uray di pannakakugit, ganggannaet, Escita, adipen, siwayawaya a tao.” * Apay nga awan koma panamaglalasin iti kongregasion gapu iti puli, naggapuan a pagilian, wenno kasasaad ti biag? Gapu ta dagiti pudno a pasurot ni Kristo ‘maymaysada amin.’​—Col. 3:11; Gal. 3:28.

4. (a) Kasano koma a tratuen dagiti adipen ni Jehova dagiti kapammatianda? (b) Ania dagiti situasion a mabalin a marigatan nga agkaykaysa dagiti Kristiano?

⁴ Dagiti nakakawes iti baro a personalidad nadayaw ti panangtratoda iti amin, kapammatianda man wenno saan, ken aniaman ti puli wenno kasasaad ti biagda. (Roma 2:11) Mabalin a narigat dayta iti dadduma a paset ti lubong. Kas pagarigan, kaaduan a Saksi idiay South Africa ti aggigian iti lugar a nasinasina gapu iti puli​—adda dagiti lugar ti baknang, nangisit, wenno laok ti pulina. Tapno maparegta dagiti kakabsat nga ‘agpalawa,’ nagaramid ti Bagi a Manarawidwid idi Oktubre 2013 iti espesial nga urnos tapno mas makapagiinnammo dagiti kakabsat. (2 Cor. 6:13) Ania ti karaman iti dayta nga urnos?

5, 6. (a) Tapno tumibker ti panagkaykaysa dagiti adipen ti Dios iti maysa a pagilian, ania ti nayurnos? (Kitaen ti ladawan iti rugi ti artikulo.) (b) Ania dagiti resultana?

⁵ Iti sumagmamano a ngudo ti lawas, nayurnos nga agkadua ti dua a kongregasion nga agsabali ti lengguahe wenno pulina. Agkakadua dagiti kakabsat a mangasaba, makigimong, ken aglalangen ken agpapangan iti balay dagiti kakabsat. Ginasut a kongregasion ti nakiraman, ket nakaawat ti sanga nga opisina iti adu a nagsasayaat a report. Naggapu pay ketdi kadagiti saan a Saksi ti dadduma kadagita. Kas pagarigan, kuna ti maysa a pastor, “Saanak a Saksi ngem makunak a nakamaymayat ti naurnos a panangasabayo, ken agtutunoskayo uray agduduma ti puliyo.” Ania ti epekto dayta kadagiti kakabsat?

⁶ Idi damo, mabain ti sister a ni Noma, a Xhosa ti lengguahena, a mangimbitar kadagiti puraw a kakabsat nga adda iti English a kongregasion gapu ta bassit ti balayna. Ngem idi nagkakaduada iti pangasabaan ken iti balay dagiti puraw a kakabsat, kunana, “Kaslada met laeng kadakami!” Isu nga idi batangen ti Xhosa a kongregasion ti mangsangaili iti English a kongregasion, nangisagana ni Noma iti makan ken nagawis kadagiti bisita. Karaman kadagiti inawisna ti maysa a puraw a panglakayen. Kuna ni Noma: “Nasdaawak ta kinayatna ti agtugaw iti bassit a plastik a kahon.” Gapu iti dayta nga agtultuloy nga urnos, adu a kakabsat ti nagbalin nga aggagayyem ken kayatda nga itultuloy nga am-ammuen ti ad-adu pay a kakabsat.

7. Apay a kasapulan a mangipakitatayo iti pannakipagrikna ita?

⁷ Masuboktayo latta bayat nga adda pay laeng ti lubong ni Satanas. Kas pagarigan, adu ti makapaspasar iti nakaro a sakit, kinaawan trabaho, pannakaidadanes, natural a kalamidad, pannakapukaw dagiti sanikua gapu iti krimen, ken dadduma pay a rigat. Tapno makapagtitinnulongtayo iti  pakarigatantayo, masapul nga adda pudpudno a pannakipagriknatayo. Tignayennatayo ti nadungngo a pannakipagrikna a mangipakita iti asi. (Efe. 4:32) Tulongannatayo dagitoy a paset ti baro a personalidad a mangtulad iti Dios ken mangliwliwa iti dadduma.​—2 Cor. 1:​3, 4.

8. Ania dagiti mabalin a pagsayaatan ti pannakipagrikna ken panangngaasi iti amin iti kongregasion? Mangted iti pagarigan.

⁸ Kasano nga agbalintayo a naas-asi kadagiti ganggannaet wenno marigrigat iti kongregasion? Gayyementayo ida ken ipakitatayo a napategda iti kongregasion. (1 Cor. 12:​22, 25) Kitaentayo ti napasamak iti Pilipino a ni Dannykarl a napan idiay Japan. Naiduma ti pannakatratona iti pannakatrato dagiti katrabahuanna a Hapon. Idi agangay, nakigimong kadagiti Saksi ni Jehova. “Dandani Hapon amin ti nakigimong,” kuna ni Dannykarl, “ngem nakabarbara ti panangawatda kaniak, a kasla agaammokami a datin.” Intultuloy nga impakitaan dagiti kakabsat iti asi ket nakatulong dayta iti espiritualidadna. Nabautisaran ket panglakayen itan. Ibilang dagiti panglakayen a bendision ni Dannykarl ken ti baketna a ni Jennifer iti kongregasion. Kuna dagiti panglakayen maipapan kadakuada, “Nakasimsimple ti biagda a payunir ken nagmayatda a pagtuladan iti panangyun-una iti Pagarian.”​—Luc. 12:31.

9, 10. Ania dagiti nagsasayaat a resulta ti panagbalin a naasi iti ministeriotayo?

⁹ Ti panangikasaba iti mensahe ti Pagarian ket gundawaytayo a ‘mangaramid iti naimbag iti amin’ a tattao. (Gal. 6:10) Gapu iti asi dagiti Saksi kadagiti aggapu iti sabali a pagilian, adu kadakuada ti nagsursuro iti sabali a lengguahe. (1 Cor. 9:23) Nagresulta dayta iti bendision. Kas pagarigan, nagsursuro iti Swahili ti kabsat a taga-Australia a ni Tiffany tapno makatulong iti Swahili ti lengguahena a kongregasion iti siudad ti Brisbane. Uray no narigatan a nagsursuro ni Tiffany, dakkel ti naitulong dayta kenkuana. Kunana: “No kayatmo a naragsak ti ministeriom, agboluntarioka iti kongregasion a sabali ti lengguahena. Kasla agpaspasiarka ngem saanen a masapul a panawam ti lugaryo. Mapadasam ti sangalubongan a panagkakabsattayo ken ti nakaskasdaaw a panagkaykaysatayo.”

¹⁰ Kitaentayo met ti kapadasan ti maysa a pamilia idiay Japan. Kuna ti balasangda a ni Sakiko: “Idi 1990’s, dandani kanayon nga adda makasaritami a Brazilian iti pangasabaan. No ibasami ti Biblia iti Portuguese, kas koma ti Apocalipsis 21:​3, 4 wenno Salmo 37:​10, 11, 29, dumngegda a naimbag, ken makaluada pay no dadduma.” Ngem saan a nagpatingga dita ti asi nga impakita ti pamilia.  “Idi nakitami a talaga nga interesadoda,” kuna ni Sakiko, “nagsursurokami a sangapamiliaan iti Portuguese.” Idi agangay, timmulongda iti pannakabukel ti maysa a Portuguese a kongregasion. Iti panaglabas ti tawen, adu ti natulongan ti pamilia nga agbalin nga adipen ni Jehova. “Adu a sakripisio ti kasapulan iti panagsursuro iti Portuguese,” kuna pay ni Sakiko, “ngem ad-adu nga amang dagiti bendision a naawatmi. Agyamyamankami unay ken Apo Jehova.”​—Basaen ti Aramid 10:​34, 35.

11, 12. (a) Apay a nakapatpateg nga umiso koma ti panggeptayo a mangikawes iti baro a personalidad? (b) Ania ti makatulong kadatayo nga agtalinaed a napakumbaba?

¹¹ Ikawkawestayo ti baro a personalidad tapno idaydayawtayo ni Jehova, saan a tapno padayawandatayo dagiti tattao. Laglagipentayo a nagbasol uray ti perpekto idi nga espiritu a parsua ta impalubosna nga agramut kenkuana ti kinapannakkel. (Idilig ti Ezequiel 28:17.) Kas managbasol a tattao, narigrigat pay ngarud a liklikantayo ti kinapannakkel ken kinatangsit! Ngem kabaelantayo nga ikawes ti kinapakumbaba. Ania ti makatulong?

¹² Tapno agtalinaedtayo a napakumbaba, masapul nga inaldaw nga iwayaantayo nga utoben dagiti mabasatayo iti Sao ti Dios. (Deut. 17:​18-20) Nagsayaat nga utobentayo dagiti pannursuro ni Jesus ken ti kinapakumbabana. (Mat. 20:28) Binugguanna pay ketdi ti saka dagiti apostolna. (Juan 13:​12-17) Masapul met a kanayon nga ikararagtayo ti espiritu ti Dios a tumulong kadatayo a manglaban iti rikrikna a nangatngatotayo ngem ti dadduma.​—Gal. 6:​3, 4; Fil. 2:3.

13. Ania dagiti pagsayaatan ti panagbalin a napakumbaba?

¹³ Basaen ti Proverbio 22:4. Masapul a napakumbaba ti amin a pudno nga agdaydayaw, ket agresulta dayta iti adu a bendision. Makatulong ti kinapakumbaba tapno natalna ken agkaykaysa ti kongregasion. No napakumbabatayo ken agtalinaedtayo a kasta, umawattayo iti di kaikarian nga asi ti Dios. Kuna ni apostol Pedro: “Dakayo amin bariksanyo ti bagbagiyo iti kinapakumbaba iti panagpampanunot maipaay iti maysa ken maysa, agsipud ta ti Dios busorenna dagiti natangsit, ngem mangted iti di kaikarian a kinamanangngaasi kadagiti napakumbaba.”​—1 Ped. 5:5.

14. Asino ti kasayaatan a pagtuladan iti kinaalumamay ken kinaanus?

¹⁴ Ibilang ita dagiti tattao a nakapuy dagiti naalumamay ken naanus. Ngem saan nga agpayso dayta! Nagtaud dagita a nagsasayaat a kababalin iti kabibilgan iti uniberso. Ni Apo Dios a Jehova ti kasayaatan a pagtuladan iti kinaalumamay ken kinaanus. (2 Ped. 3:9) Utobenyo ti sungbatna babaen kadagiti anghel idi nakitinnawar kenkuana da Abraham ken Lot. (Gen. 18:​22-33; 19:​18-21) Kasta met, nasurok a 1,500 a tawen nga inan-anusan ni Jehova ti nasubeg a nasion ti Israel.​—Ezeq. 33:11.

15. Kasano nga impakita ni Jesus ti kinaalumamay ken kinaanus?

¹⁵ “Naalumamay” ni Jesus. (Mat. 11:29) Inan-anusanna ti pagkapuyan dagiti pasurotna. Inibturanna ti saan a patas a panangtrato kenkuana dagiti tattao bayat ti ministeriona. Naalumamay ken naanus latta uray agingga iti ipapatayna. Idi permi a marigrigatan a nakalansa iti kayo, inkararag ni Jesus ken Amana a pakawanenna dagiti mangpapatay kenkuana, ta kunana, “saanda nga ammo ti ar-aramidenda.” (Luc. 23:34) Talaga a nagsayaat a pagtuladan iti kinaalumamay ken kinaanus uray iti naut-ot ken  narigat a kasasaad!​—Basaen ti 1 Pedro 2:​21-23.

16. Kasano a maipakitatayo ti kinaalumamay ken kinaanus?

¹⁶ Kasano a maipakitatayo ti kinaalumamay ken kinaanus? Imbaga ni Pablo ti maysa a pamay-an idi nagsurat kadagiti kapammatianna: “Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali. Kas iti sibubulos a panangpakawan kadakayo ni Jehova, kasta met ti aramidenyo.” (Col. 3:13) Talaga a kasapulantayo ti kinaalumamay ken anus iti panagtulnog iti daytoy a bilin. Ngem no manangpakawantayo, maadda ken agtultuloy ti panagkaykaysa iti kongregasion.

17. Apay a nagpateg ti kinaalumamay ken kinaanus?

¹⁷ Masapul nga isuot dagiti Kristiano ti kinaalumamay ken kinaanus. Nakapatpateg dayta iti pannakaisalakantayo. (Mat. 5:5; Sant. 1:21) Napatpateg pay, maidaydayawtayo ni Jehova babaen kadagitoy a galad ken matulongantayo ti dadduma nga agtulnog iti Biblia.​—Gal. 6:1; 2 Tim. 2:​24, 25.

18. Ania ti koneksion ti ayat ken ti saan a panangidumduma?

¹⁸ Amin a kababalin a napagsasaritaantayo ket nainaig unay iti ayat. Kas pagarigan, masapul idi a balakadan ni Santiago dagiti kakabsat gapu ta nasaysayaat ti panangtratoda kadagiti babaknang ngem kadagiti marigrigat. Impakitana a maikontra dayta iti naarian a linteg: “Masapul nga ayatem ti padam a tao a kas iti bagim.” Kinunana pay: “No agtultuloykayo a mangipakita iti paboritismo, agar-aramidkayo iti basol, ta tubngarennakayo ti linteg kas managsalungasing.” (Sant. 2:​8, 9) Tignayennatayo ti ayat a di mangidumduma gapu iti edukasion, puli, wenno kasasaad ti biag. Wen, masapul a pudpudno ti ditayo panangidumduma. Masapul a nairamut dayta iti personalidadtayo.

19. Apay a nagpateg a kawesantayo ti bagbagitayo iti ayat?

¹⁹ Naanus ken naasi met ti ayat ken “saan nga agtangsit.” (1 Cor. 13:4) Talaga a kasapulan ti anus, asi, ken kinapakumbaba tapno maitultuloytayo nga ikasaba ti mensahe ti Pagarian kadagiti tattao. (Mat. 28:19) Makatulong dagita tapno nalaklakatayo a pakibagayan ti amin a kakabsat iti kongregasion. Ania ti bendision iti panangipakita iti kasta nga ayat? Agresulta dayta iti nagkaykaysa a kongregasion a mangtultulad ken Jehova, ket maatrakar dagiti interesado. Maitutop la unay ti kuna ti Biblia maipapan iti baro a personalidad: “Malaksid kadagitoy amin a banag, kawesanyo ti bagbagiyo iti ayat, ta dayta ket naan-anay a singgalut ti panagkaykaysa.”​—Col. 3:14.

20. (a) Ania dagiti isaludsodtayo iti bagitayo, ken apay? (b) Ania ti padpadaanantayo?

²⁰ Panunotentayo koma amin, ‘Ania pay dagiti masapul nga aramidek tapno mauksobko ti daan a personalidad ken saankon nga isuot pay dayta?’ Ipasnektayo nga ikararag ti tulong ti Dios ken ikagumaantayo nga abaken ti aniaman nga ugali wenno aramid a manglapped kadatayo a mangtawid iti Pagarian ti Dios. (Gal. 5:​19-21) Isaludsodtayo pay, ‘Agtultuloy kadi a mapabpabaro ti panagpampanunotko?’ (Efe. 4:​23, 24) Para kadagiti Kristiano, agtultuloy a proseso ti panangisuot ken saan a panangikkat iti baro a personalidad agingga a naan-anay a maaramidtayon dayta. Nagragsak la ketdi ti biag inton amin nga am-ammotayo ket nakawesanen iti kinaperpekto ken baro a personalidad!