“DAKKEL ti anien, ngem bassit dagiti trabahador. Gapuna ipakaasiyo iti Apo ti panagani a mangibaon kadagiti trabahador iti panaganina.” (Luc. 10:2) Daytoy nga imbaga ni Jesus agarup 2,000 a tawenen ti napalabas iladawanna ti kasasaad ita idiay Myanmar. Apay? Agarup 4,200 laeng nga agibumbunannag ti mangikaskasaba idiay iti naimbag a damag iti 55 a milion nga umili.

Ngem ti “Apo ti panagani” a ni Jehova, tinukayna ti puso ti ginasut a kakabsat iti dadduma a pagilian a mapan iti daytoy a pagilian iti Abagatan a Daya nga Asia tapno tumulongda iti naespirituan a panagani. Ania ti nakatignayanda a mangpanaw iti pagilianda? Ania ti nakatulong kadakuada nga umakar? Ken ania dagiti bendisionda? Kitaentayo.

Sumagmamano a tawenen ti napalabas, ni Kazuhiro, a maysa a payunir idiay Japan, ket nagkissiw, naawanan iti puot, sa nayospital. Imbaga ti doktorna a dina mabalin ti agmaneho iti dua a tawen. Nabigla ni Kazuhiro. ‘Kasano ngaruden a maituloyko ti paggugustok nga aramiden​—ti panagpayunir?’ napanunotna. Nagkarkararag ken Jehova ket impakaasina a tulonganna tapno maitultuloyna ti agpayunir.

Inyestoria ni Kazuhiro: “Makabulan kalpasanna, nadamag ti gayyemko nga agserserbi iti Myanmar ti situasionko. Tinawagannak ket imbagana: ‘Bus ti kangrunaan a pagluganan ditoy Myanmar. No umayka, maitultuloymo ti agpayunir uray awan luganmo.’ Dinamagko iti doktorko no mabalinko ti mapan idiay Myanmar. Nasdaawak iti insungbatna: ‘Adda bimmisita ita ditoy Japan nga espesialista iti utek a taga-Myanmar. Iyam-ammoka tapno maasikasonaka no agkissiwka manen.’ Imbilangko a sungbat ni Jehova ti imbaga ti doktor.”

Dagus a nag-e-mail ni Kazuhiro iti sangay iti Myanmar ket imbagana a kayatda ken Mari a baketna ti agpayunir idiay. Kalpasan laeng ti lima nga aldaw, insungbat ti sangay: “Umaykayo, kasapulanmi ti adu a payunir!” Inlakoda ti dua a luganda, nangalada iti bisa, sa gimmatangda iti tiket ti eroplano. Ita, naragsakda nga agserserbi iti sign-language group idiay Mandalay. Kuna ni Kazuhiro: “Gapu iti daytoy a  kapadasanmi, nariknami a bimmileg ti panagtalekmi iti kari ti Dios iti Salmo 37:5: ‘Iyadanim ken Jehova ti dalanmo; ket agkammatalekka kenkuana, ket isu agtignayto.’”

Idi 2014, pribilehio dagiti Saksi ni Jehova iti Myanmar ti nangbisita para iti espesial a kombension. Adu ti immatender a delegado manipud iti sabali a pagilian. Maysa kadakuada ti sister nga agtawen iti 34 a ni Monique a taga-United States. Kunana: “Idi nakaawidak manipud kombension, inkararagko ken Jehova no ania ti sumaruno nga aramidek. Imbagak met kadagiti nagannakko dagiti naespirituan a kalatko. Nariknami amin a masapul nga agsubliak iti Myanmar. Ngem diak nakapagdesision a dagus ken namin-adu a nagkarkararagak.” Ilawlawagna no apay.

“Kinuna ni Jesus kadagiti pasurotna a ‘pattapattaenda ti magastos.’ Isu nga insaludsodko iti bagik: ‘Kabaelak kadi ti umakar? Masuportarak kadi ti bagik iti dayta a pagilian uray bassit ti tiempok nga agtrabaho?’” Inamin ni Monique: “Naamirisko a kurang ti kuartak nga umakar iti adayo a pagilian.” Kasano ngarud a nakaakar?​—Luc. 14:28.

Inyestoria ni Monique: “Maysa nga aldaw, pinaayabannak ti boss-ko. Madanaganak idi ta baka ikkatennak iti trabahok, ngem saan met gayam. Nagyaman ketdi iti nasayaat a panagtrabahok. Sa imbagana nga ikkannak iti bonus, ket eksakto dayta para kadagiti babayadak!”

Agserserbi ni Monique idiay Myanmar sipud idi Disiembre 2014. Ania ti mariknana iti ministeriona iti lugar a dakkel ti panagkasapulanna? “Nakaragragsakak ditoy,” kunana. “Tallo ti iyad-adalak iti Biblia. Maysa kadakuada ti agtawen iti 67. Kanayon a kablaawannak iti isem ken nairut nga arakup. Nakasangit idi naammuanna a Jehova ti nagan ti Dios. Imbagana: ‘Itak la a mangngeg a Jehova ti nagan ti Dios. Adayo nga ub-ubingka ngem insurom kaniak ti kapatgan a banag.’ Siempre, nakasangitak met. Gapu kadagitoy a kapadasan, makaparagsak unay ti agserbi iti lugar a dakkel ti panagkasapulanna.” Itay laeng nabiit, nageskuela ni Monique iti School for Kingdom Evangelizers.

Ti maysa pay a nakatignayan ti dadduma nga umakar idiay Myanmar ket ti salaysay iti 2013 Tinawen a Libro Dagiti Saksi ni Jehova maipapan iti daytoy a pagilian. Ni Li, a sister nga agtawen iti nasurok a 30, ket aggigian idin iti Abagatan a Daya nga Asia. Adda full-time a trabahona ngem gapu iti salaysay iti Tinawen a Libro, pinanunotna ti agserbi idiay Myanmar. “Idi immatenderak iti espesial a kombension idiay Yangon idi 2014, naam-ammok ti maysa nga agassawa nga immakar ditoy Myanmar tapno tumulong iti Chinese a teritoria. Gapu ta ammok ti ag-Chinese, nagdesisionak nga umakar ditoy Myanmar tapno tumulong iti Chinese group. Nakikaduaak ken Monique ket immakarkami ditoy Mandalay. Binendisionannakami ni Jehova iti part-time a trabaho nga agisuro iti maysa nga eskuelaan, ken nakasapulkami iti apartment iti asideg. Uray napudot ken medio narigat, naragsak ti panagserbik ditoy. Simple ti biag dagiti taga-Myanmar, ngem nadayawda ken dumngegda iti naimbag a damag. Makapagagar unay a makita a pappapartaken ni Jehova ti trabaho. Kombinsidoak a pagayatan ni Jehova nga addaak ditoy Mandalay.”

Adu a boluntario iti lugar a dakkel ti panagkasapulanna ti nakapadas iti bileg ti kararag, kas kada Jumpei ken ni baketna a Nao, nga agpada a nasurok a 30 ti tawenda. Addada idin iti sign-language a kongregasion idiay Japan. Apay nga immakarda  idiay Myanmar? Inyestoria ni Jumpei: “Kalatmi a talaga ken baketko ti agserbi iti sabali a pagilian a dakkel ti panagkasapulanna. Adda kakongregasionmi idi a brother iti sign-language idiay Japan nga immakar ditoy Myanmar. Uray no bassit ti urnongmi, immakarkami idi Mayo 2010. Sibabara nga inabrasadakami dagiti kakabsat ditoy!” Ania ti makunana iti ministerioda iti sign-language iti Myanmar? “Nagadu ti interesado. No ipabuyami dagiti sign-language a video, masmasdaaw dagiti tuleng ken umel a bumalay. Nakaragragsakkami ta nagdesisionkami nga agserbi ken Jehova ditoy!”

Kasano a naipaay ti pinansial a kasapulan da Jumpei ken Nao? “Kalpasan ti tallo a tawen, maib-ibusen ti urnongmi ken kurangen ti pagabangmi iti balay iti sumaruno a tawen. Namin-adu a nagkarkararagkami ken baketko. Dimi ninamnama a suratannakami ti sangay ket naawiskami nga agserbi kas temporary special pioneer! Nagtalekkami ken Jehova, ket saannakami a binaybay-an. Ipapaay ni Jehova ti amin a kasapulanmi.” Itay laeng nabiit, nageskuela met da Jumpei ken Nao iti School for Kingdom Evangelizers.

Immakar idiay Myanmar da Simone, a brother nga agtawen iti 43 a nayanak idiay Italy, ken ni baketna nga Anna, nga agtawen iti 37 a nayanak idiay New Zealand. Ania ti nakatignayanda? Kuna ni Anna: “Daydiay salaysay ti Myanmar iti 2013 Tinawen a Libro!” Imbaga ni Simone: “Dakkel a pribilehio ti agserbi ditoy Myanmar. Nasimsimple ti biag, ken ad-adu ti tiempok iti trabaho ni Jehova. Nagsayaat a mapadasan ti panangaywan ni Jehova bayat nga agserserbitayo iti lugar a dakkel ti panagkasapulanna.” (Sal. 121:5) Imbaga ni Anna: “Mas naragragsakak itan. Simple ti biagmi. Ad-adu ti tiempok ken lakayko, ket nasingsingedkamin. Naaddaankami iti baro a gagayyem. Saan nga idumduma dagiti tattao ditoy dagiti Saksi, ken adu ti makasabaan nga interesado!” Kasano a kasta?

Inyestoria ni Anna: “Naminsan, adda estudiante iti unibersidad a nakasabaak iti palengke ket imbagak nga agkitakamto manen. Idi nagkitakami, adda inkuyogna a gayyemna. Iti simmaruno a panagkitami, adda dadduma pay nga inkuyogna. Idi agangay, nangikuyog iti ad-adu pay. Ita, lima kadakuada ti iyad-adalak.” Kuna ni Simone: “Mannakigayyem dagiti tattao iti teritoria ken adu ti interesado. Kurang lang ti tiempomi a sumarungkar kadakuada.”

Ngem ania ti praktikal nga inaramid ti dadduma sakbay a nagdesisionda nga umakar idiay Myanmar? Inyestoria ni Mizuho a taga-Japan: “Idi pay a kayatmi ken lakayko a Sachio ti agserbi iti pagilian a dakkel ti panagkasapulanna, ngem sadino? Idi nabasami ti salaysay ti Myanmar iti 2013 Tinawen a Libro, natignaykami iti nagmamayat a kapadasan isu a pinanunotmi no posible a makapagserbikami  iti Myanmar.” Innayon ni Sachio: “Nagdesisionkami a pasiarenmi iti makalawas ti Yangon, ti kangrunaan a siudad ti Myanmar, tapno arigna agespiakami. Gapu iti dayta, nakombinsirkami a masapul nga umakarkami ditoy.”

Ni Rodney ken ni baketna a Jane, a taga-Australia ken agpada nga agtawen iti nasurok a 50, ken dagiti annakda a da Jordan ken Danica ket boluntarioda iti Myanmar sipud idi 2010. Kuna ni Rodney: “Natukay ti pusomi a tumulong kadagiti tattao a mabisbisin iti naespirituan. Irekomendak iti dadduma a pamilia a padasenda ti agserbi iti lugar a kas iti Myanmar.” Apay? “Nagsayaat ti naaramidan daytoy iti espiritualidad ti pamiliami! Adu nga agtutubo ti nakapokus iti selpon, lugan, trabaho, ken dadduma pay. Ngem nakapokus dagiti annakmi nga agsursuro iti baro a sasao nga usarenda iti ministerio. Sursuruenda ti makirinnason kadagidiay saan a pamiliar iti Biblia ken ti panagkomento iti gimong babaen ti lengguahe ti kongregasionmi, ken nakapokusda iti adu a dadduma pay a makaparagsak a naespirituan nga aktibidad.”

Inlawlawag ni Oliver, a brother a taga-United States ken agtawen iti 37, no apay nga irekomendana daytoy a kita ti panagserbi: “Adu ti pagimbagan ti agserbi ken Jehova iti lugar a saan a komportable kenka. Napabileg ti panagtalekko ken Jehova iti aniaman a kasasaad a pakaipasanguak. Gapu iti panagserbik a kadua dagiti dati a diak am-ammo ngem kapadak iti patpatien, nabigbigko a ti kapatgan ditoy lubong ket ti Pagarian ti Dios.” Sireregta pay laeng nga agserserbi ita ni Oliver ken ni baketna nga Anna iti Chinese a teritoria.

Ni Trazel, a sister a taga-Australia ken agtawen iti 52, ket agserserbi idiay Myanmar sipud idi 2004. Kunana: “Kadagidiay ipalubos ti kasasaadda, irekomendak ti panagserbi iti lugar a dakkel ti panagkasapulanna. Nakitak a no determinadoka nga agserbi ken Jehova, bendisionanna ti panagreggetmo. Diak inarapaap nga agbalin a kastoy ti biagko. Makagunggona unay ken nakaragragsak daytoy a biag, awanen ti sapulek pay.”

Sapay koma ta dagitoy a naimpusuan a komento dagiti agserserbi iti lugar a dakkel ti panagkasapulanna pagpanunotennaka a tumulong kadagiti nasingpet a tattao kadagiti saan pay a natrabtrabaho a teritoria. Wen, ipukpukkaw dagitoy a boluntario, “Pangngaasiyo, umakarkayo ditoy Myanmar ket tulongandakami!”