1, 2. (a) Ania a nakapatpateg nga isyu ti masapul a laglagipen dagiti tattao? (b) Apay a napateg a nalawag iti panunottayo a masapul a masolbar dayta nga isyu?

PARA iti adu, kuarta ti kapatgan. Nakapokusda nga agpabaknang wenno mangtaginayon iti kinabaknangda. Para iti dadduma, ti pamilia, salun-at, wenno dagiti naaramidanda ti kapatgan.

² Ngem adda pay adayo a napatpateg ngem kadagita—ti pannakaalangon ti kinasoberano ni Jehova, wenno ti pannakapaneknek a ni laeng Jehova ti maikari nga agturay. Saantayo koma a liplipatan dayta a nakapatpateg nga isyu. Kasano a mabalin a mapasamak dayta? No ad-adda a pampanunotentayo dagiti inaldaw nga aktibidad, problema, wenno pakasubokantayo. Ngem no nalawag iti panunottayo a masapul a maalangon ti kinasoberano ni Jehova, nalaklaka a sanguentayo dagiti pakarigatantayo ken ad-adda a sumingedtayo kenkuana.

3. Ania dagiti akusasion ni Satanas maipapan iti panangituray ti Dios?

³ Kinuestionaran ni Satanas a Diablo ti kalintegan ni Jehova a mangituray. Ipappapilitna a dakes ti panangituray ti Dios ken ipapaidam ni Jehova ti kasayaatan kadatayo. Ibagbagana a naragragsak  dagiti tattao no isuda a mismo ti mangituray iti bagbagida. (Gen. 3:1-5) Pagparparangenna pay nga awan ti tao a pudpudno a nasungdo iti Dios; saan kanon nga agpaituray ken Jehova ti tao no agpasar iti nakaro a rigat. (Job 2:4, 5) Gapu iti dayta, ipalpalubos ni Jehova nga aglabas ti tiempo tapno mapaneknekan a nakarigrigat ti biag no saan nga agpaituray dagiti tattao iti Dios.

4. Apay a masapul a masolbar ti isyu maipapan iti kinasoberano ni Jehova?

⁴ Siempre, ammo ni Jehova a kinaulbod dagiti akusasion ti Diablo. Ngem apay nga ipalpalubosna nga agtultuloy dayta nga isyu, ken inikkanna pay ni Satanas iti gundaway a mangpaneknek iti pammabasolna? Ti sungbat iti dayta ramanenna ti amin nga anghel ken tattao. (Basaen ti Salmo 83:18.) Ngamin, saan a nagpaituray ken Jehova da Adan ken Eva, kasta met ti adu a tattao a simmaruno kadakuada. Gapu iti dayta, posible a panunoten ti dadduma a mabalin a pudno ti akusasion ti Diablo. Agingga a saan a nalawag kadagiti anghel ken tattao ti sungbat dayta, awan latta ti pudpudno a talna ken panagkaykaysa kadagiti pagilian, puli, tribu, pamilia, ken indibidual. Ngem inton mapaneknekan a ni laeng Jehova ti maikari nga agturay, agnanayonton nga agpasakup ti amin iti nalinteg a panangiturayna. Maisublinton ti talna iti intero nga uniberso.—Efe. 1:9, 10.

5. Kasano a maipakitatayo a supsuportarantayo ti kinasoberano ni Jehova?

⁵ Mapaneknekanto a ti laeng Dios ti maikari nga agturay ken nalawagto a makita a saan a nagballigi ti panangituray ni Satanas ken dagiti tattao, ket maikkatto ti turayda. Masuktanto dagita iti turay ti Dios babaen ti Mesianiko a Pagarian. Napaneknekanto metten dagiti matalek a tattao a kabaelan ti tao ti agtalinaed a natarnaw ken nasungdo iti turay ti Dios. (Isa. 45:23, 24) Kayatmo kadi ti mairaman kadagiti natarnaw a mangsupsuporta iti turay ni Jehova? Sigurado a kayatmo. Masapul ngarud a sipapanunottayo iti nakapatpateg nga isyu ken tarusantayo ti kinapateg dayta.

6. Kasano kapateg ti pannakaalangon ti kinasoberano ni Jehova?

⁶ Ti pannakaalangon ti kinasoberano ni Jehova ket nagpateg nga isyu a nakairamanan ti tao. Napatpateg dayta ngem ti panagbalintayo a naragsak. Ngem kaipapananna kadi a saan a napateg ti pannakaisalakantayo wenno saannatayo a talaga nga ipatpateg ni Jehova? Saan. Apay?

7, 8. Apay a ti pannakaalangon ti kinasoberano ti Dios ramanenna ti pannakatungpal dagiti karina?

⁷ Ay-ayaten ken ipatpateg la unay ni Jehova dagiti tattao. Situtulok nga indatonna ti Anakna tapno maaddaantayo iti agnanayon a biag. (Juan 3:16; 1 Juan 4:9) No saan a tungpalen ni Jehova dagiti karina, mabalin a dayta ti pangibatayan ti Diablo nga ulbod ti Dios ken ipapaidamna ti naimbag. No kasta, maibaga a saan a nasayaat ti panangiturayna. Mapaneknekan met nga umiso ti ibagbaga dagiti nauyaw a kabusor: “Sadino ti ayan daytoy naikari a kaaddana? Ay ket, nanipud iti aldaw a naturog ken patay dagidi ammami, amin a bambanag nagtultuloy nga isu latta nanipud idi panangrugi ti sangaparsuaan.” (2 Ped. 3:3, 4) Gapuna, siguraduen ni Jehova a ti pannakaalangon ti kinasoberanona ramanenna ti pannakaisalakan dagiti natulnog a tattao. (Basaen ti Isaias 55:10, 11.) Kanayonanna, nalawag a makita ti ayat ni Jehova iti panangiturayna. Masiguradotayo ngarud a kanayon nga ayaten, ipateg, ken apresiarenna dagiti nasungdo nga adipenna.—Ex. 34:6.

 ⁸ Nakapatpateg kadatayo ti kinasoberano ni Jehova, ngem dina kayat a sawen a saanen a napateg ti pannakaisalakantayo wenno saantayon a napateg kenkuana. Sigsiguraduentayo laeng no ania ti napateg. Makatulong unay dayta tapno silalagiptayo iti nakapatpateg nga isyu ken agtalinaedtayo a nasungdo a mangsuporta iti nalinteg a panangituray ni Jehova.

9. Ania ti akusasion ni Satanas maipapan ken Job? (Kitaen ti ladawan iti rugi ti artikulo.)

⁹ Mabasa iti libro a Job, maysa kadagiti kaunaan a naisurat a libro ti Biblia, no apay a masapul a maaddaantayo iti umiso a kapanunotan. Maammuantayo ditoy ti akusasion ni Satanas a no makapasar ni Job iti nakaro a rigat, tallikudanna ti Dios. Imbaga ni Satanas a padasen ni Jehova a parigaten ni Job. Saan nga inaramid dayta ni Jehova, ngem impalubosna a suboken ni Satanas ni Job. Kinuna ni Jehova: “Isuamin nga adda kenkuana adda ita imam.” (Basaen ti Job 1:7-12.) Di nagbayag kalpasan dayta, napukaw ni Job dagiti sanikuana, dagiti adipenna, ken ti sangapulo a dungdungnguenna nga annak. Inaramid dayta ni Satanas ngem pinagparangna a ti Dios a mismo ti nangparigat ken Job. (Job 1:13-19) Inikkan pay ni Satanas ni Job iti naut-ot ken nakaar-ariek a sakit. (Job 2:7) Kimmaro pay ti lidayna gapu iti makapaupay ken makapasakit nga imbaga ni baketna ken ti tallo a sinsinan a gagayyemna.—Job 2:9; 3:11; 16:2.

10. (a) Ania ti mangipakita a nagtalinaed a natarnaw ni Job iti Dios? (b) Ania ti kamali ni Job?

¹⁰ Ania ti nagbanagan dayta? Napaneknekan nga ulbod ti akusasion ni Satanas! Saan a tinallikudan ni Job ti Dios. (Job 27:5) Ngem temporario a nalipatanna no ania ti napateg. Ti laeng panangpaneknekna iti kinalintegna ti pinampanunotna. Kayatna pay idi a maammuan no apay nga agrigrigat. (Job 7:20; 13:24) Gapu iti adu a rigat a napasaran ni Job, mabalin a maawatantayo no apay a kasta ti inaramidna. Ngem nakita ti Dios a masapul latta a mailinteg ti panagpampanunot ni Job. Ania ti imbaga ni Jehova kenkuana?

11, 12. Ania ti impaawat ni Jehova ken Job, ken ania ti inaramid ni Job?

¹¹ Naisurat dagiti imbaga ti Dios ken Job iti uppat a kapitulo ti libro a Job—kapitulo 38 agingga iti 41. Awan ti mabasatayo nga imbaga ti Dios ti makagapu iti panagrigrigat ni Job. Ti kangrunaan a punto iti sasao ni Jehova ket saan a tapno ilawlawagna no apay nga agrigrigat ni Job, a kasla masapul nga idepensa ti Dios ti bagina. Imbes  ketdi, kayat ni Jehova a mabigbig ni Job ti kinanumona no ikompara iti kinatan-ok ti Dios. Kayatna a maawatan ni Job nga adda napatpateg nga isyu a masapul a maikkan iti atension. (Basaen ti Job 38:18-21.) Nakatulong dayta tapno agbaliw ti kapanunotan ni Job.

¹² Naulpit kadi ni Jehova gapu ta prangka a binalakadanna ni Job uray naipasango idi iti nakaro a pakasuotan? Saan, ken saan a kasta ti pinanunot ni Job. Uray nasuot ni Job, inakseptarna ti balakad, ket kinunana: “Mangaramidak iti panangibabawi, ket agbabawiak iti tapok ken dapdapo.” Kasta ti epekto ti prangka ngem makapabang-ar a balakad ni Jehova. (Job 42:1-6) Sakbay dayta, kinorehir met ti ub-ubing a ni Eliu ni Job. (Job 32:5-10) Idi inawat ni Job ti balakad ti Dios ken binaliwanna ti kapanunotanna, imbaga ni Jehova iti dadduma a pagragsakanna ti kinamatalek ni Job iti laksid ti pakasuotan.—Job 42:7, 8.

13. Kasano a nakatulong ken Job ti balakad ni Jehova uray no nabayag idin a nagpatingga dagiti pakasuotanna?

¹³ Nagtultuloy a nagimbagan ni Job ti balakad ni Jehova uray nagpatingga idin dagiti pakasubokanna. Kasano? Ad-adda a binendisionan ni Jehova ti naud-udi a paset ti biag ni Job ngem idi damo ta idi agangay, “naaddaan . . . iti pito nga annak a lallaki ken tallo nga annak a babbai.” Ngem sigurado a kasapulan latta idi ti tiempo tapno maisubli ti dati a kasasaadna. (Job 42:12-14) Sigurado a nailiw ni Job kadagiti annakna a natay gapu ken Satanas. Mabalin nga adda dagiti tiempo a malaglagipna dagiti rigat a napasaranna. Uray no naawatanna met laeng no apay a nasubok, mabalin a napampanunotna no apay a masapul a mapadasanna ti kasdiay kakaro a rigat. No napanunotna man dagita, linagipna la ketdi ti balakad ti Dios. Dayta ti nangliwliwa ken nakatulong ken Job tapno silalagip iti nakapatpateg nga isyu.—Sal. 94:19.

14. Ania ti masursurotayo iti kapadasan ni Job?

¹⁴ Makaliwliwa ken makatulong met kadatayo ti maipapan ken Job tapno silalagiptayo iti nakapatpateg nga isyu. Kinaagpaysuanna, impaisurat dayta ni Jehova “a pakasursuruantayo, tapno babaen ti panagibturtayo ken babaen ti liwliwa manipud iti Kasuratan maaddaantay koma iti namnama.” (Roma 15:4) Ti masursurotayo? Ditay koma nga agpokus kadagiti problematayo nga uray la malipatantayon ti nakapatpateg nga isyu—ti pannakaalangon ti kinasoberano ni Jehova. Kas ken Job, laglagipentayo a ti pasettayo iti nakapatpateg nga isyu ket ti panagmatalektayo uray iti narigat a kasasaad.

15. Ania ti maaramidan ti kinamatalektayo uray no agrigattayo?

 ¹⁵ Apay a makaliwliwa a panunoten ti pateg ti kinamatalektayo? Gapu ta adda mapaneknekantayo no masuottayo. No agrigattayo, dina kayat a sawen a kaguranatayo ni Jehova. Gundaway ketdi dayta tapno maipakitatayo a supsuportarantayo ti turayna. (Prov. 27:11) No agibturtayo, maparagsaktayo ni Jehova ken tumibker ti pammatitayo iti namnamatayo. (Basaen ti Roma 5:3-5.) Paneknekan ti kapadasan ni Job a ‘ni Jehova ket nadungngo unay iti panagayat ken naasi.’ (Sant. 5:11) Makapagtalektayo ngarud a gunggonaannatayo ken ti amin a mangsuporta iti turayna. Makatulong dayta tapno ‘naan-anay a makapagibturtayo ken maaddaantayo iti mabayag a panagitured buyogen ti rag-o.’—Col. 1:11.

16. Apay a masapul a palagipantayo ti bagitayo maipapan iti kinapateg ti pannakaalangon ti kinasoberano ni Jehova?

¹⁶ Agpayso a narigat ti agbalin a silalagip iti panangsuportar iti turay ni Jehova aglalo no adda problematayo. Mabalin a dumakkel uray ti bassit laeng a problema no sangkapanunottayo dayta. Nagsayaat ngarud a kanayon a palagipantayo ti bagitayo maipapan iti kinapateg ti panangsuportatayo iti turay ti Dios no maipasangotayo kadagiti narigat a kasasaad.

17. Kasano a makatulong ti kanayon a pannakipaset iti trabaho ni Jehova tapno agtalinaedtayo a silalagip iti nakapatpateg nga isyu?

¹⁷ Makatulong ti kanayon a pannakipasettayo iti trabaho ni Jehova tapno silalagiptayo iti nakapatpateg nga isyu. Kas pagarigan, naistrok ti kabsat a babai a ni Renee ken marigrigatan iti kanserna ken iti nakaro nga ut-ot a marikriknana. Idi adda iti ospital, kinasabaanna dagiti agtrabtrabaho sadiay, dagiti pasiente, ken dagiti bisita. Iti kaaddana iti maysa nga ospital, 80 nga oras a nangaskasaba iti dua ket kagudua laeng a lawas. Uray dandani idin matay, silalagip latta iti kinasoberano ni Jehova. Nakatulong dayta tapno maksayan ti rigat a marikriknana.

18. Kasano nga ipakita ti kapadasan ti maysa a kabsat a pagimbagan ti panangsuporta iti turay ni Jehova?

¹⁸ Siempre, kayattayo a suportaran ti turay ni Jehova uray iti babassit a problema iti kada aldaw. Agawid koman ni Jennifer ngem tallo nga aldaw a nagur-uray iti airport ta agsasaruno dagiti flight a nakanselar. Gapu ta agmaymaysa ken nabambannog, naglaka la koma a maasian iti bagina. Ngem nagkararag tapno makasabaanna dagiti padana nga agur-uray iti airport. Ania ti resultana? Adu ti nakasabaanna ken adu a publikasion ti naipaimana. Kinunana, “Nariknak ti bendision ni Jehova uray iti narigat a kasasaad ken pinabilegnak a mangidaydayaw iti naganna iti nagpateg a pamay-an.” Talaga a silalagip ni Jennifer iti panggep ni Jehova.

19. Ania ti takder dagiti adipen ni Jehova maipapan iti kinasoberanona?

¹⁹ Saan a kas kadagiti ulbod a relihion, ammo dagiti pudno nga agdaydayaw ti kinapateg ti panangsuporta iti turay ni Jehova. Nabayagen a supsuportaran ti ili ti Dios ti panagturayna. Kas pudno nga agdaydayaw, ikagumaan koma ti tunggal maysa kadatayo nga itultuloy a suportaran dayta.

20. Ania ti rikna ni Jehova iti panangikagumaam a mangsuporta iti turayna?

²⁰ Masiguradom nga ipatpateg ni Jehova ti panangikagumaam a mangsuporta iti turayna babaen ti matalek a panagserbim ken panangibturmo kadagiti pannubok. (Sal. 18:25) Mailawlawag pay iti sumaruno nga artikulo no apay ken no kasano a naimpusuan a masuportaram ti turay ni Jehova.