1, 2. (a) Saan a kas iti tao nga adda autoridadna, kasano a tratuen ni Jehova dagiti tattao? (b) Ania ti adalentayo iti daytoy nga artikulo?

DAGITI adda autoridadna ken impluensiado a tattao ket masansan a “dominaranda,” wenno kontrolenda, ti dadduma. (Mat. 20:25; Ecl. 8:9) Naiduma unay ni Jehova! Uray Mannakabalin-amin, nakakonkonsiderar latta kadagiti imperpekto a tattao. Naasi ken naayat. Ikabkabilanganna ti rikrikna ken kasapulantayo. Gapu ta “laglagipenna a tapoktayo,” dina kiddawen ti nalablabes ngem iti kabaelantayo nga ited.​—Sal. 103:13, 14.

² Adu a salaysay ti Biblia ti mangipakita a nakonsiderar ni Jehova iti panangtratona kadagiti adipenna. Pagsasaritaantayo ti tallo a pagarigan. Umuna, ti naayat a panangtulong ti Dios iti ubing pay a ni Samuel a mangibaga iti mangukom a mensahena iti nangato a padi a ni Eli; maikadua, ti naanus a panagtignay ni Jehova idi nagkedked ni Moises nga agbalin a lider dagiti Israelita; ken maikatlo, ti nakonsiderar a pamay-an ti Dios a nangiruar kadagiti Israelita idiay Egipto. Bayat nga adalentayo dagita, siputantayo no ania ti masursurotayo maipapan ken Jehova ken dagiti leksion a mayaplikartayo.

3. Ania ti naidumduma a napasamak ken Samuel iti maysa a rabii, ken ania ti tumaud a saludsod? (Kitaen ti ladawan iti rugi ti artikulo.)

³ Ubing pay ni Samuel idi nangrugi nga ‘agserbi ken Jehova’ iti tabernakulo. (1 Sam. 3:1) Iti maysa a rabii, idi nakaiddan ni Samuel, adda naidumduma unay a napasamak. * (Basaen ti 1 Samuel 3:2-10.) Adda timek a mangaw-awag iti naganna. Pinanunotna a boses dayta ti lakayen a nangato a padi a ni Eli, ket nagtartaray ni Samuel a napan sa kinunana: “Adtoyak, ta inawagannak.” Ngem imbaga ni Eli a saan nga isu ti nagsao. Idi namindua pay a naulit dayta, nabigbig ni Eli a ti Dios ti mangaw-awag ken Samuel. Isu nga imbagana ken Samuel ti isungbatna, ket nagtulnog ti ubing. Apay a saan nga imbaga a dagus ni Jehova ken Samuel nga isu ti umaw-awag babaen ti maysa nga anghel? Saan nga ibaga ti Biblia, ngem makita kadagiti sumaruno a napasamak a mabalin a ti maysa a rason ket ikonkonsiderar ni Jehova ti ubing pay a ni Samuel. Kasano?

4, 5. (a) Ania ti reaksion ni Samuel iti inted ti Dios nga annongenna, ken ania ti napasamak kabigatanna? (b) Ania ti isuro kadatayo dayta a salaysay maipapan ken Jehova?

⁴ Basaen ti 1 Samuel 3:11-18. Imbilin ti Linteg ni Jehova kadagiti ubbing a respetuenda dagiti nataengan, nangruna ti maysa a panguluen. (Ex. 22:28; Lev. 19:32) Maitured ngata ni Samuel ti mapan ken Eli iti bigbigat ket ibagana ti nadagsen a mangukom a mensahe ti Dios? Siempre, saan! Ibaga kadatayo ti salaysay a “nagbuteng ni Samuel a mangibaga ken Eli maipapan ti panagparang [wenno, sirmata].” Ngem imparikna ti Dios ken ni Eli nga isuna ti umaw-awag ken Samuel, isu nga imbaga ni Eli ken Samuel a saan a mabuteng nga agsao. “[Dika ilimed] kaniak ti maysa a sao iti isuamin a sao nga insaona kenka,” imbilin ni Eli. Situtulnog nga “imbaga kenkuana ni Samuel ti amin a sasao.”

⁵ Saan la ketdi a nasdaaw ni Eli iti imbaga ni Samuel. Maitunos dayta iti imbaga ti saan a nainaganan a “lalaki ti Dios” a nakisarita idi kenkuana. (1 Sam. 2:27-36) Ipakita ti salaysay maipapan kada Samuel ken Eli a nakonsiderar ken masirib ni Jehova.

6. Ania dagiti maadaltayo iti pamay-an a panangtulong ti Dios iti ubing a ni Samuel?

⁶ Maysaka kadi nga ubing? No wen, ipakita ti salaysay maipapan iti ubing a ni Samuel a maawatan ni Jehova dagiti pakarigatam ken marikriknam. Mabalin a mabainka ket marigatanka a mangibaga iti mensahe ti Pagarian kadagiti adulto wenno agbalin a naiduma kadagiti kaedadmo. Masiguradom a kayatnaka a tulongan ni Jehova. Isu nga agkararagka ket ibagam kenkuana ti marikriknam. (Sal. 62:8) Panunotem dagiti mapagulidanan nga agtutubo iti Biblia a kas ken Samuel. Ken makisaritaka kadagiti padam a Kristiano​—ubing man wenno nataengan—​a nagballigi iti pakarigatan a kas iti pakaipaspasanguam. Sigurado nga ibagada nga adda dagiti gundaway a tinulongan ida ni Jehova, mabalin nga iti pamay-an a dida ninamnama.

7, 8. Kasano nga impakita ni Jehova ti nagpaiduma a konsiderasion ken Moises?

⁷ Idi 80 ti tawen ni Moises, inikkan ni Jehova iti narigat nga annongen. Wayawayaanna ti Israel iti pannakaadipenda idiay Egipto. (Ex. 3:10) Gapu ta 40 a tawenen nga agpaspastor ni Moises idiay Midian, posible a nakigtot iti daytoy nga annongen. Imbagana: “Siasinoak tapno mapanak koma ken Faraon ket kasapulan nga iruarko ti annak  ti Israel manipud Egipto?” Impasigurado ti Dios: “Addaakto kenka.” (Ex. 3:11, 12) Inkarina pay: Dagiti panglakayen ti Israel “sigurado nga umimdengdanto iti timekmo.” Ngem insungbat ni Moises: “No kas pagarigan . . . saanda nga umimdeng?” (Ex. 3:18; 4:1) Agparang a konkontraen ni Moises ti Dios! Ngem nagan-anus latta ni Jehova. Ken inikkanna pay ni Moises iti pannakabalin nga agaramid iti milagro ket isu ti kaunaan a tao a nairekord a naaddaan iti kasta a pannakabalin.​—Ex. 4:2-9, 21.

⁸ Ngem nagrason manen ni Moises ket imbagana a saan a nalaing nga agsao. Insungbat ti Dios: “Siak addaakto iti ngiwatmo ket isurokanto no ania ti rebbeng a sawem.” Nakombinsirna ngata ni Moises? Nalawag a saan, ta sieemma a kiniddawna iti Dios a mangibaon iti sabali. Isu a nainkalintegan a nakapungtot ni Jehova. Ngem inkabilanganna ti rikna ni Moises. Kas panangipakitana iti konsiderasion, inapointaranna ni Aaron kas pannakangiwat ni Moises.​—Ex. 4:10-16.

9. Kasano a nakatulong iti annongen ni Moises ti kinaanus ken kinakonsiderar ni Jehova?

⁹ Ania ti masursurotayo ken Jehova iti daytoy a salaysay? Kas Mannakabalin-amin a Dios, mabalinna koma a butbutngen ni Moises tapno agtulnog a dagus. Ngem naanus ken naasi ni Jehova, ken impasiguradona a tulonganna ti naemma ken napakumbaba nga adipenna. Nakatulong ngata dayta? Wen! Nagbalin ni Moises a nakasaysayaat a lider. Nagbalin a naemma ken nakonsiderar iti sabsabali kas iti panangtrato ni Jehova kenkuana.​—Num. 12:3.

10. Ania ti pagsayaatanna no tuladentayo ti panangipakita ni Jehova iti konsiderasion?

¹⁰ Dagitoy ti masursurotayo: Maysaka kadi nga asawa a lalaki, nagannak, wenno panglakayen iti kongregasion? No wen, naikkanka iti autoridad. Nagpateg ngarud a tuladem ni Jehova babaen ti panagbalinmo a nakonsiderar, naasi, ken naanus kadagiti adda iti aywanmo! (Col. 3:19-21; 1 Ped. 5:1-3) No ikagumaam a tuladen ni Jehova ken ti Dakdakkel a Moises, ni Jesu-Kristo,  agbalinka a nalaka a maas-asitgan ken makapagin-awa iti sabsabali. (Mat. 11:28, 29) Agbalinka pay a nasayaat nga ulidan kadakuada.​—Heb. 13:7.

11, 12. Idi inruar ni Jehova dagiti Israelita iti Egipto, ania ti inaramidna tapno natalged ti riknada?

¹¹ Idi pimmanaw dagiti Israelita idiay Egipto idi 1513 B.C.E., mabalin a nasurok a tallo a milion ti bilangda. Buklen ida ti tallo wenno uppat pay ketdi a henerasion. Isu nga adda dagiti ubbing, natataengan, ken sigurado nga adda met masaksakit wenno baldado. Gapu ta kasta ti kadakkel ti grupoda a pumanaw iti Egipto, masapul ti naayat ken nakonsiderar a Lider a mangidaulo kadakuada. Kasta ti impakita ni Jehova babaen ken Moises. Kas resultana, natalged ti rikna dagiti Israelita idi pampanawanda ti kakaisuna nga imbilangda a pagtaengan.​—Sal. 78:52, 53.

¹² Ania ti inaramid ni Jehova tapno natalged ti rikna ti ilina? Idi inruarna ida iti Egipto, inorganisarna ida iti “urnos ti pannakibakal.” (Ex. 13:18) Gapu iti dayta, sigurado a narikna dagiti Israelita a kontrolado ti Diosda ti bambanag. Impadlaw met ni Jehova ti kaaddana babaen ti “ulep iti aldaw ken . . . lawag ti apuy” iti rabii. (Sal. 78:14) Kasla ibagbaga ni Jehova: “Saankayo nga agbuteng. Iwanwan ken protektarankayo.” Kinapudnona, dandanin kasapulanda dayta a pammasiguro!

13, 14. (a) Kasano nga impakita ni Jehova ti konsiderasion kadagiti Israelita idiay Nalabaga a Baybay? (b) Kasano nga impakita ni Jehova ti pannakabalinna kadagiti Egipcio?

¹³ Basaen ti Exodo 14:19-22. Panunotem a maysaka kadagiti adda iti nagbaetan ti Nalabaga a Baybay ken dagiti soldado ni Faraon. Idi kuan, agtignayen ti Dios. Immakar ti adigi nga ulep iti likudanyo, ket nabangenan dagiti Egipcio ken simmipnget ti ayanda. Ngem nakalawlawag ti ayanyo gapu iti milagro! Kalpasanna, inyunnat ni Moises ti imana iti baybay, ket ti napigsa nga angin manipud iti daya ginuduana ti baybay ket naadda ti nalawa a dalan. Ita, iti naurnos a pamay-an, magnakan iti lansad ti baybay a kaduam ti pamiliam, dagiti tarakenyo nga animal, ken ti dadduma pay a tattao. Nadlawmo a dagus nga adda naidumduma. Ti lansad ket saan a nalutlot wenno nalamiis no di ket namaga ken saan unay a natangken, isu a nalaka ti magna. Kas resultana, natalged a makaballasiw uray ti kabuntogan a magna.

¹⁴ Basaen ti Exodo 14:23, 26-30. Kabayatanna, nagal-alisto ti natangsit ken maag a ni Faraon a kumamat kadakayo iti lansad ti baybay. Inyunnat manen ni Moises ti imana iti baybay. Ngem ita, narban dagiti timmangken nga agsinnumbangir a pader ti danum ket kaslada dua a tsunami a nagdinnungpar. Saanen a pulos makalasat ni Faraon ken dagiti soldadona!​—Ex. 15:8-10.

15. Ania ti masursurom iti daytoy a salaysay maipapan ken Jehova?

¹⁵ Isuro daytoy a salaysay a ni Jehova ket Dios ti urnos—maysa a kualidad a makatulong tapno mariknatayo a natalgedtayo. (1 Cor. 14:33) Impakita met ni Jehova a naayat a pastor a mangay-aywan iti ilina iti praktikal a pamay-an. Sidudungngo nga ay-aywanan ken protprotektaranna ida kadagiti kabusorda. Nagsayaat a pammasiguro kadatayo dagitoy a kinapudno bayat nga umas-asidegen ti panagpatingga daytoy a sistema ti bambanag!​—Prov. 1:33.

16. Ania ti maitulongna no repasuentayo ti pamay-an ni Jehova a nangisalakan kadagiti Israelita?

¹⁶ Ay-aywanan met ni Jehova ti ilina ita kas grupo—iti naespirituan ken pisikal.  Itultuloyna nga aramiden dayta bayat ti dakkel a rigat a nakaas-asidegen a dumteng. (Apoc. 7:9, 10) Gapuna, ubing man wenno nataengan, nasalun-at wenno baldado, saanto a mataranta wenno mabuteng dagiti adipen ti Dios bayat ti dakkel a rigat. * Kinapudnona, kasungani ti aramidenda! Silalagipdanto kadagitoy a sasao ni Jesu-Kristo: “Tumakderkayo a sililinteg ket itangadyo dagiti uloyo, agsipud ta ti pannakaispalyo umas-asidegen.” (Luc. 21:28) Agtalinaedto dayta a panagtalek ti ili ti Dios uray inton darupen ida ni Gog—ti aliansa dagiti nasion a nabilbileg nga adayo ngem ni Faraon. (Ezeq. 38:2, 14-16) Apay? Ammoda a saan nga agbalbaliw ni Jehova. Ipakitananto manen nga isu ket naayat ken nakonsiderar a Manangisalakan.​—Isa. 26:3, 20.

17. (a) Ania ti maitulongna no adalentayo dagiti salaysay ti Biblia maipapan iti panangaywan ni Jehova iti ilina? (b) Ania ti adalentayo iti sumaruno nga artikulo?

¹⁷ Dagiti pagarigan iti daytoy nga artikulo ket sumagmamano laeng iti adu a gundaway nga impakita ni Jehova a naasi ken nakonsiderar a mangaywan, mangiwanwan, ken mangisalakan iti ilina. Bayat nga ut-utobem dagita a salaysay, siputam dagiti detalye a mangipakita kadagiti saan unay a madmadlaw nga aspeto dagiti kualidad ni Jehova. Iti kasta, ad-adda a matandaanam ken maipapusom dagiti nagsasayaat a kualidad ti Dios ket ad-adda nga umuneg ti ayat ken pammatim kenkuana. Iti sumaruno nga artikulo, adalentayo dagiti pamay-an a matuladtayo ti panangipakita ni Jehova iti konsiderasion iti sabsabali. Pagsasaritaantayo ti maipapan iti pamilia, kongregasion, ken ministerio.