1-2. Ania ti mabalin a rason nga imbaga ni Jesus ti sasao iti Juan 4:35, 36?

MAGMAGNA idi ni Jesus iti taltalon, a nalabit nabiit pay a nagtubo dagiti naimula a sebada. (Juan 4:3-6) Agarup uppat a bulan pay sakbay a mabalin nga anien dagita. Isu a karkarna la ketdi ti imbaga ni Jesus: “Kitaenyo dagiti talon, natangkenanen dagiti dawa ket mabalinen nga anien.” (Basaen ti Juan 4:35, 36.) Ania ti kayatna a sawen?

² Agparang a piguratibo a panagani iti tattao ti tuktukoyen ni Jesus. Kitaentayo ti nabiit pay idi a napasamak. Nupay gagangay a saan a makilanglangen dagiti Judio kadagiti Samaritano, kinasabaan ni Jesus ti maysa a Samaritana ket dimngeg kenkuana! Kinapudnona, idi ibagbaga ni Jesus a “natangkenanen dagiti dawa [iti talon] ket mabalinen nga anien,” um-umay ti maysa a grupo dagiti Samaritano a nakangngeg iti imbaga ti babai maipapan ken Jesus tapno dumngegda iti ad-adu pay. (Juan 4:9, 39-42) Kuna ti maysa a komentario iti Biblia maipapan iti daytoy a salaysay: “Ti kinagagar dagiti tattao . . . ipakitana a kaslada iti dawa a nakasaganan a maani.”

3. No tuladem ti panangmatmat ni Jesus kadagiti tattao, kasano nga agbalin a nasaysayaat ti panangasabam?

³ Ania met ti panangmatmatmo kadagiti tattao a pangikaskasabaam iti naimbag a damag? Ibilbilangmo kadi ida a kas iti dawa a mabalinen nga anien? No wen, ania ti epekto dayta kenka? Umuna, nagangganat ti panangasabam. Limitado ti tiempo ti panagani, isu nga awan ti sayangem a tiempo. Maikadua, naragsakka no awaten dagiti tattao ti naimbag a damag. Kuna ti Biblia: ‘Naragsak ti tattao iti tiempo ti panagani.’ (Isa.  9:3) Ken maikatlo, ibilangmo ti tunggal tao kas potensial nga adalan, isu nga ibagaymo ti panangasabam iti paginteresanda.

4. Ania dagiti masursurotayo ken apostol Pablo iti daytoy nga artikulo?

⁴ Mabalin a pinanunot ti dadduma nga adalan nga imposible nga agbalin a pasurot ni Kristo dagiti Samaritano. Ngem saan a kasta ni Jesus ta minatmatanna ida kas potensial nga adalan. Kasapulantayo met a matmatan dagiti tattao iti teritoriatayo kas potensial nga adalan ni Kristo. Nangipaay ni apostol Pablo iti nagsayaat nga ulidan a surotentayo. Ania ti masursurotayo kenkuana? Iti daytoy nga artikulo, pagsasaritaantayo no kasano a (1) naammuanna ti patpatien dagiti kinasabaanna, (2) natarusanna ti paginteresanda, ken (3) minatmatanna ida kas potensial nga adalan ni Jesus.

5. Apay a maawatan ni Pablo dagiti Judio iti sinagoga?

⁵ Masansan a nangasaba ni Pablo kadagiti sinagoga dagiti Judio. Kas pagarigan, iti sinagoga idiay Tesalonica, “tallo a sabbath nga inusarna ti Kasuratan a nakirinnason [kadagiti Judio].” (Ara. 17:1, 2) Mabalin a narikna ni Pablo nga alisto a makapangasaba iti sinagoga. Napadakkel kas maysa a Judio. (Ara. 26:4, 5) Maawatan ni Pablo dagiti Judio, isu a sikokompiansa a nakapangasaba kadakuada.​—Fil. 3:4, 5.

6. Kasano a naiduma dagiti taga-Atenas nga adda iti paglakuan kadagidiay kinasabaan ni Pablo iti sinagoga?

⁶ Idi pinapanaw dagiti bumusbusor ni Pablo idiay Tesalonica ken Berea, napan idiay Atenas. Manen, “nakirinnason kadagiti Judio ken iti dadduma pay a tattao nga agdaydayaw iti Dios idiay sinagoga.” (Ara. 17:17) Ngem idi nangasaba iti paglakuan, sabalin dagiti tattao sadiay. Karaman kadakuada ket dagiti pilosopo ken dadduma a Gentil a nangibilang iti mensahena kas ‘baro a sursuro.’ Imbagada kenkuana: “Karkarna iti lapayagmi dagiti ibagbagam.”​—Ara. 17:18-20.

7. Sigun iti Aramid 17:22, 23, kasano nga imbagay ni Pablo ti pamay-anna a mangasaba?

⁷ Basaen ti Aramid 17:22, 23. Naiduma ti pamay-an ni Pablo a nangibaga iti mensahena kadagiti Gentil idiay Atenas no ikompara iti pannakisaritana kadagiti Judio iti sinagoga. Mabalin a pinanunot ni Pablo: ‘Ania ngata ti patpatien dagiti taga-Atenas?’ Inobserbaranna a naimbag ti aglawlawna ken inkabilanganna dagiti narelihiosuan a kostumbre dagiti tattao. Kalpasanna, inrugina nga ibaga ti kinapudno iti Kasuratan babaen ti banag nga  an-anamonganda. “Kas maysa a Kristiano a Judio, ammona a saan nga agdaydayaw dagiti pagano a Griego iti ‘pudno’ a Dios dagiti Judio ken Kristiano,” kuna ti maysa a komentarista ti Biblia, “ngem inkagumaanna nga ipakita a ti Dios nga ikaskasabana ket saan nga adayo kadagiti taga-Atenas.” Isu a nakasagana ni Pablo a mangibagay iti panangasabana. Imbagana kadagiti taga-Atenas a ti mensahena ket naggapu iti “Dios a Di Am-ammo,” nga ikagkagumaandan a pagdayawan. Uray no saan a pamiliar dagiti Gentil iti Kasuratan, saan a simmuko ni Pablo a mangasaba kadakuada. Imbes ketdi, imbilangna ida kas dawa a mabalinen nga anien, ket imbagayna ti pamay-anna a mangikasaba iti naimbag a damag.

8. (a) Kasano a maammuam no ania ti narelihiosuan a patpatien dagiti tattao iti teritoriayo? (b) No ibagada nga addan relihionda, ania ti mabalinmo nga isungbat?

⁸ Agbalinka koma a managpaliiw a kas ken Pablo. Kitaem dagiti pagilasinan no ania ti patpatien dagiti tattao iti teritoriayo. Ania ti dekorasion ti balayda wenno luganda? Ti kadi nagan, bado, panaglanglanga, wenno uray ti sasaoda ipakitana no ania ti relihionda? Nalabit prangka nga ibagada nga adda relihionda. No kasta ti ibaga dagiti tattao iti special pioneer nga agnagan Flutura, isungbatna, “Saankayo a piliten a mamati iti patpatiek, kayatko la koma ti makisarita maipapan iti daytoy a topiko . . . ”

9. Ania ti mabalin a pagtunosanyo iti relihioso a tao?

⁹ Ania dagiti topiko a mabalinmo nga ilawlawag iti relihioso a tao? Mangbirokka iti pagtunosanyo. Mabalin a maymaysa a Dios ti daydayawenna, baka ibilbilangna ni Jesus kas Manangisalakan ti sangatauan, wenno mabalin a patienna nga agbibiagtayon iti nakadakdakes a tiempo a dandanin agpatingga. No naammuamon dagiti patpatien a pagtunosanyo, ibagam ti mensahe ti Biblia iti pamay-an a makapainteres kenkuana.

10. Ania koma ti ikagumaantayo nga aramiden, ken apay?

¹⁰ Laglagipem a mabalin a saan a patien dagiti tattao ti amin nga isursuro ti relihionda. Isu nga uray naammuamon ti relihion ti maysa a tao, ikagumaam nga ammuen no ania a talaga ti patpatienna. “Ilalaok ita ti adu a tattao ti pilosopia iti patpatien ti relihionda,” kuna ni David a maysa nga special pioneer idiay Australia. Kuna ni Donalta a taga-Albania, “Ibagbaga ti dadduma a makasarsaritami nga addan relihionda, ngem ibagadanto met laeng a saanda a talaga a mamati iti Dios.” Napaliiw met ti kabsat a lalaki a misionero idiay Argentina nga adda dagiti mangibaga a mamatida  iti Trinidad, ngem saanda met a talaga a patien a ti Ama, ti Anak, ken ti nasantuan nga espiritu ket maymaysa a Dios. “No ammom dayta, nalaklakaka a makabirok iti pagtunosanyo iti kasarsaritam,” kunana. Ikagumaam ngarud nga ammuen no ania a talaga ti patpatien ti maysa a tao. Iti kasta, matuladmo ni Pablo a ‘nangaramid iti amin tapno matulonganna ti amin a kita ti tattao.’​—1 Cor. 9:19-23.

11. Sigun iti Aramid 14:14-17, kasano a pinagbalin ni Pablo a makapainteres ti panangibagana iti mensahena kadagiti taga-Listra?

¹¹ Basaen ti Aramid 14:14-17. Natarusan ni Pablo ti paginteresan dagiti dimngeg kenkuana, ket imbagayna ti panangasabana. Kas pagarigan, dagiti tattao a nakasaritana idiay Listra ket bassit ti ammoda iti Kasuratan wenno awan pay ketdi. Isu a nangusar ni Pablo kadagiti argumento a maawatanda. Dinakamatna ti nabunga nga apit ken ti abilidadtayo a mangtagiragsak iti biag. Nagusar iti sasao ken pagarigan a nalaka a maawatan dagiti kasarsaritana.

12. Kasanom a maammuan dagiti paginteresan ti maysa a tao tapno maibagaymo ti panangasabam?

¹² Usarem ti pannakatarusmo tapno maammuam ti paginteresan dagiti tattao iti teritoriayo sa ibagaymo ti panangasabam. Kasanom a maammuan no ania ti paginteresan ti maysa bayat nga umas-asidegka kenkuana wenno iti balayna? Manen, agbalinka a managpaliiw. Nalabit agmulmula, agbasbasa iti libro, agtartarimaan iti lugan, wenno dadduma pay. No maitutop, apay a dimo usaren ti ar-aramidenna a pangirugi iti saritaan? (Juan 4:7) Mabalin nga adda maammuam uray iti bado ti maysa a tao​—nalabit ti pulina, trabahona, wenno paboritona nga sports team. “Kinasaritak ti maysa nga agtutubo a lalaki nga agtawen iti 19 nga adda sikat a singer a nakayimprenta iti T-shirt-na,” kuna ni Gustavo. “Nagdamagak maipapan iti dayta, ket imbaga ti lalaki no apay a magusgustuanna ti singer. Nagresulta dayta iti panagadal iti Biblia, ket maysa itan a kabsattayo.”

13. Kasanom nga iyawis ti panagadal iti Biblia iti makapainteres a pamay-an?

 ¹³ No iyawismo ti panagadal iti Biblia iti maysa a tao, pagbalinem a makapainteres dayta. Ipakitam no kasano a makatulong dayta kenkuana. (Juan 4:13-15) Kas pagarigan, maysa a kabsat a babai nga agnagan Poppy ti pinauneg ti maysa nga interesado a babai iti balayna. Idi nakita ni Poppy ti maysa a diploma iti diding a mangipakita a propesor ti babai a nagadal iti kinamaestra, impaganetgetna nga isursurotayo met dagiti tattao babaen iti panangyadaltayo iti Biblia ken kadagiti gimongtayo. Inawat ti babai ti panagadal, nakigimong kabigatanna, ken di nagbayag, immatender iti asamblea sirkito. Makatawen kalpasanna, nagpabautisar. Isaludsodmo iti bagim: ‘Ania ti paginteresan dagiti sarsarungkarak? Mailawlawagko kadi iti makapainteres a pamay-an ti panangyadaltayo iti Biblia?’

14. Kasanom a maibagay iti tunggal iyad-adalam ti pamay-am a mangyadal iti Biblia?

¹⁴ No nairugimon ti panagadal iti Biblia, agsaganaka para iti tunggal panagadal, nga ikabilangam ti nalikudan ken paginteresan ti iyad-adalam. Bayat nga agsagsaganaka, piliemon no ania dagiti teksto a basaem, dagiti video nga ipabuyam, ken dagiti ilustrasion nga usarem a mangilawlawag kadagiti kinapudno iti Biblia. Isaludsodmo iti bagim, ‘Ania ti ad-adda a makapainteres ken mangdanon iti puso daytoy nga iyad-adalak?’ (Prov. 16:23) Idiay Albania, sipaprangka nga imbaga ti maysa a babai nga iyad-adalan ti payunir nga agnagan Flora, “Diak mamati iti panagungar.” Saan nga impilit ni Flora dayta a sursuro. Imbagana, “Napanunotko a masapul a maam-ammona nga umuna ti Dios a mangikarkari iti panagungar.” Sipud idin, iti tunggal panagadalda, ipagpaganetget ni Flora ti ayat, sirib, ken pannakabalin ni Jehova. Idi agangay, namati met laeng ti iyad-adalanna iti panagungar. Maysa itan a naregta a Saksi ni Jehova.

15. Sigun iti Aramid 17:16-18, aniada a kababalin dagiti taga-Atenas ti nakaburiboran ni Pablo, ngem apay a saan a simmuko a mangasaba kadakuada?

¹⁵ Basaen ti Aramid 17:16-18. Saan a simmuko ni Pablo a mangasaba kadagiti taga-Atenas, uray no napno ti siudadda iti idolatria, seksual nga immoralidad, ken pinapagano a pilosopia. Saanna met nga impalubos a maupay gapu iti panangin-insultoda kenkuana. Ni Pablo a mismo ket nagbalin a Kristiano uray no dati nga ‘agsasao maibusor iti Dios ken manangidadanes ken natangsit.’ (1 Tim. 1:13) No kasano a nagpokus ni Jesus iti potensial ni Pablo, nagpokus met ni Pablo iti potensial dagiti taga-Atenas. Ket saan a napaay iti dayta.​—Ara. 9:13-15; 17:34.

16-17. Ania ti mangipakita a makapagbalin nga adalan ni Kristo ti amin a kita ti tattao? Mangted iti pagarigan.

¹⁶ Idi umuna a siglo, nagbalin nga adalan ni Jesus dagiti tattao a nagduduma ti nalikudanda. Idi nagsurat ni Pablo kadagiti Kristiano nga agnanaed iti siudad ti Corinto a sakup ti Grecia, imbagana a dadduma kadagiti miembro dayta a kongregasion ket dati a kriminal wenno nakaro ti kinaimmoralda. Kalpasanna, innayonna: “Kasta idi ti dadduma kadakayo. Ngem nadalusankayon.” (1 Cor. 6:9-11) No addaka idi, nakitam met ngata ti potensial dagidiay a tattao nga agbalbaliw ken agbalin nga adalan?

¹⁷ Adu met ita ti sisasagana a mangaramid iti kasapulan a panagbalbaliw tapno agbalin nga adalan ni Jesus. Kas pagarigan, idiay Australia, nakita ti special pioneer nga agnagan Yukina nga amin a kita ti tattao ket mabalin nga umawat iti mensahe ti Biblia. Naminsan,  idi adda iti maysa a real estate office, nakitana ti maysa nga agtutubo a babai nga adu ti tatona ken lawlaw ti badona. “Medio nagpangaduaak,” kuna ni Yukina, “ngem kinasaritak latta. Naammuak nga interesado unay iti Biblia ken bersikulo iti Salmo ti dadduma a tatona!” Nangrugi a makipagadal ti babai iti Biblia ken umatender kadagiti gimong. *

18. Apay a ditay koma ukomen dagiti tattao?

¹⁸ Minatmatan kadi ni Jesus a mabalinen nga anien dagiti talon gapu ta ninamnamana nga adu a tattao ti sumurot kenkuana? Saan. Impakpakauna ti Kasuratan a sumagmamano laeng ti mamati kenkuana. (Juan 12:37, 38) Ken adda pannakabalin ni Jesus a mangbasa iti puso. (Mat. 9:4) Nupay nagpokus ni Jesus kadagidiay a sumagmamano a mamati kenkuana, sireregta a nangasaba iti amin. Gapu ta saantayo a mabasa ti puso, ad-adda ngarud koma nga ikagumaantayo a labanan ti tendensia a mangukom iti maysa a teritoria wenno maysa a tao! Imbes ketdi, agpokustayo iti potensial dagiti tattao. Kastoy ti imbaga ni Marc a misionero idiay Burkina Faso: “Masansan a dagiti ipagarupko a rumang-ay ti agsardeng nga agadal. Ngem dagiti ipagarupko a saan nga agtultuloy ti napartak a rumang-ay. Isu a nasursurok a nasaysayaat nga agpaidalantayo iti espiritu ni Jehova.”

19. Ania koma ti pangibilangantayo kadagiti tattao iti teritoriatayo?

¹⁹ Mabalin nga iti damo, agparang a bassit laeng a tattao iti teritoriatayo ti kasla dawa a mabalinen nga anien. Ngem laglagipentayo ti imbaga ni Jesus kadagiti adalanna. Natangkenanen dagiti dawa ket nakasaganadan a maani. Makapagbalbaliw dagiti tattao ken makapagbalinda nga adalan ni Kristo. Ibilbilang ni Jehova dagitoy a potensial nga adalan kas “napateg a bambanag.” (Hag. 2:7) No matmatantayo dagiti tattao a kas iti panangmatmat ni Jehova ken ni Jesus, maammuantayo dagiti nalikudan ken paginteresanda. Iti kasta, ibilangtayo ida, saan a kas estranghero, no di ket kas potensial a kakabsattayo.