1. Ania ti impaay ni Jehova iti tunggal matalek nga adipenna?

SIAAYAT nga impaayan ni Jehova ti tunggal matalek nga adipenna iti lugar iti kongregasionna. Nupay agduduma ti papeltayo, napategtayo amin ken kasapulantayo ti maysa ken maysa. Tulongannatayo ni apostol Pablo a mangtarus iti daytoy a napateg a leksion. Kasano?

2. Sigun iti Efeso 4:16, apay a masapul nga agpipinnateg ken agtitinnulongtayo?

² Iti pannakatema a teksto daytoy nga artikulo, impaganetget ni Pablo nga awan kadatayo ti mabalin a mangibaga iti padatayo nga adipen ni Jehova, “Dika kasapulan.” (1 Cor. 12:21) Tapno natalna ti kongregasion, masapul nga agpipinnateg ken agtitinnulongtayo. (Basaen ti Efeso 4:16.) No agtitinnulongtayo, rumang-ay ti kongregasion ken mapabileg iti ayat.

3. Ania ti usigentayo iti daytoy nga artikulo?

³ Ania ti dadduma a kasasaad a maipakitatayo ti panagraemtayo kadagiti padatayo a Kristiano iti kongregasion? Iti daytoy nga artikulo, usigentayo no kasano a maipakita dagiti panglakayen ti panagraemda kadagiti padada a panglakayen. Sumaganad, pagsasaritaantayo no kasano a maipakitatayo amin nga ipatpategtayo dagiti kakabsattayo nga awanan asawa. Kamaudiananna, ammuentayo no kasanotayo a maipakita nga ap-apresiarentayo dagidiay saan unay a nalaing wenno nasayud iti lengguahetayo.

4. Ania a balakad ni Pablo iti Roma 12:10 ti masapul a suroten dagiti panglakayen?

⁴ Amin a panglakayen iti kongregasion ket dinutokan ti nasantuan  nga espiritu ni Jehova. Ngem agduduma ti sagut ken abilidadda. (1 Cor. 12:17, 18) Dadduma kadakuada ket mabalin a kabbaro a panglakayen ken bassit pay ti kapadasanda. Mabalin a limitado met ti maaramidan ti sabsabali gapu iti edad ken salun-atda. Nupay kasta, awan koma ti panglakayen a mangtagibassit iti padana a panglakayen nga arigna ibagbagana, “Dika kasapulan.” Imbes ketdi, masapul a suroten ti tunggal panglakayen ti balakad ni Pablo iti Roma 12:10.​—Basaen.

5. Kasano a maipakita dagiti panglakayen a raraemenda dagiti padada a panglakayen, ken apay a napateg nga aramidenda dayta?

⁵ Ipakita dagiti panglakayen a raraemenda dagiti padada a panglakayen no dumngegda a naimbag kadakuada. Nangnangruna a napateg dayta no adda importante a pagmimitinganda. Apay? Kastoy ti kuna ti Pagwanawanan nga Oktubre 1, 1988: “Mabigbig dagiti panglakayen a ni Kristo, babaen iti nasantuan nga espiritu, maiturongna ti isip ti asinoman a panglakayen iti bagi dagiti panglakayen a mangted iti prinsipio ti Biblia nga isut’ kasapulan a bumagay iti aniaman a situasion wenno mangaramid iti aniaman a napateg a desision. (Ara. 15:6-15) Awan asinoman a panglakayen a mangbukbukod iti nasantuan nga espiritu iti uneg ti bagi.”

6. Kasano a makapagtitinnulong dagiti panglakayen, ken kasano a magunggonaan ti kongregasion no aramidenda dayta?

⁶ Ti panglakayen a mangraraem kadagiti padana a panglakayen saan a kanayon nga isu ti umuna nga agsao iti miting dagiti panglakayen. Saanna a dominaran ti saritaan, ken dina patien a kanayon nga umiso ti opinionna. Sipapakumbaba ken sieemma ketdi nga ibagana ti opinionna. Dumngeg a naimbag iti makuna ti sabsabali. Napatpateg pay, magagaran a mangiranud kadagiti prinsipio ti Biblia ken mangsurot iti panangiwanwan ti “matalek ken masirib nga adipen.” (Mat. 24:45-47) No ipakita dagiti panglakayen ti ayat ken panagraem iti tunggal maysa bayat nga agmimitingda, adda kadakuada ti nasantuan nga espiritu ti Dios ket dayta ti mangidalan kadakuada a  mangaramid kadagiti desision a mangpabileg iti kongregasion.​—Sant. 3:17, 18.

7. Ania ti panangmatmat ni Jesus iti kinaawan asawa?

⁷ Ti kongregasion ita ket buklen dagiti agassawa ken pamilia. Ngem adu met dagiti kakabsat a lallaki ken babbai nga awanan asawa. Ania ti masapul a panangmatmattayo kadakuada? Usigentayo ti panangmatmat ni Jesus iti kinaawan asawa. Bayat ti ministerio ni Jesus ditoy daga, saan a nangasawa. Nagtalinaed a baro ken impamaysana ti tiempo ken atensionna iti annongenna. Dina pulos insuro a masapul a makiasawa ti maysa a Kristiano wenno agtalinaed nga awanan asawa. Ngem imbagana a pilien ti dadduma a Kristiano ti saan a makiasawa. (Mat. 19:11, 12; kitaen ti study note iti Mateo 19:12, nwtsty.) Rinaem ni Jesus dagidiay awanan asawa. Saanna ida nga imbilang a nababbaba wenno adda kurang kadakuada.

8. Sigun iti 1 Corinto 7:7-9, ania ti imparegta ni Pablo a panunoten dagiti Kristiano?

⁸ Kas ken Jesus, nagtalinaed nga awanan asawa ni apostol Pablo bayat ti ministeriona. Dina pulos insuro a di umiso a makiasawa ti maysa a Kristiano. Ammona a personal a desision dayta. Ngem imparegta ni Pablo a panunoten dagiti Kristiano no mabalin nga agtalinaedda nga awanan asawa bayat nga agserserbida ken Jehova. (Basaen ti 1 Corinto 7:7-9.) Sigurado a saan a tinagibassit ni Pablo dagiti Kristiano nga awanan asawa. Kinapudnona, pinilina ti baro ken agtutubo a ni Timoteo a mangibaklay kadagiti nadagsen nga annongen. * (Fil. 2:19-22) Nalawag ngarud a di umiso a panunoten a mas kualipikado wenno saan a kualipikado ti maysa a kabsat a lalaki gapu laeng ta adda asawana wenno awan.​—1 Cor. 7:32-35, 38.

9. Ania ti makunatayo maipapan iti panagasawa ken kinaawan asawa?

⁹ Saan met nga insuro ni Jesus wenno ni Pablo a masapul a makiasawa dagiti Kristiano wenno masapul nga agtalinaedda nga awanan asawa. Ania ngarud ti makunatayo maipapan iti panagasawa ken kinaawan asawa? Nagsayaat ti imbaga ti Pagwanawanan nga Oktubre 1, 2012: “Kinapudnona, agpada a nadakamat [ti panagasawa ken kinaawan asawa] kas sagut ti Dios. . . . saan nga ibilang ni Jehova ti [kinaawan asawa] kas nakababain ken naladingit.” Gapuna, masapul a raementayo ti  lugar dagiti awanan asawa a kakabsat a lallaki ken babbai iti kongregasion.

10. Kasano a maipakitatayo a raraementayo dagiti kakabsattayo a lallaki ken babbai nga awanan asawa?

¹⁰ Kasano a maipakitatayo a raraementayo ti rikna ken kasasaad dagiti kakabsattayo a lallaki ken babbai nga awanan asawa? Nasayaat a laglagipentayo a personal a desision ti dadduma a Kristiano ti agtalinaed nga awanan asawa. Kayat met ti dadduma a babbaro ken babbalasang a Kristiano ti agasawa ngem saanda pay a nasarakan ti maitutop kadakuada. Mabalin a natay metten ti asawa ti dadduma. Aniaman ti kasasaad, umiso kadi nga isaludsodtayo kadagiti kapammatiantayo nga awanan asawa no apay nga awan asawada wenno ibagatayo a tulongantayo ida nga agbirok iti agbalin nga asawada? Siempre, dadduma a Kristiano nga awanan asawa ti nalabit agpatulong nga agbirok iti agbalin nga asawada. Ngem no saanda met nga agpatpatulong, ania ngata ti mariknada no ibagatayo a tulongantayo ida nga agbirok iti pakiasawaanda? (1 Tes. 4:11; 1 Tim. 5:13) Usigentayo ti makuna ti dadduma a matalek a kakabsattayo nga awanan asawa.

11-12. Kasano a mabalin a maupaytayo dagiti awanan asawa?

¹¹ Maysa a manangaywan iti sirkito nga epektibo unay iti annongenna ti nangibaga nga adu ti pagsayaatan ti kinaawan asawana. Ngem imbagana a nupay nasayaat ti intension dagiti kakabsat, makapaupay no isaludsodda kenkuana: “Apay nga awan pay asawam?” Imbaga met ti maysa a Bethelite a baro: “No dadduma, iparparikna kaniak dagiti kakabsat a kakaasi dagiti awanan asawa. Pagparparangenda a kasla makapadagsen imbes a maysa a sagut ti kinaawan asawa.”

¹² Imbaga ti maysa a Bethelite a balasang: “Ipagarup ti dadduma a kakabsat nga amin nga awanan asawa ket agbirbirok iti pakiasawaanda wenno amin nga awanan asawa ibilangda ti aniaman nga okasion kas gundaway a makabirokda iti pakiasawaanda. Naminsan, naibaonak iti sabali a paset ti pagilianmi ket nakasangpetak iti rabii nga adda gimong. Imbaga ti kabsat a babai a nangpadagus kaniak nga adda dua a babbaro iti kongregasionda a kaedadko. Impasiguradona a dinak iretreto, ngem idi nakadanonkamin idiay Kingdom Hall, dagus nga inyam-ammonak iti dua a babbaro. Permi ti bainmi a tallo iti dayta a situasion.”

13. Makin-ulidan ti nangparegta iti maysa a balasang a kabsat?

¹³ Kinuna pay ti maysa a Bethelite a balasang: “Adda dagiti am-ammok a nataengan a payunir nga awanan asawa. Manakemda, nakapokus, managsakripisio, kontentoda nga agserserbi, ken dakkel ti maitultulongda iti kongregasion. Balanse ti panangmatmatda iti kinaawan asawada ket saanda a marikna a nasaysayaat ti kasasaadda ta nagtalinaedda a babbalasang ken babbaro. Dida met marikna a maikapkapisda gapu ta awan asawa wenno pamiliada.” Dayta ti makagapu a makaparagsak ti makitimpuyog iti kongregasion a pakariknaam iti panagraem ken panangipateg. Dimo marikna a kakaasika wenno ap-apalandaka, ipupuera wenno itantan-okdaka. Ti ketdi mariknam ket ipatpategdaka.

14. Kasano a maipakitatayo a raraementayo dagiti awanan asawa?

¹⁴ Agyaman dagiti kakabsattayo a lallaki ken babbai nga awanan asawa no ipategtayo ida gapu kadagiti nagsayaat a kualidadda, saan ket a gapu ta awan asawada. Imbes a maasiantayo kadakuada, nasayaat no apresiarentayo ti kinamatalekda. Iti kasta, saanto a pulos marikna dagiti kakabsat a lallaki ken babbai nga awanan asawa nga ibagbagatayo kadakuada:  “Dika kasapulan.” (1 Cor. 12:21) Imbes ketdi, ammoda a raraementayo ida ken napateg kadatayo ti lugarda iti kongregasion.

15. Ania dagiti panagbalbaliw nga inaramid ti dadduma tapno mapalawada ti ministerioda?

¹⁵ Iti nabiit pay a tawtawen, nagbalin a kalat ti adu nga agibumbunannag ti agsursuro iti sabali a lengguahe tapno mapalawada ti ministerioda. Kaipapanan dayta a mangaramidda kadagiti panagbalbaliw iti biagda. Pinanawan dagitoy a kakabsat ti kongregasion nga agus-usar iti lengguaheda tapno makapagserbida iti kongregasion a sabali ti lengguahena ken agkasapulan iti ad-adu nga agibumbunannag. (Ara. 16:9) Personal a desisionda dayta tapno makatulongda iti trabaho a mainaig iti Pagarian. Nupay mabalin nga adu a tawen ti kasapulan tapno agbalinda a nalaing iti sabali a lengguahe, nagadu ti nagsayaat a maar-aramidanda. Dagiti nasayaat a kualidad ken kapadasanda ket makapabileg iti kongregasion. Ipatpategtayo dagitoy a managsakripisio a kakabsat!

16. Ania ti pagibasaran dagiti panglakayen no tingitingenda dagiti kualipikasion dagidiay agserbi kas panglakayen wenno ministerial nga adipen?

¹⁶ Saan koma nga agkedked ti bagi dagiti panglakayen a mangirekomenda iti maysa a kabsat a lalaki nga agserbi kas panglakayen wenno ministerial nga adipen gapu laeng ta saan pay a nalaing iti lengguahe ti kongregasion. Tingitingen dagiti panglakayen dayta a kabsat sigun kadagiti Nainkasuratan a kualipikasion para kadagiti panglakayen ken ministerial nga adipen, saan nga iti kalaingna nga agsao iti lengguahe ti kongregasion.​—1 Tim. 3:1-10, 12, 13; Tito 1:5-9.

17. Ania a salsaludsod ti masapul nga usigen ti dadduma a pamilia no umakarda iti sabali a pagilian?

¹⁷ Immakar ti dadduma a Kristiano a pamilia iti sabali a pagilian tapno agkamang wenno agbirokda iti trabaho. Mabalin a nasursuron dagiti ages-eskuela nga annakda ti kangrunaan a lengguahe ti pagilian. Mabalin a kasapulan metten dagiti nagannak a sursuruen ti kangrunaan a lengguahe tapno makabirokda iti trabaho. Kasano ngay no adda kongregasion wenno grupo iti dayta a lugar nga agus-usar iti nakayanakanda a lengguahe? Ania a kongregasion ti masapul a pakigimongan ti pamilia? Daydiay kadi kongregasion nga agus-usar iti kangrunaan a lengguahe ti pagilian wenno ti kongregasion nga agus-usar iti nakayanakan a lengguahe ti pamilia?

18. Maitunos iti Galacia 6:5, kasano a maipakitatayo ti panagraem iti desision ti ulo ti pamilia?

¹⁸ Ti ulo ti pamilia ti mangikeddeng no ania a kongregasion ti pakigimongan ti pamiliana. Gapu ta personal a banag dayta, masapul nga usigenna no ania ti kasayaatan para iti pamiliana. (Basaen ti Galacia 6:5.) Masapul a raementayo ti desision ti ulo ti pamilia. Awatentayo aniaman ti desisionna ken abrasaentayo ti pamiliana kas napateg a paset ti kongregasiontayo.​—Roma 15:7.

19. Ania ti masapul a panunoten a naimbag ken ikararag dagiti ulo ti pamilia?

 ¹⁹ Iti dadduma a kaso, mabalin a makitimtimpuyog dagiti pamilia iti kongregasion nga agus-usar iti nakayanakan a lengguahe dagiti nagannak, ngem mabalin a saan a nalaing dagiti annak iti dayta a lengguahe. No dayta a kongregasion ket adda iti lugar a pakaus-usaran ti lengguahe ti pagilian, nalabit marigatan dagiti annak a mangtarus kadagiti gimong ket saanda a rumang-ay iti naespirituan. Apay? Gapu ta mabalin a ti eskuelaan dagiti annak ket agus-usar iti lengguahe ti pagilian, saan a ti nakayanakan a lengguahe dagiti nagannak. No kasta ti kasasaad, masapul a panunoten a naimbag dagiti ulo ti pamilia ken ikararagda no ania ti masapul nga aramidenda tapno matulonganda dagiti annakda nga agbalin a nasingsinged ken Jehova ken iti ilina. Mabalin a tulonganda dagiti annakda nga agbalin a nalaing iti nakayanakanda a lengguahe wenno umakarda iti kongregasion nga agus-usar iti lengguahe a nalawag a maawatan dagiti annakda. Aniaman ti desision ti ulo ti pamilia, iparikna koma ti kongregasion a pinilina a raraemen ken ipatpategda isuna ken ti pamiliana.

20. Kasano a maipakitatayo a raraementayo dagiti kakabsattayo nga agsursuro iti sabali a lengguahe?

²⁰ Gapu iti amin a rason a napagsasaritaantayo, adda latta dagiti kakabsat iti adu a kongregasion a marigatan nga agsursuro iti sabali a lengguahe. Mabalin a marigatanda a mangyebkas iti pampanunotenda. Ngem no saan a ti abilidadda nga agsursuro iti lengguahe ti pagpokusantayo, makitatayo ti ayatda ken Jehova ken ti tarigagayda nga agserbi kenkuana. No kitaentayo dagitoy a nagsasayaat a kualidad, umunegto ti panangipateg ken panagraemtayo kadakuada. Saantayto nga ibaga, “Dika kasapulan,” gapu laeng ta saanda a nalaing iti lengguahetayo.

21-22. Ania ti nagsayaat a pribilehiotayo?

²¹ Impaayannatayo ni Jehova iti nagsayaat a pribilehio a maaddaan iti lugar iti kongregasionna. Lalakitayo man wenno babai, awanan wenno addaan asawa, ubing wenno nataengan, wenno nalaingtayo iti sabali a lengguahe wenno saan, napategtayo ken Jehova ken iti maysa ken maysa.​—Roma 12:4, 5; Col. 3:10, 11.

²² Sapay koma ta itultuloytayo nga iyaplikar ti adu a nagsasayaat a leksion a nasursurotayo iti ilustrasion ni Pablo maipapan iti bagi ti tao. Iti kasta, agpanunottayo pay iti ad-adu a pamay-an tapno a maipategtayo ti lugartayo ken ti lugar ti sabsabali iti kongregasion ni Jehova.