1. Ania ti pagsayaatan ti panangestoria no kasanotayo a naammuan “ti kinapudno”?

 “KASANO a naammuam ti kinapudno?” Sigurado a namin-adun a sinungbatam dayta. Dayta ti maysa kadagiti damo nga isaludsod ti maysa a kapammatiam no kayatnaka a maam-ammo. Maragragsakantayo a dumngeg bayat nga iyes-estoria dagiti kakabsat no kasanoda a naam-ammo ken inayat ni Jehova. Magusgustuantayo met nga ibaga no kasano kapateg kadatayo ti kinapudno. (Roma 1:11) Gapu kadagita a panagiinnestoria, maipalagip kadatayo no kasano kapateg ti kinapudno. Mas determinadotayo met nga ‘agtultuloy a magna iti dalan ti kinapudno’​—kayatna a sawen, itultuloytayo ti pamay-an ti panagbiag a bendisionan ken anamongan ni Jehova.​—3 Juan 4.

2. Ania dagiti adalentayo iti daytoy nga artikulo?

² Iti daytoy nga artikulo, repasuentayo ti dadduma a rason nga ipatpategtayo ti kinapudno. Kalpasanna, ammuentayo no kasano a maitultuloytayo a maipakita nga ipatpategtayo daytoy nagpateg a regalo. Sigurado a daytoy a panangrepaso ti mangpauneg iti apresasiontayo iti panangyasideg kadatayo ni Jehova iti kinapudno. (Juan 6:44) Patibkerenna met ti tarigagaytayo a mangiranud iti kinapudno.

3. Ania ti kapatgan a rason nga ipatpategtayo ti kinapudno?

³ Adu ti rason no apay nga ipatpategtayo ti kinapudno. Ti kapatgan ket ay-ayatentayo ni Jehova a Dios, ti Gubuayan ti kinapudno. Babaen ti Saona, ti Biblia, naam-ammotayo isuna, saan laeng a kas ti mannakabalin-amin a Namarsua iti langit ken daga no di ket kas ti naayat a nailangitan nga Amatayo a mangipatpateg unay kadatayo. (1 Ped. 5:7) Ammotayo a ti Diostayo ket “naasi ken mannakipagrikna, nabannayat  nga agpungtot ken dakkel ti napudno nga ayatna ken kanayon a tungpalenna ti saona.” (Ex. 34:6) Ay-ayaten ni Jehova ti hustisia. (Isa. 61:8) Masaksaktan ti riknana bayat a makitkitana nga agrigrigattayo, ken nakasaganan​—wen, magagaranen​—a mamagpatingga iti amin a panagsagaba iti inkeddengna a tiempo. (Jer. 29:11) Segseggaantayo metten dayta! Dayta ti maysa kadagiti rason nga ay-ayatentayo unay ni Jehova!

4-5. Apay nga impada ni apostol Pablo ti namnamatayo iti maysa nga angkla?

⁴ Ania pay ti rason nga ipatpategtayo ti kinapudno? Adu ti pagsayaatan nga iyeg kadatayo ti kinapudno. Kitaentayo ti maysa a pagarigan. Ti namnamatayo iti masanguanan ket karaman kadagiti kinapudno iti Biblia. Kastoy ti panangyilustrar ni apostol Pablo iti kinapateg dayta a namnama: “Adda kadatayo daytoy a namnama kas angkla ti kararuatayo, sigurado ken natibker.” (Heb. 6:19) No kasano a makatulong ti angkla tapno agtalinaed ti barko iti ayanna ken saan a mayallo-allon, makatulong met ti namnamatayo a naibatay iti Biblia tapno agtalinaedtayo a kalmado no maipasangotayo kadagiti suot.

⁵ Iti daytoy a konteksto, ti tuktukoyen ni Pablo ket ti nailangitan a namnama dagiti Kristiano a dinutokan ti espiritu. Ngem dagiti imbagana ket agaplikar met kadagiti Kristiano a mangpadpadaan nga agbiag nga agnanayon iti paraiso a daga. (Juan 3:16) Talaga a rimmagsak ti biagtayo ta naammuantayon nga adda namnamatayo nga agbiag nga agnanayon.

6-7. Ania ti naitulong ken Yvonne ti kinapudno a naammuanna maipapan iti masanguanan?

⁶ Kitaentayo ti kapadasan ti sister a ni Yvonne. Saan a Saksi dagiti nagannakna. Idi ubing, mabuteng a matay. Adda nabasana a naimula iti panunotna: “Addanto tiempo nga agpatingga ti amin.” Kinunana: “Gapu kadagita a sasao, mapuypuyatak iti kapapanunot maipapan iti masanguanan. ‘Sigurado a saan la a kastoy ti biag,’ napanunotko. ‘Apay nga addaak ditoy lubong?’ Diak kayat ti matay!”

⁷ Idi tin-edyeren ni Yvonne, naam-ammona dagiti Saksi ni Jehova. Inyestoriana: “Nakombinsirak a mabalinko ti maaddaan iti namnama nga agbiag nga agnanayon iti Paraiso a daga.” Ania ti naitulong ken Yvonne ti kinapudno a naammuanna? Innayonna: “Saanakon a mapuypuyat iti kapapanunot maipapan iti masakbayan wenno ipapatay.” Talaga nga ipatpateg ni Yvonne ti kinapudno, ken maragragsakan a mangipakaammo iti namnamana iti masanguanan.​—1 Tim. 4:16.

8-9. (a) Iti maysa nga ilustrasion ni Jesus, kasano ti panangipateg ti maysa a tao iti gameng a nasarakanna? (b) Kasano kapateg kenka ti kinapudno?

⁸ Ti naimbag a damag maipapan iti Pagarian ti Dios ket karaman met kadagiti kinapudno iti Biblia. Ti kinapudno maipapan iti Pagarian ket inyarig ni Jesus iti nailemmeng a gameng. Imbagana iti Mateo 13:44: “Ti Pagarian ti langit ket mayarig iti gameng a nailemmeng iti talon, a nasarakan ti maysa a tao ket inlemmengna. Gapu iti ragsakna, inlakona ti amin nga adda kenkuana ket ginatangna dayta a talon.” Saan idi nga agbirbirok iti gameng dayta a lalaki, di ngamin? Ngem idi nasarakanna, adu ti insakripisiona tapno maalana dayta. Kinapudnona, inlakona ti amin nga adda kenkuana. Apay? Ammona ngamin no kasano kapateg dayta a gameng. Adayo a napatpateg dayta ngem iti aniaman nga insakripisiona.

⁹ Kasta met kadi kapateg kenka ti kinapudno? Sigurado a wen! Ammotayo nga awan ti banag ditoy lubong a maipada iti ragsaktayo nga agserserbi ken Jehova ita, ken iti  namnamatayo nga agbiagto nga agnanayon kas iturayan ti Pagarian. Ti pribilehiotayo a maaddaan iti nadekket a relasion ken Jehova ket napatpateg nga amang ngem iti aniaman nga isakripisiotayo. Ti ‘naan-anay a panangparagsak’ ken Jehova ti kangrunaan a rason a marikriknatayo ti awan kapadana a rag-o.​—Col. 1:10.

10-11. Apay a binalbaliwan ni Michael ti kabibiagna?

¹⁰ Dakkel ti insakripisio ti adu kadatayo tapno magun-odantayo ti anamong ni Jehova. Tinallikudan ti dadduma dagiti matangtangad a karera iti lubong. Insardeng ti dadduma ti agpabaknang. Adda met dagidiay interamente a binalbaliwanda ti kabibiagda idi naammuanda ti maipapan ken Jehova. Kasta ti inaramid ni Michael. Saan a napadakkel iti kinapudno. Idi agtutubo pay, sinursurona ti martial arts. Imbagana: “Tagtaginayonek ti nasayaat a pammagik ken ipagpannakkelko dayta. No dadduma, panagriknak awan ti makaatiw kaniak.” Ngem idi rinugian ni Michael ti agpayadal iti Biblia, naammuanna ti panangmatmat ni Jehova iti kinaranggas. (Sal. 11:5) Imbaga ni Michael maipapan iti agassawa a Saksi a nangyadal kenkuana iti Biblia: “Dida pulos imbaga nga isardengkon ti martial arts; intultuloyda laeng nga insuro kaniak ti kinapudno iti Biblia.”

¹¹ Bayat nga immadu ti pannakaammo ni Michael maipapan ken Jehova, immuneg met ti panagayatna kenkuana. Ti kangrunaan a nangtukay iti pusona ket ti pannakipagrikna ni Jehova kadagiti agdaydayaw Kenkuana. Idi agangay, naamiris ni Michael a masapul nga agbalbaliw. “Ammok a ti karate ti karigatan a tinallikudak,” imbagana. “Ngem ammok met a maay-ayo ni Jehova, ken napatpateg ti panagserbik kenkuana ngem iti aniaman a tinallikudak.” Impateg ni Michael ti kinapudno a nasarakanna, isu a binalbaliwanna ti kabibiagna.​—Sant. 1:25.

12-13. Kasano a nakatulong ken Mayli ti lawag nga impaay kenkuana ti Biblia?

¹² Tapno maipakita ti pateg ti kinapudno, inyarig ti Biblia ti kinapudno iti maysa a lampara nga agsilsilnag iti kasipngetan. (Sal. 119:105; Efe. 5:8) Apresiaren unay ni Mayli a taga-Azerbaijan ti lawag nga impaay kenkuana ti Sao ti Dios. Saan nga agkarelihionan dagiti nagannakna. Muslim ni tatangna, ken Judio met ni nanangna. Imbagana: “Diak pulos pagduaduaan ti kaadda ti Dios ngem maburiboranak kadagitoy a saludsod, ‘Apay a pinarsua ti Dios dagiti tattao, ken apay a masapul nga agsagaba ti maysa iti intero a panagbiagna no matutuokto met laeng iti agnanayon idiay impierno?’ Kuna ti dadduma a pagayatan ti Dios ti amin a mapaspasamak isu a pinampanunotko, ‘Ik-ikkannatayo kadi ti Dios kadagiti problema sa maay-ayatan a mangbuybuya iti panagsagabatayo?’”

¹³ Intultuloy ni Mayli a binirok ti sungbat dagiti saludsodna. Idi agangay, nakipagadal iti Biblia ken inawatna ti kinapudno. “Ti makakombinsir a lohika ti Biblia pinasayaatna ti intero a panangmatmatko iti biag,” kinunana. “Naaddaanak iti talna ti panunot gapu kadagiti mapagtalkan a panangilawlawag ti Sao ti Dios.” Kas ken Mayli, idaydayawtayo amin ni Jehova, ‘ti Dios a nangayab kadatayo manipud iti sipnget nga agturong iti nakaskasdaaw a lawagna.’​—1 Ped. 2:9.

14. Kasanotayo nga ad-adda a maipateg ti kinapudno? (Kitaen met ti kahon a “ Dadduma Pay a Nakayarigan ti Kinapudno.”)

¹⁴ Sumagmamano laeng dagita a mangyilustrar iti kinapateg ti kinapudno. Sigurado nga adu pay ti sabali a mapanunotmo. Iti personal a panagadalmo, pagbalinem a proyekto ti panangammo iti dadduma pay a rason  a masapul nga ipategtayo ti kinapudno. No ad-adda nga ipategtayo ti kinapudno, ad-adu met ti mapanunottayo a pamay-an a mangipakita nga ipatpategtayo dayta.

15. Ania ti maysa a pamay-an a maipakitatayo nga ipatpategtayo ti kinapudno?

¹⁵ Maipakitatayo nga ipatpategtayo ti kinapudno no regular nga adalentayo ti Biblia ken dagiti publikasion a naibatay iti Biblia. Ngamin, uray kasano kabayagtayon iti kinapudno, kanayon nga adu latta ti masursurotayo. Kuna ti kaunaan a ruar daytoy a magasin: “Ti kinapudno ket kas iti bassit a sabong iti kataltalonan a napalawlawan ken dandani leppesen dagiti dadakkel a ruot ti kinaulbod. No nasarakamon, masapul a bantayam. . . . No kayatmo a maadda kenka, masapul nga agdumogka a mangala. Saanka koma a makontento iti maymaysa a sabong ti kinapudno. . . . Itultuloymo ti agala iti ad-adu pay.” Medio narigat ti agadal, ngem saan a sayang ti panagreggetmo.

16. Ania ti napadasamon nga epektibo a pamay-an ti panagadal? (Proverbio 2:4-6)

¹⁶ Saan nga amin ket nagaget nga agbasa ken agadal. Ngem aw-awisennatayo ni Jehova nga ‘itultuloytayo ti agsapul’ ken ‘itultuloytayo ti  agbirok’ tapno naun-uneg ti pannakaawattayo iti kinapudno. (Basaen ti Proverbio 2:4-6.) Kanayon a pagsayaatantayo no agporsegitayo a mangaramid iti dayta. Regular a basbasaen ni Corey ti Biblia. Imbagana a maysa a bersikulo ti usigenna iti kada sumagmamano a minuto. Inlawlawagna: “Basaek ti amin a ‘footnote,’ kitaek ti amin a teksto a nainaig iti dayta (cross-reference), ken agsukimatak pay iti ad-adu. . . . Nagadu ti masursurok iti kastoy a pamay-an!” Dayta man a pamay-an ti us-usarentayo wenno sabali, maipakitatayo nga ap-apresiarentayo ti kinapudno no agporsegi ken iwayaantayo nga adalen dayta.​—Sal. 1:1-3.

17. Ania ti kayat a sawen ti panagbiag maitunos iti kinapudno? (Santiago 1:25)

¹⁷ Siempre, ammotayo a saan nga umdas ti basta panangadal iti kinapudno. Tapno naan-anay a magunggonaantayo, masapul nga agbiagtayo maitunos iti kinapudno, kayatna a sawen, iyaplikartayo dagiti masursurotayo. Iti kasta, ti kinapudno ket mangyeg kadatayo iti pudpudno a kinaragsak. (Basaen ti Santiago 1:25.) Kasanotayo a masigurado nga agbibiagtayo maitunos iti kinapudno? Insingasing ti maysa a kabsat a sukimatentayo ti bagitayo tapno maammuantayo dagiti nasayaaten nga ar-aramidentayo ken dagiti masapul pay a parang-ayentayo. Imbaga ni apostol Pablo: “Aniaman ti nagrang-ayantayon, itultuloytayo ti naurnos a panangsurot iti dayta iti isu met la a pamay-an.”​—Fil. 3:16.

18. Apay nga agporsegitayo nga ‘agtultuloy a magna iti dalan ti kinapudno’?

¹⁸ Panunotentayo laengen dagiti pagsayaatan ti panagporsegitayo nga ‘agtultuloy a magna iti dalan ti kinapudno’! Mapasayaattayo ti biagtayo ken maparagsaktayo pay ni Jehova ken dagiti kapammatiantayo. (Prov. 27:11; 3 Juan 4) Talaga a dagita ti kasayaatan a rason nga ipategtayo ti kinapudno ken agbiagtayo maitunos iti dayta!