Sinuratan ni apostol Pablo dagiti Kristiano iti Tesalonica. Imbagana: “No adda asinoman a saan nga agtulnog iti imbagami iti daytoy a surat, pagtalinaedenyo a namarkaan daytoy a tao.” (2 Tes. 3:14) Iti napalabas, ibagbagatayo a dayta nga instruksion ket para kadagiti panglakayen. No adda maysa iti kongregasion nga agtultuloy a mangyaleng-aleng kadagiti prinsipio ti Biblia uray mamin-adun a nabalakadan, mabalin a mangipaay dagiti panglakayen iti palawag a mangpakdaar kadagiti kakabsat. Kalpasan dayta, dagiti agibumbunannag iti kongregasion ket saanen a makilangen iti dayta a namarkaan a tao.

Nupay kasta, masapul nga adda maaramid a panagbalbaliw. Naawatantayo itan a ti balakad ni Pablo ket tumukoy iti masapul nga aramiden ti tunggal indibidual iti kongregasion sigun iti kasasaad. Isu a saanen a masapul a mangipaay dagiti panglakayen iti palawag a mangpakdaar. Apay a kasapulan dayta a panagbalbaliw? Usigentayo ti konteksto ti balakad ni Pablo.

Nakita ni Pablo a ti dadduma iti dayta a kongregasion ket “agbibiag a nagulo.” Saanda a sursuroten ti balakad a naibatay iti Sao ti Dios. Isu nga iti napalabas a panangbisitana kadakuada, imbilinna: “Saan a rumbeng a mangan ti asinoman a dina kayat ti agtrabaho.” Ngem adda latta dagiti saanda a kayat ti agtrabaho tapno masuportaranda ti bagbagida nupay kayada met koma. Mannakibiangda met iti biag ti dadduma. Kasano idi ti masapul a panangtrato dagiti Kristiano kadagita a nagulo iti kongregasion?—2 Tes. 3:​6, 10-12.

Imbaga ni Pablo, “pagtalinaedenyo a namarkaan daytoy a tao.” Ti Griego a sao para iti daytoy, ipakitana a masapul nga agan-annadka iti dayta a tao. Inturong ni Pablo dayta nga instruksionna iti intero a kongregasion, saan laeng a kadagiti panglakayen. (2 Tes. 1:1; 3:6) No ngarud nakita ti maysa a Kristiano a suksukiren ti kapammatianna ti balakad ti Biblia, isu a mismo ti agdesision no ‘isardengna ti makilangen’ iti dayta a nagulo a tao.

Kayatna kadi a sawen a dayta a tao ket matrato a kas iti maysa a naikkat iti kongregasion? Saan. Innayon ni Pablo: “Itultuloyyo a bagbagaan a kas kabsat.” Mabalin latta ngarud a makilangen ti tunggal Kristiano iti dayta a namarkaan a kabsat kadagiti gimong ken iti ministerio. Ngem mabalinda nga ikeddeng ti saan a makikadua kenkuana kadagiti gathering wenno panaglinglingay. Apay? “Tapno agbain,” kuna ni Pablo. No isardengtayo ti makikadua iti dayta a kabsat iti kastoy a pamay-an, mabalin a mariknana ti agbain gapu iti aramidna ket agbalbaliw.—2 Tes. 3:​14, 15.

Kas Kristiano, kasanotayo a maammuan no kaanotayo nga iyaplikar dayta a balakad? Umuna, masapul a siguraduentayo no ti kababalin dayta a tao ket talaga a maibilang a “nagulo,” kas dineskribir ni Pablo. Saanna a tuktukoyen dagiti naiduma kadatayo ti konsiensia wenno kayatda. Saanna met a tuktukoyen dagiti nakasair iti riknatayo. Imbes ketdi, ti espesipiko a pampanunoten idi ni Pablo ket dagiti mangigaggagara a mangsukir kadagiti nalawag a balakad ti Dios.

Ita, no madlawtayo ti maysa a kabsat nga itultuloyna a sukiren ti balakad ti Sao ti Dios, a personal nga ikeddengtayo ti saan a makikadua kenkuana kadagiti gathering wenno panaglinglingay. Gapu ta personal a desision daytoy, ditay ibagbaga dayta iti dadduma, malaksid kadagiti Saksi a kabbalay a kapamiliatayo. Makilangentayo latta iti dayta a kabsat kadagiti gimong ken ministerio. Ngem inton balbaliwanna ti kababalinna ken ti ar-aramidna, mabalintayto manen ti makikadua kenkuana.