“HELLO! Komusta?”

Sigurado a masansan nga us-usarem dayta a pangkablaaw. Mabalin a pasarunuam pay ketdi dayta iti alamano wenno arakup. Mabalin a nagduduma ti kostumbre ken maus-usar a sasao iti tunggal lugar, ngem agpapada ti panggep dagita. Kinapudnona, maibilang a kinaawan iti ayat wenno respeto ti saan nga ikakablaaw wenno isusungbat iti dayta.

Ngem adda dagiti saanda nga ugali ti kumablaaw. Agkedked a kumablaaw ti dadduma gapu ta mabainda wenno nababa ti panagkitada iti bagida. Marigatan ti dadduma a kumablaaw gapu iti puli, kultura, wenno kinasiasino ti kablaawanda. Nupay kasta, mabalin nga adda nagsayaat nga epekto uray ti ababa laeng a kablaaw.

Mabalin a maisaludsodmo: ‘Ania ti maaramidan ti kablaaw? Ken ania ti masursurok iti Sao ti Dios maipapan iti kablaaw?’

Kinuna ni apostol Pedro idi inawatna ti kaunaan a Gentil, a ni Cornelio, iti kongregasion Kristiano: “Ti Dios saan a mangidumduma.” (Ara. 10:34) Idi agangay, insurat ni Pedro a ti Dios “tarigagayanna a makagteng ti isuamin iti panagbabawi.” (2 Ped. 3:9) Nalabit dagiti agdadamo iti kinapudno ti umuna a mapanunottayo a pagaplikaran dayta. Ngem imparegta met ni Pedro kadagiti Kristiano: “Padayawanyo dagiti amin a kita ti tattao, maaddaankayo iti ayat iti intero a timpuyog dagiti kakabsat.” (1 Ped. 2:17) Gapuna, saan kadi a nagsayaat no kablaawantayo ti sabsabali aniaman ti puli, kultura, wenno nalikudanda? Paset dayta ti panangipakitatayo iti dayaw ken ayat kadakuada.

Imparegta ni apostol Pablo kadagiti miembro ti kongregasion: “Abrasaenyo ti maysa ken maysa, a kas iti Kristo inabrasanatayo met.” (Roma 15:7) Espesipiko a dinakamat ni Pablo dagiti kakabsat a nagbalin a “makapabileg a tulong” kenkuana. Nangnangruna a kasapulan ita dagiti kakabsat ti pammabileg ta nakaro ti ibubusor ni Satanas iti ili ti Dios.​—Col. 4:11; Apoc. 12:12, 17.

No kablaawantayo ti dadduma, saantayo laeng a maiparikna nga awatentayo ida. Ipakita ti Biblia nga adda pay maaramidan dayta.

Idi tiempon a mayakar iti aanakan ni Maria ti biag ti Anak ti Dios, nangibaon ni Jehova iti anghel a makisarita kenkuana. “Naimbag nga aldawmo, maysa a naparaburan unay, ni Jehova adda kenka,” imbaga ti anghel. “Nariribukan unay” ni Maria ta dina ammo no apay a kasarsarita ti anghel. Idi nadlaw dayta ti anghel, kinunana: “Dika agbuteng, Maria, ta nakasarakka ti pabor iti Dios.” Inlawlawagna a panggep ti Dios nga iyanak ni Maria ti Mesias. Limmag-an ti rikna ni Maria ket situtulnog nga insungbatna: “Adtoy! Ti adipen a babai ni Jehova! Maaramid koma kaniak sigun iti deklarasionmo.”​—Luc. 1:26-38.

Pribilehio dayta nga anghel ti agtignay kas mensahero ni Jehova; ngem dina imbilang a nababa nga annongen ti makisarita iti imperpekto a tao. Kimmablaaw nga umuna. Ania ti masursurotayo? Nakasaganatayo koma a mangkablaaw ken mangparegta iti sabsabali. Babaen ti ababa laeng a sasao, matulongantayo ti sabsabali ken maipasiguradotayo a pasetda iti ili ni Jehova.

Adu ti naam-ammo ni Pablo kadagiti kongregasion iti Asia Menor ken Europa. Naglaon dagiti suratna iti adu a personal a kablaaw. Makitatayo daytoy iti Roma kapitulo 16. Impaidanon ni Pablo dagiti kablaawna iti adu a padana a Kristiano. Dinakamatna  ni Febe, a “kabsattayo a babai,” ken imparegtana kadagiti kakabsat nga “abrasaen[da ni Febe] iti Apo iti wagas a maikari iti sasanto, ken . . . tulongan[da] iti aniaman a banag a mabalin a pakasapulanna.” Kinablaawan ni Pablo da Prisca ken Aquila, ‘a saan laeng nga isu ti agyamyaman no di ket kasta met dagiti amin a kongregasion dagiti nasion.’ Kinablaawanna ti dadduma a saan a pamiliar kadatayo ita​—‘ni Epeneto a dungdungnguenna’ kasta met da “Trifena ken Trifosa, babbai nga agtartrabaho a sipipinget iti Apo.” Wen, saan a nagpangadua ni Pablo a nangkablaaw kadagiti kakabsat.​—Roma 16:1-16.

Panunotenyo ti rag-o dagita a kakabsat idi naammuanda a maipatpategda. Immuneg la ketdi ti ayatda ken Pablo ken iti tunggal maysa! Sigurado a naparegta ti dadduma a Kristiano a nakangngeg kadagidiay a kablaaw, ket nakatulong dayta tapno agtalinaed a natibker ti pammatida. Wen, dagiti kablaaw a mangyebkas iti naimpusuan nga interes ken komendasion ket mangpasinged kadagiti aggagayyem ken mamagkaykaysa kadagiti matalek nga adipen ti Dios.

Idi nakadanon ni Pablo iti sangladan ti Puteoli ken agturongen idiay Roma, nagpaabagatan a napan kenkuana dagiti kakabsat iti dayta a lugar. Idi napasungadan ida ni Pablo, “nagyaman iti Dios ket bimmileg.” (Ara. 28:13-15) No dadduma, mabalin nga isem wenno payapay laeng ti maikablaawtayo. Ngem uray dayta laeng, mabalin nga adda maparegtatayo, nalabit ti maysa a maladladingitan wenno naliday.

Kasapulan idi a mangipaay ni adalan a Santiago iti prangka a balakad. Adda dagiti Kristiano a makikamkamalala idi iti naespirituan gapu iti pannakigayyemda iti lubong. (Sant. 4:4) Ngem paliiwem no kasano nga inrugi ni Santiago ti suratna:

“Ni Santiago, maysa nga adipen ti Dios ken ti Apo a ni Jesu-Kristo, agpaay iti sangapulo ket dua a tribu a naiwarawara: Dagiti kablaaw!” (Sant. 1:1) Nalaklaka la ketdi nga inawat dagiti agbasbasa ti balakadna idi nakitada iti kablaawna nga agpapada ti takderda iti Dios. Wen, nalaka nga irugi uray ti serioso a saritaan no maluktan dayta iti napakumbaba a kablaaw.

Ti talaga nga epektibo a kablaaw, kasanoman kaababana, ket napasnek ken ipakitana ti naimpusuan nga ayat. Pudno dayta uray no kasla saan a madlaw ti kablaaw. (Mat. 22:39) Naminsan, mangrugin ti gimong idi sumangpet iti Kingdom Hall ti maysa a sister a taga-Ireland. Bayat nga agal-alisto a simrek, timmaliaw ti maysa a brother, immisem, sa kinunana: “Hello. Maragsakanak a makakita kenka.” Ngem nagtugaw laeng ti sister.

Kalpasan ti sumagmamano a lawas, inasitganna ti brother sa imbagana nga adda idi nadagsen a problema iti pagtaenganda. Kinunana: “Nalidayak iti daydi a rabii a gistay diakon kayat ti makigimong. Awan unay ti malagipko a naibaga iti gimong, ngem diak malipatan ti kablaawmo. Nariknak a naragsakkayo nga addaak. Pagyamanan.”

Saan idi nga ammo ti brother a nagsayaat ti epekto ti ababa a kablaawna. Kinunana: “Idi imbagana a maapresiarna ti ababa nga imbagak, naragsakanak unay ta inaramidko dayta.”

Insurat ni Solomon: “Ipalladawmo ti tinapaymo iti rabaw ti dandanum, ta iti panaglabas ti adu nga aldaw masarakamto manen dayta.” (Ecl. 11:1) No sipapanunottayo a napateg a kumablaawtayo, nangruna kadagiti padatayo a Kristiano, sumayaat ti rikna ti sabsabali ken ti riknatayo. Isu a ditay tagtagibassiten ti bileg ti kablaaw.