1. Ania ti makunatayo maipapan kadagiti agtutubo a kakabsat a lallaki?

AGTUTUBO a kakabsat a lallaki, adu ti maitulongyo. Napigsa ken naganaygay ti adu kadakayo. (Prov. 20:29) Adu ti maitulongyo iti kongregasionyo. Mabalin a kayatyonto met ti maapointaran kas ministerial nga adipen. Ngem baka mariknayo nga ubingkayo pay unay wenno bassit pay ti kapadasanyo tapno maitalek kadakayo ti napateg a trabaho. Uray no ubingkayo pay, adda dagiti banag a maaramidanyo itan tapno magun-odyo ti panagtalek ken panagraem dagiti kakabsat iti kongregasionyo.

2. Ania ti usigentayo iti daytoy nga artikulo?

² Iti daytoy nga artikulo, agpokustayo iti biag ni Ari David. Pagsasaritaantayo met apagbiit dagiti pasamak iti biag da Asa ken Jehosafat—dua nga ari ti Juda. Usigentayo dagiti problema a nakaipasanguan dagitoy tallo a lallaki, no ania ti inaramidda, ken no ania ti masursuro kadakuada dagiti agtutubo a lallaki.

3. Ania ti maysa a pamay-an a matulongan dagiti agtutubo dagiti natataengan iti kongregasion?

³ Bayat nga ubing pay ni David, nasursurona dagiti abilidad a makatulong iti sabsabali. Nalawag nga isu ket naespirituan a tao. Inkagumaanna met a pasayaaten ti abilidadna nga agtokar ket inusarna dayta a tumulong ken Saul, ti ari nga inapointaran  ti Dios. (1 Sam. 16:16, 23) Dakayo nga agtutubo a lallaki, adda kadi abilidadyo a makatulong kadagiti kakabsat iti kongregasion? Adu kadakayo ti addaan iti kasta nga abilidad. Kas pagarigan, mabalin a madlawyo nga apresiaren ti dadduma a nataengan no suruanyo ida a mangusar iti tablet-da wenno iti dadduma pay a gadyet para iti personal a panagadalda ken kadagiti gimong. Dayta a pannakaammoyo ket makatulong unay kadakuada.

4. Kas ken David, ania dagiti kualidad a masapul a patanoren dagiti agtutubo a kakabsat a lallaki? (Kitaen ti ladawan iti akkub.)

⁴ Pinaneknekan ni David a responsable ken mapangnamnamaan iti inaldaw a panagbiagna. Kas pagarigan, idi agtutubo, inaywananna a naimbag dagiti karnero ni amana. Delikado dayta a trabaho. Inlawlawag ni David idi agangay ken Ari Saul: “Daytoy adipenmo ti mangipaspastor iti arban ni amana, ket adda idi immay a leon a nangitaray iti karnero manipud iti pangen. Kasta met laeng ti inaramid ti maysa nga oso. Kinamat ken kinabilko ida tapno masalbarko dagiti karnero iti ngiwatda.” (1 Sam. 17:34, 35) Narikna ni David a responsabilidadna nga aywanan dagiti karnero, ken situtured a nakilaban tapno maprotektaranna ida. Matulad dagiti agtutubo a kakabsat a lallaki ni David no nagagetda a mangaramid iti aniaman a maipatrabaho kadakuada.

5. Sigun iti Salmo 25:14, ania ti kapatgan a maaramidan dagiti agtutubo a kakabsat a lallaki?

⁵ Idi agtutubo pay ni David, napatanornan ti nakasingsinged a relasionna ken Jehova. Napatpateg dayta a relasion ngem iti kinatured ni David wenno iti laingna nga agtokar. Ni Jehova ket saan la a Dios ni David no di ket Gayyemna pay—ti kasingedan a Gayyemna. (Basaen ti Salmo 25:14.) Agtutubo a kakabsat a lallaki, ti kapatgan a maaramidanyo ket patibkerenyo ti relasionyo iti nailangitan nga Amayo. Iti kasta, makaawatkayto kadagiti kanayonan a pribilehio.

6. Ania dagiti negatibo a panangmatmat ti dadduma ken David?

⁶ Masapul a pagballigian ni David dagiti negatibo a panangmatmat kenkuana ti dadduma. Kas pagarigan, idi nagboluntario a manglaban ken Goliat, pinadas ni Ari Saul nga upayen a kinunana: “Ubingka pay.” (1 Sam. 17:31-33) Sakbay dayta, ni David ket inakusaran ti mismo a manongna nga iresponsable kano. (1 Sam. 17:26-30) Ngem para ken  Jehova, saan nga ubing wenno iresponsable ni David. Am-ammona unay ni David. Gapu ta nagpannuray ni David iti bileg ti Gayyemna a ni Jehova, napapatayna ni Goliat.—1 Sam. 17:45, 48-51.

7. Ania ti masursurom iti maysa a salaysay maipapan ken David?

⁷ Ania ti masursurom iti kapadasan ni David? Masursurotayo a masapul nga agbalintayo a naanus. Mabalin a tiempo ti kasapulan tapno maamiris dagiti makaam-ammo kenka sipud idi ubingka a saanka gayamen nga ubing. Ngem masiguradom a saan a ti makinruar a langam ti kitkitaen ni Jehova. Am-ammonaka ken ammona ti kabaelam nga aramiden. (1 Sam. 16:7) Patibkerem ti relasionmo iti Dios. Naaramid dayta ni David babaen ti panangpaliiwna a naimbag kadagiti parsua ni Jehova. Pinampanunot ni David dagiti masursurona kadagita maipapan iti Namarsua. (Sal. 8:3, 4; 139:14; Roma 1:20) Ti maysa pay a masursurom ket agkiddawka iti bileg ken Jehova. Kas pagarigan, pagaangawandaka kadi dagiti kaeskuelaam ta maysaka a Saksi ni Jehova? No wen, ikararagmo ken Jehova a tulongannaka a mangibtur iti dayta. Ken iyaplikarmo dagiti praktikal a balakad a mabirokam iti Saona ken kadagiti naibatay-Biblia a publikasion ken video. Kada makitam a tultulongannaka ni Jehova a mangsango iti maysa a problema, bumileg met ti panagtalekmo kenkuana. Kasta met, bayat a makitkita ti dadduma nga agpampannurayka ken Jehova, magun-odam ti panagtalekda.

8-9. Ania ti nakatulong ken David a siaanus nga aguray agingga nga agbalin nga ari, ken ania ti masursuro dagiti agtutubo a kakabsat a lallaki iti ulidanna?

⁸ Usigentayo ti maysa pay a problema a nakaipasanguan ni David. Kalpasan a nadutokan nga agbalin nga ari, masapul nga aguray iti adu a tawen sakbay nga opisial nga agturay kas ari ti Juda. (1 Sam. 16:13; 2 Sam. 2:3, 4) Bayat dayta a tiempo, ania ti nakatulong kenkuana a siaanus nga aguray? Imbes a naupay ni David, nagpokus iti maaramidanna. Kas pagarigan, bayat a nagnaed ni David kas pugante iti teritoria dagiti Filisteo, ginundawayanna ti nakilaban kadagiti kabusor ti Israel. Gapu iti dayta, naprotektaranna dagiti pagbeddengan ti teritoria ti Juda.—1 Sam. 27:1-12.

⁹ Ania ti masursuro dagiti agtutubo a kakabsat a lallaki iti ulidan ni David? Aramidem ti amin a kabaelam nga agserbi kadagiti kakabsat. Panunotem ti kapadasan ti kabsat nga agnagan Ricardo. * Idi tin-edyer, arapaapna ti ag-regular pioneer. Ngem adda nangibaga a saan pay a mabalin. Imbes a sumuko wenno agsakit ti nakem ni Ricardo, ad-adu nga oras ti binusbosna iti ministerio. Imbagana: “No lagipek ti napalabas, makitak a pagsayaatak ti napasamak tapno rumang-ayak. Siniguradok a masarungkarak dagiti interesado a nasarakak ken nagsaganaak a naimbag iti tunggal panagsarungkar. Naikonduktak pay ketdi ti umuna a panangyadalko iti Biblia. Bayat nga umad-adu ti kapadasak, dumakdakkel met ti kompiansak iti bagik.” Maysa itan ni Ricardo a nabunga a regular pioneer ken ministerial nga adipen.

10. Iti maysa a pasamak, ania ti inaramid ni David sakbay a nangaramid iti napateg a desision?

¹⁰ Usigentayo ti sabali pay a salaysay maipapan iti biag ni David. Bayat a pugante isuna ken dagiti tattaona, pinanawanda dagiti pamiliada para iti maysa a mision. Bayat nga awanda, rinaut dagiti kalaban ti balbalayda ket impanawda dagiti pamiliada. Mabalin koma a pinanunot ni David a gapu iti adu a kapadasanna kas mannakigubat, sigurado a makaaramid  iti epektibo nga estratehia tapno maispalna dagiti naipanaw. Ngem nagpaiwanwan ni David ken Jehova. Iti tulong ti padi a ni Abiatar, dinamag ni David ken Jehova: “Kamatek kadi dagiti rimmaut?” Nagwen ni Jehova ken impasiguradona nga agballigi ni David. (1 Sam. 30:7-10) Ania ti masursurom iti daytoy a pasamak?

11. Ania ti mabalin nga aramidem sakbay nga agdesisionka?

¹¹ Agpabalakadka sakbay nga agdesisionka. Agkonsultaka kadagiti nagannakmo. Makaalaka met iti nasayaat a balakad no makisaritaka kadagiti eksperiensiado a panglakayen. Agtaltalek ni Jehova kadagitoy a naapointaran a lallaki, ket masapul met nga agtalekka kadakuada. Ibilang ida ni Jehova kas “sagut” iti kongregasion. (Efe. 4:8) Magunggonaanka no tuladem ti pammatida ken denggem dagiti nainsiriban a suhestionda. Usigentayon ti masursurotayo ken Ari Asa.

12. Ania dagiti kualidad ni Ari Asa idi nangrugi nga agturay?

¹² Idi agtutubo ni Ari Asa, napakumbaba ken natured. Kas pagarigan, idi isu ti simmaruno nga agturay ken amana nga Abias, inrugina ti kampania kontra iti idolatria. “Imbagana met iti Juda a sapulenda ni Jehova a Dios dagidi ammada ken tungpalenda ti Linteg ken dagiti bilin.” (2 Cron. 14:1-7) Ken idi rimmaut iti Juda ni Zera nga Etiope a kaduana ti 1,000,000 a soldadona, nainsiriban a nagpatulong ni Asa ken Jehova. Inkararagna: “O Jehova, awan nagdumaanna kenka nakapuy man wenno napigsa dagiti tulongam. Tulongannakami, O Jehova a Diosmi, ta agtalekkami kenka.” Ipakita dagitoy a nagpintas a sasao ni Asa nga agtalek a maisalakan isuna ni Jehova ken ti ilina. Nagtalek ni Asa iti nailangitan nga Amana, ket “inabak ni Jehova dagiti Etiope.”—2 Cron. 14:8-12.

13. Ania ti napasamak ken Asa idi agangay, ken apay?

¹³ Sigurado nga umanamongka a nagdakkel a problema ti panangsango iti 1,000,000 a soldado, ngem napagballigian dayta ni Asa. Nupay kasta, makapaladingit ta idi naipasango iti basbassit a problema, saan a nagkonsulta ken Jehova. Idi pinangtaan ti dakes nga ari ti Israel a ni Baasa, nagpatulong ni Asa iti ari ti Siria. Nagresulta dayta a desisionna iti didigra! Babaen ken propeta Hanani, imbaga ni Jehova ken Asa: “Gapu ta nagtalekka iti ari ti Siria ket saanka a nagtalek ken Jehova a  Diosmo, nakalibas iti imam ti armada ti ari ti Siria.” Kinapudnona, sipud idin, kanayonen a makigubgubat ni Asa. (2 Cron. 16:7, 9; 1 Ar. 15:32) Ania ti masursurotayo?

14. Kasanoka nga agpannuray ken Jehova, ken sigun iti 1 Timoteo 4:12, ania ti resultana no aramidem dayta?

¹⁴ Agtalinaedka a napakumbaba ken agtultuloyka nga agpannuray ken Jehova. Idi nagpabautisarka, impakitam ti dakkel a pammati ken panagtalek ken Jehova. Siraragsak nga intalek kenka ni Jehova ti pribilehio nga agbalin a miembro ti pamiliana. Ti napateg itan ket itultuloymo ti agpannuray ken Jehova. Kasla nalaka laeng ti agpannuray ken Jehova no maipasangoka kadagiti narigat a desision, ngem iti ngay dadduma a kasasaad? Nakapatpateg nga agtalekka ken Jehova no agaramidka kadagiti desision, kas iti panagpili iti paglinglingayan, sekular a trabaho, ken kalat iti biag! Dika agpannuray iti bukodmo a sirib. Mangbirokka ketdi kadagiti prinsipio ti Biblia nga agaplikar iti situasionmo, sa iyaplikarmo dayta. (Prov. 3:5, 6) No kasta ti aramidem, maparagsakmo ni Jehova ken raemendaka dagiti kakongregasionmo.—Basaen ti 1 Timoteo 4:12.

15. Kas mabasa iti 2 Cronicas 18:1-3; 19:2, ania dagiti nagkamalian ni Ari Jehosafat?

¹⁵ Siempre, imperpektotayo amin isu nga agkamalika no dadduma. Ngem saan koma a daytoy ti rason a saanmo nga aramiden ti amin a kabaelam nga agserbi ken Jehova. Usigentayo ti kapadasan ni Ari Jehosafat. Adu ti nagsasayaat a kualidadna. Idi agtutubo, “ti Dios ni amana ti nagserbianna ken sinurotna ti bilinna.” Kasta met, imbaonna dagiti prinsipe iti amin a siudad ti Juda tapno isuroda dagiti umili maipapan ken Jehova. (2 Cron. 17:4, 7) Uray no napasnek idi ni Jehosafat, adda dagiti tiempo a nakaaramid iti dakes a desision. Kas resulta ti maysa kadagita a desision, adda pannakabagi ni Jehova a nangtubngar ken Jehosafat. (Basaen ti 2 Cronicas 18:1-3; 19:2.) Ania ti masursurom iti dayta a salaysay?

16. Ania ti masursurom iti kapadasan ni Rajeev?

¹⁶ Awatem ken iyaplikarmo ti balakad. Kas iti adu nga agtutubo a lallaki, baka marigatanka a mangpanunot no ania dagiti masapul a prioridadmo iti biag. Saanka a maupay. Kitaem ti kapadasan ti agtutubo a kabsat a lalaki a ni Rajeev. Inyestoriana maipapan iti kinatin-edyerna:  “No dadduma, diak idi ammo ti ar-aramidek. Kas iti adu nga agtutubo, mas interesadoak iti isports ken ragragsak imbes nga iti pannakigimong wenno panangasaba.” Ania ti nakatulong ken Rajeev? Adda nasingpet a panglakayen a nangbalakad kenkuana. Intuloy ni Rajeev: “Tinulongannak a mangtarus iti prinsipio ti 1 Timoteo 4:8.” Sipapakumbaba nga inawat ni Rajeev ti balakad ket pinanunotna manen dagiti prioridadna iti biag. Imbagana: “Nagdesisionak nga iyun-unak dagiti naespirituan a kalat.” Ti resultana? “Sumagmamano a tawen kalpasan a naawatko dayta a balakad,” inlawlawag ni Rajeev, “nakualipikarak nga agserbi kas ministerial nga adipen.”

17. Ania ti marikna dagiti natataengan kadagiti agtutubo a lallaki nga agserserbi ken Jehova?

¹⁷ Agtutubo a lallaki, ap-apresiarendakayo unay dagiti natataengan a kaduayo nga agserserbi ken Jehova iti “abagan-abaga”! (Sof. 3:9) Maay-ayatanda iti kinaregta ken kinaganaygayyo iti trabaho a mait-ited kadakayo. Maragragsakanda kadakayo.—1 Juan 2:14.

18. Kas kuna ti Proverbio 27:11, ania ti marikna ni Jehova kadagiti agtutubo a lallaki nga agserserbi kenkuana?

¹⁸ Agtutubo a kakabsat a lallaki, diyo pulos liplipatan nga ay-ayaten ken agtaltalek kadakayo ni Jehova. Impakpakaunana nga iti maudi nga al-aldaw, addanto buyot dagiti agtutubo a lallaki a sisasagana nga agboluntario nga agserbi kenkuana. (Sal. 110:1-3) Ammona nga ay-ayatem isuna ken kayatmo ti agserbi kenkuana iti amin a kabaelam. Isu nga an-anusam ti dadduma, ken an-anusam ti bagim. No agkamalika, akseptarem ti balakad ken disiplina a maawatmo, ket ibilangmo a naggapu dayta ken Jehova. (Heb. 12:6) Aggaggagetka iti aniaman a maipaaramid kenka. Ken kangrunaanna, aramidem ti amin a kabaelam tapno ipagpannakkelnaka ti nailangitan nga Amam.—Basaen ti Proverbio 27:11.