Kasta ti insaludsod ti dadduma a pinalabasanda laeng a binasa dayta a salaysay. Ngem adda dua a lallaki nga agnagan iti Mefiboset kadagita a bersikulo, ket adda dagiti masursurotayo no repasuentayo dagiti napasamak.

Pito a lallaki ken dua a babbai ti annak ni Ari Saul ti Israel. Ni Jonatan ti inauna nga anak a lalaki ni Saul. Idi agangay, naaddaan ni Saul iti maysa pay nga anak a lalaki a napanaganan iti Mefiboset, nga inyanak ti kamalalana a ni Rizpa. Makapainteres ta adda met anak ni Jonatan nga agnagan iti Mefiboset. No kasta, adda anak ken apoko ni Ari Saul nga agpada a Mefiboset ti naganda.

Adda idi tiempo a kinagura ni Ari Saul dagiti Gibeonita a makipagnanaed kadagiti Israelita ket ginandatna a papatayen amin ida. Nalawag nga adu kadakuada ti napapatay. Talaga a nagdakes dayta. Apay? Ngamin, idi tiempo ni Josue, dagiti panguluen dagiti Israelita ket nangaramid iti katulagan ti pannakikappia kadagiti Gibeonita.​—Jos. 9:3-27.

Saan pay a nawaswas dayta a katulagan idi tiempo ni Ari Saul. Ngem dina sinurot ti katulagan, ta pinadasna a papatayen ti amin a Gibeonita. Gapu iti dayta, “nakabasol ni Saul ken ti pamiliana.” (2 Sam. 21:1) Idi nagtugawen ni David kas ari, impulong kenkuana dagiti nakalasat a Gibeonita ti dakes nga inaramid ni Ari Saul. Dinamag ni David kadakuada no kasano a mabayadan ti dakes nga inaramid ni Saul tapno bendisionan ni Jehova ti daga ti Israel. Imbes a kuarta ti dinawat dagiti Gibeonita, kiniddawda a mayawat kadakuada ti pito nga annak a lallaki ti tao a ‘nangpadas a mangpatay kadakuada amin’ tapno mapapatay. (Num. 35:30, 31) Pinatgan dayta ni David.​—2 Sam. 21:2-6.

Iti daydi a tiempo, natayen da Saul ken Jonatan iti gubat, ngem sibibiag ni Mefiboset nga anak ni Jonatan. Napilay idi ubing pay gapu iti aksidente, ken saan a karaman iti panangraut ni lolona kadagiti Gibeonita. Nagkinnari da David ken Jonatan nga agtalinaedda nga aggayyem, a pakagunggonaan dagiti annakda, a pakairamanan ni Mefiboset nga anak ni Jonatan. (1 Sam. 18:1; 20:42) Kuna ti salaysay: “Naasian ni Ari David ken Mefiboset nga anak ni Jonatan nga anak ni Saul, gapu iti tulaganda a dua ken ni Jonatan nga anak ni Saul iti imatang ni Jehova.”​—2 Sam. 21:7.

Ngem pinatgan latta ni David ti kiddaw dagiti Gibeonita. Inyawatna ti dua a lallaki nga annak ni Saul, a maysa kadakuada ket agnagan iti Mefiboset, ken ti lima kadagiti lallaki nga appoko ni Saul. (2 Sam. 21:8, 9) Gapu iti inaramid ni David, nagpatingga ti didigra iti daga a resulta ti basol ni Saul.

Dayta a pasamak ket saan laeng a basta paset ti historia. Nalawag ti linteg ti Dios. Kinunana: “Saan met a mapapatay dagiti annak maigapu kadagiti ammada.” (Deut. 24:16) No inosente ti dua nga annak a lallaki ni Saul ken ti lima nga appokona a lallaki, saan koma nga inaprobaran ni Jehova ti naaramid kadakuada. Kinuna pay ti linteg: “Mapapatay ti maysa maigapu iti bukodna a basol.” Agparang a ti pito a kaputotan ni Saul a napapatay ket adda pasetda iti gandat ni Saul a panangpapatay iti amin a Gibeonita. Kas resultana, inkaro dagita a pito a lallaki ti basolda.

Ipakita daytoy a salaysay a saan a mabalin a panunoten wenno irason ti maysa a tao nga awan ti sungsungbatanna iti dakes nga ar-aramidenna ta sursurotenna laeng dagiti naibilin kenkuana. Kuna ti maysa a nainsiriban a proverbio: “Pasayaatem ti pagnaan dagiti sakam, ket natalgedto ti amin nga addangmo.”​—Prov. 4:24-27; Efe. 5:15.