IDI tiempo ti Biblia, ti mayordomo ti mangaywan iti sangakabbalayan wenno sanikua ti sabali a tao. Dagiti Hebreo ken Griego a sasao a naipatarus kas “mayordomo” ket mabalin a tumukoy iti maysa a manangaywan wenno mangimanmanehar iti sangakabbalayan.

Idi naadipen idiay Egipto ni Jose nga anak ni Jacob, nagbalin a mayordomo iti balay ti amona. Kinapudnona, ti Egipcio nga amona ‘impabiangna ken Jose ti amin.’ (Gen. 39:2-6) Idi agangay, idi nagbalin ni Jose a mannakabalin nga agturay iti Egipto, nangapointar met iti mayordomo iti bukodna a balay.​—Gen. 44:4.

Idi tiempo ni Jesus, dagiti makinkukua iti daga gagangay nga agnanaedda kadagiti siudad nga adayo kadagiti talonda, isu a mangapointarda kadagiti mayordomo a mangaywan iti inaldaw nga aktibidad dagiti trabahador iti talonda.

Asino ti kualipikado nga agbalin a mayordomo? Imbaga ti umuna a siglo a Romano a mannurat a ni Columella a ti adipen a maapointaran kas manangaywan, wenno mayordomo, ket masapul nga “eksperiensiado.” Masapul a “siguraduenna nga agtrabtrabaho dagiti trabahador ngem saan a naulpit.” Innayonna: “Daytoy ti kangrunaan a kualipikasionna​—saanna koma a panunoten nga ammona ti amin a banag ken kanayon a magagaran nga agsursuro.”

Iti Sao ti Dios, nausar ti ulidan ken trabaho ti mayordomo a mangiladawan iti dadduma nga aktibidad ti kongregasion Kristiano. Kas pagarigan, iparparegta ni apostol Pedro kadagiti Kristiano nga usarenda dagiti abilidadda nga inted ti Dios tapno “agserbi[da] iti maysa ken maysa kas nasayaat nga adipen ti nagpaiduma a kinaimbag ti Dios.”​—1 Ped. 4:10.

Kasta met, inusar ni Jesus ti ulidan ti mayordomo iti ilustrasionna iti Lucas 16:1-8. Kanayonanna, iti padto maipapan iti pagilasinan ti kaadda ni Jesus kas Ari, impasiguradona kadagiti pasurotna a mangdutok iti “matalek ken masirib nga adipen,” wenno “matalek a mayordomo.” Ti kangrunaan nga annongen dayta a mayordomo ket ti panangipaay iti agtultuloy a suplay ti naespirituan a taraon kadagiti pasurot ni Kristo bayat ti tiempo ti panungpalan. (Mat. 24:45-47; Luc. 12:42) Agyamyamantayo ta karamantayo kadagiti umaw-awat kadagiti makapabileg a publikasion nga isagsagana ti matalek a mayordomo para iti amin a tattao iti intero a lubong.