1-2. (a) Apay a naibaga ni apostol Pablo a ti ayat “ti kapatgan” a kualidad? (b) Ania dagiti saludsod nga usigentayo?

 IDI inlawlawag ni apostol Pablo ti maipapan iti pammati, namnama, ken ayat, ti konklusionna ket “ti ayat ti kapatgan [a kualidad] kadagitoy.” (1 Cor. 13:13) Apay a naibaga dayta ni Pablo? Iti masanguanan, saantayton a kasapulan ti mamati kadagiti kari ti Dios maipapan iti baro a lubongna wenno mangnamnama a matungpal dagita a kari ta napasamakton dagita. Ngem masapulto latta a kanayon nga ayatentayo ni Jehova ken dagiti tattao. Kinapudnona, ti ayattayo kadakuada ket agtultuloy a dumakkel iti agnanayon.

² Ket gapu ta kanayon a masapul nga ipakitatayo ti ayat, usigentayo ti tallo a saludsod. Umuna, apay a masapul nga agiinnayattayo? Maikadua, kasanotayo a maipakita ti ayattayo iti maysa ken maysa? Maikatlo, kasanotayo a maitultuloy a mapabileg ti panagiinnayattayo?

3. Ania dagiti rason nga agiinnayattayo?

³ Apay a nagpateg nga agiinnayattayo? No ayatentayo dagiti kakabsat, pampaneknekantayo a datayo dagiti pudno a Kristiano. Imbaga ni Jesus kadagiti apostolna: “Maammuanto ti amin a dakayo dagiti adalak​—no agiinnayatkayo.” (Juan 13:35) Kasta met, agtalinaed ti panagkaykaysatayo no adda ayattayo iti maysa ken maysa. Inawagan ni Pablo dayta nga ayat kas ti “perpekto  a singgalut ti panagkaykaysa.” (Col. 3:14) Ngem adda pay sabali a rason a masapul nga agiinnayattayo. Insurat ni apostol Juan kadagiti kapammatianna: “Asinoman a mangay-ayat iti Dios masapul nga ayatenna met ti kabsatna.” (1 Juan 4:21) No agiinnayattayo, ipakpakitatayo nga ay-ayatentayo ti Dios.

4-5. Ania ti mangipakita a ti ayattayo iti Dios ket konektado iti ayattayo kadagiti kakabsat? Mangted iti pagarigan.

⁴ Ania ti mangipakita a ti ayattayo iti Dios ket konektado unay iti ayattayo kadagiti kakabsat? Kas pagarigan, kitaentayo ti koneksion ti pusotayo iti dadduma a paset ti bagitayo. No itsek ti doktor ti pulsotayo tapno maammuanna no nabuntog wenno napaspas dayta, mabalin a maammuanna met ti kondision ti pusotayo. Kasanotayo a mayaplikar daytoy a prinsipio no maipapan iti ayat?

⁵ No itsek ti doktor ti pulsotayo, maammuanna no kasano kapigsa ti pusotayo. Kasta met, maammuantayo no kasano kabileg ti ayattayo iti Dios no usigentayo no kasano kabileg ti ayattayo ti sabsabali. No madlawtayo a medio kimmapuy ti ayattayo kadagiti kakabsat, mabalin nga ipakita dayta a kumapkapuy metten ti ayattayo iti Dios. Ngem no kanayon nga ipakitatayo ti ayattayo kadagiti kapammatiantayo, ipakita dayta a nabileg ti ayattayo iti Dios.

6. Apay a rumbeng laeng nga agbalaw ken agdanagtayo no kumapkapuyen ti ayattayo kadagiti kakabsat? (1 Juan 4:​7-9, 11)

⁶ Rumbeng laeng nga agbalaw wenno agdanagtayo no kumapkapuyen ti ayattayo kadagiti kakabsat. Apay? Ngamin, ipakita dayta a kumapkapuyen ti relasiontayo ken Jehova. Pinagminar dayta ni apostol Juan idi impalagipna: “Ti saan nga agayat iti kabsatna a nakitana, saanna a mabalin nga ayaten ti Dios a saanna a nakita.” (1 Juan 4:20) Ania ti masursurotayo? Maragsakan laeng ni Jehova kadatayo no “agiinnayat[tayo].”—Basaen ti 1 Juan 4:​7-9, 11.

7-8. Ania ti dadduma a pamay-an a maipakitatayo ti ayattayo iti maysa ken maysa?

⁷ Maulit-ulit nga ibilin ti Sao ti Dios daytoy: “Agiinnayatkayo.” (Juan 15:​12, 17; Roma 13:8; 1 Tes. 4:9; 1 Ped. 1:22; 1 Juan 4:11) Ngem ti ayat ket maysa a kualidad ti puso, wenno makin-uneg a kinatao, ket awan ti tao a makabasa iti pusotayo. Kasano ngarud a maammuan dagiti kakabsat nga ay-ayatentayo ida? Babaen ti ibagbaga ken ar-aramidentayo.

⁸ Adu ti pamay-an a maipakitatayo nga ay-ayatentayo dagiti kakabsat. Dagitoy ti sumagmamano: “Agsaokayo iti pudno iti padayo a tao.” (Zac. 8:16) “Agkakappiakayo.” (Mar. 9:50) “Iti panagpipinnadayaw, dakayo ti mangyun-una.” (Roma 12:10) “Awatenyo ti maysa ken maysa.” (Roma 15:7) “Itultuloyyo ti . . . agpipinnakawan.” (Col. 3:13) “Itultuloyyo ti agtitinnulong a mangawit kadagiti pakadagsenan ti maysa ken maysa.” (Gal. 6:2) “Itultuloyyo a liwliwaen ti maysa ken maysa.” (1 Tes. 4:18) “Itultuloyyo ti . . . agpipinnabileg.” (1 Tes. 5:11) “Ikararaganyo ti maysa ken maysa.”​—Sant. 5:16.

9. Apay a ti panangliwliwa iti sabsabali ket napateg a pamay-an a maipakitatayo nga ay-ayatentayo ida? (Kitaen met ti ladawan.)

⁹ Usigentayo ti maysa a pamay-an a maipakitatayo ti ayattayo kas nadakamat iti napalabas a parapo. Imbaga ni Pablo: “Itultuloyyo a liwliwaen ti maysa ken maysa.” Apay a ti panangliwliwa iti sabsabali ket napateg a pamay-an a maipakitatayo nga ay-ayatentayo ida? Sigun iti maysa a reperensia ti Biblia, ti sao nga inusar ni Pablo para iti “liwliwaen” kaipapananna  “ti panagtakder iti sibay ti maysa a tao a mangparegta kenkuana no isut’ naipasidong [wenno makapaspasar] iti nakaro a pannakasuot.” No ngarud liwliwaentayo ti kapammatiantayo nga adda problemana, matulongantayo isuna nga agtultuloy a magna iti dalan ti biag. Kada liwliwaentayo ti kapammatiantayo, ipakpakitatayo nga ay-ayatentayo isuna.​—2 Cor. 7:​6, 7, 13.

10. Ania ti koneksion ti pannakipagrikna iti panangliwliwa?

¹⁰ Ti pannakipagrikna ket konektado unay iti panangliwliwa. Kasano? Ti mannakipagrikna a tao ket matignay a mangliwliwa iti sabsabali ken ikagumaanna a bang-aran ti panagsagabada. Umuna, makipagriknatayo; kalpasanna, mangliwliwatayo. Kitaentayo no kasano nga inkonektar ni Pablo ti pannakipagrikna ni Jehova iti panangliwliwa nga ipapaayna. Dineskribir ni Pablo ni Jehova kas “ti Ama a napnuan iti asi ken Dios ti amin a liwliwa.” (2 Cor. 1:3) Kas iti ilawlawag ti study note dayta a bersikulo, nagusar ni Pablo iti sasao a “napnuan iti asi” a pangdeskribir iti pannakipagrikna iti sabsabali. Isu a “ti Dios ket naawagan iti Ama a napnuan iti asi, wenno ti Gubuayan ti asi, gapu iti kasta unay a pannakipagriknana kadagiti tattao.” Dayta a pannakipagrikna ti mangtignay met kenkuana a mangliwliwa “kadatayo iti amin a pakasuotantayo.” (2 Cor. 1:4) No kasano a makarepresko ti nadalus a danum nga agay-ayus manipud iti ubbog para kadagiti mawaw, makarepresko met ti panangliwliwa ken tulong nga ipapaay ni Jehova kadagiti addaan iti problema. Kasanotayo a matulad ni Jehova iti pannakipagrikna ken panangliwliwa? Ti maysa ket parang-ayentayo dagiti kualidad a makatulong tapno agbalintayo a mannakipagrikna ken manangliwliwa. Ania ti dadduma kadagita a kualidad?

11. Sigun iti Colosas 3:12 ken 1 Pedro 3:​8, ania pay dagiti kualidad a masapul a parang-ayentayo tapno mataginayontayo ti ayat a mangtignay kadatayo a mangliwliwa iti sabsabali?

¹¹ Ania ti makatulong kadatayo a mangtaginayon iti ayat a kasapulantayo tapno inaldaw nga “itultuloy[tayo] a liwliwaen ti maysa ken maysa”? Masapul a parang-ayentayo dagiti nagsasayaat a kualidad a kas iti simpatia, nainkabsatan nga ayat, ken kinaimbag. (Basaen ti Colosas 3:12; 1 Pedro 3:8.) Kasano a makatulong kadatayo dagita a kualidad? No iyugalitayo ti pannakipagrikna ken ti dadduma a kualidad a konektado iti dayta, sigurado a matignaytayo a mangliwliwa kadagiti makapaspasar iti rigat. Kas imbaga ni Jesus, “sawen ti ngiwat ti linaon ti puso. Ti naimbag a tao agsao iti naimbag, gapu ta napno ti pusona iti naimbag a bambanag.” (Mat. 12:​34, 35) Ti panangliwliwa kadagiti kakabsat nga agkasapulan ket talaga a napateg a pamay-an tapno maipakitatayo nga ay-ayatentayo ida.

12. (a) Apay a masapul a kanayon nga alertotayo? (b) Ania a saludsod ti usigentayon?

¹² Kayattayo amin nga ‘itultuloy ti agiinnayat.’ (1 Juan 4:7) Ngem napateg a laglagipentayo nga impakdaar ni Jesus a “lumamiisto ti ayat ti ad-adu.” (Mat. 24:12) Saan idi nga ibagbaga ni Jesus a mapasamak dayta iti kaaduan nga adalanna. Nupay kasta, masapul a kanayon nga alertotayo tapno dinatay maimpluensiaan ti lumamlamiis nga ayat dagiti tattao iti lubong. Bayat a pampanunotentayo dayta, usigentayo daytoy a napateg a saludsod: Adda kadi pamay-an tapno masuboktayo no nabileg ti ayattayo kadagiti kakabsat?

13. Ania ti mabalin a mangsubok iti ayattayo?

¹³ Ti maysa a pamay-an tapno maammuantayo no nabileg ti ayattayo ket ti panangusig  iti reaksiontayo iti nadumaduma a situasion. (2 Cor. 8:8) Ti maysa a kasta a situasion ket dinakamat ni apostol Pedro: “Kangrunaan iti amin, nauneg koma ti ayatyo iti maysa ken maysa, ta ti ayat abbonganna ti adu a basol.” (1 Ped. 4:8) No kasta, dagiti pagkapuyan ken kinaimperpekto ti sabsabali ti mabalin a mangsubok iti ayattayo.

14. Sigun iti 1 Pedro 4:​8, ania a kita ti ayat ti kasapulantayo? Mangted iti pagarigan.

¹⁴ Usigentayo itan ti sasao nga inusar ni Pedro. Ti umuna a paset ti bersikulo 8 deskribirenna ti kita ti ayat a masapul nga adda kadatayo​—‘nauneg nga ayat.’ Ti sao nga inusar ni Pedro para iti “nauneg” literal a kaipapananna ti “nabennat.” Ti maikadua a paset ti bersikulo deskribirenna ti epekto ti nauneg nga ayattayo. Abbonganna dagiti basol ti kakabsat. Kayarigan dayta ti maysa a lamisaan nga adu ti mansana. Ania ti mabalinmo nga aramiden? Mangalaka iti tela a bennatem agingga a maabbongan saan la a maysa, wenno dua, no di ket ti adu a mansa. Kasta met laeng no nauneg ti ayattayo. Bennatentayo a bennaten ti ayattayo agingga a makalubanna ti saan la a maysa, wenno dua, no di ket ti “adu a basol.” Kas iti tela a mangabbong iti mansa, ti ayat  maabbonganna dagiti pagkapuyan ken kinaimperpekto ti sabsabali.

15. No nabileg ti ayattayo kadagiti kakabsat, ania ti kayatayo nga aramiden? (Colosas 3:13)

¹⁵ Masapul a nabileg ti ayattayo iti sabsabali tapno mapakawantayo dagiti kinaimperpekto dagiti kapammatiantayo—uray nakarigrigat dayta no dadduma. (Basaen ti Colosas 3:13.) No mapakawantayo ti sabsabali, maipakitatayo a nabileg ti ayattayo ken maparagsaktayo ni Jehova. Ania pay ti makatulong tapno mapalabastayo dagiti makapasuron nga ugali ken pagkamkamalian ti dadduma?

16-17. Ania pay ti makatulong tapno mapalabastayo dagiti nagkamalian ti sabsabali? Iyilustrar. (Kitaen met ti ladawan.)

¹⁶ Agpokuska kadagiti positibo nga ugali dagiti kakabsat, saan a kadagiti negatibo. Usigem daytoy nga ilustrasion. Ipapanmo nga addaka iti maysa a gathering a kaduam ti maysa a grupo dagiti kakabsat. Nakaragragsakkayo nga agkakadua ket idi malpasen ti gathering, nagpipiktiurkayo. Kinapudnona, saan la a namnaminsan no di ket namitlo pay a nagpipiktiurkayo ta baka naalas ti umuna a piktiur. Ita, manon ti piktiuryo? Tallo. Ngem nadlawmo nga iti maysa kadagita, nakamisuot ti maysa a brother. Ania ti aramidem iti dayta a piktiur? I-delete-mo ta adda pay dua a piktiur a nakaisem ti amin, agraman dayta a brother.

¹⁷ Dagiti piktiur nga in-save-tayo ket kayariganna dagiti pasamak a kayattayo a laglagipen. Masansan nga adda dagiti nasayaat a malaglagiptayo bayat a kaduatayo dagiti kakabsat.  Ngem komustan no iti maysa kadagita a gundaway, adda naibaga wenno naaramid ti maysa a kabsat a nakasaktam? Ania ti masapul nga aramidentayo iti dayta a napasamak? I-delete-mo dayta iti panunotmo wenno lipatemon no kasano nga i-delete-mo ti maysa kadagidiay a piktiur. (Prov. 19:11; Efe. 4:32) Kayatayo a lipaten ti nagkamalian ti kapammatiantayo gapu ta ad-adu ti nasayaat a malaglagiptayo iti dayta a kabsat. Dagita ti kayattayo nga ipateg ken pagtalinaeden iti panunottayo.

18. Ania dagiti kangrunaan a punto maipapan iti ayat ti inusigtayo iti daytoy nga artikulo?

¹⁸ Apay a kayattayo a pagtalinaeden a nabileg ti ayattayo iti maysa ken maysa? Kas nausigtayon, no ipakpakitatayo ti ayattayo kadagiti kakabsat, ipakpakitatayo met ti ayattayo ken Jehova. Kasano a mayebkastayo ti ayattayo kadagiti kapammatiantayo? Ti maysa a pamay-an ket liwliwaentayo ida. No mannakipagriknatayo, ‘maitultuloytayo a liwliwaen ti maysa ken maysa.’ Kasanotayo a mapagtalinaed a nabileg ti ayattayo iti maysa ken maysa? Babaen ti panangaramidtayo iti amin a kabaelantayo a mangpakawan kadagiti pagkamkamalian ti sabsabali.

19. Apay a nangnangruna a napateg ita nga ipakitatayo ti ayat iti maysa ken maysa?

¹⁹ Apay a nangnangruna a napateg ita nga ipakitatayo ti ayat iti maysa ken maysa? Kitaentayo ti rason nga inted ni Pedro: “Asidegen ti panungpalan ti amin a banag. Gapuna, . . . nauneg koma ti ayatyo iti maysa ken maysa.” (1 Ped. 4:​7, 8) Bayat nga umas-asideg ti panagpatingga daytoy dakes a lubong, ania ti ekspektarentayo? Imbaga ni Jesus maipapan kadagiti pasurotna: “Guraendakayto ti amin a nasion gapu iti naganko.” (Mat. 24:9) Tapno maibturantayo ti kasta a gura, masapul nga agtalinaedtayo nga agkaykaysa. No aramidentayo dayta, mapaay ti panangikagumaan ni Satanas a mamagsisina kadatayo ta nadekkettayo iti maysa ken maysa gapu iti ayat—ti “perpekto a singgalut ti panagkaykaysa.”​—Col. 3:14; Fil. 2:​1, 2.