1, 2. Ania dagiti karit a nakaipasanguan ni Josue kalpasan ti ipapatay ni Moises?

MALAGLAGIP pay laeng ni Josue ti imbaga ni Jehova: “Ni Moises nga adipenko natayen; ket ita tumakderka, ballasiwem daytoy Jordan, sika ken daytoy intero nga ili, nga agturong iti daga nga itedko kadakuada.” (Jos. 1:1, 2) Bigla a panagbalbaliw dayta para ken Josue, a nagserbi a katulongan ni Moises iti dandani 40 a tawen!

² Gapu ta nabayag idi ni Moises a lider ti Israel, mabalin a pinanunot ni Josue no agtulnogto met laeng kenkuana ti ili ti Dios. (Deut. 34:8, 10-12) Kuna ti maysa a reperensia ti Biblia maipapan iti Josue 1:1, 2: “Idi un-unana ken ita, ti panagsukat ti lider ti maysa kadagiti kapeggadan a tiempo iti seguridad ti maysa a nasion.”

3, 4. Kasano nga ammotayo a saan a napaay ti panagtalek ni Josue iti Dios, ken ania ti maisaludsodtayo iti bagitayo?

³ Adda dagiti pagdandanagan ni Josue, ngem kalpasan ti sumagmamano nga aldaw, dagus a nagtignay. (Jos. 1:9-11) Saan a  napaay ti panagtalekna iti Dios. Kas ipakita ti Biblia, inusar ni Jehova ti anghel a pannakabagina a mangidalan ken Josue ken ti ilina. Nainkalintegan a maibagatayo a daytoy nga anghel ket ti Sao, ti inauna nga anak ti Dios.​—Ex. 23:20-23; Juan 1:1.

⁴ Iti tulong ni Jehova, naakseptar ti Israel a ni Josue ti baro a liderda saanen a ni Moises. Agbibiagtayo met iti tiempo a nagadu ti panagbalbaliw, ket mabalin a maisaludsodtayo, ‘Bayat a sipapartak nga umab-abante ti organisasion ti Dios, makapagtalektayo kadi ken Jesus kas nadutokan a Lidertayo?’ (Basaen ti Mateo 23:10.) Pagsasaritaantayo no kasano a nangipaay idi ni Jehova iti mapagtalkan a lider bayat dagiti panagbalbaliw.

5. Asino ti nasabat ni Josue idi asidegen idiay Jerico? (Kitaen ti ladawan iti rugi ti artikulo.)

⁵ Idi nakaballasiwen dagiti Israelita idiay Jordan, adda napasamak a di ninamnama ni Josue. Idi asidegen idiay Jerico, adda nasabatna a lalaki a nakaiggem iti kampilan. Dina am-ammo, isu nga insaludsodna: “Dumasigka kadi kadakami wenno dumasigka kadagiti kabusormi?” Nasdaaw ni Josue idi imbaga ti lalaki no asino. Isu ti “prinsipe ti buyot ni Jehova,” a nakasagana a tumulong iti ili ti Dios. (Basaen ti Josue 5:13-15.) Nupay natukoy ni Jehova iti dadduma a paset ti Biblia nga isu ti mismo a makisasao ken Josue, awan duadua a makisasao ti Dios babaen ti anghel a pannakabagina, kas masansan nga inaramidna iti napalabas.​—Ex. 3:2-4; Jos. 4:1, 15; 5:2, 9; Ara. 7:38; Gal. 3:19.

6-8. (a) Apay a kasla awan serserbi dagiti instruksion ni Jehova no iti panangmatmat ti tao? (b) Kasano a nagbalin a nainsiriban ken naintiempuan dagita nga instruksion? (Kitaen met ti footnote.)

⁶ Nalawag dagiti instruksion daytoy nga anghel a Lider no kasano a rauten ni Josue ti siudad ti Jerico. Idi damo, kasla saan a nasayaat ti dadduma nga estratehia nga imbagana. Kas pagarigan, imbilin ni Jehova a makugit ti amin a lallaki, a dayta ti mamagbalin nga awan gawgawayda iti sumagmamano nga aldaw. Dayta kadi ti umiso a tiempo a makugit dagitoy a lallaki?​—Gen. 34:24, 25; Jos. 5:2, 8.

⁷ Mabalin a pinanunot la ketdi dagidiay nga awan gawayna a soldado nga Israelita no kasano a masalaknibanda ti pamiliada no rumaut iti kampoda dagiti kabusor. Ngem bigla a naipadamag a “siiirut a narikpan ti Jerico gapu iti annak ti Israel.” (Jos. 6:1) Bimmileg la ketdi ti panagtalek dagiti Israelita iti bilin ti Dios gapu iti kasta a di ninamnama a panagbaliw ti kasasaad!

⁸ Kasta met, naibilin kadagiti Israelita a saanda a darupen ti Jerico no di ket agmartsada iti aglawlaw ti siudad maminsan iti kada aldaw iti uneg ti innem nga aldaw sa mamimpito iti maikapito nga aldaw. Mabalin a pinanunot ti dadduma a soldado, ‘Saysayang laeng ti tiempo ken pigsatayo!’ Ngem ammo ti di makita a Lider ti Israel no ania ti eksakto nga aramidenna. Saan laeng a napabileg ti pammati dagiti Israelita iti dayta nga estratehiana no di ket nailisida pay iti pannakilaban kadagiti nabileg a mannakigubat ti Jerico.​—Jos. 6:2-5; Heb. 11:30. *

9. Apay a masapul a surotentayo dagiti instruksion ti organisasion ti Dios? Mangted iti pagarigan.

⁹ Ania ti masursurotayo iti daytoy a salaysay? No dadduma, mabalin a ditay naan-anay a maawatan ti rason dagiti baro nga urnos ti organisasion. Kas pagarigan, mabalin a kinuestionarantayo idi damo ti panagusar  iti elektroniko a gadyet iti personal a panagadal, iti ministerio, ken kadagiti gimong. Ngem ita, mabalin a mabigbigtayon dagiti pagsayaatan ti panagusar kadagita no posible. No adda positibo a resulta a makitatayo uray no agduaduatayo iti kasta a panagbalbaliw, bumileg ti pammatitayo ken ad-adda a makitunostayo.

10. Asino ti nangimaniobra iti nagpateg a miting ti bagi a manarawidwid idiay Jerusalem?

¹⁰ Agarup 13 a tawen kalpasan a nakomberte ni Cornelio, ipilpilit pay laeng ti dadduma a Judio a Kristiano ti panagpakugit. (Ara. 15:1, 2) Idi adda di panagtutunos idiay Antioquia, naibaon ni Pablo a mangidanon iti dayta nga isyu iti bagi a manarawidwid idiay Jerusalem. Ngem asino ti nangimaniobra iti dayta? Imbaga ni Pablo: “Simmang-atak maipagapu iti paltiing.” Nalawag nga inturong ni Kristo ti bambanag tapno solbaren ti bagi a manarawidwid dayta a di panagtutunos.​—Gal. 2:1-3.

11. (a) Ania nga isyu maipapan iti panagkugit ti nagtultuloy kadagiti Judio a manamati? (b) Kasano nga impakita ni Pablo ti situtulok a suportana kadagiti panglakayen idiay Jerusalem? (Kitaen met ti footnote.)

¹¹ Iti panangiwanwan ni Kristo, pinaglawag ti bagi a manarawidwid a saanen a kasapulan a makugit dagiti saan a Judio a Kristiano. (Ara. 15:19, 20) Ngem tawtawen kalpasanna, adu latta a Judio a Kristiano ti nangkugit iti annakda. Idi naipadamag kadagiti panglakayen idiay Jerusalem a saan kano a sursuroten ni Pablo ti Mosaiko a Linteg, adda di ninamnama nga imbilinda. * (Ara. 21:20-26) Imbagada a mangipan ni Pablo idiay templo iti uppat a lallaki tapno makita dagiti tattao a ‘salsalimetmetanna ti Linteg.’ Mabalin koma a kinuestionaran ni Pablo ti imbilinda nga aramidenna, sa imbagana a ti talaga a problema ket dagiti Judio a Kristiano a saan a nalawag ti pannakaawatda iti isyu ti panagkugit. Nupay kasta, sipapakumbaba a  nagtulnog ni Pablo ket sinuportaranna ti tarigagay dagiti panglakayen a mamagkaykaysa kadagiti manamati. Ngem baka maisaludsodtayo, ‘Apay nga impalubos ni Jesus nga agtultuloy daytoy a problema iti nabayag a tiempo idinto ta nagpatinggan ti Mosaiko a Linteg idi natay?’—Col. 2:13, 14.

12. Apay nga impalubos ni Kristo a lumabas ti nabayag a tiempo sakbay a masolbar ti isyu iti panagkugit?

¹² Adda dagiti nabayag a nangakseptar iti baro a pannakaawat. Kasapulan idi dagiti Judio a Kristiano ti adu a panawen tapno mabaliwanda ti panangmatmatda. (Juan 16:12) Narigat nga inakseptar ti dadduma a ti panagkugit ket saanen a pagilasinan iti espesial a relasionda iti Dios. (Gen. 17:9-12) Mabuteng ti dadduma amangan no idadanes ida dagiti padada a Judio gapu ta naidumdumada. (Gal. 6:12) Ngem idi agangay, nangipaay ni Kristo iti kanayonan a panangiwanwan babaen kadagiti surat ni Pablo.​—Roma 2:28, 29; Gal. 3:23-25.

13. Ania ti makatulong tapno maapresiartayo ti panangidaulo ni Kristo ita?

¹³ No ditay naan-anay a maawatan dagiti rason iti dadduma a panagbalbaliw iti organisasion, nasayaat a mennamennaentayo ti panangidaulo ni Kristo iti napalabas. Idi man tiempo ni Josue wenno idi umuna a siglo, kanayon a nangipaay ni Kristo iti nainsiriban a panangiwanwan tapno maprotektaran ti ili ti Dios, mapatibker ti pammatida, ken agtalinaed ti panagkaykaysa dagiti adipen ti Dios.​—Heb. 13:8.

14-16. Kasano a ti panangiwanwan ti “matalek ken masirib nga adipen” nalawag nga ipakitana a maseknan ni Kristo iti espiritualidadtayo?

¹⁴ Ti naayat a pannakaseknan ni Jesus iti espiritualidadtayo ket nalawag a makita iti naintiempuan a panangiwanwan ti “matalek ken masirib nga adipen.” (Mat. 24:45) Kinuna ni Marc, nga adda uppat nga annakna: “Pakpakapuyen ni Satanas dagiti kongregasion babaen ti panangdadaelna kadagiti pamilia. Gapu ta maiparparegta ti linawas a panagdaydayaw ti pamilia, nalawag ti mensahe kadagiti ulo ti pamilia​—protektaranda ti pamiliada!”

¹⁵ No matarusantayo ti panangiwanwan ni Kristo, mariknatayo a maseknan iti naespirituan a panagrang-aytayo. Kinuna ni Patrick, a maysa a panglakayen: “Idi damo, ibaga ti dadduma a saan unay a makaparegta ti babassit a grupo ti panangasaba iti ngudo ti lawas. Ngem nalawag a makita iti dayta nga urnos ti maysa a kangrunaan a kualidad ni Jesus​—ti interesna kadagiti nanumo. Marikna itan dagiti kakabsat a managbabain wenno saan unay a rumrummuar iti ministerio a maipatpategda ken adda usarda, isu a rimmang-ay ti espiritualidadda.”

¹⁶ Malaksid iti panangipaay ni Kristo iti naespirituan a kasapulantayo, tultulongannatayo nga agpokus iti kapatgan a trabaho ita ditoy daga. (Basaen ti Marcos 13:10.) Ni André, a baro a nadutokan a panglakayen, ket alerto kadagiti panagbalbaliw iti panangiwanwan iti organisasion ti Dios. Kinunana: “Ti panagkissay iti tao iti sanga nga opisina ipalagipna ti kinaganat ti tiempo ken masapul nga usarentayo ti pigsatayo iti trabaho a panangasaba.”

17, 18. Apay a nasayaat a panunotentayo dagiti pagimbagan dagiti nabiit pay a panagbalbaliw?

¹⁷ Ipakpakita ti aktibo a panangiwanwan ti agturturayen nga Aritayo, ni Jesu-Kristo, a nakapokus iti masanguanan. Gapuna, pagragsakantayo dagiti pagimbagan iti panangsurottayo kadagiti nabiit pay a panagbalbaliw. Mabalin a makaparegta a pagsasaritaan  iti panagdaydayaw ti pamiliayo no kasano a nagunggonaankayo kadagiti panagbalbaliw iti linawas a gimong wenno iti ministerio.

¹⁸ No maawatantayo ti rason dagiti instruksion nga ipapaay ti organisasion ni Jehova ken ti pagsayaatanda kadatayo, matignaytayo a siraragsak a sumurot iti dayta a panangiwanwan. Apresiarentayo la ketdi ta makainut iti kuarta ti basbassit a bilang ti literatura a mayim-imprenta ken ad-adda a maisaknap ti trabaho ti Pagarian iti intero a lubong gapu kadagiti baro a teknolohia. No panunotentayo dayta, mabalin a matignaytayo nga ad-adda nga agusar iti elektroniko a publikasion ken media. Iti kasta, matuladtayo ti pannakaseknan ni Kristo iti nainsiriban a panangusar iti sanikua ti organisasion.

19. Apay a nasken a suportarantayo ti panangiwanwan ni Kristo?

¹⁹ No sipipinget a suportarantayo ti panangiwanwan ni Kristo, mapabilegtayo ti pammati ti sabsabali ken makatulongtayo iti panagkaykaysa. Kinuna ni André maipapan iti pannakakissay ti miembro ti pamilia ti Bethel iti intero a lubong: “Napabilegak iti kinapositibo dagiti dati a Bethelite iti panangsuportada kadagita a panagbalbaliw. Makigidgiddanda iti karuahe ni Jehova ta naragsakda iti aniaman nga annongen a maited kadakuada.”

20, 21. (a) Apay a makapagtalektayo ken Kristo a Lidertayo? (b) Ania a saludsod ti pagsasaritaantayo iti sumaruno nga artikulo?

²⁰ Ti nadutokan a Lidertayo, ni Jesu-Kristo, asidegen nga “an-anayenna ti panagballigina” ken mangaramid iti “nakaam-amak a bambanag.” (Apo. 6:2; Sal. 45:4) Kabayatanna, isagsaganana ti ili ti Dios para iti baro a lubong inton makipasettayo amin iti nasaknap a trabaho a panangisuro ken panagibangon bayat ti panagungar dagiti natay.

²¹ Agballigi ti nadutokan nga Aritayo a mangiturong kadatayo iti baro a lubong, no naan-anay nga agtalektayo kenkuana uray no adda dagiti panagbalbaliw. (Basaen ti Salmo 46:1-3.) Mabalin a marigatantayo no dadduma gapu iti panagbalbaliw, nangnangruna no ditay ninamnama dayta. Kasano ngarud a mapagtalinaedtayo ti natalna a panunot ken naan-anay a pammati ken Jehova? Masungbatan dayta iti sumaruno nga artikulo.