1-2. (a) Ania ti asidegen nga iproklama dagiti nasion? (b) Ania dagiti saludsod a masapul a sungbatantayo?

IPAPANMON a kaiprokproklama laeng dagiti nasion ti nabayagen nga ur-urayenda a “talna ken talged.” Baka ipagpannakkelda a nakataltalnan ti lubong. Kayat dagiti nasion a panunotentayo a masolbarda ti amin a problema ti lubong. Ngem saanda a malapdan ti sumaruno a mapasamak! Apay a saan? Impadto ti Biblia: “Dumtengto ti kellaat a pannakadadaelda, . . . ket didanto pulos makalisi.”​—1 Tes. 5:3.

² Masapul a masungbatan dagitoy napapateg a saludsod: Anianto ti mapasamak bayat ti “dakkel a rigat”? Anianto ti namnamaen ni Jehova kadatayo iti dayta a tiempo? Kasanotayo a makapagsagana ita tapno agtalinaedtayto a matalek bayat ti dakkel a rigat?​—Mat. 24:21.

3. Sigun iti Apocalipsis 17:5, 15-18, kasanonto a dadaelen ti Dios ti “Babilonia a Dakkel”?

³ Basaen ti Apocalipsis 17:5, 15-18. Madadaelto ti “Babilonia a Dakkel”! Kas nadakamaten, saanto a malapdan dagiti nasion ti mapasamak iti dayta a tiempo. Apay a saan? Gapu ta ‘ikabilto ti Dios ti panunotna iti pusoda tapno itungpalda dayta.’ Ania dayta a panunot? Ti panangdadael iti sangalubongan nga imperio ti ulbod a relihion, a pakairamanan ti Kakristianuan. * Ikabilto ti Dios ti panunotna iti puso ti “10 a sara” ti  “nalabaga a narungsot nga animal.” Irepresentar ti 10 a sara ti amin a napolitikaan a turay a mangsupsuporta iti “narungsot nga animal”​—ti United Nations. (Apoc. 17:3, 11-13; 18:8) Inton bueltaen dagidiay a napolitikaan nga agtuturay ti ulbod a relihion, daytanton ti panangrugi ti dakkel a rigat. Bigla ken nakabutbutengto dayta a pasamak a mangapektar iti amin a tattao ditoy daga.

4. (a) Anianto ti posible a pagrason dagiti nasion a mangraut iti ulbod a relihion? (b) Ania ti posible nga aramidento dagiti dati a miembro dagita a relihion?

⁴ Ditay ammo no ania dagiti posible a pagrason dagiti nasion a mangraut iti Babilonia a Dakkel. Nalabit ibagadanto a dagiti relihion ti lubong ti lapped iti talna ken kanayon a makibibiangda iti politika. Wenno nalabit ibagadanto a nakaad-adu a kinabaknang ken sanikua ti naurnong dagiti relihion. (Apoc. 18:3, 7) Agparang a saanto a dadaelen daytoy nga iraraut ti amin a miembro dagidiay a relihion. Imbes ketdi, agparang a dagiti narelihiosuan nga organisasion ti pukawento dagiti nasion. Inton awanen dagita nga organisasion, mabigbigto dagiti dati a miembroda a pinaay ida dagiti lider ti relihionda ket mabalin nga ibagadanto a saanda a konektado kadagita a relihion.

5. Ania ti inkari ni Jehova maipapan iti dakkel a rigat, ken apay?

⁵ Saan nga ibaga ti Biblia no kasano kapaut ti pannakadadael ti Babilonia a Dakkel, ngem ammotayo nga ababanto laeng dayta. (Apoc. 18:10, 21) Inkari ni Jehova a ‘paababaenna dagita nga aldaw’ ti rigat tapno maisalakan ‘dagiti napili’ ken agtalinaed ti pudno a relihion. (Mar. 13:19, 20) Ngem ania ti namnamaen ni Jehova kadatayo no nangrugin ti dakkel a rigat agingga iti gubat ti Armagedon?

6. Apay a saan nga umanay a pugsatentayo laeng ti koneksiontayo iti ulbod a relihion?

⁶ Kas nailawlawag iti napalabas nga artikulo, namnamaen ni Jehova a sumina iti Babilonia a Dakkel dagiti agdaydayaw kenkuana. Ngem saan nga umanay ti panangpugsat laeng iti koneksiontayo iti ulbod a relihion.  Masapul a determinadotayo a mangitandudo iti pudno a relihion​—ti nadalus a panagdaydayaw ken Jehova. Usigentayo ti dua a pamay-an a maaramidantayo dayta.

7. (a) Kasano a naan-anay a masurottayo dagiti nalinteg a moral a pagalagadan ni Jehova? (b) Kasano nga ipaganetget ti Hebreo 10:24, 25 ti kinapateg ti panaggigimongtayo, nangnangruna ita?

⁷ Umuna, masapul a naan-anay a surotentayo dagiti nalinteg a moral a pagalagadan ni Jehova. Saantayo nga akseptaren dagiti pagalagadan ti lubong. Kas pagarigan, saantay nga anamongan ti aniaman a kita ti seksual nga immoralidad, a pakairamanan ti panagasawa dagiti agkasekso ken dadduma pay a homoseksual nga aramid ken kababalin. (Mat. 19:4, 5; Roma 1:26, 27) Maikadua, masapul nga itultuloytayo ti agdaydayaw a kadua dagiti padatayo a Kristiano. Aramidentayo daytoy sadinoman a mabalin, iti Kingdom Hall wenno, no kasapulan, iti pribado a pagtaengan wenno uray iti nalimed a pamay-an. Aniaman ti mapasamak, saantayo nga isardeng ti rutinatayo nga aggigimong tapno agdaydayaw. Kinapudnona, masapul nga ‘ad-adda pay nga aggigimongtayo amin bayat a makitkitatayo nga umas-asidegen ti aldaw.’​—Basaen ti Hebreo 10:24, 25.

8. Kasanonto a posible nga agbaliw ti mensahetayo iti masanguanan?

⁸ Bayat ti dakkel a rigat, mabalin nga agbaliwto ti mensahe nga ipakaammotayo. Iti agdama, ikaskasabatayo ti naimbag a damag maipapan iti Pagarian ken ikagkagumaantayo a tulongan dagiti tattao nga agbalin nga adalan. Ngem iti dayta a tiempo, mabalin nga ipakaammotayto ti mensahe a kas iti nadagsen a dadakkel nga uraro. (Apoc. 16:21) Mabalin nga ipakaammotayto ti asidegen a naan-anay a pannakadadael ti lubong ni Satanas. Dumtengto ti tiempo a maammuantayo no ania ti eksakto a mensahetayo ken no kasano nga ipakaammotayo dayta. Usarentayto kadi dagiti isu met laeng a pamay-an nga inusartayo iti nasurok a sangagasut a tawen tapno maileppas ti ministeriotayo? Wenno agusartayto iti sabali a pamay-an? Saantayo nga ammo. Aniaman kadagita, agparang a pribilehiotayto a situtured nga ipakaammo ti mangukom a mensahe ni Jehova!​—Ezek. 2:3-5.

9. Anianto ti posible a reaksion dagiti nasion iti mensahetayo, ngem ania ti masiguradotayo?

⁹ Dakkel ti posibilidadna nga agpungtotto dagiti nasion iti mensahetayo ket ikagumaandatayo a naan-anay a pasardengen. No kasano nga agpampannuraytayo ita iti suporta ni Jehova iti ministeriotayo, kasapulantayto met ti agpannuray iti suportana. Masiguradotayo a punnuennatayto ti Dios iti bileg a mangitungpal iti pagayatanna.​—Mik. 3:8.

10. Kas impadto ti Lucas 21:25-28, anianto ti reaksion ti kaaduan iti mapasamak bayat ti dakkel a rigat?

¹⁰ Basaen ti Lucas 21:25-28. Bayat ti dakkel a rigat, makigtotto dagiti tattao ta makitada a mangrugin a marpuog ti amin a banag nga impagarupda a di madadael. ‘Mariribukandanto,’ ket madanaganda a baka matayda bayat a mapaspasaranda ti karirigatan a tiempo iti pakasaritaan ti tao. (Sof. 1:14, 15) Iti dayta a tiempo, nalabit ad-addanto pay a rumigat ti biag uray dagiti adipen ni Jehova. Gapu ta agtaltalinaedtayo a saan a paset ti lubong, mabalin nga agpasartayto met kadagiti pakarigatan. Mabalin nga awanto ti dadduma a kasapulantayo.

11. (a) Apay a maisentronto ti atension kadagiti Saksi ni Jehova? (b) Apay a saan a kasapulan a pagbutngantayo ti dakkel a rigat?

¹¹ Iti dayta a tiempo, mabalin a makapungtotto dagiti tattao a nadadael ti relihionda ta  agtultuloy latta ti panagdaydayaw dagiti Saksi ni Jehova. Sigurado nga ipakaammodanto ti pungtotda, mabalin nga uray iti social media. Guraendatayto dagiti nasion ken ti agturay kadakuada a ni Satanas gapu ta datayo laeng ti saan a nadadael a relihion. Makitadanto a saanda a nagballigi iti panggepda a mangikkat iti amin a relihion ditoy daga. Isu a datayto ti sentro ti atensionda. Iti dayta a gundaway, agbalinto dagiti nasion a Gog iti Magog. * Agkaykaysadanto a sirurungsot a mangraut iti ili ni Jehova. (Ezek. 38:2, 14-16) Mabalin a makapadanag a panunoten dagitoy a posibilidad, nangnangruna ta saantay nga ammo dagiti eksakto a detalye. Ngem maysa a banag ti sigurado: Saan a kasapulan a pagbutngantayo ti dakkel a rigat. Ipaayto ni Jehova dagiti instruksion a mangispal iti biagtayo. (Sal. 34:19) ‘Makapagtakdertayto iti nalinteg ken tumangadtayto’ ta ‘asidegen ti pannakaisalakantayo.’ *

12. Kasano nga isagsagananatayo ti “matalek ken masirib nga adipen” iti mapasamak iti masanguanan?

¹² Isagsagananatayo ti “matalek ken masirib nga adipen” nga agtalinaed a matalek tapno malasatantayo ti dakkel a rigat. (Mat. 24:45) Ar-aramidenna dayta iti adu a pamay-an, ngem usigentayo ti maysa laeng kadagita: ti naintiempuan a programa dagiti kombension iti tawen 2016-2018. Babaen kadagita a programa, naparegtatayo a mangpabileg kadagiti kualidad a kasapulantayo bayat nga umas-asideg ti aldaw ni Jehova. Repasuentayo biit dagita a kualidad.

13. Kasanotayo a mapatibker ti kinamatalektayo ken Jehova, ken apay a masapul nga aramidentayo dayta itan?

¹³ Kinamatalek (wenno, kinasungdo): Ti tema ti kombension idi 2016 ket “Agtalinaed a Nasungdo ken Jehova!” Insuro daytoy a programa a no nabileg ti relasiontayo ken Jehova, agbalintayo a matalek kenkuana. Naipalagip a sumingedtayo ken Jehova babaen ti napasnek a panagkararag ken panagadal iti Saona. Dayta ti mangted iti bilegtayo nga agballigi uray iti karirigatan a pakasuotan. Bayat nga umas-asideg ti panagpatingga ti sistema ni Satanas, manamnamatayo a maipasangotayo kadagiti narigrigat pay a pakasubokan ti kinamatalektayo iti Dios ken iti Pagarianna. Mabalin nga itultuloyto dagiti tattao ti pananguy-uyawda kadatayo. (2 Ped. 3:3, 4) Ekspektarentayo daytoy bayat nga agtaltalinaedtayo a neutral. Masapul a patibkerentayo itan ti kinamatalektayo tapno agtalinaedtayo a matalek bayat ti dakkel a rigat.

14. (a) Ania a panagbalbaliw ti mapasamakto maipapan kadagiti kakabsat a mangidadaulo kadatayo ditoy daga? (b) Apay a masapul nga agmatalektayo iti dayta a tiempo?

¹⁴ Bayat ti dakkel a rigat, addanto panagbalbaliw maipapan kadagiti kakabsat a lallaki a mangidadaulo kadatayo ditoy daga. Iti dayta a tiempo, maummongto idiay langit ti amin a napulotan nga adda pay laeng ditoy daga tapno makiramanda iti gubat ti Armagedon. (Mat. 24:31; Apoc. 2:26, 27) Kaipapananna a saantayton a kadua ditoy daga ti Bagi a Manarawidwid. Ngem agtalinaedto latta nga organisado ti dakkel a bunggoy. Idauluandatayto dagiti kualipikado a kakabsat a lallaki a paset ti sabsabali a karnero. Masapul  nga ipakitatayto ti kinamatalektayo babaen ti panangsuporta kadagitoy a kakabsat ken panagtulnog iti instruksionda nga impaay ti Dios. Nakadepende iti dayta ti pannakaisalakantayo!

15. Kasanotayo a mapabileg ti panagibturtayo, ken apay a napateg nga aramidentayo dayta itan?

¹⁵ Panagibtur: Ti tema ti kombension idi 2017 ket “Dika Sumuksuko!” Tinulongannatayo daytoy a kombension a mangpabileg iti abilidadtayo a mangibtur kadagiti pakasuotan. Nasursurotayo a makapagibturtayo, saan a gapu ta nasayaat ti kasasaad, no di ket gapu ta agpampannuraytayo ken Jehova. (Roma 12:12) Sapay koma ta ditay liplipatan nga inkari ni Jesus: “Ti agib-ibtur agingga iti panungpalan, maisalakanto.” (Mat. 24:13, ftn.) Kaipapanan daytoy a kari a masapul nga agtalinaedtayo a matalek aniaman a pakarigatan ti pakaipasanguantayo. No ibturantayo ita ti tunggal pakasuotan, agbalin a natibtibker ti pammatitayo sakbay a bumtak ti dakkel a rigat.

16. Ania ti pakakitaan a naturedtayo, ken kasano a tumibker ti kinaturedtayo itan?

¹⁶ Kinatured: Ti tema ti kombension idi 2018 ket “Agbalin a Natured!” Impalagip daytoy a kombension a saan a nakadepende ti kinaturedtayo kadagiti abilidadtayo. No kasano a kasapulantayo ti agtalek ken Jehova tapno makapagibturtayo, masapul met nga agtalektayo kenkuana tapno pudpudno a naturedtayo. Kasano a mapatibkertayo ti panagtalektayo kenkuana? Babaen ti inaldaw a panangbasatayo iti Saona ken panangutobtayo no kasano nga insalakanna idi ti ilina. (Sal. 68:20; 2 Ped. 2:9) Inton rautendatayo dagiti nasion bayat ti dakkel a rigat, lalo a kasapulantayo ti kinatured ken panagtalek ken Jehova. (Sal. 112:7, 8; Heb. 13:6) No agtalektayo itan ken Jehova, naturedtayto a mangsango iti iraraut ni Gog. *

17. Apay a saantayo a pagbutngan ti Armagedon? (Kitaen ti ladawan iti akkub.)

¹⁷ Kas nadakamat iti napalabas nga artikulo, nayanak ti kaaduan kadatayo bayat ti maudi nga al-aldaw. Ngem adda met namnamatayo a makalasat iti dakkel a rigat. Ti gubat ti  Armagedon ti maudi a paset ti panagpatingga daytoy a sistema ti bambanag. Ngem ditay agdanag. Apay? Gapu ta daytoy ket gubat ti Dios. (Prov. 1:33; Ezek. 38:18-20; Zac. 14:3) Iti panangibilin ni Jehova, idauluanto ni Jesu-Kristo ti pannakigubat. Kaduananto dagiti napagungar a napulotan ken dagiti pinullo a ribu nga anghel. Agkakaduadanto a makigubat ken Satanas, kadagiti demoniona, ken kadagiti armadada ditoy daga.​—Dan. 12:1; Apoc. 6:2; 17:14.

18. (a) Ania ti impasigurado ni Jehova? (b) Kasano a patibkeren ti Apocalipsis 7:9, 13-17 ti panagtalekmo iti masanguanan?

¹⁸ Impasigurado ni Jehova: “Saanto nga agballigi ti aniaman nga armas a naaramid maibusor kenka.” (Isa. 54:17) Adda “dakkel a bunggoy” dagiti matalek nga agdaydayaw ken Jehova a ‘makalasatto iti dakkel a rigat’! Kalpasanna, itultuloydanto ti agserbi kenkuana. (Basaen ti Apocalipsis 7:9, 13-17.) Adu ti ibaga ti Biblia a rason a makapagtalektayo a maisalakantayto! Ammotayo a “salakniban ni Jehova dagiti matalek.” (Sal. 31:23) Amin a mangay-ayat ken mangidaydayaw ken Jehova ket maragsakanto a makakita iti panangsantipikarna iti nasantuan a naganna.​—Ezek. 38:23.

19. Ania a nakasaysayaat a namnama ti ur-urayentayo iti asidegen a masanguanan?

¹⁹ Panunotem no kasanonto a mabaliwan ti sasao iti 2 Timoteo 3:2-5 kas panangiladawan kadagiti tattao iti baro a lubong nga awanen ti impluensia ni Satanas. (Kitaen ti kahon a “ Dagiti Tattao iti Masanguanan.”) Inladawan dayta ni Brother George Gangas, * a nagserbi kas miembro ti Bagi a Manarawidwid. Kinunana: “Nakasaysayaatton ti lubong inton awagantayo ti amin iti kabsat! Asidegen nga awatem ti pribilehio nga agbiag iti baro a sistema ti bambanag. Agbiagkanto agingga a sibibiag ni Jehova. Agbiagtayto iti agnanayon.” Anian a nakasaysayaat a namnama!