KITKITAEN ti weather forecaster wenno mangad-adal iti paniempo ti ladawan a naala ti radar. Adda delikado a bagyo nga umas-asideg iti lugar nga adu ti populasionna. Gapu ta pampanunotenna ti pagsayaatan dagiti tattao, aramidenna ti amin a kabaelanna a mangpakdaar kadakuada sakbay a maladaw ti amin.

Pakpakdaaran met ita ni Jehova dagiti agnanaed ditoy daga maipapan iti maysa a “bagyo” a nadeldelikado ngem iti aniaman a mangngegda a report ti paniempo. Kasanona nga ar-aramiden dayta? Ken kasanotayo nga ammo nga ik-ikkanna dagiti tattao iti umdas a tiempo tapno makapagtignayda? Tapno maammuantayo ti sungbat, usigentayo ti dadduma a pakdaar nga impaay ni Jehova iti napalabas.

Idi panawen ti Biblia, nangpakdaar ni Jehova maipapan iti nagduduma a “bagyo,” wenno panangukomna, kadagidiay mangigaggagara a mangsukir kadagiti bilinna. (Prov. 10:25; Jer. 30:23) Iti tunggal kaso, pinakdaaranna a nasaksakbay dagiti nasukir a tattao ken imbagana no kasano a makapagtulnogda kenkuana. (2 Ar. 17:12-15; Neh. 9:29, 30) Tapno matignay dagiti tattao nga agbalbaliw, masansan nga inusarna dagiti matalek nga adipenna ditoy daga a mangipakaammo kadagiti panangukomna ken mangiparegta kadakuada nga agtignayda a dagus.​—Amos 3:7.

Ni Noe ti maysa kadagita a matalek nga adipen. Adu a tawen a situtured nga impakdaarna kadagiti immoral ken naranggas a tattao idi panawenna a malayus ti intero a daga. (Gen. 6:9-13, 17) Sireregta met nga imbagana no ania ti aramidenda tapno maisalakanda, isu a naawagan idi agangay a ‘manangikaskasaba iti kinalinteg.’​—2 Ped. 2:5.

Uray inkagumaan ni Noe nga ipakaammo ti mensahe ti Dios kadagiti tattao sakbay ti Layus, saanda a nangikankano. Impakitada nga awan a pulos ti pammatida. Kas resultana, natayda idi “dimteng ti Layus ket nayanudda amin.” (Mat. 24:39; Heb. 11:7) Idi dandanin ti pannakadadaelda, saanda a maibaga a saan ida a pinakdaaran ti Dios.

Adda met dagiti gundaway a pinakdaaran ni Jehova dagiti tattao sakbay la unay a mangrugi ti arig “bagyo” a panangukomna. Ngem uray no kasta, siniguradona a dagiti maapektaran ket maikkan iti umdas a tiempo nga agtignay. Kas pagarigan, nasaksakbay a nangpakdaar maipapan iti Sangapulo a Didigra a linak-am ti nagkauna nga Egipto. Iti maikapito a didigra​—ti makadadael nga uraro wenno panagtudo iti yelo​—imbaon ni Jehova da Moises ken Aaron a mangpakdaar ken Faraon ken kadagiti adipenna. Gapu ta mangrugin dayta kabigatanna, inikkan kadi ida ti Dios iti umdas a tiempo a mangbirok iti paglinongan tapno saanda a mairaman iti bagyo? Ibaga ti Biblia: “Dagiti adipen ni Faraon a namati iti sao ni Jehova dagus a pinaglinongda dagiti adipenda ken tarakenda. Ngem adda dagiti saan a namati iti imbaga ni Jehova ket binaybay-anda dagiti adipen ken tarakenda iti ruar.” (Ex. 9:18-21) Nalawag a nangted ni Jehova iti umdas a pakdaar, isu a dagidiay nagtignay a dagus nalasatanda dayta a didigra.

Napakdaaran met ni Faraon ken dagiti adipenna sakbay a napasamak ti maikasangapulo a didigra. Ngem saanda nga inkankano ti pakdaar. (Ex. 4:22, 23) Gapuna, nakitada a natay dagiti inauna nga annakda. Anian a nagkas-ang! (Ex. 11:4-10; 12:29) Adda kadi koma gundawayda a nangipangag iti pakdaar? Adda! Dagus a pinakdaaran ni Moises dagiti Israelita maipapan iti  um-umay a maikasangapulo a saplit ken imbagana no kasano a maisalakanda ti pamiliada. (Ex. 12:21-28) Mano ti nangipangag iti dayta a pakdaar? Natantia a tallo a milion a tattao, a pakairamanan dagiti Israelita ken ti “adu pay a sabali a tattao” a saan nga Israelita agraman dagiti Egipcio, ti naisalakan iti panangukom ti Dios ken pimmanaw iti Egipto.​—Ex. 12:38; ftn.

Kas ipakita dagitoy a pagarigan, kanayon a siguraduen ni Jehova nga adda umdas a tiempo dagiti tattao a mangipangag iti pakdaarna. (Deut. 32:4) Apay? Inlawlawag ni apostol Pedro a ni Jehova “saanna a kayat a madadael ti asinoman no di ket kayatna nga agbabawi ti amin.” (2 Ped. 3:9) Wen, ipatpateg ti Dios dagiti tattao. Kayatna nga agbabawida ken surotenda ti balakadna sakbay nga ipaayna ti panangukomna.​—Isa. 48:17, 18; Roma 2:4.

Masapul met nga ipangag ti amin a tattao ita ti napateg a pakdaar a maipakpakaammo iti intero a daga. Idi adda ni Jesus ditoy daga, impakdaarna a madadaelto ti agdama a sistema ti bambanag bayat ti “dakkel a rigat.” (Mat. 24:21) Maipapan iti dayta a panangukom, nangted iti detalyado a padto no anianto ti makita ken mapadasan dagiti pasurotna bayat nga umas-asideg dayta a tiempo. Dineskribir ni Jesus dagiti napapateg a pasamak iti intero a lubong a mapaspasamaken ita.​—Mat. 24:3-12; Luc. 21:10-13.

Maitunos iti dayta a padto, parparegtaen ita ni Jehova ti amin nga agpasakupda iti naayat a panangiturayna. Kayatna a maaddaan dagiti natulnog a tattao iti nasaysayaat a biag ita ken awatendanto dagiti bendision iti nalinteg a baro a lubongna. (2 Ped. 3:13) Tapno mamati dagiti tattao kadagiti kari ni Jehova, nangipaay iti makaisalakan a mensahe​—ti “naimbag a damag maipapan iti Pagarian,” nga impadto ni Jesus a “maikaskasabanto iti intero a daga tapno maammuan ti amin a nasion.” (Mat. 24:14) Inorganisar ti Dios dagiti pudno nga agdaydayaw kenkuana tapno ipakaammo wenno ikasabada ti mensahena iti agarup 240 a pagilian. Kayat ni Jehova nga ad-adu pay ti mangipangag iti pakdaar ket maispalda iti um-umay nga arig “bagyo” a nalinteg a panangukomna.​—Sof. 1:14, 15; 2:2, 3.

Gapuna, saan a saludsod no mangmangted met laeng ni Jehova iti umdas a tiempo kadagiti tattao tapno ipangagda ti pakdaarna. Ipakita dagiti ebidensia a kanayon nga ar-aramidenna dayta. Imbes ketdi, ti napateg a saludsod ket: Ipangagto kadi dagiti tattao ti pakdaar ti Dios bayat nga adda pay tiempo? Sapay koma ta kas mensahero ti Dios, itultuloytayo a tulongan ti ad-adu pay a tattao tapno makalasatda iti panungpalan daytoy a sistema ti bambanag.