Immadu ti manangaskasaba isu nga immadu met ti kasapulan a publikasion. Ti Brooklyn Bethel ti agim-imprenta kadagiti magasin. Ngem no kadagiti libro a natangken ti akkubda, adda dagiti kompania a mabaybayadan a mangyimprenta kadagita. Adu a bulan a dida nakayimprenta iti umdas a libro a mausar iti trabaho a panangasaba, isu a dinamag ni Brother Rutherford ken Robert Martin a manangaywan idi iti paktoria no posible nga isudan ti agimprenta kadagiti libro.

“Nakaay-ayat daydi a kapanunotan,” malagip ni Brother Martin, “ta kaipapanan dayta a maaddaankamin iti kompleto a planta para iti typesetting, electroplating, pagimprentaan, ken pagdait.” Nagabang dagiti kakabsat iti pasdek iti 18 Concord Street iti Brooklyn ken gimmatangda kadagiti kasapulan iti panagimprenta.

Saan nga amin ket naragsakan iti dayta. Ti presidente ti kompania nga agim-imprenta idi kadagiti librotayo ket bimmisita iti baro a pasilidadtayo. Imbagana: “Primera klase dagiti pagimprentaanyo, ngem awan kadakayo ti makaammo no kasano nga usaren dagitoy. Kalpasan ti innem a bulan, basuranto aminen dagitoy.”

“Kasla rasonable dayta,” imbaga ni Brother Martin, “ngem ditay liplipatan ti Apo; kanayon a tultulongannatayo.” Husto ni Brother Martin. Di nagbayag, agim-imprentatayon iti 2,000 a libro kada aldaw.

Saan la a panagimprenta kadagiti libro ti inaramid ti ili ni Jehova. Rinugianda met nga usaren ti baro a pamay-an ti panangipakaammo iti naimbag a damag​—ti panagibrodkas iti radio. Iti damo a gundaway, nagpalawag ni Brother Rutherford iti radio iti malem ti Domingo, Pebrero 26, 1922. Impalawagna ti tema a “Minilion a  Sibibiag Ita ti Saanton a Pulos a Matay” iti estasion ti radio a KOG idiay Los Angeles, California, U.S.A.

Agarup 25,000 ti dimngeg iti programa. Dadduma ti nagsurat tapno ibagada ti apresasionda. Maysa kadakuada ket ni Willard Ashford a taga-Santa Ana, California. Nagyaman ken Brother Rutherford gapu iti “makaparagsak ken makapainteres” a palawagna. Innayonna: “Tallo ti agsakit iti balaymi isu a dikam makapan dumngeg iti palawagmo uray no dita laeng asideg ti balaymi ti pagpalawagam. Imbag laengen ta nangngegmi dayta iti radio.”

Immadu pay ti naibrodkas iti simmaruno a lawlawas. Iti ngudo ti tawen, tinantia ti The Watch Tower a “di kumurang a 300,000 a tattao ti nakangngeg iti mensahe babaen ti radio.”

Gapu kadagita a surat, naparegta dagiti Estudiante ti Biblia isu a nagibangonda iti estasion ti radio iti dagada idiay Staten Island, nga asideg iti Brooklyn Bethel. Iti simmaruno a tawtawen, inusarda ti estasion a WBBR a mangisaknap iti mensahe ti Pagarian iti adu a tattao ken lugar.

Inyanunsio ti Hunio 15, 1922 a ruar ti The Watch Tower nga adda maangay a kombension idiay Cedar Point, Ohio manipud Septiembre 5 agingga iti 13, 1922. Eksayted unay dagiti Estudiante ti Biblia idi nakadanonda idiay Cedar Point.

Iti panglukat a palawag ni Brother Rutherford, imbagana kadagiti dumdumngeg: “Siguradoak a ti Apo . . . bendisionanna daytoy a kombension ken siguraduenna nga ad-adunto pay ngem idi ti makasabaan ditoy daga.” Maulit-ulit nga imparegta dagiti nagpalawag ti trabaho a panangasaba.

Iti Biernes, Septiembre 8, agarup 8,000 ti simrek iti auditorium. Magagaranda a dumngeg iti palawag ni Brother Rutherford. Namnamaenda nga ilawlawagna ti kaipapanan ti “ADV,” a nayimprenta kadagiti imbitasionda. Idi nakatugawdan, sigurado nga adu ti nakadlaw iti dakkel a banner a nakarolio iti ngato ti entablado. Ni Arthur Claus, a naggapu pay idiay Tulsa, Oklahoma, U.S.A., ket nakabirok iti pagtugawanna a sadiay,  mangngegna a naimbag ti agpalawag. Saan a kaskarina dayta ta awan pay idi ti mikropono wenno trompa.

Tapno masigurado nga awan ti makaistorbo, inyanunsio ti tserman a dagiti maladaw ket saan a mapalubosan a sumrek iti auditorium bayat nga agpalpalawag ni Brother Rutherford. Iti 9:30 a.m., inrugi ni Brother Rutherford ti palawagna babaen ti panangkotarna iti imbaga ni Jesus iti Mateo 4:17: “Asidegen ti Pagarian ti langit.” Bayat nga inlawlawagna no kasano a maammuan dagiti tattao ti maipapan iti dayta a Pagarian, kinunana: “Imbaga a mismo ni Jesus a bayat ti tiempo ti kaaddana, apitenna dagiti pasurotna, ken urnongenna dagiti napudno ken matalek kenkuana.”

Kastoy ti malagip ni Brother Claus a nakatugaw idi iti main auditorium: “Dumdumngegkami idi a naimbag.” Ngem bigla a nagsakit ti tianna. Rimmuar uray no dina koma kayat ken uray no ammona a saanton a makastrek.

Kalpasan ti sumagmamano a minuto, simmayaat met la ti riknana. Inyestoriana a bayat nga agsubsubli iti auditorium, nangngegna ti napigsa a panagpapalakpak. Nasdaaw ket kayatna a maammuan ti mapaspasamak iti uneg! Isu nga uray no masapul nga umuli iti atep, inaramidna dayta tapno mangngegna ti nabatbati pay a paset dayta a nagpintas a palawag. Kapigpigsaan ni Brother Claus ta 23 pay la idi ti tawenna isu a naulina ti atep. Nakitana a nakalukat dagiti tawa iti atep (skylight) isu a napan ket imbagana a nalawagen a mangngegna ti palawag.

Ngem saan la gayam a ni Arthur ti adda iti atep. Adda met sadiay ti dadduma a gagayyemna. Inasitgan a dagus ti maysa kadakuada a ni Frank Johnson sa dinamagna, “Adda bassit a kutsiliom?”

“Adda,” imbaga ni Arthur.

“Sika ti sungbat dagiti kararagmi,” imbaga ni Frank. “Makitam daytoy nagdakkel a rolio?  Banner dayta a naigalut kadagitoy a lansa. Denggem a naimbag ni Judge. * Kalpasan ti maikadua a panangibagana iti ‘iwaragawagyo,’ putdemon dagitoy uppat a tali.”

Insagana ni Arthur ti kutsiliona sada inuray ti pagilasinan. Di nagbayag, nadanonen ni Brother Rutherford ti kapatgan a paset ti palawagna. Nakagangganaygay ken sipipigsa nga imbaga ni Brother Rutherford: “Agbalinkayo a matalek ken pudno a saksi maipaay [ken Jehova]. Agtultuloykayo a makidangadang agingga a naan-anay a malangalang ti Babilonia. Isaknapyo ti mensahe. Masapul a maammuan ti lubong a ni Jehova ti Dios ken ni Jesu-Kristo ti Ari dagiti ar-ari ken Apo dagiti ap-appo. Isu daytoy ti aldaw dagiti al-aldaw. Adtoy, agturturayen ti Ari! Dakayo ti mangiwaragawag iti dayta. Ngarud, iwaragawagyo, iwaragawagyo, iwaragawagyo, ti Ari ken ti Pagarianna!”

Inyestoria ni Arthur a kaduana ti dadduma pay a kakabsat a nangputed kadagiti tali isu a nakamaymayat ti panagukrad ti banner. Kastoy ti mabasa iti banner: “Iwaragawagyo ti Ari ken ti Pagarian.” Ti “ADV” ket ti napaababa nga Ingles a sao nga ‘advertise,’ kayatna a sawen, ‘ikasaba’ wenno ‘iwaragawag.’

Nakatulong ti kombension iti Cedar Point tapno agpokus dagiti kakabsat iti napateg a trabaho a panangikasaba maipapan iti Pagarian. Nagadu ti siraragsak a nagboluntario. Insurat ti maysa a colporteur (maawagan itan iti payunir) manipud iti Oklahoma, U.S.A., “Nangasabakami iti lugar nga adu nga umili sadiay ti agtrabtrabaho iti pagminasan iti karbon ken nakapangpanglawda.” Imbagana a no mangngeg dagiti tattao ti mensahe iti magasin a Golden Age, “masansan a makasangitda.” Innayonna, “Maragsakankami unay ta naliwliwami ida.”

Naawatan dagita nga Estudiante ti Biblia ti kinapateg ti imbaga ni Jesus iti Lucas 10:2: “Adu ti anien ngem bassit ti agani.” Sakbay a nagpatingga ti tawen, lallalo a determinadoda nga iwaragawag ti mensahe ti Pagarian iti ad-adu a tattao ken lugar.