1. Ania ti maysa a rason a nagkaykaysa ti pamilia ni Jehova?

NARAGSAKTAYO ta pasettayo ti pamilia ni Jehova. Apay a nakataltalna ken agkaykaysa ti pamiliatayo? Ti maysa a rason ket ar-aramidentayo amin ti kasayaatan a mangraem iti kinaulo nga inyurnos ni Jehova. Kinapudnona, no nalawlawag ti pannakaawattayo iti urnos a kinaulo, ad-adda met nga agkaykaysatayo.

2. Ania dagiti saludsod a sungbatantayo iti daytoy nga artikulo?

² Iti daytoy nga artikulo, usigentayo ti maipapan iti kinaulo nga agaplikar iti kongregasion. Usigentayo met ti sungbat dagitoy a saludsod: Ania ti akem dagiti kakabsat a babbai? Agpayso kadi a ti amin a kakabsat a lallaki ket ulo ti amin a kakabsat a babbai? Agpada kadi ti autoridad dagiti panglakayen kadagiti kakabsat ken ti autoridad ti ulo ti pamilia iti asawa ken annakna? Usigentayo nga umuna no kasano ti rumbeng a panangmatmattayo kadagiti kakabsat a babbai.

3. Kasano a mapaunegtayo ti apresasiontayo iti ar-aramiden dagiti kakabsattayo a babbai?

³ Apresiarentayo dagiti kakabsattayo a babbai a mangikagkagumaan a mangaywan iti pamiliada, mangikasaba iti naimbag a damag, ken mangsuporta iti kongregasion. Umuneg ti apresasiontayo kadakuada babaen ti panangusigtayo iti panangmatmat kadakuada da Jehova ken Jesus. Magunggonaantayo met iti panangusigtayo no kasano ti panangtrato ni apostol Pablo kadagiti babbai.

4. Kasano nga ipakita ti Biblia nga ipatpateg ni Jehova dagiti babbai ken kasta met dagiti lallaki?

⁴ Ipakita ti Biblia nga ipatpateg ni Jehova dagiti babbai ken kasta met dagiti lallaki. Kas pagarigan, ibaga ti Biblia nga idi umuna a siglo, inikkan ni Jehova iti nasantuan nga espiritu dagiti  babbai ken kasta met dagiti lallaki. Inikkanna pay ida iti pannakabalin a mangaramid kadagiti milagro, kas iti panagsao iti nadumaduma a lengguahe. (Ara. 2:1-4, 15-18) Agpapada a dinutokan ida ti nasantuan nga espiritu ken adda namnamada a makipagturay ken Kristo. (Gal. 3:26-29) Dagiti babbai ken kasta met dagiti lallaki awatendanto ti gunggona nga agnanayon a biag ditoy daga. (Apoc. 7:9, 10, 13-15) Ken agpada a naibilin kadagiti lallaki ken babbai nga ikasaba ken isuroda ti naimbag a damag. (Mat. 28:19, 20) Kinapudnona, salaysayen ti libro nga Aramid a ti kabsat a babai nga agnagan Priscila agraman ni lakayna nga Aquila ket timmulong a mangilawlawag a siuumiso iti kinapudno iti edukado a lalaki a ni Apolos.—Ara. 18:24-26.

5. Kasano nga ipakita ti Lucas 10:38, 39, 42 a raraemen ni Jesus dagiti babbai?

⁵ Dinayaw ken rinaem ni Jesus dagiti babbai. Dina sinurot ti kostumbre dagiti Fariseo a panangtagibassit kadagiti babbai ken saan a pannakisarita kadakuada iti publiko, nangnangruna ti di pulos panangilawlawag iti Kasuratan. Imbes ketdi, inlawlawagna dagiti napateg a kinapudno saan laeng a kadagiti lallaki no di pay ket kadagiti babbai. * (Basaen ti Lucas 10:38, 39, 42.) Impalubosna met a makikuyog kenkuana dagiti babbai iti panangasabana. (Luc. 8:1-3) Inikkanna pay ida iti pribilehio a mangipakaammo kadagiti apostol nga isu ket napagungaren.—Juan 20:16-18.

6. Kasano nga impakita ni apostol Pablo a raraemenna dagiti babbai?

⁶ Espesipiko nga impalagip ni apostol Pablo ken Timoteo a padayawanna dagiti babbai. Imbaga kenkuana ni Pablo a tratuenna dagiti “babbaket kas inna” ken ibilangna dagiti “ub-ubing a babbai kas kabsat a babbai.” (1 Tim. 5:1, 2) Adu ti naitulong ni Pablo ken Timoteo nga agbalin a nataengan a Kristiano, ngem binigbigna a ti immuna a nangisuro ken Timoteo iti “nasantuan a sursurat” ket ti ina ken lolana. (2 Tim. 1:5; 3:14, 15) Espesipiko a kinablaawan ni Pablo dagiti kakabsat a babbai nga uray la innagananna ida iti suratna kadagiti taga-Roma. Saanna laeng a binigbig ti maar-aramidan dagiti kakabsat a babbai no di ket inyebkasna pay ti panangapresiarna kadakuada kas Kristiano a ministro.—Roma 16:1-4, 6, 12; Fil. 4:3.

7. Ania dagiti saludsod nga usigentayo?

⁷ Kas nadakamat kadagiti immuna a parapo, awan ti Nainkasuratan a pangibatayan a panunotentayo a nababbaba dagiti kakabsat a babbai ngem kadagiti kakabsat a lallaki. Dagiti nadungngo ken naparabur a kakabsattayo a babbai ket dakkel a tulong iti kongregasion. Ammo met dagiti panglakayen a makatulong ti nasayaat a kababalin dagiti kakabsat a babbai tapno agtalinaed ti kappia ken panagkaykaysa iti kongregasion. Ngem adda dagiti saludsod a kasapulan a masungbatan. Kas pagarigan: Apay a kidkiddawen ni Jehova kadagiti kakabsat a babbai nga agdalungdongda iti dadduma a situasion? Gapu ta dagiti laeng kakabsat a lallaki ti naapointaran kas panglakayen ken ministerial nga adipen, kaipapanan kadi dayta a ti tunggal kabsat a lalaki ket ulo ti tunggal kabsat a babai iti kongregasion?

8. Sigun iti Efeso 5:23, ti kadi tunggal kabsat a lalaki ket ulo ti tunggal kabsat a babai? Ilawlawag.

⁸ Ti ababa a sungbat ket saan! Ti maysa a kabsat a lalaki ket saan nga ulo ti amin a kakabsat a babbai iti kongregasion; ni Kristo ti ulo. (Basaen ti Efeso 5:23.) Iti pamilia, adda autoridad ti asawa a lalaki ken baketna. Ti bautisado nga anak a lalaki ket saan nga isu ti ulo ni nanangna. (Efe. 6:1, 2) Ken iti kongregasion,  limitado laeng ti autoridad dagiti panglakayen kadagiti kakabsat a babbai ken lallaki. (1 Tes. 5:12; Heb. 13:17) Dagiti awanan asawa a babbai nga awanen iti poder ti ama ken inada itultuloyda a raemen dagiti nagannakda ken dagiti panglakayen. Ngem kas kadagiti lallaki iti kongregasion, maymaysa laeng ti uloda, ni Jesus.

9. Apay a masapul nga agdalungdong no dadduma dagiti kakabsat a babbai?

⁹ Agpayso a dinutokan ni Jehova dagiti lallaki a mangidaulo iti panangisuro ken panagdaydayaw iti kongregasion, ken saanna nga inikkan dagiti babbai iti kasta nga autoridad. (1 Tim. 2:12) Apay? Gapu met laeng iti rason a dinutokanna ni Jesus kas ulo ti lalaki—tapno agtalinaed a naurnos ti pamiliana. Ngem no masapul nga aramiden ti maysa a kabsat a babai ti gagangay nga akem ti kabsat a lalaki, kiddawen ngarud ni Jehova nga agdalungdong isuna. * (1 Cor. 11:4-7) Kidkiddawen dayta ni Jehova kadagiti kakabsat a babbai, saan a tapno ibabainna ida, no di ket tapno ikkanna ida iti gundaway a mangipakita a raraemenda dagiti pagalagadanna iti kinaulo. Bayat a pampanunotentayo dagita, sungbatantayo daytoy a saludsod: Kasano kadakkel ti autoridad a naited kadagiti ulo ti pamilia ken kadagiti panglakayen?

10. Apay a mabalin a kayat no dadduma ti maysa a panglakayen ti agaramid kadagiti paglintegan para iti kongregasion?

¹⁰ Dagiti panglakayen ay-ayatenda ni Kristo, ken ay-ayatenda dagiti “karnero” nga impaaywan kadakuada da Jehova ken Jesus. (Juan 21:15-17) Gapu ta ay-aywanan ti maysa a panglakayen ti kongregasion, mabalin a mariknana nga isu ket kasla ama nga ulo ti kongregasion.  Mabalin nga irasonna a no ti maysa nga ulo ti pamilia ket addaan iti kalintegan a mangaramid kadagiti paglintegan tapno maprotektaran ti pamiliana, mabalinna met ti mangaramid kadagiti paglintegan a namnamaenna a mangprotektar kadagiti karnero ti Dios. Mabalin met nga iparegta ti dadduma a kakabsat kadagiti panglakayen nga agtignayda kas naespirituan nga uloda babaen ti panagkiddawda nga isuda ti mangidesision kadakuada. Ngem agpada kadi ti autoridad dagiti panglakayen iti kongregasion ken dagiti ulo ti pamilia?

11. Ania dagiti pagpadaan ti autoridad dagiti ulo ti pamilia ken dagiti panglakayen?

¹¹ Imparipirip ni apostol Pablo nga adda dagiti pagpadaan ti autoridad ti maysa nga ulo ti pamilia ken ti maysa a panglakayen. (1 Tim. 3:4, 5) Kas pagarigan, kayat ni Jehova nga agtulnog dagiti miembro ti pamilia iti uloda. (Col. 3:20) Kayatna met nga agtulnog dagiti kakabsat iti kongregasion kadagiti panglakayen. Namnamaen ni Jehova a siguraduen dagiti ulo ti pamilia ken dagiti panglakayen a nasalun-at iti naespirituan dagiti naipaaywan kadakuada. Agpada met nga ipaayda ti emosional a kasapulan dagiti adda iti sidong ti autoridadda. Ken kas kadagiti nasayaat nga ulo ti pamilia, siguraduen dagiti panglakayen a matulongan dagidiay naipaaywan kadakuada kadagiti tiempo ti krisis. (Sant. 2:15-17) Namnamaen met ni  Jehova kadagiti panglakayen ken kadagiti ulo ti pamilia a tulonganda ti sabsabali nga agtulnog kadagiti pagalagadanna ken ‘dida lumbes iti bambanag a naisurat’ iti Biblia.—1 Cor. 4:6.

12-13. Kas nadakamat iti Roma 7:2, ania dagiti nagdumaan ti autoridad dagiti ulo ti pamilia ken dagiti panglakayen?

¹² Nupay kasta, adda dadakkel a nagdumaan ti autoridad ti panglakayen ken ti autoridad ti ulo ti pamilia. Kas pagarigan, dinutokan ni Jehova dagiti panglakayen nga agserbi kas ukom, ken inikkanna ida iti responsabilidad a mangikkat kadagiti di agbabbabawi a nakabasol iti kongregasion.—1 Cor. 5:11-13.

¹³ Iti sabali a bangir, inikkan ni Jehova dagiti ulo ti pamilia iti autoridad a saanna nga inted kadagiti panglakayen. Kas pagarigan, inikkanna ti ulo ti pamilia iti autoridad a mangaramid ken mangipatungpal kadagiti paglintegan para iti pamiliana. (Basaen ti Roma 7:2.) Adda kalintegan ti ulo ti pamilia a mangikeddeng no ania nga oras a rumbeng a makaawid dagiti annakna iti rabii. Adda met autoridadna a mangdisiplina kadagiti annakna no sukirenda dayta a paglintegan. (Efe. 6:1) Siempre, ti nadungngo nga ulo ti pamilia agkonsulta nga umuna ken baketna sakbay a mangaramid kadagiti paglintegan iti pagtaengan; ngamin, isuda a dua ket ‘maymaysa a lasag.’ *—Mat. 19:6.

14. (a) Ania ti ibaga ti Marcos 10:45 a mangipakita a mayanatup ti panangdutok ni Jehova ken ni Jesus kas ulo ti kongregasion? (b) Ania ti responsabilidad ti Bagi a Manarawidwid? (Kitaen ti kahon a “ Ti Responsabilidad ti Bagi a Manarawidwid.”)

¹⁴ Babaen ti subbot, ginatang ni Jehova ti biag ti tunggal indibidual iti kongregasion ken  ti asinoman a mamati ken Jesus. (Basaen ti Marcos 10:45; Ara. 20:28; 1 Cor. 15:21, 22) Isu a maitutop laeng a ni Jesus, a nangted iti biagna kas subbot, ti dinutokanna nga agbalin nga ulo ti kongregasion. Kas ulotayo, adda autoridad ni Jesus a mangaramid ken mangipatungpal kadagiti paglintegan no ania ti masapul nga aramiden ti tunggal indibidual, pamilia, ken ti intero a kongregasion. (Gal. 6:2) Ngem saan la a mangaramid ni Jesus kadagiti paglintegan. Pakpakanen ken dungdungnguenna ti tunggal maysa kadatayo.—Efe. 5:29.

15-16. Ania ti masursurom kadagiti imbaga dagiti kakabsat a da Marley ken Benjamin?

¹⁵ Ipakpakita dagiti kakabsat a babbai a raraemenda ni Kristo no surotenda ti bilin nga ipapaay dagiti lallaki nga inapointaranna a mangaywan kadakuada. Adu a kakabsat a babbai ti umanamong iti imbaga ti kabsat nga agnagan Marley a taga-United States. Kinunana: “Talaga nga ipatpategko dagiti responsabilidadko kas misis ken sister iti kongregasion. Masapul a kanayon nga ikagumaak a raemen ti autoridad nga inted ni Jehova ken misterko ken kadagiti panglakayen. Ngem pinagbalin ni misterko ken dagiti kakabsat a lallaki iti kongregasion a nalaklaka ti panagpasakupko gapu ta raraemendak ken ap-apresiarenda dagiti maar-aramidak.”

¹⁶ Ipakpakita dagiti kakabsat a lallaki a maawatanda ti urnos ti kinaulo no raemen ken padayawanda dagiti kakabsat a babbai. Kinuna ti kabsat a ni Benjamin a taga-England: “Nagadu ti nasursurok kadagiti komento dagiti kakabsat a babbai iti gimong ken kadagiti suhestionda no kasano ti mangyadal ken agbalin nga epektibo iti ministerio. Para kaniak, nakapatpateg dagiti maar-aramidanda.”

17. Apay a masapul a raementayo ti urnos ti kinaulo?

¹⁷ No ti amin a lallaki, babbai, ulo ti pamilia, ken panglakayen iti kongregasion maawatan ken raemenda ti urnos ti kinaulo, natalna ti kongregasion. Ken kangrunaanna, maidaydayawtayo ti nadungngo a nailangitan nga Amatayo, ni Jehova.—Sal. 150:6.