Dagiti Anghel​—No Siasinoda

MAYSA a pasamak ti namagsiddaaw iti monarka ti maysa a nabileg nga imperio. Naispal ti tallo a lallaki a nasentensiaan iti nakaal-alingget nga ipapatay babaen ti dumardarang nga apuy! Siasino ti nangispal kadakuada? Ti mismo nga ari kunana kadagiti tallo a naispal: “Bendito koma [ti Diosyo], a nangibaon iti anghelna ken nangalaw kadagiti adipenna a nagtalek kenkuana.” (Daniel 3:28) Daytoy nga agturay iti Babilonia nasurok a dua a milenio ti napalabasen nasaksianna ti panangisalakan ti maysa nga anghel. Minilion a tattao iti napalabas ti mamati iti kaadda dagiti anghel. Adu ita ti saan laeng a mamati nga adda dagiti anghel no di ket mariknada nga ap-apektaran dagiti anghel ti biagda. Siasino dagiti anghel, ken ania ti nangrugianda?

Sigun iti Biblia, dagiti anghel ket espiritu, no kasano a ti Dios a mismo ket Espiritu. (Salmo 104:4; Juan 4:24) Dakkel a pamilia dagiti anghel, minilmilion ti bilangda. (Apocalipsis 5:11) Addaanda amin iti ‘nabileg a pannakabalin.’ (Salmo 103:20) Nupay dagiti anghel ket kas kadagiti tattao gapu ta addaanda iti personalidad ken wayawaya a mangngeddeng, saan a nangrugi ti biagda kas tattao. Kinapudnona, ti Dios pinarsuana dagiti anghel nabayag sakbay pay ti kaadda dagiti tattao​—sakbay pay ketdi ti pannakaparsua ti planeta a Daga. Idi ti Dios ‘imbangonna ti daga,’ kuna ti Biblia, “dagiti bituen [anghel] ti agsapa sirarag-o a nagikkisda a sangsangkamaysa, ken ti amin nga annak ti Dios nangrugida a nagdir-i buyogen ti panangpadayaw.” (Job 38:4, 7) Yantangay dagiti anghel ket parsua ti Dios, naawaganda kas annak ti Dios.

Ania ti panggep ni Jehova iti panangparsuana kadagiti anghel? Ania, no addaman, ti nagbalin nga akem dagiti anghel iti biag dagiti tattao? Apektaranda kadi ita ti biagtayo? Yantangay addaanda iti wayawaya a mangeddeng, adda kadi dagiti anghel a timmulad ken ni Satanas a Diablo ket nagbalinda a kabusor ti Dios? Mangipaay ti Biblia kadagiti napudno a sungbat kadagitoy a saludsod.