Salsaludsod Dagiti Agbasbasa

Adda kadi saka ti serpiente a nakisarita ken Eva?

Kas nairekord iti Genesis 3:14, kinasao ni Jehova a Dios ti serpiente a nangallilaw ken Eva idiay minuyongan ti Eden. Kinuna ti Dios: “Agsipud ta inaramidmo daytoy a banag, sika ti nailunod manipud kadagiti amin a naamo nga animal ken manipud kadagiti amin nga atap nga animal iti tay-ak. Babaen ti tianmo aguyaskanto ket tapok ti kanemto iti amin nga al-aldaw ti panagbiagmo.” Saan nga espesipiko a salaysayen ti Biblia a ti animal a nausar iti panangallilaw ken ni Eva ket dati nga addaan kadagiti saka ngem napukawna dagita. Nupay mabalin a kasta ti panunoten ti dadduma gapu iti nailanad iti Genesis 3:14, saantay a maipato a dagiti serpiente ket addaan kadagiti saka sakbay dayta a panangilunod. Apay?

Agsipud ta kangrunaan iti amin, ti talaga a kinondenar ni Jehova ket ni Satanas​—ti di makita nga espiritu a nangusar iti dayta a nanumo nga animal. Iti Biblia, nadeskribir ni Satanas kas “ti ama ti kinaulbod” ken “ti kadaanan a serpiente.” Dagita a sasao ket agpada a tumukoy iti panangusar ni Satanas iti maysa a makita nga animal, maysa a serpiente, kas pannakangiwatna tapno masulisogna ni Eva a mangsukir iti bilin ti Dios.​—Juan 8:44; Apocalipsis 20:2.

Ti Dios pinarsuana dagiti serpiente, ken nabatad a ni Adan ti nangpanagan kadagiti serpiente sakbay pay ti inaramid ni Satanas a panangallilaw. Saan a mapabasol ti awanan-nakem a serpiente a nakisarita ken ni Eva. Saan nga ammo ti serpiente nga isu ket us-usaren ni Satanas, ken dina maawatan ti panangkondenar ti Dios kadagiti simmukir.

Apay ngarud a sinao ti Dios ti pannakaipababa ti pisikal a kasasaad ti serpiente? Ti kababalin ti serpiente iti natural nga aglawlawna, nga aguyas babaen ti tianna ken agdilatdilat a kasla agdilpadilpat iti tapuk ket maitutop a mangisimbolo iti nakondenar a kasasaad ni Satanas. Natan-ok idi ti saadna kas maysa kadagiti anghel ti Dios, ngem naipababa iti kasasaad a natukoy iti Biblia kas ti Tartaro.​—2 Pedro 2:4.

Maysa pay, no kasano a ti mukod ti tao ket mabalin a sugaten ti maysa a literal a serpiente, ni Satanas nga adda iti nababa a saadna mabalinna a ‘dunoren ti mukod’ ti “bin-i” ti Dios. (Genesis 3:15) Ti kangrunaan a paset dayta a bin-i ket ni Jesu-Kristo, a temporario a nagsagaba iti ima dagiti alipores ni Satanas. Ngem inton agangay, ni Kristo ken dagiti napagungar a napulotan a Kristiano a kakaduana permanente a rumekendanto ti simboliko nga ulo ti serpiente. (Roma 16:20) Gapuna, ti panangilunod ti Dios iti makita a serpiente ket nabatad a mangiladawan iti pannakaipababa ken ti pannakadadael kamaudianna ti di makita a “kadaanan a serpiente” a ni Satanas a Diablo.