Tultuladenyo Kadi ti Pannakaseknan ni Jehova iti Sabsabali?

“IYALLATIWYO [iti Dios] ti isuamin a pakaringgoranyo, agsipud ta isu maseknan kadakayo.” (1 Pedro 5:7) Anian a nagdungngo nga awis! Ni Jehova a Dios ket addaan iti personal a pannakaseknan iti ilina. Natalgedtayo no addatayo iti sidong ti pannalaknibna.

Nasken a patanoren ken ipakitatayo ti umasping a naayat a pannakaseknan iti sabsabali. Gapu ta imperpektotayo, nasken nga agannadtayo kadagiti sumagmamano a palab-og no mangipakitatayo iti personal a pannakaseknan iti sabsabali. Sakbay nga usigentayo ti dadduma kadagita, ammuentayo ti sumagmamano a pamay-an nga impakita ni Jehova ti pannakaseknan iti ilina.

Babaen ti panangusarna iti pastor kas pangngarig, dineskribir ni salmista a David ti pannakaseknan ti Dios: “Ni Jehova ti Pastorko. Saanakto nga agkurang iti aniaman. Kadagiti naraber a pagaraban pagiddaennak; iti igid dagiti nasayaat-pannakapadanumna a lugar a paginanaan idalannak. Ti kararuak pabang-aranna. . . . Uray no magnaak iti ginget ti napuskol a kinasipnget, saanak nga agbuteng iti dakes, ta sikukuyogka kaniak.”​—Salmo 23:1-4.

Yantangay ni David a mismo ket maysa a pastor, ammona no ania ti nairaman iti panangaywan iti maysa nga arban. Ti pastor salaknibanna dagiti karnerona manipud kadagiti narungsot nga animal a kas kadagiti leon, lobo, ken oso. Siguraduenna a saanda nga agsisina, sapulenna dagiti napukaw a karnero, sakruyenna dagiti nabannog a kordero, ken asikasuenna dagiti masakit ken nasugatan. Inaldaw a painumenna ti arban. Saan a kaipapanan dayta a konkontrolen ti pastor ti amin a garaw dagiti karnero. Nawaya dagiti karnero ngem masalsalaknibanda.

Kasta ti panangaywan ni Jehova iti ilina. Inlawlawag ni apostol Pablo: ‘Salsaluadannakayo ti pannakabalin ti Dios.’ Ditoy, ti “salsaluadan” literal a kaipapananna ti “bambantayan.” (1 Pedro 1:5) Gapu iti napudno a pannakaseknanna, kanayon a bambantayannatayo ni Jehova, a kanayon a nakasagana a tumulong kaanoman a kiddawentayo dayta. Nupay kasta, ni Jehova pinarsuanatayo nga addaan iti wayawaya a mangngeddeng, isu a saan a bumallaet iti amin a tignay ken desisiontayo. Kasanotayo a matulad ni Jehova maipapan iti dayta?

Tuladenyo ti Dios iti Panangaywanyo iti Annakyo

“Ti annak ket tawid manipud ken Jehova.” No kasta, dagiti nagannak masapul a salakniban ken aywananda ti annakda. (Salmo 127:3) Mabalin nga iraman dayta ti panangparegta iti annak tapno iyebkasda ti kapanunotan wenno riknada sa ikabilangan dayta dagiti nagannak iti panangasikasoda kadakuada. No ikagkagumaan dagiti nagannak a kontrolen ti amin a tignay ti annakda, a dida ikabilangan dagiti kiddawda, umasping dayta iti pastor a mangikagkagumaan a mangiturong kadagiti karnerona babaen ti kawar. Awan ti pastor a mangaywan iti arbanna iti kasta a pamay-an; saannatayo met nga ipastoran ni Jehova iti kasta a pamay-an.

 Inaklon ni Mariko a: “Nabayagen nga ibagbagak iti annakko, ‘Rumbeng nga aramidenyo daytoy’ ken ‘Rumbeng a saanyo nga aramiden dayta.’ Patiek nga obligasionko dayta kas maysa nga ina. Diak ida komkomendaran, ken awan met ti napasnek a pannakikomunikarko kadakuada.” Nakabaybayag ti balasang ni Mariko no makipatang kadagiti gagayyemna babaen ti telepono, ngem nakabibiit no makipatang ken ni nanangna. “Gapu iti dayta, nabigbigko ti nagdumaanna,” innayon ni Mariko. “No makisarita ti balasangko iti gagayyemna, agusar kadagiti mannakaawat nga ebkas, kas iti ‘Wen, umanamongak,’ wenno ‘Kastaak met.’ Inrugik nga inusar dagiti umasping nga ebkas tapno suminged kaniak ti balasangko, ket di nagbayag, napapaut ken nasaysayaaten ti panagpatangmi.” Dayta ti mangipaganetget iti kinapateg ti nasayaat a komunikasion, a masansan a di bukbukodan ti maysa ti agsao.

Nasken nga ammuen dagiti nagannak ti rikna ken tarigagay ti annakda, ken nasken a maawatan ti annak no apay a pakasalaknibanda ti personal a pannakaseknan kadakuada dagiti dadakkelda. Ti Biblia balbalakadanna dagiti annak nga agtulnogda kadagiti nagannakda; sana dinakamat ti rason: “Tapno naimbag ti lak-ammo ken makapagtalinaedka iti daga iti atiddog a tiempo.” (Efeso 6:1, 3) Nalaklaka nga agtulnog dagiti annak no kombinsidoda unay a pagimbaganda ti panagpasakupda.

Iti Panangaywan iti Arban ti Dios

Ti panagayat ni Jehova ket nayanninaw iti kongregasion Kristiano. Kas Ulo ti kongregasion, ibilbilin ni Jesu-Kristo kadagiti panglakayen nga aywananda ti arbanna. (Juan 21:15-17) Ti Griego a sao para iti manangaywan ket nainaig iti berbo a kaipapananna ti “siaannad a bantayan.” Iti panangipaganetgetna no kasanoda nga aramiden dayta, imbilin ni Pedro kadagiti panglakayen: “Ipastoranyo ti arban ti Dios nga adda iti aywanyo, saan a mapilpilit, no di ket situtulok; saan met nga iti panagayat iti nakusit a gunggona, no di ket sigagagar; saan met a kas agturay kadagidiay tawid ti Dios, no di ket agbalinkayo a pagulidanan ti arban.”​—1 Pedro 5:2, 3.

Wen, ti trabaho dagiti panglakayen ket umasping kadagiti pastor. Dagiti Kristiano a panglakayen rumbeng nga aywananda dagiti masakit iti naespirituan ken aturenda ida tapno agbiagda a maitunos kadagiti nalinteg a pagalagadan. Annongen dagiti panglakayen ti panangorganisar kadagiti aktibidad ti kongregasion, panangyurnos kadagiti gimong, ken panangtaginayon iti kinaurnos ti kongregasion.​—1 Corinto 14:33.

Ngem dagita a nadakamat ni Pedro pagannadennatayo iti maysa a peggad​—ti ‘panangituray’ dagiti panglakayen iti kongregasion. Ti maysa a mangipakita iti dayta ket no agaramid ti maysa a panglakayen kadagiti di kasapulan a paglintegan. Nalabit ti maysa a panglakayen ket agbalin nga aglablabes gapu ta sipapanunot unay iti obligasionna a mangsalaknib iti  arban. Iti maysa a kongregasion iti Daya, nagaramid dagiti panglakayen kadagiti paglintegan no kasano ti panangkablaaw iti sabsabali iti Kingdom Hall​—kas iti no siasino ti rumbeng nga umuna nga agsao​—nga impagarupda a ti panangsurot kadagita a paglintegan ket makatulong iti talna ti kongregasion. Nupay di pagduaduaan a nasayaat ti motibo dagitoy a panglakayen, tultuladenda kadi ti pannakaseknan ni Jehova iti ilina? Ti kapanunotan ni apostol Pablo ket nayanninaw unay kadagitoy a sasaona: “Saan a gapu ta dakami dagiti appo iti pammatiyo, no di ket katrabahuandakami a maipaay iti rag-oyo, ta babaen ti pammatiyo a sitatakderkayo.” (2 Corinto 1:24) Agtalek ni Jehova iti ilina.

Malaksid iti di panangipasdek kadagiti di Nainkasuratan a paglintegan, dagiti naayat a panglakayen ipakitada ti napudno a pannakaseknanda babaen ti dida panangipalgak iti pribado nga impormasion. Sipapanunotda iti daytoy a pakdaar ti Dios: “Saanmo nga ipalgak ti kompidensial a panagsao ti sabali.”​—Proverbio 25:9.

Ti kongregasion dagiti napulotan a Kristiano ket inyarig ni apostol Pablo iti bagi ti tao: “Ti Dios binukelna ti bagi . . . tapno awan koma ti panaglalasin iti bagi, no di ket dagiti kamengna addaanda koma iti isu met laeng a panangisakit iti maysa ken maysa.” (1 Corinto 12:12, 24-26) Ti Griego a sasao nga “addaanda koma iti isu met laeng a panangisakit iti maysa ken maysa” literal a kaipapananna a ‘madanaganda koma iti maysa ken maysa.’ Dagiti kameng ti kongregasion Kristiano rumbeng a maseknanda unay iti maysa ken maysa.​—Filipos 2:4.

Kasano a maipakita dagiti pudno a Kristiano a ‘madanaganda iti maysa ken maysa’? Mabalin nga ipakitada ti pannakaseknanda iti dadduma a kakongregasionda babaen ti panangikararag ken panangidiayada iti praktikal a tulong kadagiti agkasapulan. Tumulong dayta tapno maipakitada ti kinaimbag agpaay iti sabsabali. Usigenyo no kasano a natulongan ni Tadataka babaen ti kasta a naayat a pannakaseknan. Idi nabautisaran ni Tadataka idi agtawen iti 17, maymaysana a Saksi ni Jehova iti pamiliada. Insalaysayna: “Adda kakongregasionko a maysa a pamilia a masansan a mangawis kaniak para iti pannangan ken panaglalangen. No mapanak idiay eskuelaan, dandani binigat a dumagasak iti pagtaenganda tapno makikaduaak kadakuada a mangusig iti teksto iti aldaw. Nakaawatak iti balakad no kasano a madaerak dagiti parikutko idiay eskuelaan, ken sangsangkamaysa nga inkararagmi ti maipapan kadagita. Nasursurok iti daytoy a pamilia ti kinamanagparabur.” Iyap-aplikar itan ni Tadataka dagiti nasursurona babaen ti panagserbina iti maysa kadagiti sanga nga opisina dagiti Saksi ni Jehova.

Namakdaar ni apostol Pablo maipapan iti maysa a naiduma a palab-og mainaig iti panangipakita iti pannakaseknan iti sabsabali. Adda dagiti dinakamatna a babbai a nagbalin a “manangidanondanon ken mannakibiangda pay iti ar-aramid ti sabsabali a tattao, a sarsaritaenda ti bambanag a saanda a rebbeng.” (1 Timoteo 5:13) Nupay rumbeng nga interesadotayo iti sabsabali, masapul nga agannadtayo tapno saan nga agbanag dayta iti pannakibiangtayo iti personal a biagda. Mabalin a maiparangarang ti nalabes a pannakaseknan iti sabsabali babaen ti ‘panangisarsarita iti bambanag a saantayo a rebbeng,’ kas iti panangisawang iti pammabalaw.

Laglagipentayo koma a mabalin nga agduduma ti pamay-an dagiti Kristiano a mangasikaso kadagiti personal nga aramidda, no ania ti pilienda a kanen, ken no ania ti pilienda a kita ti nasayaat a panagaliwaksay. Maibatay iti ipalubos dagiti prinsipio ti Biblia, nawaya ti tunggal maysa a mangngeddeng iti aramidenna. Imbalakad ni Pablo kadagiti Kristiano idiay Roma: “Saantay koma nga agiinnukomen. . . . Surotentayo koma ti bambanag a mamataud iti talna ken ti bambanag a makapabileg iti maysa ken maysa.” (Roma 14:13, 19) Rumbeng a maipakita ti napudno a pannakaseknantayo iti sabsabali iti kongregasion babaen ti kinamasindadaantayo a tumulong, imbes a babaen ti pannakibiangtayo iti ar-aramidda. No maseknantayo iti maysa ken maysa iti kasta a pamay-an, agari ti ayat ken panagkaykaysa iti pamilia ken iti kongregasion.

[Footnote]

[Ladawan iti panid 19]

Ammuenyo ti pampanunoten ken rikna dagiti annakyo babaen ti komendasion ken pannakipagrikna