Assawa a Lallaki, Tuladenyo ti Ayat ni Kristo!

ITI maudi a rabii ti biagna ditoy daga, kinuna ni Jesus kadagiti matalek nga apostolna: “Mangtedak kadakayo iti baro a bilin, nga ayatenyo ti maysa ken maysa; kas iti panagayatko kadakayo, kasta met nga ayatenyo ti maysa ken maysa. Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:34, 35) Masapul ngarud nga agiinnayat dagiti pudno a Kristiano.

Insurat ni apostol Pablo kadagiti Kristiano a lallaki: “Assawa a lallaki, itultuloyyo nga ayaten dagiti assawayo, no kasano a ti Kristo inayatna met ti kongregasion ken inyawatna ti bagina a maipaay iti dayta.” (Efe. 5:25) Kasano a mayaplikar ti maysa a Kristiano nga asawa a lalaki dayta a balakad ti Biblia, nangruna no ti asawana ket maysa a dedikado nga adipen ni Jehova?

Impateg ni Kristo ti Kongregasion

“Rebbeng a dagiti lallaki ayatenda dagiti assawada a kas kadagiti bukodda a bagi,” kuna ti Biblia. “Ti agayat iti asawana a babai ay-ayatenna ti bagina, ta awan pay a pulos ti tao a nanggura iti bukodna a lasag; no di ket taraonan ken ipatpategna dayta, a kas met ti panangipateg ti Kristo iti kongregasion.” (Efe. 5:28, 29) Ipatpateg ken dungdunguen ni Jesus dagiti adalanna. Naalumamay ken naasi kadakuada iti laksid ti kinaimperpektoda. Gapu ta kayatna nga iparang iti bagina ti kinangayed ti kongregasion, dagiti nasayaat a galad dagiti adalanna ti kangrunaan a kinitana.​—Efe. 5:27.

No kasano nga impakita ni Kristo ti panagayatna iti kongregasion, masapul met nga ipakita ti lalaki ti ayatna ken baketna agpadpada iti sao ken aramid. Naragsak ti asawa a babai ken mariknana a maipatpateg no kanayon a pakitaan ni lakayna iti ayat. Iti sabali a bangir, ti asawa a babai a mangsagsagrap iti nanam-ay a panagbiag mabalin a saan a naragsak no saan nga ipapaayan ni lakayna iti panawen ken atension.

Kasano nga ipakita ti lalaki nga ipatpategna ni baketna? Iti publiko, iyam-ammona ni baketna iti nadayaw a pamay-an ken padayawanna iti sabsabali gapu iti maitultulongna. No adda napateg a naitulong ni baketna iti panagballigi ti pamilia, saan a bumdeng a mangipakaammo iti dayta iti sabsabali. No is-isuda, mariknana ti kinadungngo ni lakayna. Mabalin a bassit a banag ti panangapros, panagisem, panangarakup, ken panangkomendar, ngem napnuan kaipapanan dayta iti maysa a babai.

“Saan a Mabain a Mangawag Kadakuada iti ‘Kakabsat’”

Ni Kristo Jesus ket “saan a mabain a mangawag [kadagiti napulotan a pasurotna] iti ‘kakabsat.’” (Heb. 2:11, 12, 17) No maysaka a Kristiano nga asawa, laglagipem a Kristiano met a kabsatmo ni baketmo. Napatpateg ti dedikasionna ken Jehova ngem ti sinapataanna kenka idi nagkasarkayo sakbay man wenno kalpasan ti pannakabautisarna. No agkomento ni baketmo iti gimong ti kongregasion, mayanatup ti panangawag ti konduktor kenkuana iti “Kabsat.” Kabsatmo met ni baketmo, saan laeng nga iti Kingdom Hall no di ket iti pay pagtaengan. Agpadpada a napateg ti panagbalinmo a naasi ken nadayaw kenkuana iti man pagtaengan wenno iti Kingdon Hall.

No addaanka kadagiti annongen iti kongregasion, mabalin a marigatanka no dadduma a mangbalanse kadagiti responsabilidadmo iti kongregasion ken iti pamilia. Ti nasayaat a panagtitinnulong dagiti panglakayen ken  ministerial nga adipen ken ti epektibo a panangipabaklay iti dadduma a responsabilidad mabalin a mangipaay kenka iti ad-adu a tiempo para ken baketmo​—ti kabsat a makasapul unay kenka. Laglagipem, adda dadduma a kakabsat a makabael a mangasikaso kadagiti annongem iti kongregasion, ngem sika laeng ti kabsat a naisinggalut ken baketmo iti panagasawa.

Maysa pay, sika ti ulo ni baketmo. Kuna ti Biblia: “Ti ulo ti tunggal lalaki isu ti Kristo; ket ti ulo ti babai isu ti lalaki.” (1 Cor. 11:3) Kasanom nga ipakat ti kinaulom? Babaen iti naayat a pamay-an, saan a babaen ti maulit-ulit a panangadawmo iti nadakamat a bersikulo ken panangikalikagum iti panagraem. Ti tulbek ti umiso a panangipakat iti kinaulo ket ti panangtuladmo ken Jesu-Kristo iti wagas a panangtratom ken baketmo.​—1 Ped. 2:21.

“Dakayo ti Gagayyemko”

Inawagan ni Jesus dagiti adalanna kas gagayyemna. Kinunana kadakuada: “Saankay nga awaganen iti ad-adipen, agsipud ta saan nga ammo ti adipen no ania ti aramiden ti apona. Ngem inawagankay iti gagayyem, agsipud ta amin a bambanag a nangngegko iti Amak impakaammok kadakayo.” (Juan 15:14, 15) Nasayaat ti komunikasion ni Jesus ken dagiti adalanna. Agdadanggayda met kadagiti aktibidadda. Naawis ni “Jesus ken dagiti adalanna” iti padaya ti kasar idiay Cana. (Juan 2:2) Adda paboritoda a luglugar, kas iti minuyongan ti Getsemani. Kuna ti Biblia nga “adu a daras a ni Jesus nakitaripnong sadiay kadagiti adalanna.”​—Juan 18:2.

Ti asawa a babai nasken la ketdi a mariknana a ni lakayna ti kasisingedan a kaduana. Anian a nakapatpateg a tagiragsakenyo nga agassawa ti kanayon a panagdanggayyo! Agdanggaykayo nga agserbi iti Dios. Tagiragsakenyo ti panagdanggayyo nga agadal iti Biblia. Iwayaanyo ti panagdanggayyo a magna, agpatang, ken mangan. Nasingedkayo koma saan laeng a kas agassawa no di ket kas aggayyem.

‘Inayatna Ida Agingga iti Panungpalan’

Ni Jesus ‘inayatna dagiti adalanna agingga iti panungpalan.’ (Juan 13:1) Napaay ti dadduma nga assawa a lallaki a mangtulad iti dayta nga ulidan ni Kristo. Mabalin a pinanawanda pay ketdi ti ‘asawa ti kinaagtutuboda,’ a nalabit nagsapulda iti ub-ubing.​—Mal. 2:14, 15.

Ngem adda dagiti nangtulad ken Kristo a kas iti inaramid ni Willi. Agkasapulan ni baketna iti adu a tawen a panangasikaso gapu ta masaksakit. Ania ti narikna ni Willi gapu iti dayta? Kinunana: “Kanayon nga imbilangko ni dungdungnguek nga Editha kas maysa a sagut manipud iti Dios ket kasta ti panangipategko kenkuana. Maysa pay, 60 a tawen sakbayna, inkarik nga aywanak ni baketko agpadpada iti tiempo ti nam-ay ken rigat. Diakto pulos malipatan dayta a kari.”

Dakayo a Kristiano nga assawa a lallaki, tuladenyo ti ayat ni Kristo. Ipategyo ti managbuteng-Dios a baketyo​—ti kabsat ken gayyemyo.

[Ladawan iti panid 20]

Ni kadi baketmo ti kasingedan a kaduam?

[Ladawan iti panid 20]

‘Itultuloymo nga ayaten ti asawam’