Lallaki, Agpaspasakupkayo Kadi iti Kinaulo ni Kristo?

“Ti ulo ti tunggal lalaki isu ti Kristo.”​—1 COR. 11:3.

1. Ania ti mangipakita a ni Jehova ket Dios ti urnos?

“MAIKARIKA, Jehova, a mismo a Diosmi, nga umawat iti dayag ken iti dayaw ken iti pannakabalin,” kuna ti Apocalipsis 4:11, “agsipud ta pinarsuam ti amin a bambanag, ket gapu iti pagayatam napaaddada ken naparsuada.” Kas Namarsua, ni Jehova a Dios ti Katan-okan a Soberano iti uniberso ken iturayanna ti amin a parsuana. Makita iti wagas ti panangorganisarna kadagiti anghelna nga isu “ket Dios, saan a ti riribuk, no di ket ti talna.”​—1 Cor. 14:33; Isa. 6:1-3; Heb. 12:22, 23.

2, 3. (a) Asino ti kaunaan a pinarsua ni Jehova? (b) Ania ti posision ti inauna nga Anak no idilig iti Amana?

² Di mabilangen a panawen nga adda ti Dios sakbay pay a naparsua ti aniaman a banag. Ti kaunaan a pinarsuana ket ti espiritu a pagaammo kas “ti Sao” gapu ta isu ti Pannakangiwat ni Jehova. Napaadda ti amin a sabali pay a bambanag babaen iti daytoy a Sao. Idi agangay, immay ditoy daga kas perpekto a tao, a nagbalin a pagaammo kas Jesu-Kristo.​—Basaen ti Juan 1:1-3, 14.

³ Ania ti ibaga ti Kasuratan maipapan iti posision ti Dios mainaig iti inauna nga Anakna? Kastoy ti ibaga kadatayo ti napaltiingan a ni apostol Pablo: “Kayatko a maammuanyo a ti ulo ti tunggal lalaki isu ti Kristo; ket ti ulo ti babai isu ti lalaki; ket ti ulo ti Kristo isu ti Dios.” (1 Cor. 11:3) Adda ni Kristo iti sidong ti kinaulo ni Amana. Nagpateg ti kinaulo ken panagpasakup tapno mataginayon ti talna ken urnos iti nagbabaetan dagiti intelihente a parsua. Uray ni Jesus, daydiay naaramat tapno ‘maparsua ti amin a sabsabali pay a bambanag,’ ket makalikaguman nga agpasakup iti kinaulo ti Dios.​—Col. 1:16.

4, 5. Ania ti panangmatmat ni Jesus iti posisionna mainaig ken Jehova?

⁴ Ania ti panangmatmat ni Jesus maipapan iti panagpasakup iti kinaulo ni Jehova ken iti iyaayna ditoy daga? Kuna ti Kasuratan: ‘Nupay adda idi ni Kristo Jesus iti langa ti Dios, saanna a pinanunot ti panangagaw, kayatna a sawen, nga isu makipada koma iti Dios. Saan, no di ket inuksobanna ti bagina ket innalana ti langa ti maysa nga adipen ket nagbalin a kaas-asping ti tattao. Ad-adda pay ngem dayta, idi nasarakanna ti bagina iti langa a kas maysa a tao, impakumbabana ti bagina ket nagtulnog agingga iti ipapatay, wen, ipapatay iti kayo a pagtutuokan.’​—Fil. 2:5-8.

⁵ Kanayon a sipapakumbaba a nagpasakup ni Jesus iti pagayatan ni Amana. Kinunana: “Diak kabalinan nga aramiden ti maysa a banag iti bukodko a nakem; . . . ti panangukom nga ipaayko nalinteg, agsipud ta sapulek, saan a ti bukodko a pagayatan, no di ket ti pagayatan daydiay nangibaon kaniak.” (Juan 5:30) “Kankanayon nga aramidek ti bambanag a makaay-ayo [iti Amak],” kinuna ni Jesus. (Juan 8:29) Idi dandanin agpatingga ti biagna ditoy daga, inkararagna ken Amana: “Pinadayagka ditoy daga, yantangay naturposko ti trabaho nga intedmo kaniak nga aramidek.” (Juan 17:4) Nalawag a sidadaan a binigbig ken nagpasakup ni Jesus iti kinaulo ti Dios.

Nagimbagan ti Anak ti Panagpasakupna iti Ama

6. Ania dagiti makaay-ayo a galad nga imparangarang ni Jesus?

⁶ Idi adda ditoy daga ni Jesus, adu nga agkakaimbag a galad ti imparangarangna. Maysa kadagita ket ti impakitana a dakkel a panagayat ken Amana. “Ay-ayatek ti Ama,” kinunana. (Juan 14:31) Impakitana met ti dakkel a panagayatna  kadagiti tattao. (Basaen ti Mateo 22:35-40.) Naasi ken nakonsiderasion ni Jesus, saan a nagubsang wenno naturay. “Umaykayo kaniak, dakayo amin a mabambannogan ken madagdagsenan,” kinunana, “ket pagin-awaenkayto. Ibaklayyo ti sangolko ket agsursurokayo kaniak, ta naalumamay ti kababalinko ken napakumbaba ti pusok, ket makasarakkayto ti gin-awa a maipaay kadagiti kararuayo. Ta ti sangolko nalanay ken ti awitko nalag-an.” (Mat. 11:28-30) Gapu iti makaay-ayo a personalidad ni Jesus ken iti makapabileg a mensahena, nagin-awaan unay dagiti marakarnero a tattao aniaman ti edadda, nangruna dagidiay mairurrurumen.

7, 8. Iti sidong ti Linteg, ania ti maiparit nga aramiden ti babai nga agsagsagaba iti panagbulos iti dara, ngem kasano ti panangtrato kenkuana ni Jesus?

⁷ Usigenyo no kasano a trinato ni Jesus dagiti babbai. Iti intero a historia, adu a lallaki ti naulpit kadagiti babbai. Kasta dagiti lider ti relihion iti nagkauna nga Israel. Ngem ni Jesus rinaemna dagiti babbai. Nagminar dayta iti panangtratona iti maysa a babai nga agsagsagaba iti panagbulos iti dara iti 12 a tawen. “Adu a rigat ti impapaay kenkuana” dagiti mangngagas ken nabusbosnan ti amin a sanikuana tapno laeng umimbag. Ngem iti laksid amin dagita a panagregget, “kimmaro” ti kasasaadna. Iti sidong ti Linteg, isu ket maibilang a narugit. Gapuna, agbalin met a narugit ti asinoman a mangsagid kenkuana.​—Lev. 15:19, 25.

⁸ Idi nadamag daytoy a babai a mangpapaimbag ni Jesus kadagiti masakit, nakilennetlet iti bunggoy a nangaribungbong ken Jesus ta pampanunotenna: “No masagidko uray laeng dagiti makinruar a kawesna umimbagakto.” Sinagidna ti kawes ni Jesus, ket dagus nga immimbag. Ammo ni Jesus a saan a maiparbeng ti inaramid ti babai. Nupay kasta, dina inungtan ti babai no di ket kinaasianna. Maawatanna ti rikna ti babai gapu iti adun a tawen a panagsagaba daytoy iti sakit ken nakitana a kasapulanna unay ti tulong. Gapuna, siaasi a kinuna ni Jesus kenkuana: “Anak, ti pammatim pinaimbagnaka. Mapanka a sitatalna, ket sumalun-atka koma.”​—Mar. 5:25-34.

9. Idi pinadas dagiti adalan a lapdan dagiti ubbing nga umasideg ken Jesus, ania ti inaramidna?

⁹ Uray dagiti ubbing komportableda ken Jesus. Iti naminsan nga inyasideg dagiti tattao ken ni Jesus dagiti ubbing, binabalaw ida dagiti adalanna ta nalabit pampanunotenda a dina kayat ti pasinga kadagiti ubbing. Ngem saan a kasta ti rikna ni Jesus. Ibaga kadatayo ti Kasuratan: “Idi makitana daytoy nagrurod ni Jesus ket kinunana [kadagiti adalan]: ‘Bay-anyo dagiti ubbing nga umay kaniak; dikay padasen a pawilan ida, ta ti pagarian ti Dios kukua dagiti kasta.’” Kalpasanna, “innalana dagiti ubbing kadagiti takiagna ket rinugianna a binendisionan ida, nga impatayna kadakuada dagiti imana.” Wen, saan laeng a maanusan ni Jesus dagiti ubbing no di ket sidudungngo a nakilangen kadakuada.​—Mar. 10:13-16.

10. Kasano a napatanor ni Jesus dagiti galad nga imparangarangna?

¹⁰ Kasano a napatanor ni Jesus dagiti galad nga imparangarangna idi adda ditoy daga? Sakbay a nagbiag kas tao, di mabilang a panawen a pinalpaliiw ken tinuladna ti ulidan ti nailangitan nga Amana. (Basaen ti Proverbio 8:22, 23, 30.) Idiay langit, nakitana ti naayat a panangusar ni Jehova iti kinaulona kadagiti amin a parsuana ket dayta ti tinuladna. Naaramid ngata dayta ni Jesus no isu ket saan a managpasakup? Pagragsakanna ti agpasakup ken Amana, ket naay-ayo ni Jehova a naaddaan iti kasta nga Anak. Idi nagbiag ni Jesus ditoy daga, naan-anay a nayanninawna dagiti agkakaimbag a galad ti nailangitan nga Amana. Anian a pribilehiotayo ti agpasakup ken Kristo, ti dinutokan ti Dios nga Agturay iti nailangitan a Pagarian!

Tuladenyo Dagiti Galad ni Kristo

11. (a) Asino ti rumbeng a pagreggetantayo a tuladen? (b) Apay a nasken a dagiti lallaki iti kongregasion ti nangruna a mangikagumaan a mangtulad ken Jesus?

¹¹ Amin a kameng ti kongregasion Kristiano, nangruna dagiti lallaki, nasken nga itultuloyda a pagreggetan a tuladen dagiti galad ni Kristo. Kas nadakamaten, ibaga ti Biblia: “Ti ulo ti tunggal lalaki isu ti Kristo.” No kasano a ni Kristo tinuladna ti Ulona, ti pudno a Dios, dagiti Kristiano a  lallaki nasken nga ikagumaanda a tuladen ti uloda​—ni Kristo. Kasta ti inaramid ni apostol Pablo idi nagbalin a Kristiano. “Agbalinkayo a tumutulad kaniak,” indagadagna kadagiti pada a Kristiano, “kas met iti panangtuladko ken Kristo.” (1 Cor. 11:1) Ken kinuna ni apostol Pedro: “Naayabankayo iti daytoy a dana, agsipud ta uray ni Kristo nagsagaba a maipaay kadakayo, a nangibati kadakayo iti pagwadan tapno sisisinged a surotenyo dagiti addangna.” (1 Ped. 2:21) Adda sabali pay a rason no apay a rumbeng nga ipangag dagiti lallaki ti balakad a tuladenda ni Kristo. Isuda dagiti agbalin a panglakayen ken ministerial nga adipen. No kasano a pagragsakan ni Jesus ti panangtuladna ken Jehova, dagiti Kristiano a lallaki nasken a pagragsakanda ti panangtuladda ken Kristo ken kadagiti galadna.

12, 13. Kasano ti rumbeng a panangtrato dagiti panglakayen iti arban a naitalek kadakuada?

¹² Dagiti panglakayen iti kongregasion Kristiano ket obligado a mangtulad ken Kristo. Kastoy ti pammagbaga ni Pedro kadagiti lallakay wenno panglakayen: “Ipastoranyo ti arban ti Dios nga adda iti aywanyo, saan a mapilpilit, no di ket situtulok; saan met nga iti panagayat iti nakusit a gunggona, no di ket sigagagar; saan met a kas agturay kadagidiay tawid ti Dios, no di ket agbalinkayo a pagulidanan ti arban.” (1 Ped. 5:1-3) Masapul a saan a diktador, dominante, wenno nagubsang dagiti Kristiano a panglakayen, wenno daydiay la kaykayatda ti masursurot. Kas panangtulad iti ulidan ni Kristo, ikagumaanda ti agbalin a naayat, nakonsiderasion, napakumbaba, ken naasi iti panangtratoda iti arban a naitalek kadakuada.

¹³ Imperpekto dagiti lallaki a mangidadaulo iti kongregasion, ken nasken  a kanayon a sipapanunotda iti dayta a limitasion. (Roma 3:23) Dayta ti makagapu a masapul a sigagagarda nga agsursuro maipapan ken ni Jesus ken mangtulad iti ayatna. Masapul nga utobenda ti pamay-an ti Dios ken ni Kristo mainaig iti panangtratoda kadagiti tattao sa ikagumaanda a tuladen dayta. Idagadag kadatayo ni Pedro: “Dakayo amin bariksanyo ti bagbagiyo iti kinapakumbaba iti panagpampanunot maipaay iti maysa ken maysa, agsipud ta ti Dios busorenna dagiti natangsit, ngem mangted iti di kaikarian a kinamanangngaasi kadagiti napakumbaba.”​—1 Ped. 5:5.

14. Agingga iti ania a nasken a pakitaan dagiti panglakayen iti pammadayaw ti sabsabali?

¹⁴ Iti pannakilangenda iti arban ti Dios, dagiti nadutokan a lallaki iti kongregasion masapul nga iparangarangda dagiti makaay-ayo a galad. Kuna ti Roma 12:10: “Iti nainkabsatan nga ayat maaddaankayo iti kinalailo iti maysa ken maysa. Iti panangipakita ti pammadayaw iti maysa ken maysa mangidaulokayo.” Dagiti panglakayen ken ministerial nga adipen rumbeng a pakitaanda iti pammadayaw ti sabsabali. Kas Kristiano, masapul nga ‘awan ti aniaman nga aramidenda gapu iti rinnupir wenno gapu iti panangipasindayaw iti bagi, no di ket buyogen ti kinapakumbaba iti isip nga ibilangda a ti dadduma ket nangatngato ngem kadakuada.’ (Fil. 2:3) No makilangen dagitoy a mangidadaulo, nasken nga ibilangda ti sabsabali a nangatngato ngem kadakuada. No kasta ti aramiden dagiti nadutokan a lallaki, ipangpangagda ti balakad ni Pablo: “Datayo a napigsa, nupay kasta, rebbeng nga anusantayo dagiti pagkapuyan dagidiay di napigsa, ket ditay ay-aywen ti bagbagitayo. Tunggal maysa kadatayo ay-aywenna koma ti padana a tao iti naimbag a maipaay a pakapabilganna. Ta uray ti Kristo saanna nga inay-ayo ti bagina.”​—Roma 15:1-3.

‘Padayawanyo Dagiti Assawa a Babbai’

15. Kasano ti rumbeng a panangtrato ti lalaki iti asawana?

¹⁵ Usigenyo ti balakad ni Pedro kadagiti assawa a lallaki. Isuratna: “Dakayo nga assawa a lallaki, agtultuloykayo a makipagtaeng [kadagiti assawayo] iti umasping a pamay-an maitunos iti pannakaammo, nga itudinganyo ida iti dayaw a kas iti narasrasi a basehas, ti babai.” (1 Ped. 3:7) Ti panangpadayaw iti maysa kaipapananna ti nauneg a panangraem kenkuana. Gapuna, ikabilanganyo dagiti opinion, kasapulan, ken kayat dayta a tao ken nalabit a pabus-oyanyo no awan met ti napateg nga isyu a masalungasing. Kasta koma ti panangtrato ti lalaki iti asawana.

16. Ania ti pakdaar ti Sao ti Dios kadagiti lallaki mainaig iti panangpadayawda iti assawada?

¹⁶ Idi binalakadan ni Pedro dagiti lallaki a padayawanda dagiti assawada, innayonna daytoy a pakdaar: “Tapno saan a malappedan dagiti kararagyo.” (1 Ped. 3:7) Dayta ti nalawag a mangipakita no kasano kaserioso ken Jehova ti panangtrato ti lalaki iti asawana. Mabalin a saan a maipangag dagiti kararagna no dina pakitaan iti dayaw ti asawana. Ken saan kadi a nalaklaka nga agpasakup ti babbai no sidadayaw a tratuen ni lakayna?

17. Kasano koma kadakkel ti panagayat ti lalaki iti asawana?

¹⁷ No maipapan ti panagayat kadagiti assawa a babbai, idagadag ti Sao ti Dios: “Dagiti lallaki ayatenda dagiti assawada a kas kadagiti bukodda a bagi. . . . Ta awan pay a pulos ti tao a nanggura iti bukodna a lasag; no di ket taraonan ken ipatpategna dayta, a kas met ti panangipateg ti Kristo iti kongregasion . . . Ayaten koma ti tinunggal maysa kadakayo ti asawana a babai a kas ti panagayatna iti bagina.” (Efe. 5:28, 29, 33) Kasano koma kadakkel ti panagayat dagiti lallaki iti assawada?  “Assawa a lallaki,” insurat ni Pablo, “itultuloyyo nga ayaten dagiti assawayo, no kasano a ti Kristo inayatna met ti kongregasion ken inyawatna ti bagina a maipaay iti dayta.” (Efe. 5:25) Wen, sidadaan koma ti lalaki a mangisakripisio uray ti mismo a biagna para iti asawana, kas iti inaramid ni Kristo para iti sabsabali. No ti Kristiano a lalaki ket nadungngo, nakonsiderasion, saan a managimbubukodan, ken naasikaso ken ni baketna, nalaklaka nga agpasakup daytoy iti kinaulo ni lakayna.

18. Ania a tulong ti magun-odan dagiti lallaki tapno maaramidda ti obligasionda kadagiti assawada?

¹⁸ Ti kadi panangpadayaw iti assawa a babbai ket nalabes a kalikagum kadagiti lallaki? Saan, yantangay di pulos agkiddaw ni Jehova iti banag a di kabaelan ti maysa. Malaksid iti dayta, mabalin a kiddawen dagiti agdaydayaw ken Jehova ti tulong ti kabilgan a puersa iti uniberso​—ti nasantuan nga espiritu ti Dios. Kinuna ni Jesus: “No dakayo, nupay nadangkeskayo, ammoyo no kasano ti mangted iti naimbag a sagsagut iti annakyo, anian a nangnangruna pay a ti Ama sadi langit mangtedto iti nasantuan nga espiritu kadagidiay agdawdawat kenkuana!” (Luc. 11:13) Mabalin nga ikararag dagiti lallaki a tulongan ida ni Jehova babaen ti espirituna tapno matratoda a siuumiso ti sabsabali, agraman dagiti assawada.​—Basaen ti Aramid 5:32.

19. Ania ti usigentayo iti sumaganad a maadal nga artikulo?

¹⁹ Wen, masapul a sursuruen dagiti lallaki ti agpasakup ken ni Kristo ken tuladenda ti panangusarna iti kinaulona. Ngem komusta met dagiti babbai, nangruna dagiti naasawaan? Usigen ti sumaganad nga artikulo no kasano ti rumbeng a panangmatmatda iti akemda sigun iti urnos ni Jehova.

Malagipyo Kadi?

• Ania dagiti galad ni Jesus a nasken a tuladentayo?

• Kasano ti rumbeng a panangtrato dagiti panglakayen iti arban?

• Kasano ti rumbeng a panangtrato ti lalaki iti asawana?

[Salsaludsod]

[Dagiti Ladawan iti panid 10]

Tuladenyo ni Jesus babaen ti panangpadayawyo iti sabsabali