Talaga Kadi a Maragragsakanka iti Sao ti Dios?

“IDI rinugiak ti regular a panagbasa iti Biblia, ad-adda a maumaak imbes a maragsakanak,” kinuna ni Lorraine. “Marigatanak a mangtarus iti dayta isu a masansan a mapukaw ti konsentrasionko.”

Admitiren ti dadduma a saanda met a maragsakan idi rinugianda ti agbasa iti Biblia. Ngem intultuloyda latta gapu ta ammoda a dayta ti umiso nga aramiden. Kuna ni Marc: “Naglaka a masinga ti panagbasak iti Biblia ken ti personal a panagadalko. Agkalikagum iti adu a kararag ken panagregget tapno ti inaldaw a panagbasak iti Biblia ket agbalin a rutinak.”

Ania ti mabalinmo nga aramiden tapno maparayraymo ti panangapresiar iti Biblia, ti naisurat a Sao ti Dios? Kasano a matagiragsakmo ti panagbasam? Usigem dagiti sumaganad a singasing.

Dagiti Kalat ken Pamay-an

Agkararag ken ipamaysam ti panunotmo no agbasaka iti Biblia. Agpatulongka ken Jehova tapno maaddaanka iti gagar a mangadal iti Saona. Ipakaasim a luktanna ti isip ken pusom tapno ad-adda a matarusam ti kinasiribna. (Sal. 119:34) No dimo aramiden dayta, nalaka la nga agbalin a mekanikal ti panagadalmo iti Biblia, ken mabalin a maumakanton. Kuna ni Lynn: “No dadduma, napartak unay ti panagbasak isu a malibtawak dagiti makapainteres a kanayonan a punto. Masansan a diak matarusan a naan-anay dagiti kangrunaan a punto. Ngem nakatulong ti panangikararagko iti panagteppel tapno saan nga agalla-alla ti panunotko.”

Ipategmo ti maad-adalmo. Laglagipem a ti pannakatarus ken panangyaplikarmo kadagiti kinapudno iti Biblia kaipapananna ti biagmo. Gapuna, ikagumaam ti mangbirok kadagiti makatulong a punto ken iyaplikarmo dagita. “Kitaek dagiti bambanag a makatulong kaniak a mangilasin kadagiti di umiso a kababalin ken motibok,” kuna ni Chris. “Makapabang-ar a makita a ti Biblia ken ti adu a publikasiontayo ket naglaon iti impormasion a makagunggona kaniak, uray no didak am-ammo dagiti mannurat.”

Mangikeddengka kadagiti kalat a kabaelam a ragpaten. Mangbirok iti baro a banag maipapan kadagiti karakter iti Biblia. Adu ti makapainteres a banag a maammuam maipapan kadakuada no agsukimatka iti Insight on the Scriptures wenno iti Watch Tower Publications Index. Ad-adda a magunggonaanka no maam-ammom dagiti karakter iti Biblia nga addaan met kadagiti galad ken rikrikna a kas kadatayo.

Mangbirok kadagiti baro a pamay-an no kasano nga idepensa ti Kasuratan. (Ara. 17:2, 3) Kasta ti panggep ti panagadal ni Sophia. Kinunana: “Kayatko nga adda masursurok a baro a pamay-an ti pannakirinnason kadagiti tattao iti ministerio ken iti dadduma pay a gundaway tapno mailawlawagko a naimbag dagiti kinapudno a linaon ti Biblia. Nagsayaat a katulongan Ti Pagwanawanan tapno maaramidko dayta.”​—2 Tim. 2:15.

Iladawanmo iti panunotmo dagiti salaysay iti Biblia. “Ti sao ti Dios nabiag,” kuna ti Hebreo 4:12. No basbasaem ti Kasuratan, biagem iti panunotmo ti mensahe ti Dios nga arigna kitkitaem ti makitkita dagiti karakter iti Biblia. Imdengam ti mangmangngegda ken riknaem ti  marikriknada. Inaigmo dagiti kapadasanda kadagiti espesipiko a kasasaadmo iti biag. Tuladem ti pamay-an a panangtamingda kadagiti bambanag. Dayta ti mangpauneg iti pannakatarusmo ken mangtulong kenka tapno dimo malipatan dagiti salaysay iti Biblia.

Mangbusboska iti ad-adu a tiempo kadagiti narigat a teksto ken iti pannakailawlawagda tapno maawatam a naimbag dagita. Umdas koma ti tiempom tunggal agadalka. Kabayatan dayta, mabalin nga adda tumaud a makapainteres a saludsod nga agkalikagum iti kanayonan a panagsukimat. Kitaem ti footnote, dagiti agkakanaig a teksto (cross-references), ken ti kaipapanan dagiti narigat a sasao. No ad-adda a matarusam ken iyaplikarmo ti mabasbasam, ad-adda a pagragsakam ti naisurat a Sao ti Dios. Kas iti salmista, maikunamto met: “Innalak dagiti pammalagipmo [Jehova] kas sanikua agingga iti tiempo a di nakedngan, ta isuda ti pagrag-oan ti pusok.”​—Sal. 119:111.

Dika agap-apura nga agadal. Adda koma umdas a tiempom para iti personal a panagadal ken iti panangisagana iti maadal kadagiti gimong ti kongregasion. “Masansan a tensionadoak unay isu a diak mayulo ti ad-adalek,” kuna ni Raquel. “Gapuna, dakdakkel ti magunggonak no ab-ababa ti tiempo a panagadalko.” Kuna ni Chris: “Makonsiensiaak no agap-apuraak gapu ta bassit laeng ti matandaanak iti naadalko. Masansan a saan a dumanon iti pusok ti ad-adalek.” Gapuna, dika agap-apura nga agadal.

Patanorem ti naun-uneg a panagtarigagay iti Sao ti Dios. Kinuna ni apostol Pedro: “Kas kayanak a maladaga, patanorenyo ti panagtarigagay iti awan lalaokna a gatas a kukua ti sao, tapno babaen iti dayta dumakkelkayo koma nga agturong iti pannakaisalakan.” (1 Ped. 2:2) Saan a kasapulan a patanoren dagiti maladaga ti panagtarigagayda iti gatas. Nainkasigudan dayta. Ngem ibaga ti Kasuratan a masapul a patanorentayo ti panagtarigagaytayo iti sao ti Dios. Mapatanormo dayta no basaem ti uray maysa laeng a panid ti Biblia iti tunggal aldaw. Ti kasla narigat iti damo ket agbalinton a makaparagsak.

Utobem dagiti teksto iti Biblia. Dakkel met ti magunggonam no utobem ti basbasaem. Makatulong dayta tapno mapagkokonektarmo dagiti naespirituan a topiko a nasukimatmon. Arigna agub-ubonka iti binukel ti perlas a  sirib​—maysa a nagpateg a gameng.​—Sal. 19:14; Prov. 3:3.

Saan a Sayang ti Panawenmo

Agkalikagum iti panagregget ti panangtaginayon iti makagunggona a panagadal, ngem nagadu ti masagrapmo a bendision. Umuneg ti naespirituan a pannakaawatmo. (Heb. 5:12-14) Ti magun-odmo a pannakatarus ken sirib manipud iti naipaltiing a Kasuratan ket mangyeg iti kinaragsak, kinaimbag, ken talna. Ti sirib a masarakan iti naipaltiing a Sao ti Dios ket “kayo ti biag” kadagidiay mangsalimetmet ken mangyaplikar iti dayta.​—Prov. 3:13-18.

Maaddaanka iti mannakaawat a puso no adalem a naimbag ti Sao ti Dios. (Prov. 15:14) Makatulong dayta tapno makaipaayka iti naimpusuan a balakad a naan-anay a naibatay iti Biblia. No agdesisionka maibatay iti nabasam iti Biblia ken kadagiti publikasion “ti matalek ken masirib nga adipen,” mariknam ti makapabang-ar ken makapabileg nga epekto ti naipaltiing a Sao ni Jehova. (Mat. 24:45) Ad-adda nga agbalinka a positibo ken naespirituan a tao. Kanayonanna, agballigi ti amin nga aramidem mainaig iti panagserbim iti Dios.​—Sal. 1:2, 3.

Ti naan-anay a panagayatmo iti Dios ti mangtignay kenka a mangiranud iti pammatim. Dakkel met ti magunggonam iti dayta. Ikagkagumaan ni Sophia a lagipen ken usaren ti nagduduma a teksto a mangala iti interes ti bumalay ken mamagbalin nga epektibo ken makapagagar ti ministeriona. “Makaparagsak a makita ti reaksion dagiti tattao iti ibagbaga ti Biblia,” kinunana.

Ngem ti kangrunaan a magunggonam iti panangtagiragsakmo iti Sao ti Dios ket ti nasinged a relasionmo ken Jehova. Makatulong ti panagadal iti Biblia tapno maammuam dagiti pagalagadanna ken maipategmo ti ayat, kinaparabur, ken kinahustisiana. Nakapatpateg ken makagunggona dayta nga aktibidad. Igaedmo nga adalen ti Sao ti Dios tapno saan a sayang ti panawenmo.​—Sal. 19:7-11.

[Kahon/Dagiti Ladawan iti panid 5]

PANAGBASA ITI SAO TI DIOS: DAGITI KALAT KEN PAMAY-AN

▪ Agkararag ken ipamaysam ti panunotmo no agbasaka iti Biblia.

▪ Ipategmo ti maad-adalmo.

▪ Mangikeddengka kadagiti kalat a kabaelam a ragpaten.

▪ Mangbirokka kadagiti baro a pamay-an no kasano nga idepensa ti Kasuratan.

▪ Iladawanmo iti panunotmo dagiti salaysay iti Biblia.

▪ Mangbusboska iti ad-adu a tiempo kadagiti narigat a teksto ken iti pannakailawlawagda tapno maawatam a naimbag dagita.

▪ Dika agap-apura nga agadal.

▪ Patanorem ti naun-uneg a panagtarigagay iti Sao ti Dios.

▪ Utobem dagiti teksto iti Biblia.

[Ladawan iti panid 4]

No agbasbasaka iti salaysay ti Biblia, panunotem nga addaka iti umasping a kasasaad