Panagbasa iti Biblia​—Gubuayan ti Bilegko

Kas insalaysay ni Marceau Leroy

“IDI punganay, ti Dios pinarsuana ti langlangit ken ti daga,” dagita ti umuna a sasao iti libro nga inlimedko a binasbasa iti kuartok. Apay? Masiguradok a saan a maragsakan ni tatangko, a maysa nga ateista, iti iggemko a libro​—ti Biblia.

Diak pay nabasbasa idi ti Biblia. Dagiti umuna a sasao ti Genesis ti namagpanunot kaniak: ‘Daytoyen ti mangilawlawag iti panagtutunos dagiti pisikal a linteg a nabayagen a pagsidsiddaawak!’ Gapu iti gagarko, nagbasaak manipud 8:00 ti rabii agingga iti 4:00 ti parbangon. Dayta ti nangrugian ti ugalik a panagbasa iti Biblia. Palubosandak a mangestoria no kasano a dayta ti gubuayan ti bilegko agingga ita.

“Inaldawton a Basbasaem”

Nayanakak idi 1926 idiay Vermelles, maysa a purok a pagminasan iti karbon iti makin-amianan a France. Bayat ti Gubat Sangalubongan II, nagpateg a produkto ti karbon iti pagilian. Gapu ta maysaak a minero, saan a maikalikagum nga agsoldadoak. Ngem tapno sumayaat ti biagko, nagadalak iti radioelectronics ken electricity. Nasursurok a nagsayaat ti panagtutunos dagiti pisikal a linteg. Idi agtawenak iti 21, inikkannak ti kaklasek iti Biblia. Kinunana: “Makagunggona a basaen daytoy a libro.” Idi nabasakon dayta, nakombinsirak a ti Biblia ket Sao ti Dios, maysa a palgaak kadagiti tattao.

Impagarupko a maragsakan met dagiti kaarrubak nga agbasa iti Biblia isu a nangalaak iti walo a kopia. Ngem nasdaawak ta linais ken binusordak. Kuna dagiti kakabagianmi a mamati iti an-anito: “Apaman a rinugiam a basaen dayta a libro, inaldawton a basbasaem!” Kasta ti inaramidko ket diak pulos pagbabawyan dayta. Nayugalikon ti agbasa iti Biblia.

Gapu ta ammo dagiti kaarrubami nga interesadoak iti Biblia, itedda kaniak dagiti publikasion a naawatda kadagiti Saksi ni Jehova. Dagiti bokleta a kas iti One World, One Government a (naipakita iti French) ilawlawagna no apay nga ibaga ti Biblia a ti Pagarian ti Dios ti kakaisuna a namnama ti sangatauan. (Mat. 6:10) Ad-addan a determinadoak a mangiranud iti daytoy a namnama.

Ti maysa kadagiti damo a naikkak iti Biblia ket ti gayyemko a ni Noël, a kinaubingak. Gapu ta maysa a Katoliko, inyurnosna a makisaritakami iti maysa nga agad-adal iti kinapadi. Medio maamakak, ngem nabasak iti  Salmo 115:4-8 ken Mateo 23:9, 10 a saan nga anamongan ti Dios ti panagusar kadagiti imahen iti panagdayaw ken ti panangawag kadagiti klero iti narelihiosuan a titulo. Dayta ti nangpatured kaniak a mangidepensa iti baro a patpatiek. Kas resultana, inawat ni Noël ti kinapudno ket nagtalinaed a matalek a Saksi agingga ita.

Sinarungkarak met ni manangko. Addaan ni lakayna kadagiti libro maipapan iti espiritismo ken rirriribuken dagiti demonio. Nupay awan kompiansak idi damo, nakombinsirak kadagiti teksto a kas iti Hebreo 1:14 a tulongandak dagiti anghel ni Jehova. Idi inyaplikar ni kayongko dagiti prinsipio ti Biblia ken naan-anay nga inlaksidnan ti okulto, saanen a riniribuk dagiti demonio. Agpadada ken manangko a nagbalin a naregta a Saksi.

Idi 1947, sinarungkarannak ni Arthur Emiot a maysa nga Amerikano a Saksi. Maragragsakanak a nagsaludsod iti paggigimongan dagiti Saksi. Imbagana nga adda grupo idiay Liévin, nga agarup 10 a kilometro ti kaadayona. Manmano pay la idi ti bisikleta isu a sumagmamano a bulan a nagnagnaak a mapan ken agawid a makigimong. Walo a tawen a naiparit ti trabaho dagiti Saksi ni Jehova ditoy France. Adda laeng 2,380 a Saksi iti intero a pagilian a kaaduan kadakuada ket imigrante a taga-Poland. Ngem idi Setiembre 1, 1947, legal a nabigbig manen ti trabahotayo ditoy France. Naluktan manen ti sanga nga opisina iti Villa Guibert, Paris. Gapu ta awan idi ti payunir ditoy, ti Disiembre 1947 a ruar ti Informant (Ti Ministeriotayo iti Pagarian itan) imparegtana ti panagserbi kas general pioneer (regular pioneer itan), a mangbusbos iti 150 nga oras iti kada bulan. (Idi 1949, nagbalin dayta a 100 nga oras.) Gapu ta kombinsidoak iti sasao ni Jesus iti Juan 17:17 a, ‘ti sao ti Dios ket kinapudno,’ nagpabautisarak idi 1948 ken nagpayunirak idi Disiembre 1949.

Nagsubliak Idiay Dunkerque Idi Nawayawayaanak

Apagbiit laeng ti pannakaidestinok idiay Agen, iti makin-abagatan a France. Gapu ta saanakon a minero, naikalikagum nga agsoldadoak. Nagkedkedak isu a naibaludak. Nupay maiparit ti Biblia iti pagbaludan, nakaitugotak iti sumagmamano a panid ti libro a Salmo. Naparegtaak iti panangbasbasak kadagita. Idi nawayawayaanakon, masapul nga agdesisionak: Agsardengak ngatan a payunir tapno agpamilia? Nakatulong manen kaniak dagiti sasao ni Pablo iti Filipos 4:11-13: “Ta iti amin a bambanag addaanak iti bileg gapu iti daydiay mangmangted kaniak iti pannakabalin.” Pinampanunotko dagita ket inkeddengko ti agtultuloy a payunir. Idi 1950, naidestinoak idiay Dunkerque, maysa nga ili a nangaskasabaak idi.

Idi dimtengak sadiay, awan a pulos ti naitugotko. Nakaro ti pannakadadael ti ili gapu iti gubat, ken narigat ti agsapul iti pagdagusan. Sinarungkarak ti pamilia a dati a kinaskasabaak. Maragragsakan ti asawa a babai ket kinunana: “Nawayawayaanka gayamen Mr. Leroy! Kuna ni lakayko nga awan koma ti gubat no kas kenka ti amin a tao.” Adda papaabanganda a balay, isu a pinadagusdak agingga nga agsangpet dagiti turista. Iti dayta met la nga aldaw, inikkannak iti trabaho ni Evans, b a manong ti Arthur Emiot. Maysa a paraipatarus ni Evans iti pier, ken agbirbirok iti parabantay iti barko iti rabii. Inyam-ammonak iti maysa a kapitan ti barko. Idi rimmuarak iti pagbaludan, kaslaak la naipasikig a bigao. Inlawlawag ni Evans ti makagapu isu a kuna ti kapitan a mangalaak latta iti kanek iti refrigerator. Agasem iti maysa la nga aldaw, naaddaanak iti pagdagusan, trabaho, ken taraon! Talaga a napabileg ti panagtalekko iti sasao ni Jesus iti Mateo 6:25-33.

 Idi agsangpeten dagiti turista, masapul nga agbirokkamin iti pagdagusan ken Simon Apolinarski, a kaduak a payunir. Ngem determinadokami nga agtalinaed iti destinomi. Nagdaguskami iti daan a kuadra ti kabalio sa naturogkami iti rabaw dagiti garami. Agmalmalemkami a mangasaba. Adu ti immawat iti kinapudno a pakairamanan ti makinkukua iti kuadra. Di nagbayag, maysa nga artikulo iti lokal a pagiwarnak ti mangpakpakdaar kadagiti taga-Dunkerque nga “agsaksaknapen ti aktibidad dagiti Saksi ni Jehova.” Ngem dakami laeng ken Simon ken ti sumagmamano nga agibumbunannag ti Saksi sadiay! Iti laksid ti narigat a kasasaad, nakatulong ti panangutobmi iti namnamatayo a Kristiano ken iti panangaywan kadakami ni Jehova. Adda agarup 30 nga agibumbunannag iti Dunkerque idi naidestinoak iti sabali a lugar idi 1952.

Napabilegak Para iti Baro a Responsabilidad

Kalpasan ti apagbiit a panagnaedko iti siudad ti Amiens, nadutokanak kas special pioneer idiay Boulogne-Billancourt, a paset ti Paris. Adu ti nayadalak iti Biblia ken dadduma ti nagbalin a payunir ken misionero. Maysa kadakuada ti agtutubo a ni Guy Mabilat nga immawat iti kinapudno ket nagserbi kas manangaywan iti sirkito ken kalpasanna, manangaywan iti distrito. Idi agangay, immatonanna ti pannakaibangon ti pagimprentaan iti agdama a Bethel idiay Louviers a medio adayo iti Paris. Gapu ta masansan nga isarsaritak ti Biblia iti ministerio, ad-adda a naimula iti panunotko ti Sao ti Dios. Dayta ti nangparagsak kaniak ken nangparang-ay iti abilidadko a mangisuro.

Idi 1953, diak ninamnama a madutokanak kas manangaywan iti sirkito iti Alsace-Lorraine, maysa a lugar a namindua a sinakup ti Germany iti nagbaetan ti 1871 ken 1945. Isu a masapul nga agsursuroak iti German. Manmano pay la idi ti lugan, TV, makinilia, ken awan ti radio ken kompiuter. Ngem saanak met a naliday. Kinapudnona, nakaragragsakak kadagidi a tiempo. No suroten ti balakad ti Biblia a taginayonen ti ‘simple a mata,’ basbassit idi ti pakasingaan iti panagserbi ken Jehova ngem ita.​—Mat. 6:19-22.

Diak malipatan ti “Triumphant Kingdom” nga asamblea idiay Paris idi 1955. Naam-ammok sadiay ti asawak a ni Irène Kolanski, nga immun-una a nagpayunir iti makatawen ngem siak. Taga-Poland dagiti nagannakna ken nabayagdan a naregta a Saksi. Sinarungkaran ida ni Adolf Weber idiay France. Isu ket hardinero idi ni Kabsat Russell ken napan idiay Europe tapno ikasabana ti naimbag a damag. Nagkasarkami ken Irène idi 1956, ket  kinaduanak a nagserbi iti sirkito. Nagsayaat ti panangsuportana kaniak iti panaglabas ti tawtawen!

Kalpasan ti dua a tawen, nasorpresaak manen ta nadutokanak kas manangaywan iti distrito. Ngem gapu ta manmano ti kualipikado a lallaki, intultuloyko ti nagbisita iti sumagmamano a kongregasion kas manangaywan iti sirkito. Okupadoak unay idi! Malaksid iti panangasaba iti 100 nga oras iti makabulan, linawas a mangipaayak iti palawag, mangikonduktaak iti tallo a panangyadal iti Biblia, sukimatek dagiti rekord, ken isaganak dagiti report. Kasanok ngarud a maiwayaan ti panagbasa iti Biblia? Maysa laeng ti nakitak a solusion​—nangkartibak kadagiti panid iti daan a Biblia ket itugtugotko dagita. Bayat nga adda ur-urayek, gundawayak ti agbasa. Dagita nga apagbiit a makapagin-awa a panagbasa pinabilegda ti determinasionko a mangitultuloy iti annongek.

Idi 1967, naawiskami ken Irène nga agbalin a kameng ti pamilia ti Bethel idiay Boulogne-Billancourt. Nagserbiak iti Service Department ket nasurok nga 40 a tawenkon iti daytoy a departamento. Ti maysa a magusgustuak ditoy ket ti panangsungbat kadagiti surat nga agsalsaludsod maipapan iti Biblia. Napalalo a ragsakko a mangsukimat iti Sao ti Dios ken ‘mangidepensa iti naimbag a damag’! (Fil. 1:7) Maragragsakanak met a mangidaulo iti panangusig iti teksto iti inaldaw a kadua ti pamilia ti Bethel. Idi 1976, nadutokanak a kameng ti Branch Committee ditoy France.

Ti Kasayaatan a Wagas ti Panagbiag

Adun a rigat ti napasarak ngem ti karigatan ket ita ta lakay ken baketkamin ken ni Irène ken nakapsuten ti bagimi, isu a limitadon ti maaramidanmi. Kaskasdi, ti panagbasa ken panagadalmi a dua iti Sao ti Dios ti mangparparayray iti namnamami. Maragragsakankami nga aglugan iti bus a mapan iti teritoria ti kongregasionmi a mangiranud iti dayta a namnama iti sabsabali. No pagtiponen ti amin-tiempo a panagserbimi, nasuroken a 120 a tawen isu a naimpusuan a mairekomendami daytoy a karera kadagidiay mayat a mangragpat iti kasayaatan, karagsakan, ken makagunggona a biag. ‘Lakayen’ ni Ari David idi insuratna ti sasao iti Salmo 37:25 ngem kas kenkuana, diak pay “nakakita iti asinoman a nalinteg a naan-anay a nabaybay-an.”

Agingga ita, pabpabilgennak ni Jehova babaen ti Saona. Imbaga idi dagiti kakabagiak nasurok nga 60 a tawenen ti napalabas nga agbalinton nga ugalik ti panagbasa iti Biblia. Saanda a nagkamali. Nayugalikon ti inaldaw a panagbasa ket diak pulos pagbabawyan dayta!

[Footnotes]

[Ladawan iti panid 5]

Dakami ken Simon

[Ladawan iti panid 5]

Ti Biblia a kapadpada ti immuna a Bibliak

[Ladawan iti panid 5]

Idi agserserbiak kas manangaywan iti distrito

[Ladawan iti panid 6]

Idi kasarmi

[Ladawan iti panid 6]

Maragragsakankami ken Irène nga agbasa ken agadal iti Sao ti Dios