“Aniaman ti ar-aramidenyo, aramidenyo dayta nga amin-kararua a kas maipaay ken Jehova.”​—COL. 3:23.

1-3. (a) Ti kadi ipapatay ni Jesus iti kayo a pagtutuokan kaipapananna a saanen nga ikalikagum ni Jehova a mangipaaytayo iti aniaman a sakripisio? Ilawlawagyo. (b) Ania a saludsod ti tumaud maipapan kadagiti sakripisiotayo?

IDI umuna a siglo C.E., impalgak ni Jehova iti ilina a nagpatinggan ti Mosaiko a Linteg gapu iti pangsubbot a daton ni Jesus. (Col. 2:13, 14) Saanen a kasapulan ken awanen ti pategna ti panagidaton kadagiti animal nga inar-aramid dagiti Judio iti ginasgasut a tawen. Naitungpalen ti Linteg ti akemna kas ‘manangisuro a mangiturong ken Kristo.’​—Gal. 3:24.

² Di kayat a sawen dayta a saanen nga interesado dagiti Kristiano kadagiti daton. Kinapudnona, kuna ni apostol Pedro a kasapulan ti ‘panangidaton kadagiti naespirituan a sakripisio a makaay-ayo iti Dios baeten ken Jesu-Kristo.’ (1 Ped. 2:5) Ken imbatad ni apostol Pablo a ti intero a panagbiag ti maysa a dedikado a Kristiano ket maibilang a “sakripisio.”​—Roma 12:1.

³ Gapuna, agidatdatontayo ken Jehova no adda banag nga ipaay wenno isakripisiotayo tapno ad-adda a makapagserbitayo kenkuana. Maibatay iti naadaltayo nga impaannurot ni Jehova kadagiti Israelita, kasanotayo a masigurado a makaay-ayo kenkuana dagiti datontayo?

ITI INALDAW A PANAGBIAG

4. Ania ti rumbeng a laglagipentayo maipapan kadagiti inaldaw nga aktibidadtayo?

⁴ Nalabit ditay matarusan no kasano a dagiti inaldaw nga aktibidadtayo ket adda pakainaiganna iti panangipaay kadagiti sakripisio ken Jehova. Kasla awan pakainaiganna kadagiti naespirituan a banag dagiti trabaho iti balay, homework, panggedan, panag-shopping, ken dadduma pay. Ngem no indedikarmon wenno dandanimon idedikar ti biagmo ken  Jehova, nagpateg a laglagipem a dagita nga aktibidad apektaranna ti relasionmo kenkuana. Kristianotayo iti uneg ti 24 nga oras kada aldaw ken masapul nga iyaplikartayo dagiti prinsipio ti Biblia iti amin nga aspeto ti biagtayo. Isu nga imparegta ni Pablo: “Aniaman ti ar-aramidenyo, aramidenyo dayta nga amin-kararua a kas maipaay ken Jehova, ket saan a maipaay iti tattao.”​—Basaen ti Colosas 3:18-24.

5, 6. Ania dagiti rumbeng nga ikabilangantayo mainaig iti panagtigtignay ken panagkawkawestayo iti inaldaw?

⁵ Saan a paset ti sagrado a panagserbitayo dagiti inaldaw nga aktibidadtayo. Ngem ti pammaregta ni Pablo nga aramidentayo ti bambanag nga ‘amin-kararua maipaay ken Jehova’ pagpanunotennatayo no kasano ti rumbeng a panagtignaytayo iti amin a tiempo. Kasanotayo ngarud a mayaplikar dayta? Ti kadi panagtigtignay ken panagkawkawestayo ket kanayon a maitutop iti maysa a Kristiano? Wenno kadagiti inaldaw nga aktibidadtayo, mabaintayo kadi a mangibaga a maysatayo a Saksi ni Jehova gapu iti panagtigtignay wenno panagkawkawestayo? Saan koma a mapasamak dayta! Ditay kayat ti mangaramid iti aniaman a pakaibabainan ti nagan ti Dios.​—Isa. 43:10; 2 Cor. 6:3, 4, 9.

⁶ Pagsasaritaantayo no kasano a ti tarigagaytayo a mangaramid iti bambanag nga ‘amin-kararua maipaay ken Jehova’ apektaranna ti panagpampanunot ken panagtigtignaytayo iti nagduduma a situasion. Kabayatan dayta, laglagipentayo a ti masapul nga idaton idi dagiti Israelita ken ni Jehova ket ti kasayaatan.​—Ex. 23:19.

NO KASANO A MAAPEKTARAN TI BIAGMO

7. Ania ti ramanen ti panagdedikartayo iti Dios?

⁷ Idi indedikarmo ti biagmo ken Jehova, saan kadi nga inkarim nga usarem ti intero a biagmo nga agserbi kenkuana? Arigna imbagam nga iyun-unam ni Jehova iti amin nga aspeto ti biagmo. (Basaen ti Hebreo 10:7.) Nasayaat dayta nga inaramidmo. Awan duadua a napaneknekam a nagsayaat ti resultana no ikagumaam nga ammuen ti pagayatan ni Jehova iti maysa a banag ken agtignayka maitunos iti dayta. (Isa. 48:17, 18) Nasantuan ken naragsak ti ili ti Dios gapu ta iyan-anninawda dagiti galad Daydiay mangisursuro kadakuada.​—Lev. 11:44; 1 Tim. 1:11.

8. Apay a napateg a laglagipentayo nga ibilang ni Jehova a nasantuan dagiti nagkauna a sakripisio?

⁸ Maibilang a nasantuan dagiti sakripisio nga indaton dagiti Israelita ken ni Jehova. (Lev. 6:25; 7:1) Ti Hebreo a termino a naipatarus a “kinasanto” kaipapananna naisina, wenno agpaay laeng iti  Dios. No kayattayo nga awaten ni Jehova dagiti sakripisiotayo, masapul a liklikantayo ti aniaman a narugit a banag ditoy lubong. Ditay mabalin nga ayaten ti aniaman a kagura ni Jehova. (Basaen ti 1 Juan 2:15-17.) Kaipapanan dayta a liklikantayo ti asinoman wenno aniaman a mamagbalin kadatayo a narugit iti imatang ti Dios. (Isa. 2:4; Apoc. 18:4) Kaipapananna met a ditay matmatan wenno pampanunoten dagiti narugit ken imoral a bambanag.​—Col. 3:5, 6.

9. Apay a napateg ti panangtratotayo iti sabsabali?

⁹ Imparegta ni Pablo kadagiti kapammatianna: “Dikay lipatan ti panagaramid iti naimbag ken ti panangiranud iti bambanag iti sabsabali, ta babaen iti kakasta a sakripisio maay-ayo a naan-anay ti Dios.” (Heb. 13:16) Gapuna, ibilang ni Jehova a makaay-ayo a sakripisio kenkuana ti panagbalin a naimbag ken panagaramid iti kinaimbag iti sabsabali. Ti naayat a pannakaseknan iti sabsabali ti pakabigbigan dagiti pudno a Kristiano.​—Juan 13:34, 35; Col. 1:10.

DAGITI SAKRIPISIO ITI PANAGDAYAW

10, 11. Ania ti panangmatmat ni Jehova iti panangasaba ken panagdayawtayo? Ania ti rumbeng nga epekto dayta kadatayo?

¹⁰ Ti maysa kadagiti pamay-an a maipakitatayo ti kinaimbag iti sabsabali ket ti “publiko a panangideklara iti namnamatayo.” Gunggundawayam kadi ti tunggal oportunidad a mangasaba? Tinukoy ni Pablo dayta a napateg nga aktibidad dagiti Kristiano kas “sakripisio ti panagdaydayaw, kayatna a sawen, ti bunga dagiti bibig a mangaramid iti publiko a panangideklara iti [nagan ti Dios].” (Heb. 10:23; 13:15; Os. 14:2) Nasayaat ngarud a panunotentayo no kasano kaadu ti tiempotayo a mangasaba ken no kasanotayo a maparang-ay ti wagas a panangasabatayo. Makatulong iti dayta dagiti paset iti Gimong ti Serbisio. Ngem masapul a laglagipentayo a yantangay ti pormal ken di pormal a panangasabatayo ket maibilang a “sakripisio ti panagdaydayaw,” paset ti panagdayawtayo, masapul nga ipaaytayo ti kasayaatan. Nupay agduduma ti kasasaadtayo, ti kaadu ti tiempotayo a mangasaba masansan nga ipakitana no kasano ti panangipategtayo kadagiti naespirituan a bambanag.

¹¹ Addatayo man iti pagtaengan wenno kongregasion, regular a mangipaaytayo iti tiempo nga agdayaw ken Jehova. Dayta ti ikalikagumna kadatayo. Pudno, ditayon al-alagaden ti linteg ti Sabbath  wenno tabtabunuan dagiti piesta idiay Jerusalem. Ngem adda katupag dagita iti biagtayo kas Kristiano. Nupay adu ti trabahotayo iti inaldaw, namnamaen ti Dios nga iwayaantayo ti agadal iti Biblia, agkararag, ken makigimong. Ken responsabilidad ti ulo ti pamilia nga idaulo ti panagdaydayaw ti pamiliana. (1 Tes. 5:17; Heb. 10:24, 25) Nasayaat ngarud nga isaludsodtayo iti bagitayo, ‘Mapasayaatko pay kadi ti panagdayawko iti Dios?’

12. (a) Ania ti kaaspingna ita ti insienso a maidatdaton iti nagkauna a panagdayaw? (b) Kasano nga arig insienso dagiti kararagtayo?

¹² Inkanta ni Ari David ken ni Jehova: “Ti kararagko maisagana koma kas insienso iti sanguanam.” (Sal. 141:2) Nasayaat a panunotentayo no kasano kasansan ti panagkararagtayo ken no ania ti ikarkararagtayo. Ti libro nga Apocalipsis inyarigna “ti karkararag dagiti sasanto” iti insienso gapu ta dagiti makaay-ayo a kararag agpangatoda ken Jehova a kasla nabanglo ken makaay-ayo a sayamusom. (Apoc. 5:8) Iti nagkauna nga Israel, ti insienso a regular a maidaton iti altar ni Jehova ket masapul a maitutop ken naisagana a naimbag. Awaten laeng dayta ni Jehova no maitunos kadagiti pagannurotanna. (Ex. 30:34-37; Lev. 10:1, 2) Umasping iti dayta, no dagiti naimpusuan a kararagtayo ket maitunos iti bilin ni Jehova, masiguradotayo nga awatenna dagita.

PANANGTED KEN PANANGAWAT

13, 14. (a) Ania ti inaramid ni Epafrodito ken ti kongregasion ti Filipos para ken Pablo? Ania ti panangmatmat ti apostol iti inaramidda? (b) Kasanotayo a matulad ti ulidan ni Epafrodito ken dagiti taga-Filipos?

¹³ Dagiti kontribusiontayo para iti sangalubongan a trabaho ket mayarig iti sakripisio, adu man dayta wenno bassit. (Mar. 12:41-44) Idi umuna a siglo C.E., ti kongregasion ti Filipos imbaonna ni Epafrodito idiay Roma tapno asikasuenna dagiti kasapulan ni Pablo. Awit ni Epafrodito ti kuarta a sagut ti kongregasion ken Pablo. Saan a dayta ti damo nga impakitada ti kinaparaburda ken Pablo. Dida kayat nga agproblema ni Pablo iti kuarta tapno ad-adu ti tiempona a mangasaba. Ania ti panangmatmat ni Pablo iti dayta a sagut? Imbilangna a “nabanglo a sayamusom, maawat a sakripisio, a makaay-ayo unay iti Dios.” (Basaen ti Filipos 4:15-19.) Inapresiar unay ni Pablo, kasta met ni Jehova, ti kinaparabur dagiti taga-Filipos.

¹⁴ Apresiaren met unay ni Jehova dagiti kontribusiontayo ita para iti sangalubongan a trabaho. Inkarina pay a no kanayon nga iyun-unatayo dagiti interes ti Pagarian, ipaayna ti amin a naespirituan ken material a kasapulantayo.​—Mat. 6:33; Luc. 6:38.

IPAKITAM TI APRESASIONMO

15. Ania ti dadduma a bambanag a pagyamantayo ken Jehova?

¹⁵ Adu ti panggapuantayo nga agyaman ken Jehova. Saan kadi a rumbeng laeng nga inaldaw nga agyamantayo iti sagutna a biag? Ipapaayna ti amin a kasapulantayo tapno agbiagtayo kas iti taraon, kawes, ken pagnaedan agraman ti angin nga ang-angsentayo. Ken adda namnamatayo gapu iti pammatitayo a naibatay iti umiso a pannakaammo. Rumbeng laeng a dayawentayo ni Jehova ken mangipaaytayo iti sakripisio ti panagdaydayaw gapu iti kinasiasinona ken iti inaramidna para kadatayo.​—Basaen ti Apocalipsis 4:11.

16. Kasano a maipakitatayo ti panagyamantayo iti pangsubbot a daton ni Kristo?

¹⁶ Kas naadaltayon iti napalabas nga artikulo, ti pangsubbot a daton ni Kristo ket nagpateg a sagut ti Dios iti sangatauan. Dayta ti kasayaatan a panangipakita ti Dios iti ayatna kadatayo. (1 Juan 4:10) Kasanotayo a maipakita ti panagyamantayo iti dayta? Kinuna ni  Pablo: “Ti ayat nga adda iti Kristo pilitennakami, agsipud ta isu daytoy ti impatomi, a ti maysa a tao natay maipaay iti isuamin; . . . ket isu natay maipaay iti isuamin tapno dagidiay nga agbiag saanda koman nga agbiag nga agpaay iti bagbagida, no di ket agpaay kenkuana a natay maipaay kadakuada ken naibangon.” (2 Cor. 5:14, 15) Arigna ibagbaga ni Pablo a no talaga nga ap-apresiarentayo ti di kaikarian a kinamanangngaasi ti Dios, usarentayo ti biagtayo a mangidayaw Kenkuana ken iti Anakna. Maipakitatayo ti ayat ken panagyamantayo iti Dios ken ni Kristo babaen ti panagtulnogtayo ken ti tarigagaytayo a mangasaba ken agaramid kadagiti adalan.​—1 Tim. 2:3, 4; 1 Juan 5:3.

17, 18. Kasano a pinasayaat ti dadduma ti panagserbida ken Jehova? Mangted iti pagarigan.

¹⁷ Mapasayaatmo pay kadi ti panagserbim iti Dios? Kalpasan a nautob ti adu dagiti naimbag nga inaramid ni Jehova maipaay kadakuada, natignayda a nangaramid kadagiti panagbalbaliw tapno ad-adu ti tiempoda a mangasaba ken makiraman iti dadduma pay a nateokratikuan nga aktibidad. Adda dagiti nag-auxiliary pioneer iti maysa wenno ad-adu pay a bulan iti kada tawen ken dadduma ti nag-regular pioneer. Adda met dagiti timmulong iti panagibangon kadagiti pasdek a mausar iti panagdayaw ken Jehova. Saan kadi a nagsayaat a pamay-an dagita tapno maipakitatayo ti panagyamantayo? No umiso ti motibotayo nga agyaman, awaten ti Dios dagita a sagrado a panagserbitayo.

¹⁸ Adu a Kristiano ti natignay a mangipakita iti panagyamanda ken Jehova. Maysa kadakuada ni Morena. Nupay dimmakkel a Katoliko, adu ti saludsodna maipapan iti Dios ken iti panggep ti biag. Nagbirok iti sungbat iti Katolisismo ken iti pilosopia dagiti taga-Asia. Ngem nasungbatan laeng dagita idi nakipagadal iti Biblia kadagiti Saksi ni Jehova. Napalalo ti panagyamanna iti nasursurona iti Biblia ta nangyeg dayta kenkuana iti pudno a kinaragsak, isu a kayatna nga usaren ti amin a pigsana nga agserbi ken Jehova. Kalpasan la unay ti bautismona, nagtultuloy a nag-auxiliary pioneer ket idi impalubos ti kasasaadna, nag-regular pioneer. Kalpasan ti 30 a tawen, regular pioneer pay laeng ni Morena.

19. Kasanom a mapasayaat ti panagserbim ken Jehova?

¹⁹ Siempre, adu a matalek nga adipen ni Jehova ti saan a makapagpayunir gapu iti kasasaadda. Aniaman ti maaramidantayo iti panagserbitayo ken Jehova, makaipaay ti tunggal maysa kadatayo kadagiti makaay-ayo a naespirituan a sakripisio. Iti konduktatayo, surotentayo a naimbag dagiti nalinteg a pagalagadan ti Biblia, ken laglagipentayo nga ireprepresentartayo ni Jehova iti amin a tiempo. Iti pammati, naan-anay nga agtalektayo iti pannakatungpal dagiti panggep ti Dios. Iti nasayaat nga aramid, tumulongtayo a mangisaknap iti naimbag a damag. Gapu iti naimpusuan a panagyamantayo iti amin nga inaramid ni Jehova para kadatayo, itultuloytayo ti mangipaay iti amin-kararua a sakripisio ken Jehova.

[Salsaludsod]

[Blurb iti panid 25]

Matignayka kadi a mangpasayaat iti panagserbim ken Jehova gapu iti kinaimbagna?

[Ladawan iti panid 23]

Gunggundawayam kadi ti tunggal oportunidad a mangasaba?