Salsaludsod Dagiti Agbasbasa

Posible kadi nga agresulta iti pannakailaksid ti panangyugali ti maysa a Kristiano nga agbuya iti pornograpia?

▪ Posible. Nagpateg ngarud a liklikantayo ti aniaman a kita ti pornograpia. Ramanenna dagiti libro, magasin, pelikula, video, ken Internet a mangipakita iti pornograpia.

Nasaknap ti pornograpia iti intero a lubong. Gapu iti Internet, nalaklakan a makita dagiti pornograpiko a material isu nga immadun dagiti agbuybuya kadagita. Dadduma nga ubbing wenno nataengan ti di inggagara a nakakita kadagiti pornograpiko a Web site. Ngem dadduma ti nangigagara a nanglukat kadagita gapu ta mabalinda ti sililimed nga agbasa ken agbuya iti pagtaengan wenno opisinada. Apay a masapul a pakaseknan unay daytoy dagiti Kristiano?

Mabasatayo ti kangrunaan a rason iti pakdaar ni Jesus: “Ti tunggal maysa nga agtultuloy a mangmatmat iti maysa a babai tapno gartemanna nakikamalalan kenkuana iti pusona.” (Mat. 5:28) Siempre, ti panagdenna ket maitutop kadagiti agassawa ken agpaay a pakaragsakanda. (Prov. 5:15-19; 1 Cor. 7:2-5) Ngem saan a dayta ti panggep ti pornograpia. Imbes ketdi, itampokna ti maiparit a panagdenna a mangpataud iti imoral a tarigagay nga impakdaar ni Jesus. Nalawag a ti panagbasa  ken panagbuya iti pornograpia ket maikontra iti bilin ti Dios: “Papatayenyo, ngarud, dagiti kameng ti bagiyo nga adda iti rabaw ti daga no maipapan iti pannakiabig, kinarugit, panaggartem iti sekso, makapasakit a tarigagay, ken kinaagum, a dayta ket idolatria.”​—Col. 3:5.

Kasanon no naminsan wenno namindua laeng a nagbasa wenno nagbuya iti pornograpia ti maysa a Kristiano? Mabalin nga umasping dayta iti napeggad a kasasaad idi ni salmista Asaf: “No maipapan kaniak, gistay simiasi dagiti sakak, nganngani naikaglis dagiti addangko.” Kasano a maaddaan ti maysa a Kristiano iti nadalus a konsiensia ken makikappia iti Dios no agbuybuya met iti nakalabus a lalaki wenno babai wenno agseseks a di agassawa? Kas ken Asaf a nangikuna: “Ket nasaplitak iti intero nga agmalem, ket ti pannakailintegko tunggal bigat.”​—Sal. 73:2, 14.

Masapul nga agbalbaliw ti maysa a Kristiano nga agbuybuya iti pornograpia ken bigbigenna a kasapulanna ti naespirituan a tulong. Magun-odan dayta a tulong iti kongregasion: “Uray pay ti maysa a tao makaaramid iti aniaman a di umiso nga addang sakbay a maammuanna dayta, dakayo nga addaan kadagiti naespirituan a kualipikasion padasenyo nga aturen ti kasta a tao iti espiritu ti kinaalumamay, bayat a tunggal maysa kadakayo siputanna ti bagina.” (Gal. 6:1) Maysa wenno dua a panglakayen ti makaipaay iti kasapulanna a tulong a pakairamanan ‘ti kararag ti pammati a mangpaimbag iti addaan sagubanit ket mapakawanto ti basolna.’ (Sant. 5:13-15) Dagiti nagpatulong a makalapsut iti pornograpia nakitada a nagimbaganda ti iyaadani iti Dios, kas ken Asaf.​—Sal. 73:28.

Ngem kinuna ni apostol Pablo a dadduma a nagbasol dida nagbabawyan ti ‘kinarugitda, pannakiabigda, ken ti nalulok a kababalinda.’ * (2 Cor. 12:21) Kuna ni Propesor Marvin R. Vincent a ti Griego a termino a naipatarus a ‘kinarugit’ kaipapananna makarimon. Nakalkaldaang ta dadduma a pornograpia ket saan la a basta labus a ladawan wenno panagseks ti saan nga agassawa. Adda makarimon, naariek a pornograpia a pakairamanan ti homoseksualidad (panagseks ti agpada a lalaki wenno agpada a babai), grupo a panagseks, pornograpia a pakairamanan dagiti ubbing, pannakiseks iti animal, grupo a panangrames, brutal a panangtrato kadagiti babbai, panangigalut wenno sadistiko a panangtrato iti maysa a kaseks. Idi kaaldawan ni Pablo, dadduma nga adda iti “kinasipnget no maipapan iti isip” ti ‘nakapukaw iti isuamin a moral a riknada, ken inyawatda ti bagbagida iti nalulok a kababalin tapno aramidenda ti tunggal kita ti kinarugit buyogen ti kinaagum.’​—Efe. 4:18, 19.

Dinakamat met ni Pablo ti “kinarugit” iti Galacia 5:19. Kuna ti maysa nga eskolar a taga-Britain a tumukoy dayta iti amin a saan a normal a panaggartem. Amin a Kristiano ket umanamong a dagiti nadakamaten a kita ti pornograpia ket naariek, makarimon, ken mangpataud iti saan a normal a tarigagay. Kas konklusion, kinuna ni Pablo iti Galacia 5:19-21 a “dagidiay mangannurot” wenno agar-aramid iti kinarugit “saandanto a tawiden ti pagarian ti Dios.” Ania ti mapasamak iti maysa a Kristiano no nayugalinan ti agbuya iti makarimon, nakababain a pornograpia, nalabit iti nabayagen a tiempo? No saan nga agbabawi ken dina isardeng dayta, masapul a mailaksid tapno masalakniban ken mataginayon ti kinadalus ti kongregasion.​—1 Cor. 5:5, 11.

Makaparagsak ta dadduma nga agbuybuya iti pornograpia ket nagpatulong kadagiti panglakayen ken nangaramidda kadagiti panagbalbaliw. Pinaregta ni Jesus dagiti Kristiano iti nagkauna a Sardis: “Pabilgem ti bambanag a nabatbati a nakasagana a matay, . . . agtultuloyka a sipapanunot no kasano nga inawatmo ken no kasano a nangngegmo, ket itultuloymo a taginayonen dayta, ket agbabawika. Pudno unay malaksid no agriingka, . . . saanmonto a pulos maammuan no iti ania nga oras nga umayak kenka.” (Apoc. 3:2, 3.) Posible nga agbabawi ti maysa ken arigna marabsut iti apuy.​—Jud. 22, 23.

Ngem nasaysayaat nga amang nga umadayotayo iti aniaman a napeggad a kasasaad. Wen, masapul a determinadotayo a mangliklik iti amin a kita ti pornograpia!

[Footnote]

[Blurb iti panid 30]

Masapul nga agbalbaliw ti maysa a Kristiano nga agbuybuya iti pornograpia ken bigbigenna a kasapulanna ti naespirituan a tulong