Agmasirib​—Suroten ti “Nasigo a Panangiwanwan”

Nayarig ti biag iti panaglayag iti taaw. Nupay kasta, masansan a saan nga umdas ti natauan a sirib tapno agballigi ti tao iti daytoy a panagdaliasat. Adun ti arigna narba iti nadawel a dandanum ti biag. (Sal. 107:23, 27) Apay a maitutop dayta a nakayarigan ti biag?

Idi un-unana, nakarigrigat ti agdaliasat iti taaw ken agkasapulan dayta iti kinasigo a masursuro laeng iti eksperiensiado a lumalayag wenno timonero. (Ara. 27:9-11) Kas ipakita ti adu a nagkauna a naipinta a ladawan, napateg ti akem ti timonero ta dakdakkel ti pannakaipintana ngem iti kakaduana. Tapno makapaglayag dagiti marino, masapul nga ammoda ti posision dagiti bituen, turong ti angin, ken dadduma pay a kasapulanda nga impormasion. Iti Biblia, nadeskribir dagiti “nasigo” a lumalayag babaen iti termino a mabalin a kaipapananna ti “masirib.”​—Ezeq. 27:8; footnote iti Rbi8.

Ti panangsango kadagiti problema ita ket kas karigat ti panaglayag idi un-unana a tiempo. Ania ngata ti makatulong kadatayo?

KASANO A MAGUN-ODAN TI “NASIGO A PANANGIWANWAN”?

Bayat a pampanunotem ti pannakayarig ti biag iti panaglayag, usigem daytoy a prinsipio ti Biblia: “Ti masirib a tao umimdengto ken gumun-od iti ad-adu pay a pammilin, ket ti tao nga addaan pannakaawat isu daydiay manggun-od iti nasigo a panangiwanwan.” (Prov. 1:5, 6) Ti Hebreo a sao a naipatarus kas “nasigo a panangiwanwan” ket tumukoy iti kinalaing ti kapitan a mangiturong ken mangiwanwan iti nagkauna a barko.

Nupay narigat, kabaelantayo a gun-oden ti “nasigo a panangiwanwan” ken masursurotayo ti “aglayag” a sibaballigi iti taaw ti biag. Kas ipasimudaag ti Proverbio, kasapulantayo ti “sirib,” “pannakaawat,” ken “pannakatarus.” (Prov. 1:2-6; 2: 1-9) Ken saantay koma a liplipatan ti agpaiwanwan iti Dios, ta uray ti nadangkes ammona nga ‘iturong’ ti bambanag, ngem para iti nakillo a gakatna.​—Prov. 12:5.

Napateg ngarud a naaneptayo nga agadal iti Sao ti Dios tapno maawatantayo ti nagpateg a pannakaammo maipapan ken Jehova ken daydiay kangrunaan a mangyanninaw Kenkuana, ni Jesu-Kristo. (Juan 14:9) Adu a nainsiriban a balakad ti maawattayo kadagiti Nakristianuan a gimong. Makasursurotayo met iti kapadasan ti sabsabali, pakairamanan dagiti nagannaktayo.​—Prov. 23:22.

AGSAKBAY KEN AGPLANO

Nangnangruna a kasapulantayo ti “nasigo a panangiwanwan” no maipasangotayo kadagiti arig nadawel a baybay a pakarigatan. Iti narigat a situasion,  saantay a makapagdesision no agduaduatayo, ket mabalin a pagdaksantayo dayta.​—Sant. 1:5, 6.

Makapainteres ta nausar met ti sasao a “nasigo a panangiwanwan” mainaig iti pannakigubat. Kastoy ti mabasatayo: “Babaen iti nasigo a panangiwanwan [“naannad a panagplano,” Ti Baro a Naimbag a Damag Biblia] itultuloymonto ti gubatmo, ket iti kinaadu dagiti manangbalakad adda pannakaisalakan.”​—Prov. 20:18; 24:6.

Kas iti maysa a nalaing iti estratehia ti gubat, nasayaat no saganaantayo dagiti posible a mamagpeggad iti espiritualidadtayo. (Prov. 22:3) Kas pagarigan, masapul nga agdesisionka no awatem ti maysa a baro a trabaho wenno pannakai-promote. Natural laeng nga ikabilangam ti sueldo, tiempom nga agbiahe, ken dadduma pay. Ngem adda pay dadduma a masapul nga ikabilangam: Awan ngata ti masalungasingko a prinsipio ti Biblia iti daytoy a trabaho? Ania ngata ti epekto ti iskediul ti trabahok iti Nakristianuan nga aktibidadko?​—Luc. 14:28-30.

Maysa a Saksi ni Jehova ni Loretta ket nasayaat ti trabahona iti maysa a kompania. Idi mayakar ti kompaniada, naitukon kenkuana ti nangato a posision. Imbaga dagiti direktor: “Daytoyen ti gundawaymo. Dika agdanag ta adda Kingdom Hall iti asideg ti opisina.” Ngem kayat ni Loretta a pasimplien ti biagna tapno ad-adda pay a makapagserbi iti Namarsua. Ammona a no awatenna dayta a tukon, basbassitton ti tiempona nga agserbi. Isu a nagikkat iti trabahona nupay kuna ti maysa a direktor a saan a kayat ti kompania ti mapukawan iti empleado a kas kenkuana. Agarup 20 a tawen itan a payunir ni Loretta ket kombinsido a nagsayaat ti resulta ti desisionna gapu iti ‘naannad a panagplanona,’ maitunos iti balakad ti Sao ti Dios. Dayta ti nangpasinged iti relasionna ken Jehova ket nakatulong iti sumagmamano nga umawat iti kinapudno ti Biblia.

Awan duadua a kasapulan met ti “nasigo a panangiwanwan” iti uneg ti pamilia. Naunday a tiempo ti kasapulan iti panangpadakkel kadagiti annak, ket ti desision mainaig iti naespirituan ken material a bambanag apektaranna ti masanguanan ti intero a pamilia. (Prov. 22:6) Kas pagarigan, mabalin nga isaludsod dagiti nagannak: ‘Iti sasao ken ulidanmi, isursuromi kadi kadagiti annakmi dagiti naespirituan a galad a makatulong kadakuada a mangaramid iti nainsiriban a desision inton adultodan? Ti kadi wagas ti panagbiagmi isurona ida nga agbalin a kontento, agbiag a simple, ken nakapokus iti Nakristianuan a ministerio?’​—1 Tim. 6:6-10, 18, 19.

Saan a marukod ti pudno a balligi kadagiti nailubongan a kalat, kas iti iyaasenso ken panagbalin a nalatak. Ammo dayta ni Ari Solomon, a napaltiingan a mangisurat: “Naimbagto ti pagbanagan dagidiay agbuteng iti pudno a Dios, agsipud ta nagbutengda kenkuana.” (Ecl. 8:12) Pammaneknek laeng dayta a nainsiriban ti panangsurot iti “nasigo a panangiwanwan” a naibatay ken maitunos iti Sao ti Dios.​—2 Tim. 3:16, 17.

[Ladawan iti panid 30]

Masansan a dakdakkel ti pannakaipinta ti timonero ngem iti kakaduana tapno maipaganetget ti akemna

[Credit Line]

Su concessione del Ministero per i Beni e le Attività Culturali. Maiparit ti aniaman a panangkopia iti daytoy a ladawan.