1. Apay a masapul a naan-anay nga agtalektayo iti Sao ti Dios?

BAYAT a tingtingitingen dagiti panglakayen no kualipikadon ti maysa a mayad-adalan iti Biblia a makiraman iti panangasaba, isaludsodda iti bagida, ‘Ti kadi sasao ken tigtignay daytoy a tao ipakitana a patienna a ti Biblia ket naipaltiing a Sao ti Dios?’ * Para iti asinoman a mayat nga agbalin nga agibumbunannag iti Pagarian—ken iti amin nga ad-adipen ti Dios—masapul a wen ti sungbat. Apay? Ti panagtalektayo iti Sao ti Dios ken ti abilidadtayo a mangusar iti dayta iti ministerio ti makatulong kadatayo a tumulong iti sabsabali a mangammo ken Jehova ken maisalakan.

2. Apay a masapul nga ‘agtultuloytayo iti bambanag a nasursurotayo’?

² Impaganetget ni apostol Pablo ti kinapateg ti Sao ti Dios idi insuratna ken Timoteo: “Agtultuloyka iti bambanag a nasursurom ken nakaguyugoyam a patien.” Ti “bambanag” a tuktukoyen ni Pablo isu dagiti kinapudno iti Biblia a nakaguyugoyan ni Timoteo a mamati iti naimbag a damag. Kasta met laeng ti epektona kadatayo dagita a kinapudno, ket tultulongandatayo nga agtalinaed a ‘masirib maipaay iti pannakaisalakan.’ (2 Tim. 3:14, 15) Nupay masansan nga usarentayo ti simmaruno a kinuna ni Pablo tapno ipakitatayo iti sabsabali a ti Biblia ket nagtaud iti Dios, adda pay masursurotayo kadagita a sasao a masarakan iti 2 Timoteo 3:16. (Basaen.) Usigentayo a naimbag dayta a bersikulo tapno bumileg ti panagtalektayo nga “umiso” ti amin a pannursuro ni Jehova.—Sal. 119:128.

3-5. (a) Ania ti reaksion ti maysa a bunggoy iti palawag ni Pedro bayat ti Pentecostes, ken apay? (b) Apay nga inawat ti adu a taga-Tesalonica ti kinapudno? (c) Ania ti ap-apresiaren dagiti tattao maipapan iti ministeriotayo?

³ Imbaga ni Jesus iti nasion ti Israel: “Ibaonko kadakayo dagiti mammadto ken dagiti masirib a tattao ken dagiti manangisuro iti publiko.” (Mat. 23:34) Tuktukoyen ni Jesus dagiti adalanna, a sinuruanna a mangusar iti Kasuratan iti ministerioda. Idi Pentecostes 33 C.E., ni apostol Pedro a maysa kadagiti “manangisuro iti publiko” ket nagpalawag iti sanguanan ti dakkel a bunggoy idiay Jerusalem nga inadawna ti sumagmamano a teksto iti Hebreo a Kasuratan. Idi nangngeg dagiti tattao ti aplikasion dagitoy a sasao, adu kadakuada ti ‘naduyok ti pusona.’ Nagbabawyanda dagiti basolda. Agarup tallo ribu kadakuada ti nagkiddaw iti pammakawan ti Dios ket nagbalinda a Kristiano.—Ara. 2:37-41.

⁴ Ti sabali pay a manangisuro iti publiko, a ni apostol Pablo, inkasabana ti naimbag a damag iti ruar ti Jerusalem. Kas pagarigan, iti siudad ti Tesalonica idiay Macedonia, nagsao ni Pablo iti sanguanan dagiti tattao nga agdaydayaw iti maysa a sinagoga. Iti tallo a Sabbath, “nakirinnason kadakuada manipud iti Kasuratan, nga inlawlawagna ken pinampaneknekanna babaen kadagiti reperensia a masapul a ti Kristo agsagaba ken bumangon manipud kadagiti natay.” Ania ti nagbanaganna? ‘Nagbalin a manamati ti sumagmamano a Judio ken ti adu a Griego.’—Ara. 17:1-4.

⁵ Adu ti mangap-apresiar kadagiti adipen ti Dios ita gapu iti nasigo a panangusarda iti Biblia. Idiay Switzerland, maysa a kabsat a babai ti nangibasa iti teksto iti maysa a lalaki. Kalpasanna, dinamag ti lalaki, “Ania ti relihionyo?” Insungbat ti kabsattayo: “Saksi ni Jehova-kami.” Kinuna ti bumalay: “Ay wen aya, awan gayamen ti sabali nga umay agbalaybalay a mangibasa iti Biblia no di laeng dagiti Saksi ni Jehova.”

6, 7. (a) Kasano a dagiti mangisursuro iti kongregasion naan-anay a mausarda ti Biblia? (b) Apay a napateg ti epektibo a panangusar iti Kasuratan no mangyadaltayo iti Biblia?

⁶ Kasanotayo a naan-anay a mausar ti Biblia iti panangisurotayo? No adda pribilehiom a mangisuro iti kongregasion, agaramatka kadagiti espesipiko a teksto ti Biblia. Imbes a dakamatem laeng ti punto dagiti napateg a teksto wenno basaem dagita iti nayimprenta a reperensia wenno iti gadyet, luktam ken basaem ti Biblia, sa awisem dagiti agdengdengngeg a kasta met ti aramidenda. Ilawlawagmo met dagiti teksto tapno ad-adda a sumingedda ken Jehova. Imbes nga agusarka kadagiti komplikado nga ilustrasion ken kapadasan tapno laeng agpakatawa, usarem ti tiempo a mangilawlawag a naimbag iti Sao ti Dios.

⁷ Ania ti masapul a laglagipentayo no mangyadaltayo iti Biblia? Saantay a liblibtawan dagiti nadakamat a teksto iti publikasion nga us-usarentayo. Paregtaentayo ti iyad-adalantayo a basaenna dagiti naisitar a teksto ken tulongan a mangtarus kadagita. Kasano? Saan a babaen ti atiddog a panangilawlawag a kasla mangipapaaytayo iti lektiur. Paregtaentayo ketdi a yebkasna ti kapanunotanna. Imbes nga idiktartayo ti rumbeng a patienna wenno aramidenna, mangpataudtayo kadagiti mamagpanunot a saludsod a makatulong iti panangtarusna kadagiti pannursuro ti Biblia. *

8. Ania a panagdangadang ti napasaran ni Pablo?

⁸ Masansan nga ibilangtayo ti “panangtubngar” kas annongen laeng dagiti panglakayen iti kongregasion. Pudno met ketdi a pagrebbengan dagiti manangaywan a ‘tubngaren  dagidiay mangyug-ugali iti panagbasol.’ (1 Tim. 5:20; Tito 1:13) Ngem napateg met a tubngarentay ti mismo a bagitayo. Ni Pablo ket mapagulidanan a Kristiano nga addaan iti nadalus a konsiensia. (2 Tim. 1:3) Ngem kaskasdi nga insuratna: “Makitak iti kamkamengko ti sabali a linteg a makigubgubat iti linteg ti panunotko ken mangiturturong kaniak a kautibo iti linteg ti basol.” No usigentayo ti konteksto dagitoy a sasao, ad-adda a maawatantayo ti panagregget ni Pablo a mangparmek kadagiti pagkapuyanna.—Basaen ti Roma 7:21-25.

9, 10. (a) Aniada a pagkapuyan ti nalabit pinarmek ni Pablo? (b) Ania ti mabalin nga inaramid ni Pablo tapno malabananna dagiti pagkapuyanna?

⁹ Aniada a pagkapuyan ti inkagumaan a parmeken ni Pablo? Nupay saanna nga espesipiko a dinakamat dagita iti suratna ken Timoteo, imbagana a maysa idi a “nakuspag a tao.” (1 Tim. 1:13) Sakbay a nakomberte ni Pablo, kasta unay ti gurana kadagiti Kristiano. Impudnona ti sigud a riknana kadagiti pasurot ni Kristo: “Makaungetak unay idi a maibusor kadakuada.” (Ara. 26:11) Nasursuro ni Pablo ti agteppel, ngem adda latta dagiti gundaway a marigatan a mangkontrol iti rikna ken panagsaona. (Ara. 15:36-39) Ania ti nakatulong kenkuana?

¹⁰ Iti suratna kadagiti Kristiano idiay Corinto, inladawan ni Pablo no kasano a tinubngarna ti bagina. (Basaen ti 1 Corinto 9:26, 27.) Linabananna dagiti pagkapuyanna. Mabalin a nangbirok kadagiti balakad ti Kasuratan, nagpakaasi a tulongan ni Jehova a mangyaplikar kadagita, ken inkagumaanna ti agbalbaliw. * Magunggonaantayo iti ulidanna gapu ta makidangdangadangtayo met kadagiti pagkapuyantayo.

11. Kasanotay nga ‘itultuloy a suboken’ ti bagitayo no an-annurotentayo met laeng ti kinapudno?

¹¹ Ditay koma ipapan a ditayon kasapulan a labanan dagiti pagkapuyantayo. Imbes ketdi, masapul nga “itultuloy[ta]yo a suboken” ti bagitayo tapno masiertotayo nga an-annurotentayo ti kinapudno. (2 Cor. 13:5) No kas pagarigan basbasaentayo ti Colosas 3:5-10, nasayaat nga isaludsodtayo iti bagitayo: ‘Ikagkagumaak kadi a parmeken dagiti pagkapuyak, wenno mangrugrugi a magustuak dagiti ibilang ni Jehova a dakes? No bigla nga agparang ti maysa nga immoral a Web site iti Internet, dagusko kadi nga i-close, wenno dagita ti birbirokek?’ Ti panangyaplikar iti balakad ti Sao ti Dios ti tumulong kadatayo nga ‘agtalinaed a siririing ken sipupuot.’—1 Tes. 5:6-8.

12, 13. (a) Ania koma ti panggeptayo iti “panangpalinteg[tayo] iti bambanag”? (b) No kayattayo nga ‘ilinteg ti bambanag’ iti padatayo a tao, ania a panagsasao ti masapul a liklikantayo?

¹² Ti Griego a termino a naipatarus a “panangpalinteg iti bambanag” kaipapananna ti “pasayaaten, aturen, isubli iti umiso ken nalinteg a kasasaad.” No dadduma, masapul nga ilintegtayo ti bambanag iti asinoman a di umiso ti pannakaawatna iti imbaga wenno inaramidtayo. Kas pagarigan, linais dagiti Judio a papanguluen ti relihion ti naasi a pannakilangen ni Jesus kadagiti “agsingsingir iti buis ken kadagiti managbasol.” Insungbat ni Jesus: “Dagiti tattao a nasalun-at saanda a kasapulan ti mangngagas, no di ket dagiti masaksakit. Inkayo, ngarud, ket adalenyo no ania ti kaipapanan daytoy, ‘Kalikagumak ti asi, ket saan a sakripisio.’” (Mat. 9:11-13) Siaanus nga inlawlawagna iti amin ti kaipapanan ti sasao ti Dios. Gapuna, dagiti nanumo a tattao naam-ammoda ni Jehova kas “Dios a naasi ken managparabur, nabannayat nga agunget ken naruay iti naayat a kinamanangngaasi ken kinapudno.” (Ex. 34:6) Nagbanaganna, adu ti namati iti naimbag a damag gapu iti panagregget ti Anak ti Dios a ‘mangilinteg kadagiti bambanag.’

¹³ Tuladentayo koma ni Jesus no tultulongantayo ti sabsabali. Ngem mabalin a sigugubsang a kunaen ti maysa a makasursuron,  ‘Agsaritata man iti nalapat.’ Saan a kasta ti kayat a sawen ti 2 Timoteo 3:16. Dinatay ikkan ti Kasuratan iti karbengan nga agsao a sigugubsang iti sabsabali. Kas iti ‘sugsugat a gapuanan ti kampilan,’ ti nakaro a panangbabalaw mangyeg laeng iti saem ken awan pagsayaatanna.—Prov. 12:18.

14-16. (a) Kasano a ‘mailinteg dagiti panglakayen ti bambanag’ tapno matulonganda dagidiay addaan iti parikut? (b) Apay a nakapatpateg nga usaren ti Kasuratan iti “panangpalinteg iti bambanag” mainaig iti panangpadakkel kadagiti annak?

¹⁴ Kasano ngarud a maipakitatayo ti anus ken asi no ‘ilintegtayo ti bambanag’? Ipapantayo nga adda agassawa nga agpatpatulong iti maysa a panglakayen gapu iti kanayon a panagsubangda. Ania ti rumbeng nga aramiden ti panglakayen? Awan koma ti dasdasiganna ken usarenna dagiti prinsipio ti Biblia, kas iti nailanad iti kapitulo 3 ti libro a Ti Sekreto ti Kinaragsak iti Pamilia. Bayat a pagsasaritaanda dagita, mabalin a mabigbig dagiti agassawa no ania pay a balakad ti pagreggetanda nga iyaplikar. Kalpasan ti sumagmamano a tiempo, mabalin a komustaen ti panglakayen ti kasasaadda ken mangipaay iti kanayonan a tulong no kasapulan.

 ¹⁵ Dakayo a nagannak, kasanoyo a ‘mailinteg ti bambanag’ mainaig kadagiti annakyo? Kas pagarigan, kayatmo a tulongan ti tin-edyer a balasangmo a mangliklik iti di umiso a kakadua. Umuna, masapul nga ammuem no asino ti pakikadkaduaanna. Kalpasanna, no makitam nga adda masapul a pagtungtonganyo, kasaritam ket mabalin nga usarem dagiti punto iti Dagiti Saludsod nga Iyimtuod ti Agtutubo—Dagiti Sungbat nga Epektibo, Tomo 2. Kadagiti sumaganad nga aldaw, iwayaam ti makikadua kenkuana. Paliiwem met no ania ti pampanunotenna no adda iti ministerio wenno bayat nga aglinglingay ti pamiliayo. No naanus ken naasika, madlaw ti balasangmo ti naayat a pannakaseknam. Mabalin a matignay a mangyaplikar iti balakadmo ket maliklikanna ti agaramid iti di umiso.

¹⁶ No naanus ken naasitayo, maparegtatayo met dagidiay madandanagan iti salun-atda, dagidiay maladladingitan gapu ta naikkatda  iti trabahoda, wenno dagidiay marigatan a mangawat iti maysa a sursuro ti Biblia. Dakkel ti magunggona dagiti adipen ni Jehova no usarenda ti Sao ti Dios iti “panangpalinteg[da] iti bambanag.”

17. Apay a rumbeng a siyayaman nga awatentay ti disiplina?

¹⁷ “Awan disiplina a kasla makaparag-o iti agdama, no di ket makapaladingit.” Ngem “kalpasanna kadagidiay a nasanayen iti dayta mangpataud iti natalna a bunga, awan sabali, ti kinalinteg.” (Heb. 12:11) Umanamong ti adu nga adulto a Kristiano a nakatulong ti disiplina nga impaay dagiti Kristiano a nagannakda. No awatentay ti disiplina manipud ken Jehova babaen kadagiti panglakayen, makapagtalinaedtayo iti dalan ti biag.—Prov. 4:13.

18, 19. (a) Apay a nakapatpateg ti balakad ti Proverbio 18:13 iti “panangdisiplina iti kinalinteg”? (b) Ania ti masansan a resultana no ipakita dagiti panglakayen ti kinaalumamay ken ayat iti panangtamingda kadagiti nakabasol?

¹⁸ Kasano a makaipaay iti nasayaat a disiplina dagiti panglakayen ken dagiti nagannak? Imbaga ni Jehova nga ipaaytayo ti disiplina maitunos “iti kinalinteg.” (2 Tim. 3:16) Napateg ngarud a surotentayo dagiti prinsipio ti Biblia no mangdisiplinatayo. Ti maysa kadagita a prinsipio ket masarakan iti Proverbio 18:13: “No ti asinoman sumungbat iti maysa a banag sakbay a mangngegna, kinamaag dayta iti biangna ken maysa a pannakaipababa.” No ngarud adda nangibaga kadagiti panglakayen a nakaaramid iti nadagsen a basol ti maysa a kabsat, siguraduenda nga ammuen nga umuna ti amin a detalye. (Deut. 13:14) Kalpasanna, mabalindan ti mangdisiplina maitunos “iti kinalinteg.”

¹⁹ Ibaga met ti Sao ti Dios a mangilinteg dagiti panglakayen “buyogen ti kinaalumamay.” (Basaen ti 2 Timoteo 2:24-26.) Pudno a ti nakabasol ket mangyeg iti pannakaumsi iti nagan ni Jehova ken pannakadangran ti dadduma. Ngem saan a matulongan dayta no agung-unget ti panglakayen a mangbalbalakad. Nupay kasta, no tuladen dagiti panglakayen ti ‘kinamanangngaasi ti Dios,’ mabalin a matignayda ti nakabasol nga agbabawi.—Roma 2:4.

20. Ania dagiti prinsipio a masapul nga iyaplikar dagiti nagannak no disiplinaenda dagiti annakda?

²⁰ Masapul nga iyaplikar dagiti nagannak dagiti prinsipio ti Biblia iti panangpadakkelda kadagiti annakda iti “disiplina ken panangiturong-panunot ni Jehova.” (Efe. 6:4) Kas pagarigan, ania ti rumbeng nga aramiden ti maysa nga ama no adda nadamagna a di umiso nga inaramid ti anakna? Ammuenna koma nga umuna dagiti detalye sakbay a mangipaay iti disiplina. Saan a mayanatup iti Kristiano a pamilia ti nakaro a panagpungtot nga agresulta iti kinaranggas. “Ni Jehova nadungngo unay iti panagayat ken naasi,” ket masapul a tuladen dayta dagiti nagannak no disiplinaenda dagiti annakda.—Sant. 5:11.

21, 22. Ania a sasao iti Salmo 119:97-104 ti makailadawan iti panangmatmatmo iti Sao ni Jehova?

²¹ Maysa nga adipen ti Dios ti nangibaga no apay nga ay-ayatenna ti linteg ni Jehova. (Basaen ti Salmo 119:97-104.) Gapu iti panangadalna iti dayta, naaddaan iti sirib, pannakatarus, ken pannakaawat. Naliklikanna ti dakes a dana a nakaisagmakan ti dadduma gapu ta inyaplikarna ti naadalna. Makaay-ayo ken makapnek kenkuana ti panangadal iti Kasuratan. Determinado nga agtulnog kadagiti bilin ti Dios iti intero a panagbiagna.

²² Tagtagipatgem kadi ti “amin a Kasuratan”? Dayta ti mangpabileg iti pammatim a ti Dios tungpalenna ti panggepna. Dagiti linaonna a balakad ti salaknib manipud kadagiti dakes nga epekto ti panangyugali iti panagbasol. Ken no nasayaat ti panangilawlawagmo iti dayta, matulongam ti sabsabali a magna ken agtalinaed iti dalan ti biag. Naan-anay koma nga usarentay ti “amin a Kasuratan” bayat nga agserserbitayo ken Jehova, ti naayat a Dios a gubuayan ti sirib.