1. Apay a sumingedtayo ken Jehova no tuladentayo ni Jesus?

MASANSAN a kayattayo a tuladen dagiti tattao a magusgustuantayo ti personalidad ken tigtignayna. Kadagiti amin a tattao a nagbiag ditoy daga, awanen ti ad-adda pay a rumbeng a tuladentayo no di ni Jesu-Kristo. Apay? Kinuna a mismo ni Jesus: “Ti nakakita kaniak nakitana met ti Ama.” (Juan 14:9) Naan-anay nga impakita ni Jesus ti personalidad ni Amana isu a no maam-ammom ti Anak, kasla naam-ammom metten ti Ama. Gapuna, bayat a tultuladentayo ni Jesus, sumingedtayo ken Jehova, ti katan-okan a Persona iti uniberso. Anian a makagunggona ti panangtulad kadagiti kualidad ken daldalan ti Anakna!

2, 3. (a) Apay a nangipaay ni Jehova iti naisurat a salaysay maipapan iti Anakna, ken ania ti namnamaenna nga aramidentayo? (b) Ania ti usigentayo iti daytoy nga artikulo ken iti sumaruno?

² Ngem kasanotayo a maam-ammo ni Jesus? Agyamantayo ta nangted ni Jehova iti detalyado a salaysay maipapan ken Jesus. Impaay dayta ni Jehova, a masarakan iti Kristiano a Griego a Kasuratan, gapu ta kayatna nga am-ammuen ken tuladentayo ti Anakna. (Basaen ti 1 Pedro 2:21.) Iti Biblia, ti ulidan nga imbati  ni Jesus ket mayarig kadagiti ‘addang,’ wenno tugot. No kasta, ibagbaga ngarud ni Jehova a magnatayo iti likudan ni Jesus ket surotentayo dagiti addangna. Siempre, perpekto ti ulidan nga impakita ni Jesus, ngem saantayo a perpekto. Nupay kasta, saan a namnamaen ni Jehova a matuladtayo a naan-anay dagiti addang ni Jesus. Imbes ketdi, namnamaen ti Ama a tuladentayo ti Anakna iti amin a kabaelantayo nupay imperpektotayo.

³ Usigentayo ita ti sumagmamano a makaay-ayo a kualidad ni Jesus. Pagsasaritaantayo iti daytoy nga artikulo ti kinapakumbaba ken kinadungngona. Iti sumaganad nga artikulo, adalentay met ti kinatured ken kinamannakaawatna. Bayat a maus-usig ti tunggal kualidad, sungbatantayo ti tallo a saludsod: Ania ti kaipapanan dayta? Kasano nga impakita dayta ni Jesus? Kasanotayo a matulad isuna?

4. Ania ti kinapakumbaba?

⁴ Ania ti kinapakumbaba? Iti daytoy napannakkel a lubong, mabalin a panunoten ti dadduma a nakapuyka wenno kurang ti kompiansam no napakumbabaka. Ngem saan nga umiso dayta. Kinapudnona, tapno agbalinka a napakumbaba, masapul a nabileg ken naturedka. Nadepinar ti kinapakumbaba kas “kababalin a kasungani ti kinapannakkel wenno kinatangsit.” Tapno agbalintayo a napakumbaba, masapul nga umiso ti panangmatmattayo iti bagitayo. Kuna ti maysa a diksionario ti Biblia: “Ti kinapakumbaba ket panangbigbig iti kinanumotayo iti imatang ti Dios.” No pudpudno a napakumbabatayo iti imatang ti Dios, saantayo met nga ibilang ti bagbagitayo a natantan-ok ngem iti padatayo a tao. (Roma 12:3; Fil. 2:3) Saan a nalaka a patanoren dayta dagiti imperpekto a tattao. Ngem masursurotayo ti agbalin a napakumbaba no panunotentayo ti takdertayo iti imatang ti Dios ken surotentayo ti addang ti Anakna.

5, 6. (a) Asino ni Miguel nga arkanghel? (b) Kasano nga impakita ni Miguel ti kinapakumbabana?

⁵ Kasano nga impakita ni Jesus ti kinapakumbaba? Datin a nakapakpakumbaba ti Anak ti Dios kas mannakabalin nga espiritu a parsua idiay langit ken kas perpekto a tao ditoy daga. Usigentayo ti sumagmamano a pagarigan.

⁶ Ti kababalinna. Ti mannurat iti Biblia a ni Judas dinakamatna ti maysa a pagarigan ti kinapakumbaba ni Jesus sakbay a nagbalin a tao. (Basaen ti Judas 9.) Kas Miguel nga arkanghel, ‘nakisusik ni Jesus iti Diablo’ ken ‘nakisupiat’ iti daytoy a nadangkes maipapan iti “bagi ni Moises.” Idi natay ni Moises, awan ti makaammo no sadino ti nangipanan ni Jehova iti bangkayna. (Deut. 34:5, 6) Nalabit kayat ti Diablo nga usaren ti bangkay ni Moises a mangitandudo iti palso a panagdayaw. Aniaman ti dakes a panggep ti Diablo, situtured a sinupiat dayta ni Miguel. Kuna ti maysa a reperensia a dagiti Griego a sasao a naipatarus kas “naaddaan ti pannakisusik” ken “nakisupsupiat” ket “nausar met mainaig iti legal a kaso” ken mabalin a kaipapananna a “ni Miguel ‘kinaritna ti kalintegan’ ti Diablo a mangala iti bangkay ni Moises.” Ngem nabigbig ti Panguluen nga Anghel nga awan kalinteganna a mangukom. Isu nga impabiangna dayta iti Kangatuan nga Ukom, ni Jehova. Saan ngarud a limbes ni Miguel iti autoridad a naited kenkuana. Anian a kinapakumbaba!

7. Kasano nga impakita ni Jesus ti kinapakumbaba iti panagsasao ken panagtigtignayna?

⁷ Bayat ti ministerio ni Jesus ditoy daga, nagsao ken nagtignay iti wagas a mangipakita iti pudno a kinapakumbaba. Ti panagsasaona. Saan a pulos nga inturong ni Jesus  ti atension iti bagina. Imbes ketdi, inturongna ti amin a dayaw ken Amana. (Mar. 10:17, 18; Juan 7:16) Dina pulos tinagibassit dagiti adalanna wenno imparikna a nababbabada. Imbes ketdi, pinadayawanna ida, nga inapresiarna dagiti nasayaat a kababalinda ken impakitana nga agtalek kadakuada. (Luc. 22:31, 32; Juan 1:47) Ti tigtignayna. Pinili ni Jesus ti agbiag a simple ken awanan iti adu a material a bambanag. (Mat. 8:20) Situtulok nga inaramidna ti kanunumuan a trabaho. (Juan 13:3-15) Naan-anay nga impakitana ti kinapakumbaba babaen ti panagtulnogna. (Basaen ti Filipos 2:5-8.) Saan a kas kadagiti napannakkel a tattao a dida kayat ti agtulnog, sipapakumbaba a nagtulnog ni Jesus iti amin nga impaaramid kenkuana ni Jehova, uray “agingga iti ipapatay.” Nalawag ngarud a ni Jesus, ti Anak ti tao, ket ‘napakumbaba ti pusona.’—Mat. 11:29.

8, 9. Kasano a maipakitatayo ti kinapakumbaba?

⁸ Kasanotayo a matulad ti kinapakumbaba ni Jesus? Ti kababalintayo. Saantayo a lumbes iti autoridadtayo no napakumbabatayo. No bigbigentayo a saantayo a nadutokan a mangukom, saantayo a dagus a kritikaren ti sabsabali gapu iti biddutda wenno pagduaduaan ti motiboda. (Luc. 6:37; Sant. 4:12) Tulongannatayo ti kinapakumbaba a di agbalin a “nalabes ti kinalintegna,” a ditay tagibassiten dagidiay awanan iti abilidad ken pribilehio a kas iti adda kadatayo. (Ecl. 7:16) Dagiti napakumbaba a panglakayen dida ibilang ti bagida a natantan-ok ngem kadagiti kapammatianda. Imbes ketdi, ‘ibilangda a nangatngato ti dadduma ngem kadakuada’ ken agtignayda a kas nanumnumo.—Fil. 2:3; Luc. 9:48.

⁹ Usigentayo ti kapadasan ni W. J. Thorn, a nagserbi kas maysa a pilgrim, wenno agdaldaliasat a manangaywan, sipud idi 1894. Kalpasan ti adu a tawen a panagserbina iti dayta nga annongen, naawis iti Kingdom Farm iti makin-amianan a paset ti New York ket nagtrabaho iti pagtaraknan ti manok. Kinunana: “No madlawko a nangato ti panagriknak iti bagik, agpasuliak ket kunaek: ‘Sika a nakabasbassit a tapok, ania koma ti pagpannakkelmo?’” (Basaen ti Isaias 40:12-15.) Talaga a nakapakpakumbaba!

10. Kasanotayo a maipakita a napakumbabatayo iti panagsasao ken tigtignaytayo?

¹⁰ Ti panagsasaotayo. No pudno a napakumbaba ti pusotayo, madlaw iti panagsasaotayo ti kinapakumbabatayo. (Luc. 6:45) No makisarsaritatayo iti sabsabali, liklikantayo nga iturong ti saritaan kadagiti nagapuanan ken pribilehiotayo. (Prov. 27:2) Imbes ketdi, kitaentayo ti naimbag a kualidad, abilidad, ken nagapuanan dagiti kakabsattayo ken komendarantayo ida. (Prov. 15:23) Ti tigtignaytayo. Saan nga agsapsapul dagiti napakumbaba a Kristiano iti gundaway nga agbalin a nalatak iti daytoy a sistema. Kaykayatda ti agbiag a simple, nga uray aramidenda ti ibilang ti lubong a nababa a trabaho tapno laeng naan-anay a makapagserbida ken Jehova. (1 Tim. 6:6, 8) Ngem kangrunaan iti amin, maipakitatayo ti kinapakumbaba babaen ti panagtulnogtayo. Masapul a napakumbabatayo tapno masurottayo dagiti instruksion ti organisasion ni Jehova ken ‘makapagtulnogtayo kadagidiay mangidadaulo’ iti lokal a kongregasiontayo.—Heb. 13:17.

11. Ilawlawag ti kaipapanan ti kinadungngo.

¹¹ Ania ti kinadungngo? Ti sao a “nadungngo” kaipapananna ti naalumamay ken naasi a rikna. Ti kinadungngo ket maysa nga aspeto ti ayat ken kaasping ti  pannakipagrikna ken asi. Nadakamat iti Kasuratan ti “nadungngo a panangngaasi,” “nadungngo nga asi,” ken “kinalailo.” (Luc. 1:78; 2 Cor. 1:3; Fil. 1:8) Maipapan iti pannakipagrikna a dakdakamaten ti Biblia, kuna ti maysa a reperensia: “Saan laeng a maiparparegta kadatayo a makipagrikna ken maasiantayo kadagiti agkasapulan. Imbes ketdi, maseknan ken matignaytayo koma a tumulong a mangbalbaliw wenno mangpasayaat iti biag ti sabsabali.” Ti nadungngo a tao ket matignay a mangaramid iti pagimbagan ti sabsabali.

12. Ania ti mangipakita a nadungngo ni Jesus iti sabsabali, ken natignay a mangaramid iti ania?

¹² Kasano nga impakita ni Jesus a nadungngo iti sabsabali? Ti nadungngo a rikna ken tigtignayna. Naasian ni Jesus iti sabsabali. Idi nakitana nga agsangsangit ti gayyemna a ni Maria ken dagiti kakaduana gapu iti ipapatay ti kabsatna a ni Lazaro, “nagarubos dagiti lua ni Jesus.” (Basaen ti Juan 11:32-35.) Kalpasanna, gapu iti napalaus nga asina—kas iti nariknana idi pinagbiagna ti anak ti maysa a balo a babai—natignay a mangpagungar ken Lazaro. (Luc. 7:11-15; Juan 11:38-44) Gapu iti dayta a kinadungngo ni Jesus, naikkan ni Lazaro iti namnama nga agbiag idiay langit. Iti immun-una a gundaway, naasian ni Jesus iti bunggoy a napan kenkuana. Gapu iti asina “rinugianna nga isuro ida iti adu a banag.” (Mar. 6:34) Nabalbaliwan la ketdi ti biag dagidiay nangipangag iti pannursurona! Laglagipentayo a saan laeng a rikna ti kinadungngo ni Jesus; dayta ti nangtignay kenkuana a tumulong iti sabsabali.—Mat. 15:32-38; 20:29-34; Mar. 1:40-42.

13. Kasano a nagsao a sidudungngo ni Jesus iti sabsabali? (Kitaen ti ladawan iti rugi ti artikulo.)

¹³ Ti nadungngo a panagsasaona. Gapu ta nadungngo ti panagpuspuso ni Jesus, nagsao a sidudungngo nangnangruna kadagiti nakakaasi. Inyaplikar ni apostol Mateo ken ni Jesus dagitoy a sasao ni Isaias: “Awanto ti tukkolenna a naparpar a runo; ket no maipapan iti nakudrep a pabilo a lino, saannanto nga iddepen.” (Isa. 42:3; Mat. 12:20) Ti panagsao ni Jesus ket makapabileg kadagidiay arigna naparpar a runo wenno agkurkuridemdem a pabilo. Inkasabana ti mensahe ti namnama a ‘mangpatapat iti nasnaayan a puso.’ (Isa. 61:1) Inawisna a mapan kenkuana dagidiay ‘nabambannog ken madagdagsenan,’ ket impanamnamana a ‘makasarakda iti gin-awa.’ (Mat. 11:28-30) Impasiguradona kadagiti pasurotna a maseknan ti Dios iti tunggal agdaydayaw Kenkuana, agraman dagiti “babassit”—dagidiay ibilbilang ti lubong a saan a napateg.—Mat. 18:12-14; Luc. 12:6, 7.

14. Kasano a maaddaantayo iti nadungngo a rikrikna para iti sabsabali?

¹⁴ Kasano a matuladtayo ti kinadungngo ni Jesus? Ti nadungngo a rikriknatayo. Mabalin a saan a nainkasigudan kadatayo ti agbalin a nadungngo, ngem iparegta ti Biblia nga ikagumaantay koma a patanoren dayta. Ti “kinalailo ti pannakipagrikna” ket paset ti baro a personalidad a manamnama nga ikawes ti amin a Kristiano. (Basaen ti Colosas 3:9, 10, 12.) Kasano a maaddaanka iti nadungngo a rikrikna para iti sabsabali? Luktam ti pusom. (2 Cor. 6:11-13) Agimdengka a naimbag no adda mangyebkas iti rikrikna ken pakaseknanna. (Sant. 1:19) Usarem ti imahinasionmo ket isaludsodmo iti bagim: ‘No siak ti adda iti kasasaadna, ania ngata ti riknak? Ania ti kasapulak?’—1 Ped. 3:8.

15. Ania ti aramidentayo tapno matulongantayo dagidiay kasla naparpar a runo wenno agkurkuridemdem a pabilo?

¹⁵ Ti nadungngo a tigtignaytayo. No nadungngotayo, matignaytayo a mangaramid  iti pagimbagan ti sabsabali, nangnangruna dagidiay kasla naparpar a runo wenno agkurkuridemdem a pabilo. Kasanotayo a matulongan ida? “Makipagsangitkayo kadagiti tattao nga agsangit,” kuna ti Roma 12:15. Kaaduanna, mas kasapulan dagiti maup-upay ti empatia ngem solusion. Kuna ti maysa a sister a liniwliwa dagiti kakabsat idi natay ti balasangna: “Naapresiarko idi immay dagiti gagayyemko tapno makipagsangitda kaniak.” Maipakitatayo met ti nadungngo a panagayat babaen ti panagaramidtayo iti naimbag. Adda kadi am-ammoyo a balo a kasapulan a matarimaan ti balayna? Adda kadi lakay wenno baket a kabsat a kasapulan a maitulod iti gimong, makadua iti ministerio, wenno makuyog iti doktor? Uray ti bassit a panangipakita iti kinaimbag mabalin a dakkel ti epektona iti biag dagiti kapammatiantayo nga agkasapulan. (1 Juan 3:17, 18) Kangrunaanna, maipakitatayo ti nadungngo a pannakaseknan iti sabsabali babaen ti naan-anay a pannakiramantayo iti ministerio. Daytoy ti kasayaatan a pamay-an a mabalintayo a balbaliwan ti biag dagiti napasnek a tattao!

16. Ania ti mabalintayo nga ibaga tapno mapabileg dagidiay malmaldaangan?

¹⁶ Ti nadungngo a panagsasaotayo. Ti nadungngo a panagayattayo iti sabsabali tignayennatayo nga ‘agsao iti makaliwliwa kadagiti malmaldaangan.’ (1 Tes. 5:14) Kasanotayo a makapagsao kadakuada iti makapabileg? Maparegtatayo ida no iyebkastayo a talaga a maseknantayo kadakuada. Naimpusuan a komendarantayo ida tapno matulongantay ida a mangkita kadagiti positibo a kualidad ken abilidadda. Mabalin nga ipalagiptayo kadakuada nga inyasideg ida ni Jehova iti Anakna, isu a sigurado a napategda iti imatangna. (Juan 6:44) Ipatalgedtayo kadakuada a maseknan unay ni Jehova kadagiti adipenna a “nadunor ti pusoda” wenno “naidagel iti espiritu.” (Sal. 34:18) Sumayaat ti rikna dagidiay agkasapulan iti liwliwa no nadungngo ti pannakisaotayo kadakuada.—Prov. 16:24.

17, 18. (a) Ania ti namnamaen ni Jehova a panangtrato dagiti panglakayen kadagiti karnerona? (b) Ania ti usigentayo iti sumaganad nga artikulo?

¹⁷ Dakayo a panglakayen, namnamaen ni Jehova a tratuenyo a sidudungngo ti arbanna. (Ara. 20:28, 29) Laglagipenyo a responsabilidadyo a pakanen, pabilgen, ken bang-aran dagiti karnerona. (Isa. 32:1, 2; 1 Ped. 5:2-4) No kasta, ti maysa a panglakayen a nadungngo ken mannakipagrikna saanna a padasen a kontrolen dagiti karnero, a mangaramid kadagiti paglintegan wenno konsiensiaenna ida a mangaramid iti ad-adu pay a saanda a kabaelan. Imbes ketdi, kayatna nga agbalinda a naragsak, ket agtalek nga agserserbida ken Jehova iti amin a kabaelanda gapu iti ayatda Kenkuana.—Mat. 22:37.

¹⁸ Bayat nga ut-utobentayo ti kinapakumbaba ken kinadungngo ni Jesus, sigurado a matignaytayo nga agtultuloy a mangsurot kadagiti addangna. Iti sumaganad nga artikulo, usigentayo ti dua pay nga aspeto ti makaay-ayo a personalidad ni Jesus—ti kinatured ken ti kinamannakaawatna.