1, 2. (a) Ania ti impalgak ni Jesus maipapan iti maudi nga al-aldaw? (b) Ania dagiti saludsod nga usigentayo?

SIGURADO a nasdaawka no maysaka idi kadagiti nakatugaw iti Bantay dagiti Olibo, a mangtantannawag iti templo ti Jerusalem, idi insawang ni Jesus ti maysa kadagiti makapainteres unay a padtona. Immimdeng a naimbag da Pedro, Andres, Santiago, ken Juan iti impalgak ni Jesus maipapan iti masanguanan. Adu ti imbagana maipapan iti maudi nga al-aldaw daytoy dakes a lubong, inton agturay iti Pagarian ti Dios. Kinunana kadakuada nga iti dayta a makapagagar a tiempo, agbalinto a pannakabagina ditoy daga ti ‘matalek ken masirib nga adipenna’ a mangipaayto iti naespirituan a taraon kadagiti pasurotna iti umiso a tiempo.—Mat. 24:45-47.

² Kalpasanna, iti dayta met la a padto, insalaysay ni Jesus ti pangngarig maipapan iti sangapulo a birhen. (Basaen ti Mateo 25:1-13.) Usigentayo dagitoy a saludsod: (1) Ania ti kangrunaan a punto ti pangngarig? (2) Kasano nga inyaplikar dagiti matalek a napulotan ti balakad iti pangngarig, ken ania dagiti resultana?  (3) Kasanotayo a magunggonaan ita iti pangngarig ni Jesus?

3. Iti napalpalabas, kasano ti panangilawlawag dagiti publikasiontayo iti pangngarig maipapan iti sangapulo a birhen, ken ania ti posible a resulta dayta?

³ Iti umuna nga artikulo, naammuantayo nga iti nabiit pay a tawtawen, in-inut a nagbalbaliw ti pamay-an ti matalek nga adipen a mangilawlawag iti Kasuratan. Ad-adda itan a maipagpaganetget dagiti praktikal a leksion imbes a dagiti simboliko a kaipapanan dagita. Ibagbaga idi dagiti publikasiontayo nga adda simboliko a kaipapanan uray dagiti babassit a detalye iti pangngarig ni Jesus maipapan iti sangapulo a birhen, kas koma kadagiti pagsilawan, lana, pagkargaan, ken dadduma pay. Ngem posible ngata a dayta ti mangyadayo iti atensiontayo iti simple ken napateg a punto ti pangngarig? Nagpateg ti sungbat daytoy a saludsod.

4. Iti pangngarig, kasanotayo nga ammo no siasino (a) ti nobio? (b) dagiti birhen?

⁴ Kitaentay ita ti kangrunaan a punto iti pangngarig ni Jesus. Usigentayo nga umuna dagiti kangrunaan a karakter. Siasino ti nobio iti pangngarig? Nalawag a ni Jesus. Ammotayo a kasta gapu ta adda idi gundaway a tinukoyna ti bagina kas ti nobio. (Luc. 5:34, 35) Dagiti ngay birhen? Iti pangngarig, imbaga ni Jesus a masapul a nakasagana dagiti birhen ken nagangtan dagiti pagsilawanda inton dumteng ti nobio. Paliiwentayo daytoy nga umasping a bilin ni Jesus iti “bassit nga ipastoran” a buklen dagiti napulotan a pasurotna: “Mabariksan koma dagiti lomoyo ken sigagangat dagiti pagsilawanyo, ket dakayo agbalinkayo a kas kadagiti tattao nga agur-uray iti apoda inton agsubli manipud iti kasar.” (Luc. 12:32, 35, 36) Kanayonanna, napaltiingan da apostol Pablo ken apostol Juan a mangyasping kadagiti napulotan a pasurot ni Kristo kadagiti nadalus a birhen. (2 Cor. 11:2; Apoc. 14:4) Nalawag nga iti pangngarig a nairekord iti Mateo 25:1-13, kayat ni Jesus a balakadan ken pakdaaran dagiti napulotan a pasurotna.

5. Kasano nga impalgak ni Jesus ti tiempo a pagaplikaran ti pangngarigna?

⁵ Usigentayo met ita ti tiempo a pagaplikaran ti balakad iti pangngarig ni Jesus. Nangipaay ni Jesus iti nalawag a pamalatpatan iti ngudo ti pangngarigna idi kinunana: “Dimteng ti nobio.” (Mat. 25:10) Kas naibinsabinsa iti Pagwanawanan a Hulio 15, 2013, naminwalo a nadakamat ti maipapan iti ‘iyaay’ wenno ‘idadateng’ ni Jesus iti padtona a nairekord iti Mateo kapitulo 24 ken 25, ket maymaysa a porma ti Griego a sao ti nausar kadagita. Tunggal dakamaten ni Jesus dayta, tuktukoyenna ti tiempo kabayatan ti dakkel a rigat inton umay tapno ukomen ken dadaelenna daytoy dakes a lubong. Nalawag ngarud a daytoy a pangngarig ni Jesus ket agaplikar bayat ti maudi nga al-aldaw, ngem ti iyaayna ket bayat ti dakkel a rigat.

6. Ania ti kangrunaan a punto ti pangngarig?

⁶ Ania ti kangrunaan a punto ti pangngarig? Lagipentayo ti konteksto. Kaisalsalaysay laeng ni Jesus ti maipapan iti ‘matalek ken masirib nga adipenna.’ Dayta nga adipen ket buklen ti bassit a grupo dagiti napulotan a lallaki a mangidaulonto kadagiti pasurot ni Kristo bayat ti maudi nga al-aldaw. Impakdaar ni Jesus a masapul nga agtalinaedda a matalek. Kalpasanna, binalakadanna ti amin a napulotan a pasurotna iti maudi nga al-aldaw nga ‘agtultuloyda nga agbantay’ tapno dida mapukaw ti nagpateg a gunggonada. (Mat. 25:13) Usigentay ita ti pangngarig ken kitaentayo no kasano nga inyaplikar dagiti napulotan dayta a balakad.

7, 8. (a) Ania a dua a kualidad ti nakatulong kadagiti masirib a birhen? (b) Kasano nga ipakpakita dagiti napulotan a sisasaganada?

⁷ Impaganetget ni Jesus iti pangngarig a saan a kas kadagiti maag a birhen, sisasagana dagiti masirib a birhen iti idadateng ti nobio. Apay? Gapu iti dua a kualidad: kinamanagsagana ken kinaridam. Naibilin kadagiti birhen nga urayenda ti idadateng ti nobio. Gapuna, masapul nga iti intero nga agpatnag, alertoda ken nagangtan dagiti pagsilawanda agingga iti makapagagar nga okasion. Saan a kas kadagiti maag, nakasagana dagiti lima a masirib a birhen ta nangitugotda iti kanayonan a lana para iti pagsilawanda. Ipakpakita met kadi dagiti matalek a napulotan a nakasaganada?

⁸ Wen! Kabayatan ti maudi nga al-aldaw, agtigtignay dagiti napulotan a Kristiano a kas kadagiti masirib a birhen, ta sisasaganada a mangitungpal a simamatalek iti annongenda agingga iti panungpalan. Bigbigenda a tapno maaramidda dayta, rumbeng nga idianda dagiti material a pagnam-ayan nga ituktukon ti lubong ni Satanas. Determinadoda a mangipamaysa iti panagserbida ken Jehova, saan a gapu ta pampanunotenda nga asidegen ti panungpalan, no di ket gapu iti ayat ken kinasungdoda kenkuana ken iti Anakna. Salsalimetmetanda ti kinatarnawda, a saanda nga agpaimpluensia iti materialistiko, immoral, ken managimbubukodan a kababalin daytoy nadangkes a lubong. Kanayonda ngarud a sisasagana, nga agsilsilnagda kas silsilaw babaen ti siaanus a panagur-urayda iti idadateng ti Nobio nupay no kasla agtaktak.—Fil. 2:15.

9. (a) Kasano a namakdaar ni Jesus maipapan iti tendensia nga agdungsa? (b) Kasano nga impangag dagiti napulotan ti pukkaw nga: “Adtoyen ti nobio”? (Kitaen met ti footnote.)

⁹ Ti maikadua a kualidad a nakatulong kadagiti masirib a birhen ket ti kinaridamda. Posible kadi nga agdungsa ti maysa a napulotan a Kristiano bayat ti agpatnag a panagbantayna? Wen. Paliiwentayo ta kinuna ni Jesus a ti sangapulo a birhen “nagdungsada amin ket nakaturogda” bayat ti kasla panagtaktak ti nobio. Ammo ni Jesus nga uray no sidadaan ken sigagagar ti maysa a tao, mabalin nga agdungsa gapu iti kinakapuy ti lasag. Inyaplikar dagiti matalek a napulotan dayta a pakdaar ken ikagkagumaanda ti agtalinaed a naridam wenno managbantay. Iti pangngarig, impangag ti amin a birhen ti pukkaw nga: “Adtoyen ti nobio!” Ngem dagiti laeng masirib a birhen ti nagtultuloy a nagbantay. (Mat. 25:5, 6; 26:41) Dagiti ngay matalek a napulotan ita? Bayat ti maudi nga al-aldaw, impangagda dagiti nabatad a pagilasinan nga arigna a mangipukpukkaw: “Adtoyen ti nobio”—um-umayen. Agtultuloyda met nga agbambantay, a kanayon a sisasaganada iti idadateng ti Nobio. * Nupay kasta, ti tampok ti pangngarig ket adda mas espesipiko a tiempo a pagaplikaranna. Ania dayta?

10. Ania a mamagpanunot a saludsod ti patauden ti panagsinnarita dagiti masirib ken dagiti maag a birhen?

¹⁰ Adda maysa a punto iti ngudo ti pangngarig a nalabit narigat a maawatan. Nagkiddaw dagiti maag a birhen iti lana kadagiti masirib a birhen, ngem nagkedkedda a mangted. (Basaen ti Mateo 25:8, 9.) Mangpataud dayta iti saludsod: “Kaano  a nagkedked a timmulong dagiti matalek a napulotan kadagidiay nagkiddaw iti tulong?” Masungbatan dayta no usigentayo manen ti tiempo a pagaplikaran ti pangngarig. Lagipentayo ti limmawag a pannakaawattayo a ti iyaay ni Jesus, ti Nobio, tapno mangukom ket mapasamak sakbay ti ngudo ti dakkel a rigat. Ngarud, posible ngata a daytoy a paset ti pangngarig ket mapasamak sakbay la unay dayta a panangukom? Agparang a kasta, ta iti dayta a tiempo naawatton dagiti napulotan ti maudi a pannakaselioda.

11. (a) Anianto ti mapasamak sakbay la unay a mangrugi ti dakkel a rigat? (b) Ania ti kayat a sawen dagiti masirib a birhen idi imbagada kadagiti maag a mapanda kadagiti aglaklako iti lana?

¹¹ No kasta, sakbay ngarud a mangrugi ti dakkel a rigat, naawatton ti amin a matalek a napulotan ditoy daga ti maudi a pannakaselioda. (Apoc. 7:1-4) Manipud iti dayta a gundaway, siguradon ti nailangitan a namnamada. Ngem panunotem ti tawtawen sakbay a mangrugi ti dakkel a rigat. Ania ti mapasamak kadagiti napulotan a saan a nagtalinaed a managbantay ken matalek? Mapukawda ti nailangitan a gunggonada. Nalawag a didanto maawat ti maudi a pannakaselio sakbay a mangrugi ti dakkel a rigat. Iti dayta a tiempo, dadduma a matalek a Kristiano ti agbalinto a napulotan. Inton mangrugi ti dakkel a rigat, mabalin a maklaatto dagidiay maag iti pannakadadael ti Babilonia a Dakkel. Mabalin nga iti dayta la a tiempo a maamirisda a saanda a nakasagana iti idadateng ti Nobio. No iti dayta a naladawen a kanito ket agdawatda iti tulong, anianto ti mapasamak? Nakalkaldaang ti sungbat iti pangngarig. Dagiti masirib a birhen didanto ited ti lanada kadagiti maag no di ket ibagada kadakuada a mapanda kadagiti aglaklako iti lana. Ngem laglagipentayo a “tengnga ti rabii” dayta. Adda pay ngata aglako iti lana iti kasta nga oras? Awanen. Naladawen ti amin.

12. (a) Bayat ti dakkel a rigat, anianto ti nakalkaldaang a kasasaad dagiti napulotan a saan nga agtalinaed a matalek sakbay ti maudi a pannakaselio? (b) Anianto ti pagtungpalan dagidiay agtignay a kas kadagiti maag a birhen?

¹² Kasta met laeng ti mapasamak bayat ti dakkel a rigat. Dagiti matalek a napulotan saandanto a matulongan ti asinoman a nagbalin a di matalek. Awanto ti maawatda a tulong ta naladawen ti amin. Anianto ngarud ti pagtungpalanda? Kastoy ti imbaga ni Jesus a napasamak bayat a mapmapan gumatang dagiti maag a birhen: “Dimteng ti nobio, ket dagiti birhen a sisasagana simrekda a kimmuyog kenkuana iti padaya ti kasar; ket ti ridaw nairikep.” Inton dumteng ni Jesus iti dayagna sakbay ti ngudo ti dakkel a rigat, urnongennanto dagiti matalek a napulotan idiay langit. (Mat. 24:31; 25:10; Juan 14:1-3; 1 Tes. 4:17) Mairikepton ti ruangan kadagidiay saan a nagmatalek, a kas kadagiti maag a birhen. Arigna nga ipukkawdanto: “Apo, apo, ilukatannakami!” Ngem sungbatannanto ida kas iti sungbatna kadagiti arig-kalding a tattao iti dayta nga oras ti panangukom: “Ibagak kadakayo ti pudno, Saankayo nga am-ammo.” Anian a nagkas-ang!—Mat. 7:21-23; 25:11, 12.

13. (a) Apay a ditay koma ipapan nga adu kadagiti napulotan nga adipen ni Kristo ti saanto nga agtultuloy a matalek? (b) Kasanotayo a maibaga a ti pakdaar ni Jesus ket ebkas met ti panagtalekna? (Kitaen ti ladawan iti rugi ti artikulo.)

¹³ Ania ngarud ti konklusiontayo? Ibagbaga kadi ni Jesus nga adunto kadagiti napulotan nga adipenna ti saan nga agtalinaed a matalek ken kasapulan a masuktan? Saan. Laglagipentayo a pakpakdaaran laeng ni Jesus dagiti ‘matalek ken masirib nga adipenna’ a dida agbalin a dakes nga adipen. Dina kayat a sawen a namnamaen  ni Jesus a mapasamak ti kasta. Umasping iti dayta, ti pangngarig maipapan iti sangapulo a birhen ket maysa a nabileg a pakdaar. No kasano a ti lima a birhen ket maag ken ti sabali a lima ket masirib, nakadepende met iti tunggal napulotan no ikeddengna ti agbalin a sisasagana ken naridam wenno agbalin a maag ken saan a matalek. Napaltiingan ni apostol Pablo a mangipaay iti kasta met laeng a pakdaar iti suratna kadagiti napulotan a kakabsatna. (Basaen ti Hebreo 6:4-9; idilig ti Deuteronomio 30:19.) Direkta dayta a pakdaar ni Pablo ngem pinasarunuanna iti naimpusuan nga ebkas iti panagtalek nga adda “nasaysayaat a bambanag” nga agur-uray kadagiti kakabsatna. Umasping iti dayta, ipakita ti pakdaar iti pangngarig a naimpusuan met ti panagtalek ni Jesus kadagiti napulotan. Ammona a kabaelan ti tunggal maysa kadakuada ti agtalinaed a matalek ken masagrapdanto ti nagsayaat a gunggona!

14. Apay a magunggonaan met ti “sabsabali a karnero” iti pangngarig maipapan iti sangapulo a birhen?

¹⁴ Nupay inturong ni Jesus kadagiti napulotan a pasurotna ti pangngarigna maipapan iti sangapulo a birhen, magunggonaan met kadi iti dayta ti “sabsabali a karnero” ni Kristo? (Juan 10:16) Wen! Laglagipentayo a simple laeng ti punto ti pangngarig: “Agtultuloykayo nga agbantay.” Agaplikar laeng kadi daytoy kadagiti napulotan? Kinuna ni Jesus: “Ti kunaek kadakayo kunaek iti isuamin, Agtultuloykayo nga agbantay.” (Mar. 13:37) Idagdagadag ni Jesus iti amin a pasurotna nga agbalinda a nakasagana ken managbantay. Masapul ngarud a tuladen ti amin a Kristiano ti nasayaat nga ulidan dagiti napulotan ken ti panangyun-unada iti ministerio iti biagda. Laglagipentay met a dagiti maag a birhen dimmawatda iti lana kadagiti masirib a birhen. Ti panagdawatda ipalagipna kadatayo nga awan ti asinoman a makapagmatalek ken makapagtultuloy nga agbantay ken agsagana para kadatayo. Tunggal maysa kadatayo ket manungsungbat iti sanguanan ti nalinteg nga Ukom a dinutokan ni Jehova. Masapul a nakasaganatayo ta um-umayen!

15. Apay a magagaran ti amin a Kristiano iti kasar ni Kristo ken ti nobiana?

¹⁵ Magunggonaan met ti amin a Kristiano iti kasar a nadakamat iti pangngarig ni Jesus. Siasino kadatayo ti saan a magagaran iti dayta? Addanton idiay langit dagiti napulotan, ket kalpasan ti gubat ti Armagedon, agbalindanto a nobia ni Kristo. (Apoc. 19:7-9) Magunggonaanto ti amin nga adda ditoy daga iti dayta a kasar ta ipasiguradona a maaddanto ti perpekto a gobierno a mangituray iti amin. Nailangitan man wenno naindagaan ti namnamatayo, determinadotayo koma a mangyaplikar iti napateg a leksion iti pangngarig maipapan iti sangapulo a birhen. Agtalinaedtayo koma a nakasagana ken managbantay tapno masagraptayo ti nagsayaat a masanguanan nga isagsagana ni Jehova para kadatayo!