1. Ania ti imparegta ni apostol Juan a panunoten dagiti Kristiano, ken apay?

RUMBENG laeng nga apresiaren ken ipategtayo dagiti sasao ni apostol Juan a masarakan iti 1 Juan 3:1. Idi dinakamatna dagiti sasao a “kitaenyo no ania a kita ti ayat ti inted kadatayo ti Ama,” parparegtaen ni Juan dagiti Kristiano a panunotenda no kasano kauneg ti panagayat ti Dios kadakuada ken no kasano nga ipakpakitana dayta. No naan-anay a matarusantayo dayta, sigurado nga umuneg ti panagayattayo ken Apo Jehova ken tumibker ti relasiontayo kenkuana.

2. Apay a marigatan ti dadduma a mangtarus nga ay-ayaten ida ti Dios?

² Nupay kasta, saan a matarusan ti dadduma no kasano nga ay-ayaten ti Dios dagiti tattao. Para kadakuada, masapul a pagbutngan ken pagtulnogan ti Dios. Mabalin met a gapu kadagiti ulbod a sursuro a nakairuamanda, ipagarupda a saan a naayat ti Dios, ken saan pay ketdi a mabalin nga ayaten. Adda met dagiti mamati nga ayaten latta ti Dios ida aniaman ti aramidenda. Idi nagadalka iti Biblia, naammuam nga ayat ti kangrunaan a galad ni Jehova ken ayat ti nangtignay kenkuana a mangipaay iti Anakna kas subbot para kadatayo. (Juan 3:16; 1 Juan 4:8) Ngem mabalin a gapu iti pannakapadakkel wenno kapadasam iti biag, marigatanka a mangtarus no kasano nga ay-ayatennaka ti Dios.

3. Ania a kinapudno ti makatulong kadatayo a mangtarus iti panagayat ti Dios kadatayo?

 ³ Kasano nga ipakpakita ni Jehova ti panagayatna kadatayo? Tapno masungbatan dayta a saludsod, masapul a maawatantayo ti relasiontayo iti Dios. Ni Jehova ti Namarsua iti amin a tao. (Basaen ti Salmo 100:3-5.) Dayta ti gapuna nga inawagan ti Biblia ni Adan kas “anak ti Dios,” ken insuro ni Jesus kadagiti pasurotna nga awaganda ti Dios kas “Amami nga adda iti langlangit.” (Luc. 3:38; Mat. 6:9) Kas Manangted-Biag kadatayo, ni Jehova ti Amatayo. Maikunatayo a ti relasiontayo kenkuana ket kas iti relasion ti ama kadagiti annakna. Kayatna a sawen, ay-ayatennatayo ni Jehova a kas iti panagayat ti maysa a nadungngo nga ama kadagiti annakna.

4. (a) Kasano a naiduma ni Jehova kadagiti imperpekto nga amma? (b) Ania ti usigentayo iti daytoy nga artikulo ken iti sumaruno?

⁴ Siempre, imperpekto ti amin nga amma. Nupay ikagkagumaanda, saanda a naan-anay a matulad ti panagayat ni Jehova kas maysa nga ama. Kinapudnona, dadduma ti saan a nasayaat ti pannakapadakkelda a nangibati iti nasaem a pakalaglagipan kadakuada. Nasakit, nakalkaldaang, ken nakas-ang pay ketdi dayta. Ngem saan a kasta nga ama ni Jehova. (Sal. 27:10) No maammuantayo no kasano nga ay-ayaten ken ay-aywanannatayo ni Jehova, sigurado a sumingedtayo kenkuana. (Sant. 4:8) Iti daytoy nga artikulo, usigentayo ti uppat a pamay-an nga ipakpakita ni Jehova nga ay-ayatennatayo. Iti sumaganad nga artikulo, usigentayo met ti uppat a pamay-an a maipakitatayo ti panagayattayo kenkuana.

5. Ania ti imbaga ni apostol Pablo kadagiti taga-Atenas maipapan iti Dios?

⁵ Idi adda ni apostol Pablo idiay Atenas, nakitana nga adu dagiti idolo ken didiosen iti siudad a patien dagiti tattao a nangted iti biag ken kasapulanda. Gapuna, kinuna ni Pablo: “Ti Dios a nangaramid iti lubong ken amin a bambanag nga adda iti dayta . . . mangted iti biag ken anges ken amin a bambanag. . . . Babaen kenkuana addaantayo ti biag ken aggunaytayo ken addatayo.” (Ara. 17:24, 25, 28) Wen, gapu iti ayat, ipapaay ni Jehova ti “amin a bambanag” a kasapulantayo tapno agbiagtayo. Panunotem ti nairaman iti dayta.

6. Kasano a ti daga ipakitana ti napalalo a panagayat ti Dios kadatayo? (Kitaen ti ladawan iti rugi ti artikulo.)

⁶ Alaentayo a pagarigan ti daga. Ni Jehova ti Nangaramid iti dayta, ket “intedna iti annak ti tattao.” (Sal. 115:15, 16) Binilbilionen ti ginastos dagiti sientista iti panagsirarakda iti law-ang tapno agbirok iti planeta a kaasping ti daga. Nupay ginasuten a planeta ti natakuatanda, naupay dagiti sientista ta awan kadagidiay a planeta ti addaan iti balanse a kasasaad ti aglawlaw a kas iti daga, a posible a pagbiagan ti tao. Talaga a naidumduma ti daga kadagiti amin a pinarsua ti Dios. Panunotem laengen, iti di mabilang a planeta iti galaksi a Milky Way, pinarsua ni Jehova ti daga a saan laeng a basta pagtaengan no di ket napintas, komportable, ken natalged a pagnaedan dagiti tattao! (Isa. 45:18) Ipakita dayta ti napalalo a panagayat ni Jehova kadatayo.—Basaen ti Job 38:4, 7; Salmo 8:3-5.

7. Kasano nga ipakita ti panangparsua ti Dios kadatayo a talaga nga ay-ayatennatayo?

⁷ Nupay inikkannatayo ni Jehova iti nagsayaat a pagnaedan, ammona a saan laeng a dagiti material a bambanag ti kasapulantayo tapno naragsak ken mapnektayo. Natalged ti rikna ti ubing no mariknana ti ayat ken panangipateg dagiti nagannakna. Pinarsua ni Jehova ti tao iti ladawanna. Gapuna, addaan ti tao iti abilidad a makarikna ken mangiparikna iti ayat ken pammateg ken Jehova. (Gen. 1:27) Kinuna pay ni Jesus: “Naragsak  dagidiay sipapanunot iti naespirituan a kasapulanda.” (Mat. 5:3) Kas naayat nga Ama, ni Jehova “sibabaknang a mangipaay kadatayo iti amin a bambanag a pagragsakantayo,” iti material ken iti naespirituan.—1 Tim. 6:17; Sal. 145:16.

8. Apay a manamnamatayo nga ay-ayatennatayo ti “Dios ti kinapudno”?

⁸ Ay-ayaten dagiti amma ti annakda ken salaknibanna ida tapno saanda a mayaw-awan wenno maallilaw. Nupay kasta, adu a nagannak ti saan a makaipaay iti umiso a panangiwanwan kadagiti annakda gapu ta inwaksida a mismo dagiti pagalagadan ti Biblia. Masansan nga agbanag dayta iti pannakariribuk ken pannakaupay. (Prov. 14:12) Iti sabali a bangir, ni Jehova ket “Dios ti kinapudno.” (Sal. 31:5) Ay-ayatenna dagiti annakna ken maragsakan a mangisilnag iti lawag ti kinapudno a mangiwanwan kadakuada iti panagbiagda, nangruna iti panagdayaw. (Basaen ti Salmo 43:3.) Ania a kinapudno ti impakaammo ni Jehova, ket kasano nga ipakita dayta nga ay-ayatennatayo?

9, 10. Kasano nga ipakpakita ni Jehova nga ay-ayatennatayo babaen ti panangipakaammona iti kinapudno (a) maipapan kenkuana? (b) maipapan kadatayo?

⁹ Umuna iti amin, ipakpakaammo ni Jehova ti kinapudno maipapan kenkuana. Inyam-ammona ti naganna nga agparang iti Biblia iti ad-adu nga amang ngem iti aniaman a nagan. Iti kastoy a pamay-an, umad-adani ni Jehova kadatayo tapno maam-ammotayo. (Sant. 4:8) Ipakpakaammo met ni Jehova dagiti galadna ken ti kinasiasinona. No kasano nga ipakita ti uniberso ti pannakabalin ken siribna, impalgak met ni Jehova iti Biblia ti kinahustisiana ken nangnangruna ti di aggibus nga ayatna. (Roma 1:20) Isu ket kas iti maysa nga ama a saan laeng a nabileg ken masirib, no di ket saan pay a mangidumduma ken naayat. Gapuna, nalaka para kadagiti annakna ti agbalin a nasinged kenkuana.

¹⁰ Tapno magunggonaantayo, ipakpakaammo met ni Jehova ti kinapudno maipapan kadatayo—ti lugartayo iti pamiliana. Makatulong dayta tapno natalna ken naurnos ti pamiliana iti intero nga uniberso. Naadaltayo iti Biblia a saan a naparsua ti tao tapno isu ti mangikeddeng no ania ti umiso ken di umiso, agbiag a naisina iti Dios, ken saan a nasayaat ti pagbanagan ti tao no sukirenna dayta. (Jer. 10:23) Nakapatpateg dayta para iti pagimbagantayo. Masagraptayo laeng ti talna ken panagkaykaysa no agpaituraytayo iti Dios. Talaga nga ay-ayatennatayo ni Jehova ta impakaammona daytoy a nagpateg a kinapudno!

11. Ania a kari ni Jehova ti mangipakita a maseknan kadatayo ken ay-ayatennatayo?

¹¹ Maseknan unay ti naayat nga ama iti masakbayan dagiti annakna. Kayatna a maaddaanda iti pudpudno ken makapnek a biag. Nakalkaldaang ta adu a tattao ti madanagan iti masanguananda, wenno us-usarenda ti biagda kadagiti bambanag a saan a makaited iti manayon a pagimbagan. (Sal. 90:10) Kas annak ti Dios, mariknatayo a talaga nga ay-ayatennatayo ni Jehova ta inkarina kadatayo ti nakasaysayaat a masakbayan. Dayta ti mangted iti pudpudno a kaipapanan ken panggep ti biagtayo.

12. Kasano nga impakita ni Jehova ti ayat ken pannakaseknanna kada Cain ken ni Baruc idi binalakadanna ida?

¹² ‘Apay nga agpupudotka ken apay a nagliday ti rupam? No agaramidka iti naimbag, awanto aya ti pannakaitan-ok? Maparukmamto kadi [ti basol]?’ (Gen. 4:6, 7) Naintiempuan dayta a balakad a napakuyogan iti makatulong nga instruksion. Pinakdaaran  ngarud ni Jehova ni Cain idi makitana a napeggaden ti pagturonganna. Nakalkaldaang ta saan nga impangag ni Cain dayta a pakdaar isu a nadusa. (Gen. 4:11-13) Idi nabannog ken maup-upay ni Baruc a sekretario ni Jeremias, binalakadan ni Jehova tapno makitana no ania a talaga ti makagapu iti problemana. Saan a kas ken Cain, impangag ni Baruc ti balakad ni Jehova isu a naispal.—Jer. 45:2-5.

13. Apay nga ipalpalubos ni Jehova nga agpasar iti pannubok dagiti matalek nga adipenna?

¹³ Insurat ni Pablo: “Ti ayaten ni Jehova disiplinaenna; iti kinapudnona, saplitenna ti tunggal maysa nga awatenna kas anak.” (Heb. 12:6) Ngem saan laeng a dusa ti kaipapanan ti disiplina. Nagduduma dayta. Iti Biblia, adu dagiti matalek nga adipen ti Dios a nakapasar iti nakaro a pannubok a nagserbi kas disiplina wenno pannakasanayda. Alaentayo a pagarigan da Jose, Moises, ken David. Iti amin a nadakamat a karakter iti Biblia, detalyado a naisalaysay ti pakasaritaan ti biagda. No adalentayo no kasano a tinulongan ida ni Jehova idi napasaranda ti rigat ken no kasano nga inusar ida ni Jehova iti naidumduma a pamay-an, ad-adda a mariknatayo ti pannakaseknan ken panagayat ni Jehova kadagiti adipenna.—Basaen ti Proverbio 3:11, 12.

14. Kasanotayo a marikna nga ay-ayatennatayo ni Jehova uray no disiplinaennatayo?

¹⁴ Makitatayo ti sabali pay nga aspeto ti ayat ni Jehova iti panangdisiplinana. No agbabawi ken ipangag dagiti nakabasol ti disiplina ni Jehova, sibubulos a pakawanenna ida. (Isa. 55:7) Ania ti kaipapanan dayta? Inladawan ni David ti makatukay iti rikna a pammakawan ni Jehova: “Isuna a mangpakpakawan iti isuamin a biddutmo, a  mangpapaimbag kadagiti amin a sakitmo, a mangbawbawi iti biagmo manipud iti mismo nga abut, a mangkorkorona kenka iti naayat a kinamanangngaasi. Kas iti kaadayo ti leleggakan ti init manipud iti lelennekan ti init, kasta ti kaadayona manipud kadatayo ti nangikabilanna kadagiti salungasingtayo.” (Sal. 103:3, 4, 12) Kanayon koma a denggentayo dagiti balakad ni Jehova, uray ti disiplinana, ken dagus nga ipangagtayo, a bigbigentayo nga ebkas dayta ti napalalo nga ayatna kadatayo.—Sal. 30:5.

15. Ania ti mangipakita a nakapatpateg ken Jehova dagiti adipenna?

¹⁵ Sigurado a ti maysa kadagiti ipangpangruna ti naayat nga ama ket ti panangsalaknib ken panangsaluadna iti pamiliana manipud iti peggad. Nangnangruna a kasta ni Jehova, ti nailangitan nga Amatayo. Kinuna ti salmista maipapan ken Jehova: “Saluadanna dagiti kararua dagidiay nasungdona [wenno, matalek]; iti ima dagidiay nadangkes ispalenna ida.” (Sal. 97:10) Kas pagarigan, ti matam ket nakapatpateg kenka! Kasta met ti panagrikna ni Jehova iti ilina. (Basaen ti Zacarias 2:8.) Talaga nga ipatpateg ti Dios dagiti adipenna!

16, 17. Kasano a salsalakniban ken salsaluadan ni Jehova ti ilina, uray ita?

¹⁶ Ti maysa a pamay-an a salsalakniban ni Jehova ti ilina ket babaen kadagiti anghelna. (Sal. 91:11) Insalakan ti maysa nga anghel ti Jerusalem manipud iti panangraut dagiti Asirio. Pinapatayna dagiti 185,000 a soldado iti maysa laeng a rabii. (2 Ar. 19:35) Inruar met ti anghel manipud iti pagbaludan da apostol Pedro, Pablo, ken ti dadduma pay. (Ara. 5:18-20; 12:6-11) Iti kaaldawantayo, saan met nga ababa ti ima ni Jehova. Maysa a pannakabagi ti hedkuarter a bimmisita iti maysa a sanga nga opisina idiay Africa ti nangibaga a gapu iti riribuk iti politika ken iti relihion, nadadael dayta a pagilian. Nagresulta iti nakaro a riribuk ti panaglalaban, panagtakaw, panangrames, ken panagpipinnatay. Ngem awan ti natay kadagiti kakabsattayo nupay adu kadakuada ti napukawan iti amin a sanikua ken pagsapulanda. Idi napagsaludsodanda no komustadan, nakaisemda amin a nangibaga: “Napiakami amin gapu iti tulong ni Jehova.” Nariknada ti ayat ti Dios kadakuada.

¹⁷ Adda dagiti gundaway nga ipalubos ni Jehova a mapapatay ti maysa a matalek nga adipenna, a kas iti napasamak ken Esteban. Ngem salsalakniban ti Dios ti intero nga ilina babaen ti panangipaayna kadagiti pakdaar iti umiso a tiempo tapno maliklikanda dagiti pangallilaw ni Satanas. (Efe. 6:10-12) Babaen iti Saona ken kadagiti naibatay iti Biblia a publikasion manipud iti organisasionna, matultulongantayo a mangammo iti kinapudno maipapan iti makaallilaw a kinabaknang, immoral ken naranggas a paglinglingayan, di umiso a panagusar iti Internet, ken dadduma pay. Nalawag, kas naayat nga Ama, salsalakniban ken ay-aywanan ni Jehova dagiti adipenna.

18. Ania ti maikunam iti panagayat ni Jehova kenka?

¹⁸ Naadaltayo ti dadduma a pamay-an nga ipakpakita ni Jehova ti ayatna kadatayo. Gapuna, mariknatayo ti kas iti narikna ni Moises. Bayat nga ut-utobenna dagiti tawen a panagserbina ken Jehova, kinunana: “Iti bigat pennekennakami iti naayat a kinamanangngaasim, tapno makapagdir-ikami a siraragsak ken makapagrag-okami bayat dagiti amin nga aldawmi.” (Sal. 90:14) Ti maysa kadagiti kasayaatan a pribilehio ken bendision a magun-odtayo ita ket ti pannakatarus ken pannakariknatayo iti ayat ni Jehova. Gapuna, maibagatayo met ti kinuna ni apostol Juan: “Kitaenyo no ania a kita ti ayat ti inted kadatayo ti Ama!”—1 Juan 3:1.